រាជបណ្ឌិត្យសភាកម្ពុជា

«ស្ពានមិត្តភាពកម្ពុជា-ជប៉ុន (ជ្រោយចង្វារ) គ្រោងបើកដំណើរការនៅមុនបុណ្យចូលឆ្នាំខ្មែរ» ដោយ៖ ផាញ់ សារឿន

គិតត្រឹមថ្ងៃទី៦ ខែមីនា ឆ្នាំ២០១៩នេះ ការងារស្តារ និងជួសជុលស្ពាននេះឡើងវិញសម្រេចបាន៩៧% ហើយ និងគ្រោងបើកឱ្យដំណើរការនៅមុនបុណ្យចូលឆ្នាំថ្មីប្រពៃណីជាតិខ្មែរខាងមុខនេះ ហើយ ឯកឧត្តម ស៊ុន ចាន់ថុល ទេសរដ្ឋមន្រ្តី រដ្ឋមន្រ្តីក្រសួងសាធារណការ និងដឹកជញ្ជូន បានអញ្ជើញចុះពិនិត្យមើលវឌ្ឍនភាព នៃការជួសជុលស្ពានមិត្តភាពកម្ពុជា-ជប៉ុន (ជ្រោយចង្វារ) ដោយមានការចូលរួមពីមន្ត្រីក្រសួង តំណាងក្រុមហ៊ុនជួសជុលសាងសង់ និងក្រុមហ៊ុនត្រួតពិនិត្យលក្ខណបច្ចេកទេស។ នេះបើយោងតាមការផ្សាយគេហទំព័រហ្វេសប៊ុករបស់ ក្រសួងសាធារណការ និងដឹកជញ្ជូន នៅថ្ងៃទី០៦ ខែ មីនា ឆ្នាំ២០១៩។

យោងតាមប្រភពដដែល បានបញ្ជាក់ថា ស្ពាននេះតម្រូវឱ្យមានការជួសជុលឡើងវិញជាបន្ទាន់ ដោយចំណាយថវិកាអស់ប្រមាណ ៣០លានដុល្លារអាម៉េរិក ក្រោមជំនួយហិរញ្ញប្បទានឥតសំណងរបស់រដ្ឋាភិបាលជប៉ុន ដែលបានចាប់ផ្តើមបើកការដ្ឋានសាងសង់នៅថ្ងៃទី១៥ ខែកញ្ញា ឆ្នាំ២០១៧ និងគម្រោងបញ្ចប់នៅថ្ងៃទី១៤ ខែមិថុនា ឆ្នាំ២០១៩។ ដោយសារតែ ស្ពាននេះត្រូវបានខូចខាតដោយសង្គ្រាមស៊ីវិលនៅកម្ពុជា និងត្រូវបានសាង សង់ឡើងវិញនៅឆ្នាំ​១៩​៩២ ដោយប្រទេសជប៉ុន ហើយត្រូវបានប្តូរឈ្មោះទៅជាស្ពានមិត្តភាពកម្ពុជា-ជប៉ុន ដោយព្រះមហាវិរៈក្សត្រ សម្ដេចព្រះបាទព្រះបរមរតនកោដ្ឋ នរោត្ដម សីហនុ ។ ស្ពាននេះមានប្រវែង៩៧១មែត្រ ទទឹង១៣ម៉ែត្រ ស្ថិតនៅតាមបណ្តោយផ្លូវជាតិលេខ៦Aក្នុងភូមិសាស្ត្រទឹកដី រាជធានីភ្នំពេញ ត្រូវបានសាងសង់ និងសម្ភោធឱ្យប្រើប្រាស់ក្នុងឆ្នាំ១៩៦៣ ក្រោមហិរញ្ញប្បទានឥត សំណងរបស់ប្រទេសជប៉ុន៕

RAC Media

  ថ្ងៃព្រហស្បតិ៍, 07 មីនា 2019 ម៉ោង 11:19 AM

ជីកស្រះដើម្បីសង្គ្រោះសត្វរាប់រយប្រភេទនៅឧទ្យានរាជបណ្ឌិត្យសភាកម្ពុជា តេជោសែន ឫស្សីត្រឹប

ក្នុងគោលដៅក្នុងការអភិរក្សសត្វព្រៃ និងធនធានធម្មជាតិ នៅក្នុងឧទ្យានរាជបណ្ឌិត្យសភាកម្ពុជា តេជោសែន ឫស្សីត្រឹប ក្រសួងធនធានទឹក និងឧតុនិយម បានជីក និងស្តារជីកស្រះធំៗចនួន ០៦ កាលពីខែមីនា ឆ្នាំ២០១៨៖

១.ស្រះត្រឹប ១២០មx២១០មx៣ម,
២. ត្រពាំងត្បែងជ័យ(ស្រះត្បែង) ៣០មx៥០មx៣ម,
៣. ត្រពាំងមរកត (ស្រះក្ដួច) ៧០មx១០៥មx៣ម,
៤. ត្រពាំងសេះផ្អើល ២០០មx១៣០មx៣ម,
៥. ត្រពាំងជើងគ្រុះ ២២១មx១៦៩មx៣ម,
៦. ទំនប់បង្ហៀរ ៣០០មx៥០មx៣ម

ឧទ្យានរាជបណ្ឌិត្យសភាកម្ពុជា តេជោសែន ឫស្សីត្រឹប សូមថ្លែងអំណរគុណយ៉ាងជ្រាលជ្រៅ ចំពោះ ឯកឧត្តមកិត្តិ បណ្ឌិត លឹម គានហោ រដ្ឋមន្ត្រីក្រសួងធនទឹកនិងឧតុនិយម ព្រមទាំងក្រុមបច្ចេកទេស ដែលមកពីមន្ទីរធនធានទឹកព្រះវិហារ បាត់ដំបង កំពង់ធំ និងឧត្តមានជ័យ ដែលបានខ្នះខ្នែងក្នុងការជីកស្តារត្រពាំងនេះ ដើម្បីជាគុណប្រយោជន៍ក្នុងការប្រើប្រាស់ ទាំងសត្វ ធម្មជាតិ និងមនុស្ស។

គួររំលឹកផងដែរថា ឧទ្យានរាជបណ្ឌិត្យសភាកម្ពុជា តេជោសែន ឫស្សីត្រឹប បង្កើតឡើងដោយព្រះរាជក្រឹត្យលេខ នស/រកត/០៤១៤/៤៣៦ ចុះថ្ងៃទី០៨ ខែមេសា ឆ្នាំ២០១៤ មានផ្ទៃដីទំហំ ១១៤,៣៥ គីឡូម៉ែត្រក្រឡា ដែលកំពុងធ្វើការអភិរក្សព្រៃឈើ សត្វព្រៃ និងផលិតកម្មសត្វដើម្បីជួយដល់ជីវភាពសហគមន៍នៅជុំវិញនោះ។

RAC Media

  ថ្ងៃព្រហស្បតិ៍, 07 មីនា 2019 ម៉ោង 09:11 AM

«ប្រជុំពិនិត្យ ពិភាក្សា និង អនុម័តបច្ចេកសព្ទគណៈកម្មការអក្សរសិល្ប៍»

ថ្ងៃអង្គារ ១៤រោច ខែមាឃ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃ​ទី០៥ ខែមីនា ឆ្នាំ២០១៩ ក្រុមប្រឹក្សាជាតិភាសាខ្មែរ ក្រោមអធិបតីភាពឯកឧត្តមបណ្ឌិត ជួរ គារី បានបន្តប្រជុំពិនិត្យ ពិភាក្សា និង អនុម័តបច្ចេកសព្ទគណៈកម្មការអក្សរសិល្ប៍ បានចំនួន០២ពាក្យ ដូចខាងក្រោម៖

RAC Media 

  ថ្ងៃពុធ, 06 មីនា 2019 ម៉ោង 03:25 PM

អបអរសាទរទិវានារីអន្តរជាតិ លើកទី១០៨

នៅឆ្នាំនេះ រាជបណ្ឌិត្យសភាកម្ពុជា បានប្រារព្ធធ្វើពិធីអបអរទិវាសិទ្ធិនារីអន្តរចនប្រារព្ធធ្វើពិធីអបអរទិវាសិទ្ធិនារីអន្តរជាតិ លើកទី១០៨ ក្រោមអធិបតីរបស់ឯកឧត្តមបណ្ឌិតសភាចារ្យ សុខ ទូច ប្រធានរាជបណ្ឌិត្យសភាកម្ពុជា ឯកឧត្តមបណ្ឌិតសភាចារ្យអនុប្រធានរាជបណ្ឌិត្យសភាកម្ពុជា ថ្នាក់ដឹកនាំវិទ្យាស្ថាន និងស្ថាប័នចំណុះ ថ្នាក់ដឹកនាំ និងជាច្រើនរូប ជាពិសេសនារីជាថ្នាក់ដឹកនាំនិងមន្ត្រីនៃរាជបណ្ឌិត្យសភាកម្ពុជា។ឯកឧត្តមបណ្ឌិតសភាចារ្យប្រធាន បានមានប្រសាសន៍ ដោយផ្តល់តម្លៃជាពិសេសដល់នារីដែលជាមាតា ជាអ្នកអប់រំដ៏ចំណាន និងជាអ្នកដែលតែងផ្តល់គំរូដល់បុត្រធីតាទាំងឡាយ។ ឯកឧត្តមបណ្ឌិតសភាចារ្យបានបញ្ជាក់ដែរថា រាជបណ្ឌិត្យសភាកម្ពុជា ផ្តល់តម្លៃយេនឌ័រ ហើយអ្នកដែលខិតខំបំពេញភារកិច្ច ដើម្បីជួយដល់ការងារស្ថាប័ននឹងទទួលបានលើកទឹកចិត្តដោយមិនស្មើភាពគ្នា។

សូមបញ្ជាក់ដែរថា ឆ្លៀតឱកាសអបអរទិវាសិទ្ធិនារីអន្តរជាតិ លើកទី១០៨នេះ រាជបណ្ឌិត្យសភាកម្ពុជា ក៏បានរៀបចំការបោះឆ្នោតជ្រើសរើសប្រធានសមាគមនារីរាជបណ្ឌិត្យសភាកម្ពុជា ដោយផ្តល់ឱកាសដល់នារីគ្រប់រូបឈរឈ្មោះជាបេក្ខជន សម្រាប់ការជ្រើសរើសប្រធាន១រូប អនុប្រធាន៣រូប និងបេឡា១រូប ដោយស្មើភាពផងដែរ។

  ថ្ងៃអង្គារ, 05 មីនា 2019 ម៉ោង 07:43 PM

«ទិវាជាតិអំណានឆ្នាំ២០១៩ នឹងមានការចែកសៀវភៅ៤,០០០ក្បាលដោយឥតគិតថ្លៃ» ដោយ៖ ផាញ់ សារឿន

ភ្នំពេញ៖ រាជរដ្ឋាភិបាល បានចេញអនុក្រឹត្យមួយ ចុះថ្ងៃទី១៤ ខែកញ្ញា ឆ្នាំ២០១៥ ស្តីពីទិវាជាតិអំណាន និងបានកំណត់យក់ថ្ងៃទី១១មីនា ប្រារព្ធទិវានេះជារៀងរាល់ឆ្នាំ ហើយការសម្រេចជ្រើសរើសយកថ្ងៃទី១១មីនានេះ ដោយសារជាថ្ងៃកំណើតរបស់សម្តេចព្រះសង្ឃរាជ ជួន ណាត។

ឯកឧត្តមបណ្ឌិតសភាចារ្យ ហង់ ជួនណារ៉ុន រដ្ឋមន្រ្តីក្រសួងអប់រំបានប្រកាសឱ្យសិស្ស និស្សិតនិងប្រជាពលរដ្ឋខ្មែរទូទៅអញ្ចើញទៅ ចូលរួមក្នុងព្រឹត្តិការណ៍ទិវាជាតិអំណានលើកទី៤ ចាប់ពីថ្ងៃទី៩ដល់ថ្ងៃទី១១ ខែមីនា ឆ្នាំ២០១៩ ខាងមុខនេះ នៅវិទ្យាស្ថានបច្ចេកទេសកម្ពុជា។ នេះបើយោងតាមការផ្សាយព័ត៌មាននៅគេហទំព័រក្រសួងព័ត៌មាន នៅថ្ងៃទី០៤ ខែមីនា ឆ្នាំ២០១៩។

 ក្នុងឱកាសដែលលោកបានអញ្ជើញបើកសន្និសីទសារព័ត៌មានស្តីពី ការរៀបចំទិវាជាតិអំ​ណាន ឆ្នាំ២០១៩ ក្រោមប្រធានបទ «ការអានបណ្តុះវប្បធម៌ការសិក្សាពេញមួយជីវិត» នៅដើមខែមីនា ឆ្នាំ២០១៩ លោកបានថ្លែងថា «បច្ចុប្បន្ននេះសិស្សមិនត្រឹមតែអាចអានពីសៀវភៅទេ ពួកគេអាចរៀនអានពី Facebook Youtube ការរៀនរបស់មនុស្ស ជាការឆ្លើយតបទៅនឹងការខិតខំ បង្កើនចំណេះដឹង របស់សិស្សានុសិស្ស។ យើងត្រូវការលើកទឹកចិត្តអ្នកនិពន្ធ ត្រូវការលើកទឹកចិត្តការសសេរសៀវភៅជាភាសាខ្មែរ ដើម្បីថែរក្សាអភិរក្សអភិវឌ្ឍភាសា​ខ្មែរ ចឹងវាមាន​ន័យ​៣ មានគោលដៅ៣ គឺថាថែរក្សា អភិរក្សស្រាវជ្រាវពីអ្វីពីមុនមកដើម្បីទុកសម្រាប់មនុស្សជំនាន់ក្រោយ និងអភិវឌ្ឍន៍បន្ថែមទៀតតាមតម្រូវការ»។

 RAC Media

  ថ្ងៃអង្គារ, 05 មីនា 2019 ម៉ោង 02:05 PM

ហេតុអ្វីបំភ្លេចសិទ្ធិរបស់ពួកគេ ? ដោយ៖ ស៊ឺន សម

នៅក្នុងពិភពលោកសព្វថ្ងៃ មិនថានៅក្នុងប្រទេសអភិវឌ្ឍ ប្រទេសកំពុងអភិវឌ្ឍ ឬប្រទេសក្រីក្រនោះទេ គេតែងនាំគ្នានិយាយអំពីសិទ្ធិមនុស្ស ដោយពេលខ្លះគេបានលើកឡើងអំពីសិទ្ធិមនុស្សស្របតាមច្បាប់ជាតិ និងច្បាប់អន្តរជាតិ ផងដែរ ហើយជាច្រើនលើកច្រើនសារណាស់ ដែលអង្គការជាតិ ឬអង្គការអន្តរជាតិមួយចំនួនបានលើកយកបញ្ហាសិទ្ធិមនុស្សមកធ្វើការវាយប្រហារមកលើរដ្ឋាភិបាលនៃប្រទេសមួយទៀត បើទោះបីជារឿងនោះពិតខ្លះមិនពិតខ្លះ តែមនុស្សភាគច្រើនបានចាត់ទុកថា សិទ្ធិមនុស្សគឺជាសិទ្ធចាំបាច់បំផុតក្នុងលោកនេះ។

ខ្ញុំទទួលស្គាល់ថា សិទ្ធិមនុស្សគឺជាសិទ្ធមួយសំខាន់ណាស់សម្រាប់ការរស់នៅក្នុងផែនដីនេះ ប៉ុន្តែនៅលើពិភពលោកយើងនេះ មិនមែនតែមនុស្សនោះទេ ដែលមានជីវិតរស់នៅ សត្វ និងរុក្ខជាតិ ដែលជារស់នៅជាមួយមនុស្ស ឬដែលកើតមានជុំវិញមនុស្ស ពួកគេក៏ជាចំណែកមួយនៃពិភពលោកយើងនេះដែរ គ្រាន់តែមនុស្សយើងមិនសូវជាចាប់អារម្មណ៍ក្នុងការលើកយកនិយាយតែប៉ុណ្ណោះ។

ពាក្យមួយដែលពិភពលោកបានបង្ហាញតាមកាយវិការ តែពួកគេមិនចង់និយាយនោះ គឺ “ ទាល់តែប៉ះចំសាច់ឯងទើបដឹងថាឈឺ”។ មានន័យថា ប្រទេសមួយចំនួនដែលធ្លាប់តែរិះគន់អ្នកផ្សេងទៀតរឿងសិទ្ធិមនុស្ស ដល់ពេលគេយករឿងសិទ្ធិមនុស្សនេះដដែលមកនិយាយទៅកាន់ខ្លួនវិញ បែរជានិយាយថា “នេះជារឿងផ្ទៃក្នុងរបស់គេ” ប្រទេសផ្សេង សូមកុំលូកដៃ ឧទាហរណ៍ ប្រទេសបារាំង និងប្រទេសមួយចំនួនទៀតជាដើម។

មនុស្សភាគច្រើន គឺបែបនេះ ដោយសារតែការយកចិត្តទុកដាក់ខ្លាំងតែនៅលើរឿងសិទ្ធិមនុស្សតែម្យ៉ាង នាំគ្នាបំភ្លេចសិទ្ធិរបស់សត្វ និងសិទ្ធិរុក្ខជាតិ ឬសិទ្ធដើមឈើ ដែលជាចំណែកមួយដ៏សំខាន់សម្រាប់ការរស់នៅ ហើយសកម្មជនដែលការពារសិទ្ធិសត្វ និងសិទ្ធិរុក្ខជាតិនោះ មិនសូវជាបានទទួលគាំទ្រ ហើយមិនសូវមានសម្ភារៈ ឬថិវកាសម្រាប់បំពេញការងាររបស់ពួកគេនោះទេ ពួកគេតែងធ្វើការដោយខ្វះនេះ ខ្វះនោះជានិច្ច។ ហេតុអ្វីមនុស្សយើងមិនសូវយកចិត្តទុកដាក់ជាមួយសត្វ និងរុក្ខជាតិដែលមានជីវិតដូចយើងដែរនោះ?

ប្រទេសកម្ពុជា ដែលជាប្រទេសក្រីក្រ និងជាប្រទេសតូចមួយផងនោះ តែងត្រូវបានរបាយការណ៍សិទ្ធិមនុស្សអន្តរជាតិ ឬតែងត្រូវបានប្រទេសផ្សេងទៀតរិះគន់ ថាមិនសូវមានសិទ្ធិមនុស្សល្អ ដោយប្រការយ៉ាងនេះ យ៉ាងនោះជាដើម។ ប៉ុន្តែអ្នករិះគន់រឿងសិទ្ធិមនុស្សនោះ មិនដែលបានចាប់អារម្មណ៍សោះឡើយចំពោះបញ្ហាសិទ្ធិរបស់សត្វ ឬសិទ្ធដើម​ឈើ ដែលសកម្មជនអ្នកការពារសិទ្ធិសត្វ និងសិទ្ធរុក្ខជាតិ បានជួនប្រទះជាញឹកញាប់ក្នុងការបំពេញការងាររបស់ខ្លួន។

ទាក់ទងនឹងរឿងសិទ្ធិសត្វ និងសិទ្ធរុក្ខជាតិនេះ ឯកឧត្តម សូត្រ សំណាង ប្រធានឧទ្យានរាជបណ្ឌិត្យសភាកម្ពុជាតេជោសែនឬស្សីត្រឹប ដែលជាឧទ្យានជាតិមួយស្ថិតនៅក្នុងស្រុកឆែប នៃខេត្តព្រះវិហារនោះ បានមានប្រសាសន៍ថា “ ជាធម្មតាមនុស្សចូលចិត្តនិយាយតែអំពីរឿងសិទ្ធមនុស្សតែម្យ៉ាងប៉ុណ្ណោះ ហើយមិនចូលចិត្តនិយាយ និងមិនសូវផ្តល់តំលៃដល់អ្នកដែលការពារសិទ្ធិរបស់សត្វ និងសិទ្ធិរុក្ខជាតិទេ” ។ លោកបានបន្តទៀតថា “ ក្នុងការបំពេញការងាររបស់ក្រុមការពារឧទ្យាននៅពេលសព្វថ្ងៃនេះ គឺប្រឈមនឹងការខ្វះខាតខ្លាំងណាស់ ហើយក៏ប្រឈមនឹងគ្រោះថា្នក់ច្រើនណាស់ដែរ ព្រោះថាអ្នកដែលធ្លាប់កាប់ឈើលក់ ហើយមិនបានកាប់វិញនោះ គេមានការខឹងក្រោធជាមួយក្រុមអ្នកការពារព្រៃឈើណាស់ ម្យ៉ាងវិញទៀត ពលរដ្ឋអ្នកដែលរស់នៅជិតបរិវេននៃឧទ្យាននោះ ក៏មិនសូវជាមានការយល់ដឹងអំពីតម្លៃនៃការពារ ឬការអភិរក្សព្រៃឈើរដែរ  អីចឹងហើយ ក្រុមការងារឧទ្យានប្រឈមមុខទាំងជាមួយនឹងអ្នកដែលបាត់បង់ប្រយោជន៍ផង ប្រឈមមុខនឹងពលរដ្ឋដែលមិនទាន់បានយល់ដឹងអំពីតម្លៃនៃការងាររបស់ក្រុមការពារឧទ្យានផង ជាពិសេសប្រឈមមុខនឹងការមិនសូវផ្តល់តម្លៃអំពីអ្នកដែលចូលចិត្តនិយាយអំពីរឿងសិទ្ធិមនុស្ស តែបំភ្លេចសិទ្ធសត្វ និងសិទ្ធរុក្ខជាតិផងដែរ”។

សិទ្ធិមនុស្ស សិទ្ធិសត្វ និងសិទ្ធិធរុក្ខជាតិ សុទ្ធតែសំខាន់សម្រាប់ភពផែនដីនេះ  យើងមិនត្រូវសំលឹងតែមួយចំណុច ឬមើលតែមួយចំណុច ហើយធ្វើការរិះគន់ជារួមនោះទេ ព្រោះថា អ្នកខ្លះមិនបាននិយាយថាគេជាអ្នកការពារសិទ្ធិមនុស្ស ឬជាសកម្មជនសិទ្ធិមនុស្សនោះទេ តែពួកគេបានលះបង់ពេលវេលា កំលាំងកាយ កំលាំងចិត្ត ជាពិសេសសុភមង្គលគ្រួសារ ដើម្បីទៅបំពេញការងារជាអ្នកការពារព្រៃឈើ  ជាអ្នកផ្តល់សេចក្តីសុខដល់សត្វ តាយរយៈការជីកស្រះទឹកដើម្បីឱ្យសត្វព្រៃមានទឹកផឹក មានព្រៃជាទីជម្រក ជាពិសេស គឺការរក្សាព្រៃឈើដើម្បីជាប្រយោជន៍ដល់មនុស្សជំនាន់ក្រោយទៀត។ សកម្មភាពសង្ខេបខាងលើនេះ សុទ្ធតែជារឿងសំខាន់សម្រាប់ជាតិ និងសម្រាប់ភពផែននេះ ដូច្នេះ បើសិនជាអ្នកគិតថា អ្នកជាអ្នកស្រលាញ់សិទ្ធិមនុស្សនោះ សូមចែករំលែកក្តីស្រលាញ់របស់អ្នក ជាមួយសត្វ និងរុក្ខជាតិ ដែលជាចំណែកមួយសំខាន់នៃផែនដីរបស់យើងផង។

RAC Media  ( ដោយលោកស៊ឺន សម  មន្ត្រីទំនាក់ទំនងសាធារណៈនៃរាជបណ្ឌិត្យសភាកម្ពុជា)

  ថ្ងៃអង្គារ, 05 មីនា 2019 ម៉ោង 09:06 AM

«ព្រះមហាក្សត្រ ចេញព្រះរាជក្រឹត្យត្រាស់បង្គាប់តែងតាំង អនុប្រធានក្រុមប្រឹក្សាជាតិភាសាខ្មែររាជបណ្ឌិត្យសភាកម្ពុជា០១ រូបមានឋានៈស្មើអគ្គនាយក»

យោងតាមព្រះរាជក្រឹត្យ នស/រកត/០២១៩/២៨២ ធ្វើនៅថ្ងៃទី២២ ខែកុម្ភៈ ឆ្នាំ២០១៩ ព្រះករុណា ព្រះបាទសម្ដេច ព្រះបរមនាថ នរោត្ត សីហមុនី ព្រះមហាក្សត្រនៃកម្ពុជា ទ្រង់បានចេញព្រះរាជក្រឹត្យត្រាស់បង្គាប់តែងតាំង និងផ្ដល់តួនាទីជូន ឯកឧត្តមបណ្ឌិត ប៊ី សុខគង់ ជាអនុប្រធានក្រុមប្រឹក្សាជាតិភាសាខ្មែរនៃរាជបណ្ឌិត្យសភាកម្ពុជាមានឋានៈស្មើ អគ្គនាយក។

RAC Media | ស៊ាង រ៉ូហ្សាត

  ថ្ងៃចន្ទ, 04 មីនា 2019 ម៉ោង 12:06 PM

«ព្រះមហាក្សត្រ ចេញព្រះរាជក្រឹត្យត្រាស់បង្គាប់តែងតាំង ជំនួយការរាជបណ្ឌិត្យសភាកម្ពុជាចំនួន០៧ រូបមានឋានៈស្មើអគ្គនាយក»

យោងតាមព្រះរាជក្រឹត្យ នស/រកត/០២១៩/២៨១ ធ្វើនៅថ្ងៃទី២២ ខែកុម្ភៈ ឆ្នាំ២០១៩ ព្រះករុណា ព្រះបាទសម្ដេច ព្រះបរមនាថ នរោត្ត សីហមុនី ព្រះមហាក្សត្រនៃកម្ពុជា ទ្រង់បានចេញព្រះរាជក្រឹត្យត្រាស់បង្គាប់តែងតាំង និងផ្ដល់តួនាទីជូន ជំនួយការរាជបណ្ឌិត្យសភាកម្ពុជា ចំនួន០៧រូបមានឋានៈស្មើ អគ្គនាយក។

សូមអានខ្លឹមសារលំអិតនៃព្រះរាជក្រឹត្យដូចខាងក្រោម៖

RAC Media| ស៊ាង រ៉ូហ្សាត

  ថ្ងៃចន្ទ, 04 មីនា 2019 ម៉ោង 11:50 AM

សិស្ស និស្សិតកម្ពុជា ១១០នាក់ ទទួលអាហារូបករណ៍និងសិក្សាភាសាចិននៅវិទ្យាស្ថានខុងជឺ មុនចេញទៅសិក្សាជំនាញនៅប្រទេសចិន

ក្រោមជំនួយកិច្ចឧបត្ថម្ភពីសមាគមសប្បុរសធម៌ជនជាតិចិននៅក្រៅប្រទេស «Overseas Chinese Charity Foundation of China (OCCFC)» ដែលបានទទួលអាហារូបករណ៍ផ្តល់ដល់សមាគមមូលនិធិសុខមាភាពសាធារណៈ កម្ពុជា ចិន សម្រាប់រយៈពេល៣ឆ្នាំ ជ្រើសរើសនិស្សិតអាហាររូបករណ៍កម្ពុជា ទៅសិក្សាជំនាញសំខាន់៣ គឺ៖ ផ្នែកអគ្គិសនី, ផ្នែកជួសជុលនិងតម្លើងរថយន្ត និង ផ្នែកគ្រូមតេយ្យភាសាចិន។ 

និស្សិតដែលត្រូវជ្រើសរើសទៅសិក្សានៅប្រទេសចិនទាំង១១០នាក់ ក្រោមការឧបត្ថម្ភរបស់សមាគមសប្បុរសធម៌ជនជាតិចិននៅក្រៅប្រទេស នឹងត្រូវទទួលបានការសិក្សាភាសាចិនកម្រិតមូលដ្ឋានចំនួន២ខែ នៅវិទ្យាស្ថាន​ខុងជឺ នៃរាជបណ្ឌិត្យសភាកម្ពុជា មុននឹងចេញទៅសិក្សាជំនាញបច្ចេកទេសនៅប្រទេសចិន។ សូមបញ្ជាក់ថា ឧកញ៉ា កែវ មុំ អនុប្រធានសមាគមមូលនិធិសុខមាភាពសាធារណៈកម្ពុជា-ចិន បានជួបពិភាក្សាជាមួយ ឯកឧត្តមបណ្ឌិតសភាចារ្យ​ សុខ ទូច អំពីការផ្តល់អាហារូបករណ៍​ដល់​និស្សិត​កម្ពុជា និង​សុំការសហការជាមួយវិទ្យាស្ថានខុងជឺនៃរាជបណ្ឌិត្យសភាកម្ពុជា ដើម្បីរៀបចំការបណ្តុះបណ្តាលភាសាចិន​កម្រិតដំបូងដល់និស្សិតកម្ពុជាទាំងនេះ។ ដោយមានការឯកភាពពីឯកឧត្តម​ប្រធាន​រាជ​បណ្ឌិត្យ​សភាកម្ពុជា និស្សិតទាំង​១១០នាក់ នឹងសិក្សាភាសាចិនរយៈពេល២ខែ មុននឹងបន្តបេសកកម្ម​របស់ខ្លួន​ទៅសិក្សាជំនាញបច្ចេកទេស សម្រាប់​​យកមកបម្រើជាតិមាតុភូមិកម្ពុជាវិញ។ បើពិនិត្យទៅ​ពេលវេលានៃការបណ្តុះបណ្តាលនេះហាក់ដូចជាតិច តែ​និស្សិតដែល​ទទួលអាហារូបករណ៍ទាំងអស់ សុទ្ធ​តែធ្លាប់ឆ្លងកាត់ការសិក្សាភាសាចិននេះរួចមកហើយ និង​ចេះ​ភាសា​ចិនរួចហើយ។

និស្សិតដែលទទួលបានអាហារូបករណ៍ គឺទទួលបានការឧបត្ថម្ភគាំទ្រច្រើនពីភាគីចិន ដូចជា សំបុត្រ​​យន្តហោះ​ទៅមកកម្ពុជា-ចិនម្តងក្នុង១ឆ្នាំ ថ្លៃសិក្សា កន្លែងស្នាក់នៅ សូម្បីធានា​រ៉ាប់រងសុខភាព ក្នុង​អំឡុង​ពេល​ទទួល​បានអាហារូបករណ៍ ជាដើម។ ឧកញ៉ា កែវ មុំ បានបញ្ជាក់ថា នឹងខិតខំស្នើ​សុំ​អាហារូបករណ៍​ពី​ភាគី​ចិន​បន្ថែម​ទៀត ដើម្បី​ចូលរួម​ចំណែក​ក្នុងការ​បណ្តុះ​បណ្តាល​ធនធាន​មនុស្ស​នៅ​កម្ពុជា សម្រាប់​ចូលរួម​ក្នុងការ​អភិវឌ្ឍ​ប្រទេស។ ធនធានមនុស្សជារឿងសំខាន់ជាងគេ អ្នក​ដែលទៅ​សិក្សា​នៅ​​ប្រទេសចិន ត្រូវតែធ្វើជាសិស្សគំរូល្អ និងជួយ​រំឭក​ដាស់តឿនគ្នា ខិតខំរៀនសូត្រ ជាគំរូដល់សិស្ស​ដែល​មក​ពីបណ្តាប្រទេសអាស៊ានផ្សេងទៀត។ ​            

(ឧកញ៉ា កែវ មុំ អនុប្រធានសមាគមមូលនិធិសុខមាភាពសាធារណៈ កម្ពុជា ចិន)

បើតាមលោក Xu Dian Wei អគ្គលេខាធិការ «Overseas Chinese Charity Foundation of China (OCCFC)» សមាគមសប្បុរសធម៌ជនជាតិចិននៅក្រៅប្រទេស បានបញ្ជាក់ដែរថា នៅក្នុងកម្មវិធី​អាហារូបករណ៍​នេះ និស្សិតនឹងចូលរួមរយៈពេល ៣ឆ្នាំ ហើយនៅឆ្នាំ​នីមួយៗ និស្សិតនឹងត្រូវ​ទទួល​ការសិក្សា​៦ខែ​​នៅគ្រឹះស្ថានសិក្សា​ និង៦ខែទៀត ត្រូវចុះទៅ​អនុវត្ត​ផ្ទាល់នៅ​តាម​រោងចក្រ​សហគ្រាស​នានា។ លោក បាន​បញ្ជាក់ថា និស្សិត​ដែល​បញ្ចប់​ការ​សិក្សា នឹងមានសមត្ថភាពបំពេញ​ការងារ​ជាអ្នក​គ្រប់គ្រង តាម​ជំនាញ​ឯកទេសរបស់ខ្លួន។ និស្សិតកម្ពុជា ដែលទទួលអាហារូបរណ៍ទាំងអស់ អាចដាក់ពាក្យជ្រើសរើសគ្រឹះស្ថានសិក្សា តាមជំនាញ ក្នុងចំណោមគ្រឹះស្ថានសិក្សា ដូចខាងក្រោម៖

១. សាលាបច្ចេកទេសវិស្វកម្មមេកានិច និងអគ្គិសនី (Technical College of Mechanical and Electrical Engineering)
២. សាលាបច្ចេកទេសអភិរក្ស (Conservancy Technical College)
៣. វិទ្យាស្ថានបច្ចេកវិជ្ជា Wuhu (Wuhu Institute of Technology)
៤. សាលាអប់រំក្មេងមិនទាន់គ្រប់អាយុចូលរៀន HEFEI (HEFEI Preschool Education College)

នៅក្នុងពិធីសំណេះសំណាលជាមួយនិស្សិតនេះដែរ ឯកឧត្តមបណ្ឌិតសភាចារ្យ សុខ ទូច បាន​លើក​ទឹកចិត្ត​ដល់និស្សិតឱ្យគិតគូរ​ពីជោគវាសនារបស់ខ្លួន ខិតខំសិក្សា ដើម្បីក្លាយជាធនធានមាន​តម្លៃ​សម្រាប់​ជួយដល់​ប្រទេស​របស់ខ្លួន។ តើរៀនជំនាញរួចហើយធ្វើការឱ្យគេ ឬបង្កើតការងារមួយ​សម្រាប់​ខ្លួនឯង និងអ្នកជុំវិញ។ ឧទាហរណ៍ អ្នកទៅរៀនជំនាញគ្រូមតេយ្យភាសាចិន តើរៀនចប់ត្រឡប់មកវិញ ត្រូវទៅធ្វើការឱ្យគេ ឬ បង្កើតការងារខ្លួនឯង? នៅកម្ពុជា​ មានកូនចៅចិនច្រើនណាស់ ហើយទាំងនេះ សុទ្ធ​តែ​ជាឱកាសដែលត្រូវចាប់យក។ ឯកឧត្តម​បណ្ឌិត​សភាចារ្យ ក៏បញ្ជាក់ដែរថា «ធ្វើការឱ្យ​គេបាន​ប្រាក់ខែ​រាប់ពាន់ តែបើធ្វើការឱ្យខ្លួនឯង ធ្វើការបាន​ត្រឹម៣០០ដុល្លារ ក៏​មាន​តម្លៃដែរ ហើយការងារនេះ នឹងបង្រៀន​យើង​ឱ្យ​ក្លាយជាសហគ្រិន គ្រប់គ្រងអាជីវកម្មល្អមួយ ល្អជា​ជាង​ស៊ីប្រាក់​ពីគេ។ 

សូមបញ្ជាក់ដែរនេះជាកម្មវិធីផ្តល់អាហារូបករណ៍លើកទី២ ហើយបន្ទាប់ពីកម្មវិធីផ្តល់​អាហារូបករណ៍​លើក​ទី​១​ ​ធ្វើ​ឡើងកាលពីឆ្នាំ២០១៨ កន្លងមកសមាគមមូលនិធិសុខមាភាពសាធារណៈ កម្ពុជា ចិន ជ្រើសរើសបាននិស្សិតចំនួន៤៩នាក់ទៅសិក្សានៅគ្រឹះស្ថានទាំងនោះ។ ដោយឡែកក្នុងឆ្នាំ២០១៩នេះ សមាគមសប្បុរសធម៌ជនជាតិចិននៅក្រៅប្រទេស Overseas Chinese Charity Foundation of China (OCCFC) ផ្តល់ជូនចំនួន២០០នាក់ ប៉ុន្តែសមាគមមូលនិធិសុខមាភាពសាធារណៈ កម្ពុជា ចិន ជ្រើសរើសបាននិស្សិតត្រឹមតែចំនួន១១០នាក់ សម្រាប់ទៅសិក្សាជំនាញទាំងបីខាងលើ។

ពិធីសំណេះសំណាលនេះ បានប្រព្រឹត្តទៅនាព្រឹកថ្ងៃទី៤ ខែមីនា ឆ្នាំ២០១៩ វេលាម៉ោង៩និង០០នាទីព្រឹក នៅសាសនាងនួន អាគារ F នៃរាជបណ្ឌិត្យសភាកម្ពុជា។

RAC Media 

  ថ្ងៃចន្ទ, 04 មីនា 2019 ម៉ោង 10:46 AM

«វិមានរំឭកដល់អ្នកស្លាប់ក្នុងសង្គ្រាមលោកលើកទី១» (ភាគទី ៣) ចងក្រងដោយ៖ លោកស្រី ស៊ន ច័ន្ទអមរា | ផ្សាយថ្ងៃទី២ ខែមីនា ឆ្នាំ២០១៩

នៅក្នុងភាគទី២នៃអត្ថបទ យើងបានបង្ហាញអំពី«បណ្ណសារ»(Archive)មួយ ដែលជាលិខិតរបស់ ឧកញាវាំង​ជូនទៅលោករេស៊ីដង់ជាន់ខ្ពស់បារាំង ចុះថ្ងៃទី១៣ ខែមីនាឆ្នាំ១៩១៦(សូមមើលអត្ថបទមុន)។  

ចំណែកនៅភាគទី៣នេះ សូមបង្ហាញ«បណ្ណសារ»(ឯកសារប្រភពទី១)មួយទៀត គឺព្រះរាជ ឱង្ការរបស់ព្រះបាទស៊ីសុវត្ថិ ចុះថ្ងៃទី២៥ ខែវិច្ឆិកា ឆ្នាំ១៩១៧[1]។ ដើម្បីឱ្យកូនខ្មែរបច្ចុប្បន្នបានស្គាល់នូវ ពាក្យពេចន៍ ដែលជាពាក្យកម្រងកែវជាច្រើនអន្លើគួរឱ្យជក់ចិត្ត និងអក្ខរាវិរុទ្ធខ្មែរ កាលពី១០២ឆ្នាំមុននោះ យើងសូម​បង្ហាញអត្ថបទស្តីពីព្រះរាជឱង្ការដែលមានខ្លឹមសារដើម ដោយសម្រួលនិងពន្យល់តែពាក្យ ពិបាកមួយ​ចំនួនដូចតទៅ៖



[1] ព្រះរាជឱង្ការ ចុះថ្ងៃទី២៥ ខែវិច្ឆិកា ឆ្នាំ១៩១៧ នៅក្នុងរាជកិច្ចរាជការ, សេចក្តីក្នុងរាជការ, ចំណែកទី១, លេខ៤ ខែតុលា-វិច្ឆិកា-ធ្នូ ឆ្នាំ១៩១៧, ទំព័រ២៤១-២៤៧។

RAC Media | ស៊ន ច័ន្ទអមរា

  ថ្ងៃសៅរ៍, 02 មីនា 2019 ម៉ោង 11:31 AM