រាជបណ្ឌិត្យសភាកម្ពុជា

«ស្ថាប័នស្រាវជ្រាវធំទាំងពីរ កម្ពុជា-កូរ៉េ ផ្តើមជួបគ្នា ដើម្បីអភិវឌ្ឍវិស័យស្រាវជ្រាវវិទ្យាសាស្ត្រនៅកម្ពុជា»

កាលពីព្រឹកថ្ងៃទី១៤ ខែមីនា នេះ ថ្នាក់ដឹកនាំនៃរាជបណ្ឌិត្យសភាកម្ពុជា (RAC) បានទទួលជំនួបប្រជុំចង្អៀតមួយជាមួយគណៈប្រតិភូនៃក្រុមប្រឹក្សាជាតិស្រាវជ្រាវសេដ្ឋកិច្ច មនុស្សសាស្ត្រ និងវិទ្យាសាស្ត្រសង្គម (NRC) នៃសាធារណ​រដ្ឋកូរ៉េ ដើម្បីពិភាក្សាពីកិច្ចសហប្រតិបត្តិការ លើវិស័យសំខាន់ៗមួយចំនួនសម្រាប់ការចុះអនុស្សរណៈ​យោគយល់គ្នា រវាងស្ថាប័នទាំងពីរ ដែលនឹងប្រព្រឹត្តទៅនៅថ្ងៃទី១៥ ខែមីនា ឆ្នាំ២០១៩ស្អែកនេះ ក្រោមអធិបតីភាពដ៏ខ្ពង់ខ្ពស់របស់ប្រធានាធិបតីនៃសាធារណរដ្ឋកូរ៉េ និង សម្តេចអគ្គមហាសេនាបតីតេជោ ហ៊ុន សែននាយករដ្ឋមន្ត្រីនៃព្រះរាជាណាចក្រកម្ពុជា ជាសក្ខីភាព នៃការចុះអនុស្សរណៈដ៏មានសារសំខាន់នេះ។

ទាំងពីរភាគី គឺទាំងរាជបណ្ឌិត្យសភាកម្ពុជា (RAC) និង ក្រុមប្រឹក្សាជាតិស្រាវជ្រាវសេដ្ឋកិច្ច មនុស្សសាស្ត្រ និងវិទ្យា​សាស្ត្រសង្គម (NRC) បានយកចិត្តទុកដាក់ខ្ពស់ចំពោះកិច្ចពិភាក្សាខាងលើ និងជាពិសេសកំណត់ឱ្យបាននូវគោល​ការណ៍ និងធ្វើយ៉ាងណាសម្រេចឱ្យបានលើអនុស្សរណៈ និងអនុវត្តឱ្យមានប្រសិទ្ធភាព។

ស្អែកនេះ ក្រៅពីការចុះអនុស្សរណៈយោគយល់គ្នាស្តីពីកិច្ចសហប្រតិបត្តិការជាមួយរាជបណ្ឌិត្យសភាកម្ពុជា នៅមានការចុះអនុស្សរណៈយោគយល់គ្នា ចំនួន៤ផ្សេងទៀត និងកិច្ចព្រមព្រៀងចំនួន២ គឺ អនុស្សរណៈស្តីពីកិច្ចសហប្រតិបត្តិការជាមួយវិទ្យាស្ថានការទូតកម្ពុជា, អនុស្សរណៈស្តីពីវិស័យថាមពល, អនុស្សរណៈស្តីពីការសម្រួលការវិនិយោគ, និង អនុស្សរណៈស្តីពីការជំរុញពាណិជ្ជកម្មរវាងប្រទេសទាំងពីរ ដោយផ្តោតលើឧបករណ៍ និងសម្ភារសំណង់ និង កិច្ចព្រមព្រៀងឥណទានជួយដល់វិស័យសុខាភិបាល និងកិច្ចព្រមព្រៀងឥណទានកែលម្អផ្លូវជនបទ។

RAC Media

  ថ្ងៃព្រហស្បតិ៍, 14 មីនា 2019 ម៉ោង 03:53 PM

«ប្រជុំពិនិត្យ ពិភាក្សា និងអនុម័តបច្ចេកសព្ទគណ:កម្មការគីមីវិទ្យា និង រូបវិទ្យា»

កាលពីថ្ងៃពុធ ៨កេីត ខែផល្គុន ឆ្នាំច សំរឹទ្ធិស័ក ព.ស.២៥៦ ត្រូវនឹងថ្ងៃទី១៣ ខែមីនា ឆ្នាំ២០១៩  ក្រុមប្រឹក្សាជាតិភាសាខ្មែរ ក្រោមអធិបតីភាពឯកឧត្តមបណ្ឌិត ហ៊ាន សុខុម ប្រធានក្រុមប្រឹក្សាជាតិភាសាខ្មែរ បានបន្តដឹកនាំប្រជុំពិនិត្យ ពិភាក្សា និងអនុម័តបច្ចេកសព្ទគណ:កម្មការគីមីវិទ្យា និង រូបវិទ្យា បានចំនួន២២ពាក្យ ដូចខាងក្រោម៖

RAC Media

  ថ្ងៃព្រហស្បតិ៍, 14 មីនា 2019 ម៉ោង 03:14 PM

រាជរដ្ឋាភិបាល បានប្រគល់សិទ្ធិដល់រាជបណ្ឌិត្យសភាកម្ពុជា ចុះ MOU លើវិស័យស្រាវជ្រាវជាមួយកូរ៉េខាងត្បូង

នៅថ្ងៃទី១៣ ខែមីនា នេះ រាជរដ្ឋាភិបាល បានសម្រេចប្រគល់សិទ្ធិដល់ឯកឧត្តមបណ្ឌិត្យសភាចារ្យ សុខ ទូច ប្រធានរាជបណ្ឌិត្យសភាកម្ពុជា ចុះហត្ថលេខាលើអនុស្សរណៈយោគយល់គ្នា (MOU) រវាងរាជបណ្ឌិត្យសភាកម្ពុជា និង ក្រុមប្រឹក្សាជាតិស្រាវជ្រាវសេដ្ឋកិច្ច មនុស្សសាស្ត្រ និងវិទ្យាសាស្ត្រសង្គម នៃសាធារណរដ្ឋកូរ៉េ ស្តីពីកិច្ចសហប្រតិបត្តិការលើវិស័យស្រាវជ្រាវ។ នៅក្នុងឱកាសពិធីចុះហត្ថលេខាលើអនុស្សរណៈយោគយល់គ្នានេះ សម្តេចនាយករដ្ឋមន្ត្រីនៃព្រះរាជាណាចក្រកម្ពុជា ជាសក្ខីភាព ចុះហត្ថលេខាលើសិទ្ធិប្រទាននេះ ដល់រាជបណ្ឌិត្យសភាកម្ពុជា។

ស្របពេលជាមួយគ្នានេះដែរ ឯកឧត្តមបណ្ឌិតសភាចារ្យ សុខ ទូច បានផ្តល់កិច្ចសម្ភាសន៍មួយ ស្តីពី«សារៈសំខាន់នៃដំណើរទស្សនកិច្ចរបស់ប្រធានាធិបតីកូរ៉េខាងត្បូងមកកម្ពុជា»។ កិច្ចសម្ភាសន៍ធ្វើឡើង មុនពេលមានជំនួបជាមួយគណៈប្រតិភូក្រុមប្រឹក្សាជាតិស្រាវជ្រាវសេដ្ឋកិច្ច មនុស្សសាស្ត្រ និងវិទ្យាសាស្ត្រសង្គម ដែលគ្រោងនឹងធ្វើឡើងនៅព្រឹកថ្ងៃទី១៤ ខែមីនា ឆ្នាំ២០១៩ នេះ។

RAC Media

  ថ្ងៃពុធ, 13 មីនា 2019 ម៉ោង 06:19 PM

«កម្ពុជា និង សាធារណរដ្ឋកូរ៉េ គ្រោងនឹងចុះកិច្ចព្រមព្រៀងចំនួនពីរ និងអនុស្សារណៈចំនួន៥»

ភ្នំពេញ៖ ប្រធានាធិបតីនៃសាធារណរដ្ឋកូរ៉េ ឯកឧត្តម មួន ចេអ៊ីន នឹងមកបំពេញទស្សនកិច្ចជាផ្លូវរដ្ឋនៅកម្ពុជានៅថ្ងៃទី១៤ ដល់ថ្ងៃទី១៦ ខែមីនាខាងមុខនេះ។ នារសៀលថ្ងៃទី១២ ខែមីនា ឆ្នាំ២០១៩ ឯកឧត្តម កេត សោផាន់ អនុរដ្ឋលេខាធិការ និងជាអ្នកនាំពាក្យក្រសួងការបរទេសកម្ពុជា បានមាន ប្រសាសន៍ថា មេដឹកនាំនៃប្រទេសទាំងពីរនឹងធ្វើជាសាក្សីនៅក្នុងការចុះកិច្ចព្រម ព្រៀងចំនួន ពីរ និងអនុស្សរណៈចំនួនប្រាំដែលគ្រោងនឹងចុះហត្ថលេខានាពេលខាងមុខនេះ។ នេះបើយោងតាមការផ្សាយព័ត៌មាននៅគេហទំព័រក្រសួងព័ត៌មាន នៅថ្ងៃទី១២ ខែមីនា ឆ្នាំ២០១៩។

កិច្ចព្រមព្រៀង និងអនុស្សារណៈទាំងប្រាំនោះរួមមាន៖ 
- កិច្ចព្រមព្រៀងឥណទានជួយដល់វិស័យសុខាភិបាល និងកិច្ចព្រម ព្រៀងឥណទានកែលម្អផ្លូវជនបទ។
-អនុស្សរណៈស្តីពីកិច្ចសហប្រតិបត្តិការជាមួយវិទ្យាស្ថានការទូតកម្ពុជា។
- អនុស្សរណៈស្តីពីកិច្ចសហប្រតិបត្តិការជាមួយរាជបណ្ឌិត្យសភាកម្ពុជា។
- អនុស្សរណៈស្តីពីវិស័យថាមពល។
- អនុស្សរណៈ ស្តីពីការសម្រួលការវិនិយោគ។ 
- អនុស្សរណៈស្តីពីការជំរុញពាណិជ្ជកម្មរវាងប្រទេសទាំងពីរ ដោយផ្តោតលើឧបករណ៍ និងសម្ភារសំណង់។

RAC Media | ផាញ់ សារឿន

  ថ្ងៃពុធ, 13 មីនា 2019 ម៉ោង 10:43 AM

«វិមានរំឭកដល់អ្នកស្លាប់ក្នុងសង្គ្រាមលោកលើកទី១» (ភាគទី៤) អត្ថបទដោយ៖ លោកស្រី ស៊ន ច័ន្ទអមរា មន្ត្រីលេខាធិការដ្ឋានរបស់ក្រុមប្រឹក្សាបណ្ឌិតសភាចារ្យ នៃរាជបណ្ឌិត្យសភាកម្ពុជា

សូមរំឭកថានៅក្នុងភាគទី១ យើងបានបង្ហាញអំពីកិច្ចសហការបារាំង-ខ្មែរខាងកងទ័ពជើងគោកនៅចុងសតវត្សរ៍ទី១៩ និងក្នុងសង្គ្រាមលោកលើកទី១ ដែលមានយុទ្ធនាការជ្រើសរើសទាហានស្ម័គ្រចិត្តខ្មែរជាច្រើនរយនាក់ ឱ្យទៅជួយច្បាំងនៅប្រទេស​បារាំង។ ចំណែកនៅក្នុងភាគទី២ មានការបង្ហាញអំពីលិខិតរបស់ឧញាវាំងជូនទៅកាន់លោករេស៊ីដង់ជាន់ខ្ពស់បារាំងនៅឆ្នាំ១៩១៦ ស្តីអំពីព្រះរាជដំណើរ២លើករបស់ព្រះបាទស៊ីសុវត្ថិ ក្នុងការជ្រើសរើសអ្នកស្ម័គ្រចិត្តនៅក្នុងខេត្តព្រៃវែង និងស្វាយរៀង។ រីឯភាគទី៣ បង្ហាញអំពីព្រះរាជឱង្ការរបស់ព្រះបាទស៊ីសុវត្ថិទៅកាន់រាជវង្សានុវង្ស អង្គអគ្គមហាសេនាបតី នាម៉ឺនសព្វមុខមន្ត្រីនៅថ្នាក់ជាតិ និងថ្នាក់ក្រោមជាតិ និងប្រជារាស្ត្រគ្រប់សាសន៍​ឱ្យបានដឹងអំពីគុណបំណាច់របស់ប្រទេសបារាំងមកលើប្រទេសកម្ពុជា ដែលត្រូវជួយបារាំងវិញនៅក្នុងចម្បាំងប្រឆាំងនឹងអាល្លឺម៉ង់នេះ។

ភាគទី៤ ដែលជាប្រធានបទសំខាន់របស់យើងនឹងផ្តោតទៅលើបណ្តាចំណុចដែលមានការពាក់ព័ន្ធនឹងវិមានរំឭកដល់អ្នកស្លាប់នៅក្នុងសង្គ្រាមលោកលើកទី១នេះតែម្តង​ ជាពិសេសពីមូលហេតុនៃការសាងសង់វិមានរំឭកដល់អ្នកស្លាប់នេះតែម្តង។

ទាញយកអត្ថបទពីគេហទំព័ររាជបណ្ឌិត្យសភាកម្ពុជា ខាងក្រោម៖ http://rac.apppeppers.com/royal-academy/research/attachments/original/83.pdf?1552277476

 RAC Media

  ថ្ងៃចន្ទ, 11 មីនា 2019 ម៉ោង 11:10 AM

ទោសប្រហារជីវិត៖ ប្រមុខរាជរដ្ឋាភិបាល ទទួលស្គាល់ការវិភាគរបស់អ្នកវិភាគ៣រូប

ចុះផ្សាយថ្ងៃទី១១ ខែមីនា ឆ្នាំ២០១៩

ភ្នំពេញ៖ ក្រោយពីទទួលបានការផ្ដល់ជាមតិជាច្រើនទាក់ទងទៅនឹងបំណងធ្វើប្រជាមតិដើម្បីសម្រេចថា តើគួរមានច្បាប់ដាក់ទោសប្រហារជីវិតទៅលើជនដែលរំលោភសេពសន្ថវៈលើសាច់ញាតិរបស់ខ្លួនដែរឬទេនោះ នៅព្រឹកថ្ងៃទី១១ ខែមីនា ឆ្នាំ២០១៩ នេះ សម្ដេចអគ្គមហាសេនាបតីតេជោ ហ៊ុន សែន ប្រមុខរាជរដ្ឋាភិបាលកម្ពុជា បានថ្លែងថាសម្ដេចទទួលយកយោបល់របស់អ្នកវិភាគ៣រូប ដែលមិនគាំទ្រឱ្យមានច្បាប់ប្រហារជីវិត។

ក្នុងពិធីប្រគល់សញ្ញាបត្រជូននិស្សិតសាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច នាព្រឹកនេះ សម្ដេចតេជោបានប្រកាសថា សម្ដេចគាំទ្រការលើកឡើងរបស់លោកមេធាវី សុក សំអឿន លោក អ៊ូ វីរៈ អ្នកវិភាគវេទិកាអនាគតកម្ពុជា និងបណ្ឌិតសភាចារ្យ សុខ ទូច នៅក្នុងការវិភាគរបស់អ្នកទាំងបីរូបទាក់ទងទៅនឹងបំណងក្នុងការបង្កើតច្បាប់ដាក់ទោសប្រហារជីវិត។ សម្ដេចបានប្រកាសថា មិនចាំបាច់ធ្វើវិសោធនកម្មរដ្ឋធម្មនុញ្ញបើកឱ្យមានច្បាប់ដាក់ទោស​ប្រហារជីវិតឡើយ គឺកំណត់ត្រឹមជាប់ទោសមួយជីវិតគឺគ្រប់គ្រាន់ហើយ។ សម្ដេចបានគូសបញ្ជាក់បន្ថែមថា ការវិភាគរបស់អ្នកវិភាគទាំងបីរូបខាងលើ អាចទទួលយកបាន ព្រោះជាការវិភាគដែលមិនមានបង្កប់នយោបាយនៅក្នុងនោះទេ ហើយការវិភាគមិនបង្កប់ជាមួយនយោបាយងាយនឹងទទួលយក។

ជាមួយគ្នានេះដែរ សម្ដេចមានប្រសាសន៍បន្តថា «[...] ប្រសិនបើមានការថ្លោះធ្លោយណាមួយកើតឡើងនៅក្នុងការកាត់ទោសប្រហារជីវិត អ្នកដែលស្លាប់ទៅ ស្រាប់តែសើររើរឿងក្ដីត្រឡប់មកវិញ គ្នាអត់មានទោសអីសោះ បែរជាមនុស្សស្លាប់បាត់ទៅហើយ អញ្ចឹងរឿងនេះគឺជារឿងមួយអណោចអធ័មលើសពីអ្វីដែលយើងគិតដល់ អញ្ចឹងទេ ខ្ញុំព្រះករុណា ខ្ញុំគិតថា មិនមានការចាំបាច់ដើម្បីធ្វើវិសោធនកម្មរដ្ឋធម្មនុញ្ញ ដើម្បីនឹងការឱ្យមានទោសប្រហារជីវិតទេ [...]»។

ទោះជាយ៉ាងនេះក្ដី សម្ដេចតេជោបានប្រកាសឱ្យមានការធ្វើយុទ្ធនាការព្រមៗគ្នា ដើម្បីលើកកម្ពស់សីលធម៌ក្នុងសង្គម និងលុបបំបាត់ការរំលោភសេពសន្ថវៈលើកុមារ និងរាល់សកម្មភាពរំលោភសេពសន្ថវៈ ដែលមិនមែនត្រឹមតែរវាងសាច់ញាតិបង្កើតនោះទេ និងការប្រព្រឹត្តអំពើហិង្សាទៅលើស្ត្រីភេទទន់ខ្សោយ។ លើសពីនេះទៅទៀត សម្ដេចតេជោថែមទាំងបានដាក់បទបញ្ជាឱ្យមានការអនុវត្តច្បាប់ឱ្យបានម៉ឺងម៉ាត់ ជាពិសេសគឺដាក់ទោសជាប់ពន្ធនាគារអស់មួយជីវិតចំពោះជនរំលោភសេពសន្ថវៈ៕

RAC Media | លឹម សុវណ្ណរិទ្ធ

  ថ្ងៃចន្ទ, 11 មីនា 2019 ម៉ោង 11:10 AM

«រាជបណ្ឌិត្យសភាកម្ពុជា បង្ហាញពីរបកគំហើញសិលាចារឹកថ្មីមួយនៅវត្តពោធិមុនី»

កាលពីពេលថ្មីៗ កន្លងទៅនេះ ក្រុមអ្នកស្រាវជ្រាវនៃរាជបណ្ឌិត្យសភាកម្ពុជា បានចុះទៅសិក្សាពីសិលាចារឹកថ្មីមួយដោយផ្ទាល់នៅវត្តពោធិមុនី ហៅវត្តស្វាយចេកថ្មី ដែលសិ្ថតនៅក្នុងភូមិស្វាយចេក ឃុំស្វាយចេក ស្រុករំដួល ខេត្តស្វាយរៀង ដែលមានចម្ងាយប្រមាណជា​១៣គីឡូម៉ែត្រ​ ពីទីរួមខេត្ត។ 

លោកបណ្ឌិត មាឃ បូរ៉ា មន្ត្រីវិទ្យាស្ថានភាសាជាតិ ឯកឧត្តមបណ្ឌិត សន ពៅ អនុប្រធានក្រុមប្រឹក្សាជាតិភាសាខ្មែរ និងកញ្ញា ពេជ្រ ណាទីន បានចុះទៅដល់ទីកន្លែង បន្ទាប់ពីទទួលបានដំណឹងពីលោក លាង សុភាព ប្រធានលេខាធិការដ្ឋាននៃក្រុមប្រឹក្សាជាតិភាសាខ្មែរ អំពីសិលាចារឹកមួយផ្ទាំងនេះ។ 

បើតាមសង្ឃដីការបស់ព្រះចៅអធិការវត្តពោធិមុនី ព្រះនាម គង់ សំណាង ថា ពីតជាសិលាចារឹកនោះពិតប្រាកដមែន ហើយព្រះអង្គបានចាក់សោរក្សាការពារទុកទៅហើយ។ រហូតដល់ថ្ងៃទី២ ខែមីនា ទើបក្រុមការងាររបស់លោកបណ្ឌិត មាឃ បូរ៉ា បានដឹកនាំនិស្សិតនៃវិទ្យាស្ថានសង្គមសាស្ត្រ និងបច្ចេកវិទ្យា បានចុះទៅពិនិត្យសិលាចារឹកនេះ សាជាថ្មី។

បើតាមការអធិប្បាយរបស់លោកបណ្ឌិត មាឃ បូរ៉ា បានឱ្យដឹងថា សិលាចារឹកនេះ ចារនៅលើគោលសីមាថ្មភក់ពណ៌ក្រហម បើពិនិត្យចំពីមុខ សិលាចារឹកនេះ មានកម្ពស់ ០,៥៨ម៉ែត្រ ទទឹង ០,៤៥ម៉ែត្រ និងកម្រាស់ថ្ម ០,២៩ម៉ែត្រ។ សិលាចារឹកនេះ សរសេរជាភាសាខ្មែរទម្រង់បែបអក្សរជ្រៀង មាន១៦បន្ទាត់ ដែលចុះកាលបរិច្ឆេទឆ្នាំ៨៥៧នៃមហាសករាជ ត្រូវនឹងឆ្នាំ៩៣៥នៃគ្រិស្តសករាជ គឺស្ថិតក្នុងរាជ្យរបស់ព្រះបាទ ជ័យវរ្ម័នទី៤ (៩២៤-៩៤១ គ.ស.) ដែលទ្រង់មានព្រះនាមក្នុងពេលសោយរាជ្យថា «ធូលីព្រះបាទធូលីជេងព្រះកម្រតេងអញ ជយវម្ម៌ទេវៈ» និងបច្ឆាមរណនាមរបស់ព្រះអង្គ គឺព្រះបាទបរមសិវបទ។

សូមអំពីខ្លឹមសារនៃសិលាចារឹកនេះ តាមរយៈគេហទំព័រ៖ http://rac.apppeppers.com/royal-academy/research/attachments/original/82.pdf?1552272341

RAC Media

  ថ្ងៃចន្ទ, 11 មីនា 2019 ម៉ោង 10:19 AM

«សម្ដេចតេជោនាយករដ្ឋមន្ត្រី លើកឡើងអំពីលទ្ធភាពដែលកម្ពុជាគួរមានទោសប្រហារជីវិត»

ចុះផ្សាយថ្ងៃទី១០ ខែមីនា ឆ្នាំ២០១៩

ភ្នំពេញ៖ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាបានលើកឡើងនូវបំណងរបស់សម្ដេច ក្នុងការធ្វើប្រជាមតិដើម្បីឈានទៅស្នើសុំព្រះមហាក្សត្រធ្វើវិសោធនកម្មរដ្ឋធម្មនុញ្ញកម្ពុជា បើក​ឱ្យមានទោសប្រហារជីវិតឡើងវិញ។ នេះជាការថ្លែងរបស់សម្ដេចតេជោប្រមុខរាជរដ្ឋាភិបាលកម្ពុជា នៅក្នុងពិធីជួបសំណេះសំណាលសួរសុខទុក្ខជាមួយគ្រូៗ យុវនារីនិងកុមារ រងគ្រោះនៅមជ្ឈមណ្ឌលបណ្ដុះបណ្ដាលវិជ្ជាជីវៈ និងស្ដារនីតិសម្បទាយុវនារី អាហ្វេស៊ីប (AFESIP) ទុំឌី ដែលស្ថិតនៅភូមិ២៤ សង្កាត់ព្រៃស ខណ្ឌដង្កោ រាជធានីភ្នំពេញ។

សម្ដេចតេជោ បានលើកឡើងអំពីលទ្ធភាព ក្នុងការធ្វើវិសោធនកម្មរដ្ឋធម្មនុញ្ញ បើកឱ្យមានការកាត់ទោសប្រហារជីវិត ទៅលើជនណាដែលរំលោភទៅលើកូនបង្កើតរបស់ខ្លួន ជីតារំលោភចៅខ្លួនឯង ដែលគួរតែកម្រិតទោសប្រហារជីវិត។ សម្ដេចថា នេះគ្រាន់តែជាការគិតរបស់សម្តេចតែប៉ុណ្ណោះ ហើយរឿងធ្វើវិសោធនកម្មរដ្ឋធម្មនុញ្ញ មិនអាចធ្វើតាមសំណើរបស់នាយករដ្ឋមន្ត្រី ឬក៏សមាជិករដ្ឋសភាដែលធ្វើជាសេចក្ដីស្នើច្បាប់ សេចក្ដីព្រាងច្បាប់នោះទេ គឺប្រហែលជាដើរដល់ការធ្វើប្រជាមតិតើគួរតែមានទោសប្រហារជីវិតឡើងវិញឬក៏អត់? ប៉ុន្តែទោសប្រហារជីវិតនេះ គួរតែកំណត់ត្រឹមជីតារំ​លោភ​ចៅ ឳពុករំលោភកូនខ្លួនឯង ឳពុកមារំលោភលើក្មួយខ្លួនឯង។ នេះបើតាមប្រសាសន៍របស់សម្ដេចតេជោប្រមុខរាជរដ្ឋាភិបាលកម្ពុជា។

សម្ដេចបានបន្តថា នេះគ្រាន់តែជាការគិតរបស់សម្ដេចប៉ុណ្ណោះ ដោយសម្ដេចនឹងមិនប្រើអំណាចដើម្បីស្នើសុំព្រះ​មហាក្សត្រ ដើម្បីនឹងធ្វើវិសោធនកម្មរដ្ឋធម្មនុញ្ញបើកឱ្យមានទោសប្រហារជីវិតឡើងវិញទេ ហើយសម្ដេចក៏នឹងមិនស្នើសុំសមាជិករដ្ឋសភាដើម្បីស្នើសុំធ្វើវិសោធនកម្មរដ្ឋធម្មនុញ្ញដែរ ដែលការនេះគឺចាំបាច់ត្រូវធ្វើប្រជាមតិទូទាំងប្រទេស ដើម្បីសម្រេចថាត្រូវធ្វើវិសោធនកម្មរដ្ឋធម្មនុញ្ញឬក៏អត់?

គួរបញ្ជាក់ផងដែរថា ក្រោយបញ្ចប់សង្គ្រាមជាង៣ទសវត្សរ៍នៅកម្ពុជា នៅក្នុងសម័យព្រះរាជាណាចក្រទី២ រដ្ឋធម្មនុញ្ញនៃព្រះរាជាណាចក្រកម្ពុជា ត្រង់ជំពូកទី៣ អំពីសិទ្ធិ និង ករណីយកិច្ចរបស់ប្រជាពលរដ្ឋខ្មែរ មាត្រា ៣២ បានចែងថា « ជនគ្រប់រូប មានសិទ្ធិរស់រានមានជីវិត មានសេរីភាពនិងមានសន្តិសុខផ្ទាល់ខ្លួន។ ទោសប្រហារជីវិតមិនត្រូវឱ្យមានឡើយ»។

បើក្រឡេកមកមើលស្ថានភាពសង្គមក្នុងពេលបច្ចុប្បន្នវិញ សីលធម៌សង្គមហាក់បីបានធ្លាក់ចុះក្នុងកម្រិតមួយដែលគួរឱ្យព្រួយបារម្ភ ទាក់ទងទៅនឹងការរំលោភសេពសន្ថវៈពីសំណាក់ឳពុកចុង ឳពុកមា រហូតឳពុកនិងជីតាបង្កើត ទៅ​លើកូនដើម ក្មួយបង្កើត កូននិងចៅបង្កើតជាដើម ក្នុងរូបភាពប្រៀបដូចជាសត្វតិរច្ឆានមិនស្គាល់សាច់ញាតិរបស់ខ្លួន ដែលបានបន្សល់នូវសោកនាដកម្មដល់ជនរងគ្រោះដែលភាគច្រើនជាអនីតិជន កើតមានជម្ងឺផ្លូវចិត្ត បាត់បង់ស្មារតីម្ចាស់ការខ្លួនឯង អស់សង្ឃឹមក្នុងជីវិត មិនអាចប្រាស្រ័យទាក់ទងជាធម្មតាជាមួយអ្នកដទៃ ដែលមានផលប៉ះពាល់ដល់ការរស់នៅនិងលូតលាស់របស់កុមាររយៈពេលយូរអង្វែង ឬរហូតដល់ពេញមួយជីវិត ដែលអាចនឹងបង្កទៅជាវិបត្តិសង្គមធ្ងន់ធ្ងរមួយចំពោះអនាគតជនរងគ្រោះទាំងនោះ។

ហេតុនេះ ការដាក់កំហិតទោសទណ្ឌឱ្យបានធ្ងន់ធ្ងរទៅលើបុគ្គលទាំងឡាយដែលបានប្រព្រឹត្តអំពើអសីលធម៌និងគ្មានមនុស្សធម៌ខាងលើនេះ វាគឺជាការចូលរួមចំណែកយ៉ាងសំខាន់ក្នុងការបង្ការ ទប់ស្កាត់ និងឈានទៅលុបបំបាត់នូវការធ្លាក់ចុះកាន់តែខ្លាំងនៃសីលធម៌សង្គម ដើម្បីបញ្ចៀសនូវផលវិបាកដែលកើតចេញពីទង្វើដែលប្រៀបដូចតិរច្ឆានខាងលើនេះ។

RAC Media | លឹម សុវណ្ណារិទ្ធ

  ថ្ងៃអាទិត្យ, 10 មីនា 2019 ម៉ោង 02:09 PM

សរុបព័ត៌មានប្រចាំសប្តាហ៍៖ «បច្ចេកសព្ទចំនួន ៧ ត្រូវបានអនុម័ត នៅសប្តាហ៍ទី១ ក្នុងខែមីនា ឆ្នាំ២០១៩ ដោយក្រុមប្រឹក្សាជាតិភាសាខ្មែរ(ក.ជ.ភ.ខ)នៃរាជបណ្ឌិត្យសភាកម្ពុជា»

បច្ចេកសព្ទចំនួន 0៧ ត្រូវបានអនុម័ត នៅសប្តាហ៍ទី១ ក្នុងខែមីនា  ឆ្នាំ២០១៩នេះ​ ក្នុងនោះមាន៖

- បច្ចេកសព្ទគណៈ កម្មការអក្សរសិល្ប៍  ចំនួន០២ពាក្យ ដែលបានបន្តប្រជុំពិនិត្យ ពិភាក្សា និងអនុម័ត កាលពីថ្ងៃអង្គារ ៥រោច ខែមាឃ ឆ្នាំច សំរឹទ្ធិស័ក ព.ស.២៥៦២មានដូចជា ១. អត្ថន័យ និង២. ប្រធានរឿង។

- បច្ចេកសព្ទគណ:កម្មការគីមីវិទ្យា និង រូបវិទ្យា ចំនួន០៥ ពាក្យ ដែលបានបន្តប្រជុំពិនិត្យ ពិភាក្សានិងអនុម័ត កាលពីថ្ងៃពុធ ១កើត ខែផល្គុន ឆ្នាំច សំរឹទ្ធិស័ក ព.ស.២៥៦២ មានដូចជា ១. លោហកម្ម ២. លោហសាស្ត្រ ៣. អ៊ីដ្រូសែន ៤.​ អេល្យ៉ូម ៥. បេរីល្យ៉ូម។

សទិសន័យ៖

១. អត្ថន័យ  អ. content បារ. Fond(m.) ៖ ខ្លឹមសារ ប្រយោជន៍ គតិ គំនិតចម្បងៗ ដែលមានសារៈទ្រទ្រង់អត្ថបទនីមួយៗ។
នៅក្នងអត្ថន័យមានដូចជា ប្រធានរឿង  មូលបញ្ហារឿង ឧត្តមគតិរឿង ជាដើម។
២. ប្រធានរឿង អ. theme បារ. Sujet(m.)៖ ខ្លឹមសារចម្បងនៃរឿងដែលគ្របដណ្តប់លើដំណើររឿងទាំងមូល។ ឧទហរណ៍ ប្រធានរឿងនៃរឿងទុំទាវគឺ ស្នេហាក្រោមអំណាចផ្តាច់ការ។
៣. លោហកម្ម អ. metallurgy  បារ. Métallurgie(f.) ៖ បណ្តុំវិធី ឬបច្ចកទេស ចម្រាញ់ យោបក ឬស្ល លោហៈចេញពីរ៉ែ។
៤. លោហសាស្ត្រ អ. mettalography បារ. métallographies ៖ ការសិក្សាពីលោហៈ ផលតិកម្ម បម្រើបម្រាស់ និងទម្រង់នៃលោហៈ និងសំលោហៈ។
៥. អ៊ីដ្រូសែន អ. hydrogen បារ. hydrogen (m.)៖ ធាតុគីមីទី១ ក្នុងតារាងខួប ដែលមាននិមិត្តសញ្ញា H ជាអលោហៈ មានម៉ាសអាតូម 1.007940. ខ.អ។
៦.​ ​​អេល្យ៉ូម អ.​ helium បារ. hélium (m.) ៖ ធាតុគីមីទី២ ក្នុងតារាងខួប ដែលមាននិមិត្តសញ្ញា He ជាឧស្ម័នកម្រ មានម៉ាសអាតូម 4.0026 ខ.អ។
៧. បេរីល្យ៉ូម អ. beryllium  បារ. Beryllium(m.) ៖ ធាតុគីមីទី៤ ក្នុងតារាងខួប ដែលមាននិមិត្តសញ្ញា Be មានម៉ាសអាតូម 1.012182 ខ.អ។ បេរីល្យ៉ូមជាលោហៈអាល់កាឡាំងដី/ អាល់កាលីណូទែរ៉ឺ និងមានលក្ខណៈអំហ្វូទែ។

RAC Media

  ថ្ងៃសុក្រ, 08 មីនា 2019 ម៉ោង 02:05 PM

«ប្រជុំពិនិត្យ ពិភាក្សា និង អនុម័តបច្ចេកសព្ទគណ:កម្មការគីមីវិទ្យា និង រូបវិទ្យា»

ថ្ងៃពុធ ១កេីត ខែផល្គុន ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី០៦ ខែមីនា ឆ្នាំ២០១៩​​ក្រុមប្រឹក្សាជាតិភាសាខ្មែរ ក្រោមធិបតីភាពឯកឧត្តមបណ្ឌិត ហ៊ាន សុខុម បានបន្តដឹកនាំប្រជុំពិនិត្យ ពិភាក្សា និង អនុម័តបច្ចេកសព្ទគណ:កម្មការគីមីវិទ្យា និង រូបវិទ្យា បានចំនួន០៥ពាក្យ ដូចខាងក្រោម៖

RAC Media

  ថ្ងៃព្រហស្បតិ៍, 07 មីនា 2019 ម៉ោង 09:04 PM