រាជបណ្ឌិត្យសភាកម្ពុជា
Royal Academy of Cambodia
Royal Academy of Cambodia
Pensonic Holdings Bhd គឺជាក្រុមហ៊ុនដែលផលិតសម្ភារប្រើប្រាស់របស់ម៉ាឡេស៊ី ហើយក្រុមហ៊ុននេះមានគោលបំណងពង្រីកសាខានៅក្នុងប្រទេសកម្ពុជា ដោយបច្ចុប្បន្នក្រុមហ៊ុន Pensonic កំពុងសម្លឹងមើល ខេត្តបាត់ដំបង ខេត្តសៀមរាប ខេត្តកំពង់ស្ពឺ និងខេត្តកំពង់ចាម ក្នុងឆ្នាំ២០១៩នេះ។ នេះបើយោងតាមការផ្សាយព័ត៌មានរបស់គេហទំព័រភ្នំពេញប៉ុស្តិ៍ នៅថ្ងៃទី៥ ខែកុម្ភៈ ឆ្នាំ២០១៩។
បើយោងតាមប្រភពព័ត៌មានដដែលបានបញ្ជាក់ថា ក្រុមហ៊ុននេះមានអាជីវកម្មស្នូលរួមមាន ការផលិត ការនាំចូល ការនាំចេញ ការចែកចាយសម្រាប់ទីផ្សារក្នុងស្រុក និងអន្តរជាតិ ហើយក្រុមហ៊ុននេះផលិតនិងចែកចាយសម្ភារអគ្គិសនី សម្ភារប្រើប្រាស់ក្នុងផ្ទះ មានដូចជា សម្ភារផ្ទះបាយ ម៉ាស៊ីនបោកខោអាវ ម៉ាស៊ីនត្រជាក់ គ្រឿងអេឡិចត្រូវនិកគ្រប់ប្រភេទសម្រាប់ប្រើប្រាស់នៅក្នុងអង្គប្រជុំ សិក្ខាសាលាឬក្រុមហ៊ុន ហើយក៏មានអំពូលភ្លើងល្អប្រណីតគ្រប់ប្រភេទ ហើយជាពិសេសទៀតនោះផលិតផលរបស់ក្រុមហ៊ុន Pensonic ត្រូវបាននាំចេញទៅកាន់៣០ប្រទេសនៅទូទាំងពិភពលោក។
RAC Media | ផាញ់ សារឿន
ថ្ងៃពុធ, 06 កុម្ភៈ 2019 ម៉ោង 11:30 AM
ភ្នំពេញ៖ នាវាចំនួន ២ គ្រឿងរបស់កងកម្លាំងស្វ័យការពារជើងទឹកជប៉ុនដែលមានឈ្មោះថា “សេតូយុគិ” និង“ស៊ីម៉ាយុគិ” ដឹកនាំដោយវរនាវីឯក យ៉ូស៊ីយូគី ណាកាហ្គាម៉ា មេបញ្ជាការកងពលធំហ្វឹកហ្វឺនលេខ១ នៃកងកម្លាំងស្វ័យការពារជើងទឹកជប៉ុននឹងមកធ្វើទស្សនកិច្ចនៅប្រទេសកម្ពុជានៅថ្ងៃខែខាងលើនាក្នុងអំឡុងពេលនៃដំណើរហ្វឹកហ្វឺនលើលំហសមុទ្រ ហើយនាវាចំនួន២គ្រឿងរបស់កងកម្លាំងស្វ័យការពារជើងទឹកជប៉ុន នឹងប្រារឰឡើងនៅថ្ងៃទី ២៥ ខែកុម្ភៈ ឆ្នាំ២០១៩ ចាប់ពីម៉ោង ១០:៣០ ព្រឹក នៅឯផែចាស់នៃកំពង់ផែស្វយ័តក្រុងព្រះសីហនុ។ នេះបើតាមប្រភពពីក្រសួងព័ត៌មានដែលបានចុះផ្សាយនៅថ្ងៃទី៥ ខែ កុម្ភៈ ឆ្នាំ២០១៩។
យោងតាមប្រភពដដែលបានបញ្ជាក់ថា គោលបំណងនៃដំណើរទស្សនកិច្ចនេះ គឺដើម្បីពង្រឹងទំនាក់ទំនងមិត្ដភាពរវាងប្រទេសជប៉ុន និងព្រះរាជាណាចក្រកម្ពុជា តាមរយៈកម្មវិធីផ្លាស់ប្ដូរផេ្សងៗ ក៏ដូចជាដើម្បីផ្ដល់ឱកាសឱ្យនាយនាវិកកម្មសិក្សាការីចំនួន១០៩រូបដែលទើបបានបពា្ចប់ការសិក្សាបានឈ្វេងយល់អំពីវប្បធម៌ និងវិស័យយោធានៅព្រះរាជា ណាចក្រកម្ពុជា ។
RAC Media
ថ្ងៃពុធ, 06 កុម្ភៈ 2019 ម៉ោង 11:18 AM
ភ្នំពេញ៖ វត្តមានប្រជាជនចិននៅកម្ពុជា មានចាប់តាំងពីចុងសតវត្សរ៍ទី១៣ រហូតមកដល់បច្ចុប្បន្ន។ អន្ដោប្រវេសន៍ជនជាតិចិនដែលមកដល់កម្ពុជាដំបូងៗ ភាគច្រើនបំផុតជាបុរស ហើយពួកគេបានយកស្ត្រីខ្មែរធ្វើជាភរិយា។ កូនចៅជំនាន់ក្រោយរបស់ពួកគេ បានធ្វើសមាហរណកម្មយ៉ាងលឿនចូលទៅក្នុងសហគមន៍ខ្មែរ តាមរយៈការបញ្ចូលខ្លួនឯង ជាលក្ខណៈសង្គមនិងសេដ្ឋកិច្ច ទៅក្នុងសហគមន៍កសិកម្មរបស់ប្រជាជនខ្មែរបុរាណ។ ទោះបីជាយ៉ាងណាក៏ដោយ ក៏អន្តោប្រវេសន៍ចិនមួយចំនួន បានរក្សាទុកការប្រតិបត្តិតាមមីង(Ming) នូវការរក្សាម៉ូតសក់បែបចិនរហូតដល់សតវត្សទី១៨។ លើសពីនេះទៀត ពួកគេក៏បានថែរក្សាប្រពៃណី ទំនៀមទម្លាប់របស់ខ្លួនដែរ ដូចជា ប្រពៃណីបុណ្យចូលឆ្នាំចិន បុណ្យសែនលោកខែ បុណ្យសែនក្បាលទឹក បុណ្យឆេងម៉េង ជាដើម។ ក្រោយមក ជនជាតិភាគតិចចិន ឬ អន្តោប្រវេសន៍ចិន មិនគ្រាន់តែអាចរក្សាប្រពៃណី ទំនៀមទម្លាប់របស់ខ្លួនបានប៉ុណ្ណោះទេ ពួកគេថែមទាំងបានជះឥទ្ធិពលប្រពៃណីរបស់ខ្លួនទៅលើសង្គមខ្មែរវិញ និងបន្ថែមពីលើនេះ ពួកគេក៏បានជះឥទ្ធិពលផ្នែកពាណិជ្ជកម្ម សេដ្ឋកិច្ច នយោបាយ និងវិស័យផ្សេងៗផងដែរ។
ប្រជាជនចិនដែលកំពុងមានវត្តមាននៅលើទឹកដីកម្ពុជា ទាំងចាស់ទាំងថ្មី មានមុខរបរខុសៗគ្នា ដូចជា អ្នកការទូត ពាណិជ្ជករ វិនិយោគគិន វិស្វករ កម្មករជំនាញ ពលករ គ្រូបង្រៀនភាសាចិន អ្នកផ្សាយសាសនា។ល។ ទោះបីជាពួកគេមានចំនួនមិនច្រើនក៏ដោយ បើប្រៀបធៀបនឹងចំនួនប្រជាជនសរុបរបស់កម្ពុជា ក៏ពួកគេបានចូលរួមក្នុងវិស័យផ្សេងៗភាគច្រើនក្នុងសង្គមខ្មែរដែរ។ ជាទូទៅ ពួកគេមិនត្រូវបានរើសអើង ឬមើលងាយដោយពលរដ្ឋខ្មែរទេ។ ផ្ទុយទៅវិញ ពួកគេទទួលបានការចូលចិត្ត និងការឱ្យតម្លៃពីសង្គមខ្មែរ។ ដូចជា មានការលើកឡើងថា «កុំឈ្លោះនឹងស្រី កុំក្ដីនឹងចិន», «ចិនដេញខ្មែរ ខ្មែរដេញខ្មោច» ដែលមានន័យថា បើឈ្លោះនឹងចិន កម្រឈ្នះចិនណាស់ ហើយម្យ៉ាងទៀត ជនជាតិខ្មែរបានត្រឹមតែកាប់ឆ្ការរានដីព្រៃមុនប៉ុណ្ណោះ ទីបំផុត ជនជាតិចិនបានទិញយកកន្លែងល្អៗអស់ ឯខ្មែរក៏បន្តទៅកាប់រានព្រៃថ្មីទៀតជាបន្តបន្ទាប់។ លើសពីនេះទៀត ពួកគេបានដើរតួនាទីនាំមុខគេនៅក្នុងវិស័យពាណិជ្ជកម្ម ក៏ដូចជាវិស័យនយោបាយនៅកម្ពុជាផងដែរ។
យោងតាមការកត់សម្គាល់ នៅដំណាក់កាលដំបូងៗ ជនជាតិភាគតិចចិន ឬអន្តោប្រវេសន៍ចិនទទួលឥទ្ធិពលច្រើនពីសង្គមខ្មែរ ដូចក្នុងករណីពួកគេបានរៀបការជាមួយជនជាតិខ្មែរ និងខិតខំធ្វើសមាហរណកម្មចូលក្នុងសង្គមទូទៅនិងសហគមន៍កសិកម្មខ្មែរបុរាណ ប៉ុន្តែក្នុងរយៈពេលក្រោយមក យើងបានសង្កេតឃើញថា សង្គមខ្មែរក៏បានទទួលឥទ្ធិពលពីជនជាតិភាគតិចចិន ឬអន្តោប្រវេសន៍ចិនវិញដែរ។ ជាពិសេស លើវិស័យពាណិជ្ជកម្ម។ យោងតាមតថភាពសង្គមខ្មែរទាំងសម័យបុរាណ និងសម័យទំនើប បង្ហាញឱ្យឃើញថា ប្រជាជនខ្មែរ មិនសូវពូកែខាងពាណិជ្ជកម្មដូចជនជាតិចិនទេ។
ក្នុងសង្គមខ្មែរ អ្នកលក់ដូរ ឬពាណិជ្ជករ ទាំងតូច ទាំងធំ ភាគច្រើន ជាជនជាតិភាគតិចចិន ឯជនជាតិខ្មែរវិញចូលចិត្តប្រកបរបរកសិកម្ម និងធ្វើការងាររាជការ។ បើទោះបីជាក្រោយមក មានជនជាតិខ្មែរខ្លះ បានប្រកបរបស់ជួញដូរដូចជនជាតិភាគតិចចិនក៏ដោយ ក៏គេនៅតែហៅខ្មែរទាំងនោះថាចិនដែរ។
បច្ចុប្បន្ន ពលរដ្ឋខ្មែរដើមកំណើតចិន ចិនកាត់ខ្មែរ និងអន្តោប្រវេសន៍ចិនដទៃទៀតដែលកំពុងមានវត្តមាននៅកម្ពុជា បានចូលរួមយ៉ាងសកម្មក្នុងវិស័យសេដ្ឋកិច្ចកម្ពុជា។ ពួកគេមួយចំនួនជាម្ចាស់ភាគហ៊ុនមួយចំណែកធំក្នុងវិស័យសេដ្ឋកិច្ច និងពាណិជ្ជកម្ម ដូចជា ជាម្ចាស់រោងច្រក ម្ចាស់សហគ្រាស និងម្ចាស់អាជីវកម្មធំៗនៅកម្ពុជា។ ជារួម ភាគច្រើននៃពួកគេ មានឥទ្ធិពលពិសេសនៅក្នុងវិស័យធនាគាររបស់កម្ពុជាដែលជាសហគ្រាសផ្តល់ប្រាក់កម្ចី សហគ្រាសប្ដូរប្រាក់ ស្ថាប័នហិរញ្ញវត្ថុខ្នាតតូច និងសហគ្រាសពាក់ព័ន្ធដទៃទៀត។
លើសពីនេះទៀត ផ្ដើមចេញពីការមានលុយកាក់ច្រើន ការមានទីលំនៅក្នុងរាជធានី ទីក្រុង និងទីប្រជុំជន នាំឱ្យជនជាតិភាគតិចចិន ឬជនជាតិចិនកាត់ខ្មែរ មានឱកាសរៀនសូត្របានខ្ពង់ខ្ពស់ មានឱកាសធ្វើដំណើរបានច្រើនកន្លែងដែលជាកត្តានាំឱ្យពួកគេមានចំណេះដឹងខ្ពស់ និងមានការយលដឹងជ្រៅជ្រះ។ ដោយសារកត្តាទាំងអស់នេះ រួមផ្សំជាមួយឱកាសផ្សេងៗ មានដូចជាអំពើពុករលួយជាដើម នាំឱ្យជនជាតិចិនកាត់ខ្មែរទទួលបានតួនាទីសំខាន់ៗក្នុងរដ្ឋាភិបាល និងក្នុងការងាររាជការទូទៅ ជាពិសេសការងារមួយចំនួនដែលគេនិយមហៅថាការងារល្អ ឬការងារកន្លែងខ្លាញ់ ពោលគឺប្រភេទការងារទាំងឡាយដែលអាចរកកម្រៃ ឬចំណូលក្រៅច្បាប់បានច្រើន ដូចជាការងារគយ ការងារពន្ធដារ ការងារហិរញ្ញវត្ថុ ជាដើម។
ជាទូទៅ ឥទ្ធិពលក្នុងសង្គមមួយ វាតែងតែជះពីទីក្រុងទៅជនបទ ពីអ្នកមានទៅអ្នកក្រ ពីអ្នកធំទៅអ្នកតូចពីស្ថាប័នទៅបុគ្គល ពីអ្នកមានចំណេះដឹងច្រើនទៅអ្នកមានចំណេះដឹងតិច។ល។ ហេតុផលនេះហើយបានជាជនជាតិភាគតិចចិន ឬជនជាតិចិនកាត់ខ្មែរ ថ្វីបើពួកគេមានចំនួនតិច ប៉ុន្តែដោយសារតែពួកគេមានសក្ដានុពលខាងពាណិជ្ជកម្ម សេដ្ឋកិច្ច ហិរញ្ញវត្ថុ និងចំណេះដឹង, នាំឱ្យពួកគេមានឥទ្ធិពលទាំងក្នុងសង្គមនយោបាយ និងវិស័យដទៃទៀត។
ផ្ដើមចេញពីនេះ នាំឱ្យភាសាចិន ភាពយន្តចិន និងប្រពៃណីចិន ដូចជាបុណ្យចូលឆ្នាំចិន បុណ្យសែនលោកខែ បុណ្យសែនក្បាលទឹក បុណ្យឆេងម៉េង ជាដើម មិនគ្រាន់តែមានជីវិត និងមានឥទ្ធិពលក្នុងសហគមន៍ជនជាតិភាគតិចចិន ជនជាតិចិនកាត់ខ្មែរ និងអន្តោប្រវេសន៍ចិននៅកម្ពុជាប៉ុណ្ណោះទេ ប៉ុន្តែ វាក៏មានឥទ្ធិពលលើប្រជាជនខ្មែរដែរ។ ជាក់ស្ដែង សព្វថ្ងៃ ទូរទស្សន៍ខ្មែរស្ទើរតែទាំងអស់បញ្ចាំងភាពយន្តចិន ហើយប្រជាជនខ្មែរភាគច្រើនក៏ចូលចិត្តទស្សនាភាពយន្តចិនដែរ។ មិនតែប៉ុណ្ណោះ ប្រជាជនខ្មែរសុទ្ធមួយចំនួនក៏បានប្រារព្ធពិធីប្រពៃណីរបស់ចិនដូចដែលបានរៀបរាប់ខាងលើនេះដែរ ជាពិសេស ការសែនព្រេនក្នុងពីធីបុណ្យចូលឆ្នាំចិន និងការឈប់សម្រាកពេលចូលឆ្នាំចិន។ ហេតុផលមួយក្នុងចំណោមហេតុផលដទៃទៀត ត្រូវបានប្រជាជនខ្មែរសុទ្ធដែលទទួលយកឥទ្ធិពលប្រពៃណីចិននោះ អះអាងថា«ការកាន់ប្រពៃណីដូចចិន ដើម្បីឱ្យរកស៊ីមានបានដូចគេដែរ»។
ម្យ៉ាងទៀត ដោយសារទំនាក់ទំនងល្អរវាងរដ្ឋាភិបាលកម្ពុជា និងរដ្ឋាភិបាលចិន គោលនយោបាយទីផ្សារសេរីរបស់កម្ពុជា និងគោលការណ៍ប្រជាធិបតេយ្យ គេបានសង្កេតឃើញថា សហគមន៍ជនជាតិភាគតិចចិន ជនជាតិចិនកាត់ខ្មែរ និងអន្តោប្រវេសន៍ចិន មិនគ្រាន់តែបានរស់នៅយ៉ាងសុខសាន្តប៉ុណ្ណោះទេ ពួកគេថែមទាំងបានចងក្រងគ្នាជាសមាគម បង្កើតសាលារៀនភាសាចិន ព្រះវិហារចិន ភោជនីយដ្ឋានចិន វិទ្យុផ្សាយសម្លេងជាភាសាចិន និងក្រុមហ៊ុនចិនជាច្រើនទៀតកំពុងរកស៊ីនៅស្រុកខ្មែរ ដូចជាក្រុមហ៊ុនវិនិយោគខាងរោងចក្រកាត់ដេរសម្លៀកបំពាក់ រោងចក្រកាត់ស្បែកជើង សហគ្រាសសំណង់ស្ពានថ្នល់ វារីអគ្គិសនី និងការរុករករ៉ែ ជាដើម។
ជាសន្និដ្ឋាន ឥទ្ធិពលរបស់ចិននៅកម្ពុជា ពិតជាមានលក្ខណៈលេចធ្លោគួរឱ្យកត់សម្គាល់ ទាំងវិស័យភាព-យន្ត សិល្បៈ វប្បធម៌ ប្រពៃណី ទំនៀមទម្លាប់ ភាសា សេដ្ឋកិច្ច ពាណិជ្ជកម្ម និងនយោបាយ ទាំងផ្ទៃក្នុងប្រទេស ក្នុងតំបន់ និងអន្តរជាតិ ដោយសារតែចិនជាមិត្តយុទ្ធសាស្រ្តគ្រប់ជ្រុងជ្រោយរបស់កម្ពុជាផង ចិនអ្នកផ្ដល់ជំនួយឱ្យកម្ពុជាធំជាងគេបំផុតផង ហើយទុនវិនិយោគរបស់វិស័យឯកជនចិននៅកម្ពុជាក៏ច្រើនជាងគេដែរ៕
អត្ថបទស្រាវជ្រាវទាំងស្រុងដោយ លោកបណ្ឌិត ឈត ប៊ុនថង ប្រធានផ្នែកទំនាក់ទំនងវប្បធម៌ អប់រំ និងទេសចរណ៍ នៃវិទ្យាស្ថានទំនាក់ទំនងអន្តរជាតិកម្ពុជា នៃរាជបណ្ឌិត្យសភាកម្ពុជា។
ថ្ងៃពុធ, 06 កុម្ភៈ 2019 ម៉ោង 11:08 AM
ខេត្តព្រះវិហារ៖ ថ្ងៃទី៥ ខែកុម្ភៈ ឆ្នាំ២០១៩ ឯកឧត្តមបណ្ឌិតសភាចារ្យ សុខ ទូច ប្រធានរាជបណ្ឌិត្យកម្ពុជា បានទទួលស្វាគមន៍ ដំណើរទស្សនកិច្ចរបស់លោក Surachat Khahinthapong ប្រធានសមាគមចិញ្ចឹមគោទឹកដោះ វ៉ាងណាំយិនប្រទេសថៃ និងក្រុមវិស្វករជាន់ខ្ពស់ មកកាន់ឧទ្យានរាជបណ្ឌិត្យសភាកម្ពុជា តេជោសែន ឫស្សីត្រឹប នៅក្នុងភូមិសាស្ត្រស្រុកឆែប ខេត្ដព្រះវិហារ។ លោក Surachat Khahinthapong និងក្រុមការងារបានទៅទស្សនាពិនិត្យនិងសិក្សានៅទីតាំងសំខាន់ៗដូចជា ទីតាំងគម្រោងសាងសង់កសិដ្ឋានចិញ្ចឹមគោទឹកដោះ ទីតាំងសាងសង់រោងចក្រកែច្នៃទឹកដោះគោស្រស់ ទីតាំងដាំស្មៅសម្រាប់គោទឹកដោះ ទីតាំងស្រះ និងប្រព័ន្ធស្រោចស្រពចំការស្មៅ ព្រមទាំងស្ថានីយទ្បស្លដែកបុរាណ និងទីតាំងពិសិដ្ឋនៅត្រពាំងត្រឹប។
ក្នុងឱកាសនោះ ក្រុមការងារទាំងពីរភាគីក៏បានពិភាក្សាគ្នាយ៉ាងសកម្មអំពីវិធីសាស្ត្របច្ចេកទេស និងបញ្ហាសំខាន់សម្រាប់ការងារចិញ្ចឹមគោទឹកដោះ ដូចជា៖
-ការជ្រើសរើសពូជស្មៅឱ្យស័ក្ដិសមនឹងប្រភេទដី ហើយធន់នឹងអាកាសធាតុរដូវប្រាំង ដូចជាពូជស្មៅពីរប្រភេទថ្មីគឺ គីវី និងអាតាតាំ។
-ការរក្សាទុកពូជអំពៅ ដោយប្រើអង្គប់វាយដើមអំពៅ នៅដើមខែវស្សា ដោយប្រមូលបន្ទាប់ពីវាលូតលាស់បាន ៦០ថ្ងៃ។ ការធ្វើផ្អកអំពៅដែលនៅសល់។ ការដាំពោតបន្ថែមដែលឱ្យផលក្នុងរយៈពេល ៧៥ថ្ងៃ។
-ការពង្រីកទំហំផ្ទៃស្រះឱ្យបានកាន់តែធំដើម្បីស្រោចស្រពទឹកគ្រប់គ្រាន់។
-ការកែលំអផ្នែកខ្លះនៃរោងគោទឹកដោះ ដូចជា ស្នូកចំណី ធ្លាគោដើរ ទីតាំងអាងស្តុកទឹកផឹកសម្រាប់គោ និងទីតាំងលាងសំអាតគោ ព្រមទាំងការបែកចែកប្លុក។
-ការតម្លើងកម្លាំងថាមពលភ្លើងអគ្គិសនីបន្ថែមរហូត250KVA សម្រាប់រោងpasteurize និង50KVA សម្រាប់រោងរឹតទឹកដោះ។
ជារួម ភាគីថៃ លោក Surachat Khahinthapongបានវាយតម្លៃខ្ពស់ចំពោះដំណើរការទៅមុខរបស់ឧទ្យានរាជបណ្ឌិត្យ សភាកម្ពុជា តេជោសែនឫស្សីត្រឹប ប្រកបដោយឆន្ទៈមោះមុតចំពោះការងារចិញ្ចឹមគោទឹកដោះ និងកំណត់ការនាំចូល គោទឹកដោះដោយជោគជ័យនៅពេលខាងមុខឆាប់ៗឆ្នាំនេះ។ លោកបានបន្ថែមថា៖ «វាពិតជាមិនមានទីណាល្អជាងនៅឧទ្យានឫស្សីត្រឹប ដែលឯកឧត្តមបណ្ឌិតសភាចារ្យ អាចចិញ្ចឹមគោទឹកដោះបានផង និងអភិរក្សព្រៃធម្មជាតិបានថែមទៀត»។
RAC Media
ថ្ងៃពុធ, 06 កុម្ភៈ 2019 ម៉ោង 10:02 AM
កាលពីទី០១ ខែកុម្ភៈ ឆ្នាំ២០១៩ កន្លងទៅនេះ ឯកឧត្តម សូត្រ សំណាង ប្រតិភូរាជបណ្ឌិត្យសភាកម្ពុជា បានដឹកនាំក្រុមការងារ និងសិក្ខាកាមទាំង៧នាក់ទៅចូលរួមវគ្គបណ្តុះបណ្តាលជំនាញនៅកសិដ្ឋានចិញ្ចឹមគោវ៉ាងណាំយិន នៅខេត្តស្រះកែវ ប្រទេសថៃ។ ក្រុមសិក្ខាកាម នឹងចូលរួមវគ្គបណ្តុះបណ្តាលជំនាញចំនួន ៤ជំនាញសំខាន់ៗ គឺ៖
សូមបញ្ជាក់ដែរថា ការបញ្ជូនសិក្ខាកាមទៅចូលរួមវគ្គបណ្តុះបណ្តាលនៅកសិដ្ឋានចិញ្ចឹមគោទឹកដោះវ៉ាងណាំយីននេះដែរ គឺជាចំណែកមួយនៃគម្រោងការអភិវឌ្ឍន៍ និងចិញ្ចឹមគោ នៅក្នុងឧទ្យានរាជបណ្ឌិត្យសភាកម្ពុជា តេជោសែនឫស្សីត្រឹប នៅស្រុកឆែប ខេត្តព្រះវិហារ។ នៅពេលបញ្ចប់ការសិក្សាបំប៉នបន្ថែមពីប្រទេសថៃ សិក្ខាកាមទាំងអស់នឺងទទួលបានឱកាសការងារនៅក្នុងឧទ្យានឫស្សីត្រឹប។
RAC Media | ស្រី សីហា
ថ្ងៃចន្ទ, 04 កុម្ភៈ 2019 ម៉ោង 09:57 AM
ចុះផ្សាយថ្ងៃទី២ ខែកុម្ភៈ ឆ្នាំ២០១៩
ភ្នំពេញ៖ ក្នុងរយៈពេលប្រហែលជាមួយសប្ដាហ៍មកនេះ ទាំងអ្នកនយោបាយ អ្នកវិភាគ សកម្មជននយោបាយ និងប្រជាពលរដ្ឋខ្មែរមួយចំនួននៅក្នុងបណ្ដាញសង្គម Facebook បានផ្ដោតចំណាប់អារម្មណ៍ខ្លាំងទៅលើករណីវិបត្តិដែលកំពុងកើតមានឡើងនៅប្រទេសវេណេស៊ុយអេឡា។
ផ្ដើមចេញពីការបោះឆ្នោតជ្រើសរើសប្រធានាធិបតីវេណេស៊ុយអេឡា ដែលអវត្តមានអ្នកនយោបាយគណបក្សប្រឆាំងរបស់ប្រទេសនេះ វិបត្តិនយោបាយនិងវិបត្តិសេដ្ឋកិច្ចបានរុញច្រានប្រទេសនេះឱ្យធ្លាក់ចូលទៅក្នុងស្ថានការណ៍មួយដ៏គួរឱ្យព្រួយបារម្ភ។ នៅខណៈដែលប្រធានរដ្ឋសភា ដែលជាអ្នកនយោបាយវ័យក្មេងមួយរូប បានប្រកាសពុំទទួលស្គាល់លោក ម៉ាឌូរ៉ូ ប្រធានាធិបតីដែលទើបនឹងជាប់ឆ្នោតកាលពីឆ្នាំ២០១៨។ ប្រធានរដ្ឋសភារូបនេះបានប្រកាសខ្លួនថាជាប្រធានាធិបតីស្ដីទីរបស់ប្រទេសដែលស្ថិតនៅក្នុងតំបន់អាម៉េរិកឡាទីនមួយនេះ ហើយក៏ត្រូវបានទទួលស្គាល់ដោយបស្ចឹមប្រទេសនិងមហាអំណាចមួយចំនួនរហូតឈានដល់មានការប្រកាសឱ្យយោធានៃប្រទេសនេះធ្វើរដ្ឋប្រហារ ទម្លាក់លោកប្រធានាធិបតីប្រទេសនេះ ដោយមហាអំណាចសហរដ្ឋអាម៉េរិកថែមទៀតផង។
បើក្រឡេកមកមើលនៅកម្ពុជាវិញ អ្នកនយោបាយ និងអ្នកវិភាគមួយចំនួនបានទាញចំណាប់អារម្មណ៍មហាជន និងលើកជាការប្រៀបធៀបអំពីករណីដែលពួកគេបានចាត់ទុកថាវិបត្តិនៅវេណេស៊ុយអេឡាមានភាពដូចគ្នាជាមួយនឹងអ្វីដែលបានកើតឡើងនៅប្រទេសកម្ពុជាបច្ចុប្បន្ន ហើយអន្តរជាតិគួរតែដាក់សម្ពាធឬធ្វើការសម្រេចចិត្តនយោបាយណា មួយមកលើកម្ពុជាដូចដែលគេបានធ្វើទៅលើមេដឹកនាំប្រទេសវេណេស៊ុយអេឡា។
ជាការស្រាយបំភ្លឺទៅលើការលើកឡើងដោយខ្វះមូលដ្ឋានវិទ្យាសាស្ត្រដែលនឹងអាចធ្វើឱ្យសាធារណៈមតិទូទៅភាន់ច្រ ឡំខាងលើនេះ ឯកឧត្ដមបណ្ឌិតសភាចារ្យ សុខ ទូច បានបកស្រាយបញ្ជាក់អំពីការប្រៀបធៀបនេះថាជាការយល់ឃើញខុសឆ្គង និងពុំមានហេតុផលសមស្របទាល់តែសោះ។ នៅក្នុងការពន្យល់បកស្រាយនេះ ឯកឧត្ដមបណ្ឌិតសភា ចារ្យបានលើកឡើងនូវទិដ្ឋភាពចំនួន៦ដែលគេមិនអាចទាញករណីវិបត្តិនៅប្រទេសវេណេស៊ុយអេឡាមកប្រៀប ធៀបនឹងប្រទេសកម្ពុជាបានដែលក្នុងនោះរួមមាន៖
១. ផ្ទុយស្រឡះពីវេណេស៊ុយអេឡាទាំងស្រុង នៅកម្ពុជា ពុំធ្លាប់បានលើកកាលបរិច្ឆេទនៃការបោះឆ្នោតម្ដងណាឡើយ ដោយការបោះឆ្នោតត្រូវបានធ្វើឡើងជាទៀងទាត់និងទៅតាមការកំណត់ក្នុងរដ្ឋធម្មនុញ្ញ និងបានប្រព្រឹត្តទៅដោយរលូននៅរៀងរាល់អាណត្តិ ដែលខុសប្លែកពីការបោះឆ្នោតនៅវេណេស៊ុយអេឡា គឺពេលមានវិបត្តិទើបធ្វើការបោះឆ្នោត។
២. ការរំលាយគណបក្សប្រឆាំងនៅកម្ពុជា គឺឈរនៅលើអង្គហេតុនិងអង្គច្បាប់ដោយវីដេអូដែលមេដឹកនាំគណបក្សប្រឆាំងនិយាយនៅអូស្ត្រាលី បានបង្ហាញយ៉ាងច្បាស់ពីចេតនានិងបញ្ជាក់អំពីពិរុទ្ធភាពរបស់ខ្លួន។
៣. នៅកម្ពុជា បានអនុវត្តយ៉ាងខ្ជាប់ខ្ជួននូវឯករាជភាពនៃអំណាចទាំងបី (នីតិប្រតិបត្តិ នីតិបញ្ញត្តិ និងតុលាការ) ដោយស្របទៅតាមរដ្ឋធម្មនុញ្ញរបស់ប្រទេស។
៤. កម្ពុជាមិនមានវិបត្តិសេដ្ឋកិច្ចនោះទេ ហើយមិនត្រឹមតែប៉ុណ្ណោះរាជរដ្ឋាភិបាលថែមទាំងបានសម្រួលដល់ជីវភាពរបស់ពលរដ្ឋដោយរៀបចំអនុវត្តការបើប្រាក់បៀរវត្សរ៍នៅរៀងរាល់២សប្ដាហ៍ម្ដងថែមទៀតផង។
៥. រាជរដ្ឋាភិបាលកម្ពុជាបានផ្ដល់នូវប្រាក់ចូលនិវត្តន៍ជូនដល់កម្មករឱ្យបានដូចជាមន្ត្រីរាជការផងដែរ។
៦. ស្របពេលដែលសេដ្ឋកិច្ចកំពុងរីកចម្រើន ហើយពលរដ្ឋគ្រប់រូបសុទ្ធតែខិតខំធ្វើការងារនិងរកស៊ីទទួលទានដើម្បីមានថវិកាសម្រាប់ការចាយវាយ ប្រើប្រាស់និងទិញអចលនវត្ថុនិងទ្រព្យសម្បត្តិផ្សេងៗដូចជា រថយន្ត ដីធ្លី ដែលមានអ្នកខ្លះពុំមានលទ្ធភាពទិញទាំងស្រុងក៏បានធ្វើការបង់រំលោះដីធ្លី ផ្ទះសម្បែង តើមាននរណាដែលនឹងចូលរួមធ្វើបាតុកម្មដើម្បីដុតឡាននិងដីធ្លីរបស់គេ? ហេតុនេះហើយពុំមានពលរដ្ឋណាម្នាក់ចង់ឱ្យប្រទេសជាតិជួបប្រទះនឹង អស្ថិរភាពនោះឡើយ។
ជាមួយគ្នានោះដែរ ឯកឧត្ដមបណ្ឌិតសភាចារ្យ បានគូសបញ្ជាក់ឱ្យពលរដ្ឋធ្វើការពិចារណាថា នៅពេលដែលពលរដ្ឋបានផ្ដល់ទំនុកចិត្តដល់អតីតគណបក្សសង្គ្រោះជាតិតាមរយៈសន្លឹកឆ្នោត ដែលគណបក្សនេះទទួលបានរហូតដល់៥៥ អសនៈ តើគណបក្សបានធ្វើអ្វីខ្លះដើម្បីប្រជាពលរដ្ឋ? តើហេតុអ្វីបានជាមិនយកវេទិកានៅក្នុងរដ្ឋសភាជាតិ ដើម្បីដោះស្រាយបញ្ហា តាមរយៈការកោះហៅរដ្ឋមន្ត្រីនៃក្រសួងនីមួយៗដែលខ្លួនយល់ថាមិនបានបំពេញតួនាទីនិងភារកិច្ចការងារបានល្អទៅធ្វើការបំភ្លឺ? ហេតុអ្វីបានជាទៅយកវេទិការបរទេសទៅស្រែកនៅលើឆាកអន្តរជាតិ ហែកហួរអំពីបញ្ហាប្រទេសជាតិរបស់ខ្លួនឯងទៅវិញ?
RAC Media | លឹម សុវណ្ណរិទ្ធ
ថ្ងៃអាទិត្យ, 03 កុម្ភៈ 2019 ម៉ោង 08:46 PM
ភ្នំពេញ៖ គម្រោងអភិវឌ្ឍន៍វារីវប្បកម្ម សម្រាប់និរន្តភាពពាណិជ្ជកម្មនៅកម្ពុជានេះ ទទួលបានការគាំទ្រនូវថវិកាចំនួនជាង១៧លានដុល្លារអាម៉េរិកពីរដ្ឋាភិបាលសហរដ្ឋអាម៉េរិក ដើម្បីបង្កើន និងអភិវឌ្ឍន៍វារីវប្បកម្មទឹកសាបនៅកម្ពុជា នៅក្នុងខេត្តចំនួនប្រាំមួយរួមមាន ខេត្តកណ្តាល ខេត្តកំពង់ធំ ខេត្តសៀមរាប ខេត្តបាត់ដំបង ខេត្តពោធិ៍សាត់ និងខេត្តកំពង់ចាម ដល់រដ្ឋាភិបាលកម្ពុជា តាមរយៈក្រសួងកសិកម្ម រុក្ខាប្រមាញ់ និងនេសាទ។
គម្រោងនេះត្រូវបានផ្តល់ឥណទានដោយផ្ទាល់ពីក្រសួងកសិកម្មសហរដ្ឋអាម៉េរិក សម្រាប់ដំណើរការកម្មវិធីស្របទៅនឹងផែនការយុទ្ធសាស្រ្តអភិវឌ្ឍន៍វារីវប្បកម្មនៃរាជរដ្ឋាភិបាលកម្ពុជា។ គម្រោងនេះ នឹងជួយជំរុញដល់កំណើនកូនត្រីពូជ និងប្រភពចំណីអាហារ ព្រមទាំងពង្រឹងគ្រប់ទំនាក់ទំនងក្នុងចង្វាក់តម្លៃគិតពីកន្លែងបង្កាត់ភ្ញាស់ទៅអ្នកផលិត អ្នកទិញ និងអ្នកចែកចាយ។
កម្ពុជានឹងទទួលបានផលប្រយោជន៍ពីការកើនឡើងនូវទំនុកចិត្ត និងឈានទៅទទួលបាននូវផលត្រីដែលមានគុណភាពខ្ពស់ និងស្តង់ដាសមរម្យ។ លើសពីនេះ គម្រោងក៏នឹងជួយសេដ្ឋកិច្ចជាតិកម្ពុជាតាមរយៈការនាំចេញផលត្រីទៅកាន់ទីផ្សារអន្តរជាតិ និងផ្គត់ផ្គង់ទីផ្សារក្នុងស្រុកប្រកបដោយគុណភាព។ នេះបើតាម ប្រភពព័ត៌មាន ពីក្រសួងព័ត៌មានបានចុះផ្សាយនៅថ្ងៃទី៣១ ខែ មករា ឆ្នាំ២០១៩។
យោងតាមប្រភពដដែល លោក Michael Newbill តំណាងស្ថានទូតសហរដ្ឋអាម៉េរិកប្រចាំនៅកម្ពុជា បានបញ្ជាក់ថា គម្រោងអភិវឌ្ឍន៍វារីវប្បកម្មសម្រាប់និរន្តភាពពាណិជ្ជកម្ម (ហៅកាត់ថា CAST) ជាគម្រោងដ៏មានសារៈសំខាន់ក្នុងការចូលរួមអភិវឌ្ឍន៍អនុវិស័យជលផលនៅកម្ពុជា ជាពិសេសលើការអភិវឌ្ឍបច្ចេកទេស និងបច្ចេកវិទ្យាវារីវប្បកម្ម ដើម្បីធានានូវនិរន្តភាពផលិតផលជលផលនៅកម្ពុជា និងបង្កើននូវគុណភាព និងស្តង់ដាផលិតផលត្រី។ លោកបានបន្ដថា គម្រោង CAST ក៏នឹងជួយដល់ការផ្សារភ្ជាប់ទំនាក់ទំនងពាណិជ្ជកម្មរវាងកម្ពុជា និងសហរដ្ឋអាមេរិកផងដែរ។
ប្រភព៖ ក្រសួងព័ត៌មាន
RAC Media
ថ្ងៃសុក្រ, 01 កុម្ភៈ 2019 ម៉ោង 04:48 PM
ឯកឧត្តមបណ្ឌិតសភាចារ្យ សុខ ទូច ប្រធានរាជបណ្ឌិត្យសភាកម្ពុជា បានទទួលជួបជាមួយឯកឧត្តមបណ្ឌិត Kim Jae Youl ដែលជាទីប្រឹក្សានៃក្រុមហ៊ុន S.K. នៃប្រទេសកូរ៉េខាងត្បូង និងជាទីប្រឹក្សារាជបណ្ឌិត្យសភាកម្ពុជា ដែលបានអញ្ជើញមកបំពេញទស្សនកិច្ចនៅរាជបណ្ឌិត្យសភាកម្ពុជា ដើម្បីស្វែងយល់អំពីការវិវឌ្ឍរបស់រាជបណ្ឌិត្យសភាកម្ពុជា។ ជំនួបនេះ ក៏បានពិភាក្សាពីការរៀបចំធ្វើសេចក្តីព្រាងអនុស្សរណៈនៃការយោគយល់ ដែលនឹងត្រូវចុះហត្ថលេខានៅពេលដែលថ្នាក់ដឹកនាំនាំសារណរដ្ឋកូរ៉េអញ្ជើញមកបំពេញទស្សនកិច្ច នៅព្រះរាជាណាចក្រកម្ពុជា នៅពេលខាងមុខនេះ។
នៅក្នុងជំនួបនេះ ឯកឧត្តមបណ្ឌិត Kim Jae Youl ក៏មានគម្រោងចុះអនុស្សរណៈយោគយល់ជាមួយរាជបណ្ឌិត្យសភាកម្ពុជាដោយផ្ទាល់ ដើម្បីធ្វើការអភិវឌ្ឍនៅក្នុងឧទ្យានរាជបណ្ឌិត្យសភាកម្ពុជា តេជោសែនឫស្សីត្រឹប សម្រាប់ការអភិរក្សព្រៃឈើ និងសត្វព្រៃប្រភេទកម្រនៅទីនោះ។ ឯកឧត្តមបណ្ឌិត Kim Jae Youl ក៏មានគម្រោងធ្វើកិច្ចសហការជាមួយរាជបណ្ឌិត្យសភាកម្ពុជានៅលើវិស័យជាច្រើនទៀតផងដែរ។
សូមជម្រាបជូនថា ឯកឧត្តមបណ្ឌិត Kim Jae Youl បានជួយជ្រោមជ្រែងឱ្យមានការបង្កើតមជ្ឈមណ្ឌលសិក្សាកម្ពុជានៅក្នុងសាកលវិទ្យាល័យប៉េកាំងនៃសាធារណរដ្ឋប្រជាមានិតចិន ដើម្បីសម្រួលឱ្យនិស្សិតចិន និងនិស្សិតបរទេស អាចសិក្សាភាសាខ្មែរ និងវប្បធម៌ប្រពៃណីរបស់ខ្មែរនៅទីនោះបាន។ ដោយឡែក នៅវេលាថ្ងៃស្អែកនេះ ឯកឧត្តមបណ្ឌិត Kim Jae Youl នឹងអញ្ជើញជាវាគ្មិនកិត្តិយស ក្នុងបាឋកថាមួយ ស្តីពីតម្លៃនៃតំបន់អាស៊ីអាគ្នេយ៍ នៅរាជបណ្ឌិត្យសភាកម្ពុជា។
ជំនួបនេះធ្វើឡើងនៅថ្ងៃ ពុធ ១០រោច ខែ បុស្ស សំរឹទ្ធិស័ក ព.ស. ២៥៦២ ត្រូវនឹងថ្ងៃទី ៣០ ខែ មករា ឆ្នាំ ២០១៩ នៅរាជបណ្ឌិត្យសភាកម្ពុជា។
RAC Media
ថ្ងៃពុធ, 30 មករា 2019 ម៉ោង 05:30 PM
នៅដើមឆ្នាំ២០១៩ រដ្ឋាភិបាលនៃព្រះរាជាណាចក្រកម្ពុជាបានសម្រេចឱ្យមានការកែប្រែរដ្ឋបាលស្រុក ខណ្ឌ តាមរយៈ អនុក្រឹត្យ ដោយបង្កើតបន្ថែមនូវក្រុង០១ គឺក្រុងកោះរ៉ុង នៃខេត្តព្រះសីហនុ ខណ្ឌចំនួន០២ គឺខណ្ឌបឹងកេងកង និង ខណ្ឌកំបូល នៃរាជធានីភ្នំពេញ និង ស្រុកចំនួន០៣ គឺស្រុកតាលោសែនជ័យ នៃខេត្តពោធិ៍សាត់ ស្រុកបុរីអូរស្វាយសែនជ័យ នៃខេត្តស្ទឹងត្រែង និងស្រុកតាំងគោក នៃខេត្តកំពង់ធំ ដែលមានសេចក្តីលម្អិតដូចខាងក្រោម៖
រាជធានីភ្នំពេញ
០១.ត្រូវបានបង្កើតខណ្ឌបឹងកេងកងនៃរាជធានីភ្នំពេញ ដោយកាត់យកសង្កាត់ចំនួន០៧ ពីខណ្ឌចំការមននៃរាជធានីភ្នំពេញ គឺសង្កាត់បឹងកេងកងទី១ សង្កាត់បឹងកេងកងទី២ សង្កាត់បឹងកេងកងទី៣ សង្កាត់អូឡាំពិច សង្កាត់ទំនប់ទឹក សង្កាត់ទួលស្វាយព្រៃទី១ និង សង្កាត់ទួលស្វាយព្រៃទី២។ ក្នុងនោះ សាលាខណ្ឌចំការមនដែលស្ថិតនៅក្នុងសង្កាត់បឹងកេងកងទី៣ ត្រូវបានផ្ទេរទៅឱ្យសាលាខណ្ឌបឹងកេងកង ហើយទីតាំងសាលាខណ្ឌចំការមន ត្រូវស្ថិតក្នុងសង្កាត់ទន្លេបាសាក់។
០២.ត្រូវបានបង្កើតខណ្ឌកំបូល នៃរាជធានីភ្នំពេញ ដោយកាត់យកសង្កាត់ចំនួន០៦ពីខណ្ឌពោធិ៍សែនជ័យនៃរាជធានីភ្នំពេញគឺ សង្កាត់កំបូល សង្កាត់កន្ទោក សង្កាត់ឪឡោក សង្កាត់ស្នោរ សង្កាត់ភ្លើងឆេះរទេះ សង្កាត់បឹងធំនិងកាត់យកសង្កាត់ចំនួន០១ ពីខណ្ឌដង្កោ នៃរាជធានីភ្នំពេញគឺ សង្កាត់ប្រទះឡាង។ ព្រំប្រទល់រដ្ឋបាលខណ្ឌកំបូល ត្រូវបានកំណត់ដូចមានក្នុងផែនទីជាឧបសម្ព័ន្ធនៃអនុក្រឹត្យនេះ។ សរុបមកខណ្ឌកំបូលមានសង្កាត់ចំនួន០៧គឺ សង្កាត់កំបូល សង្កាត់កន្ទោក សង្កាត់ឪឡោក សង្កាត់ស្នោរ សង្កាត់ភ្លើងឆេះរទេះ សង្កាត់បឹងធំសង្កាត់ប្រទះឡាង។
ក្រុងព្រះសីហនុ៖
ត្រូវបានបង្កើតក្រុងកោះរ៉ុង ដោយកាត់យកសង្កាត់ចំនួន០២ ពីក្រុងព្រះសីហនុនៃខេត្តព្រះសីហនុគឺ សង្កាត់កោះរ៉ុង និងសង្កាត់កោះរ៉ុងសន្លឹម រីឯទីតាំងសាលាក្រុងកោះរ៉ុង ត្រូវស្ថិតនៅក្នុងសង្កាត់កោះរ៉ុងសន្លឹម។
១.ខេត្តពោធិ៍សាត់៖ ត្រូវបានបង្កើតស្រុកតាលោសែនជ័យ នៃខេត្តពោធិ៍សាត់ ដោយកាត់យកឃុំចំនួន០២ គឺឃុំតាលោ នៃស្រុកបាកាននិងឃុំផ្ទះរុងនៃស្រុកភ្នំក្រវ៉ាញនៃខេត្តពោធិ៍សាត់។ ត្រូវបានកាត់យកភូមិចំនួន០២ គឺភូមិកោះស្វាយ និង ភូមិកោះវត្ត ពីឃុំខ្នារទទឹង នៃស្រុកបាកាន មកឱ្យឃុំតាលោ នៃស្រុកតាលោសែនជ័យ។ សរុបមក ស្រុកតាលោ សែនជ័យ មានឃុំចំនួន ០២គឺ ឃុំតាលោ និង ឃុំផ្ទះរុង។ ទីតាំងសាលាស្រុកតាលោសែនជ័យ ត្រូវស្ថិតនៅក្នុងឃុំផ្ទះ រុង។
២.ខេត្តស្ទឹងត្រែង៖ ត្រូវបង្កើតស្រុកបុរីអូរស្វាយសែនជ័យ នៃខេត្តស្ទឹងត្រែង ដោយកាត់យកឃុំចំនួន០៣គឺ ឃុំអូរស្វាយ ឃុំកោះស្នែង និង ឃុំព្រះរំកិលពីស្រុកថាឡាបរិវ៉ាត់ នៃខេត្តស្ទឹងត្រែង។ ត្រូវបានកែសម្រួលព្រំប្រទល់រដ្ឋបាល ឃុំអូរស្វាយដោយឃុំកាត់យកផ្ទៃដីមួយផ្នែកពិសង្កាត់សាមគ្គី នៃក្រុងស្ទឹងត្រែង ផ្ទៃដីមួយផ្នែកពីឃុំស្តៅ នៃស្រុកសេ សាន និងកាត់យកភូមិចំនួន០១គឺ ភូមិណាអូង ពីឃុំស្រែសំបូរនៃស្រុកសៀមប៉ាង មកឱ្យឃុំអូរស្វាយ នៃស្រុកបុរីអូរស្វាយសែនជ័យ។ សរុបមក ស្រុកបុរីអូរស្វាយសែនជ័យ មានឃុំចំនួន០៣គឺ ឃុំអូរស្វាយ ឃុំកោះស្នែង និង ឃុំព្រះរំកិល។ ទីតាំងសាលាស្រុកបុរីអូរស្វាយសែនជ័យ ត្រូវស្ថិតនៅក្នុងឃុំអូរស្វាយ។
៣.ខេត្តកំពង់ធំ៖ ត្រូវបានបង្កើតស្រុកតាំងគោក នៃខេត្តកំពង់ធំ ដោយកាត់យកឃុំចំនួន០៨ ពីស្រុកបារាយណ៍គឺ ឃុំពង្រ ឃុំច្រនាង ឃុំជ្រលង ឃុំទ្រៀល ឃុំសូយោង ឃុំស្រឡៅ ឃុំស្វាយភ្លើង និង ឃុំអណ្តូងពោធិ៍។ សរុបមកស្រុកតាំងគោកមានឃុំចំនួន០៨គឺ ឃុំពង្រ ឃុំច្រនាង ឃុំជ្រលង ឃុំទ្រៀល ឃុំសូយោង ឃុំស្រឡៅ ឃុំស្វាយភ្លើង និង ឃុំអណ្តូងពោធិ៍។ រីឯទីតាំង សាលាស្រុកតាំងគោក ត្រូវស្ថិតនៅក្នុងឃុំសូយោង។
(សូមអានអនុក្រឹត្យដូចខាងក្រោម៖...)
RAC Media | ម៉ៅ សុគន្ធា
ថ្ងៃពុធ, 30 មករា 2019 ម៉ោង 11:02 AM
បើយោងតាមអនុក្រឹត្យលេខ០៣ អនក្រ.បក ចុះថ្ងៃទី៨ ខែមករា ឆ្នាំ២០១៤ ស្ដីពីការបង្កើតខណ្ឌបឹងកេងកង ប្រមុខរាជរដ្ឋាភិបាល បានសម្រេចបំបែកខណ្ឌចំការមន ដោយកាត់យកសង្កាត់ចំនួន៧ ដើម្បីបង្កើតខណ្ឌថ្មីមួយ គឺខណ្ឌបឹងកេងកង។ នៅក្នុងមាត្រាទី១ នៃអនុក្រឹត្យនេះ បានបញ្ជាក់យ៉ាងច្បាស់ថា ខណ្ឌបឹងកេងកង នៃរាជធានីភ្នំពេញ គឺកាត់យកសង្កាត់ចំនួន៧ ពីខណ្ឌចំការមននៃរាជធានីភ្នំពេញគឺ៖ សង្កាត់បឹងកេងកងទី១, សង្កាត់បឹងកេងកងទី២, សង្កាត់បឹងកេងកងទី៣, សង្កាត់អូរឡាំពិក, សង្កាត់ទំនប់ទឹក, សង្កាត់ទួលស្វាយព្រៃទី១, និងសង្កាត់ទួលស្វាយព្រៃទី២។ ចំណែកសាលាខណ្ឌចំការមនដែលស្ថិតនៅក្នុងសង្កាត់បឹងកេងកងទី៣ នឹងត្រូវផ្ទេរទៅឱ្យសាលាខណ្ឌបឹងកេងកង ហើយទីតាំងសាលាខណ្ឌចំការមន នឹងត្រូវស្ថិតនៅក្នុងសង្កាត់ទន្លេបាសាក់វិញ។
ក្រៅពីខណ្ឌបឹងកេងកង រាជរដ្ឋាភិបាលក៏គ្រោងនឹងបង្កើតខណ្ឌថ្មីមួយទៀតគឺខណ្ឌកំបូល ដោយកាត់យកសង្កាត់ចំនួន៦ ពីខណ្ឌពោធិ៍សែនជ័យ (សង្កាត់កំបូល សង្កាត់កន្ទោក សង្កាត់ឪឡោក សង្កាត់ស្នោរ សង្កាត់ភ្លើងឆេះរទេះ និងសង្កាត់បឹងធំ) និងកាត់យកសង្កាត់ប្រទះឡាង ពីខណ្ឌដង្កោផងដែរ។
សរុបមករាជធានីភ្នំពេញ នឹងមានខណ្ឌថ្មីចំនួន២ បន្ថែមលើខណ្ឌទាំង១២ ដែលមានស្រាប់ គឺខណ្ឌព្រែកព្នៅ, ខណ្ឌជ្រោយចង្វារ, ខណ្ឌសែនសុខ, ខណ្ឌមានជ័យ, ខណ្ឌឬស្សីកែវ, ខណ្ឌ៧មករា, ខណ្ឌច្បារអំពៅ, ខណ្ឌទួលគោក, ខណ្ឌដូនពេញ, ខណ្ឌចំការមន, ខណ្ឌពោធិ៍សែនជ័យ និងខណ្ឌដង្កោ។
(រូបភាព ពីកោះសន្តិភាព)
ថ្ងៃអង្គារ, 29 មករា 2019 ម៉ោង 06:48 PM
សេចក្ដីជូនដំណឹង ស្តីពី"ការអញ្ជើញចូលរួមដេញថ្លៃ ការផ្គត់ផ្គង់ប្រេងឥន្ធនៈប្រចាំឆ្នាំ២០២៤ សម្រាប់ជរាជបណ្ឌិត្យសភាកម្ពុជា ចាប់ពីថ្ងៃទី១៨ មេសា ឆ្នាំ២០២៤។ *ចាប់ទទួលលក់ពាក្យដេញថ្លៃពីថ្ងៃនេះតទៅ រហូតដល់ថ្ងៃទី១៨ ខែមេសា ឆ្នាំ២០២៤ វេលាម៉ោង ១០.៣០នាទីព្រឹក។ ទូរសព្ទទំនាក់ទំនង : ០២៣ ៨៩០ ១៨០។
ថ្ងៃចន្ទ, 08 មេសា 2024 ម៉ោង 02:35 PM
សេចក្ដីជូនដំណឹង ស្តីពីការ ចូលរួមដេញថ្លៃ ផ្គត់ផ្គង់សម្ភារៈអេឡិចត្រូនិកសម្រាប់រាជបណ្ឌិត្យសភាកម្ពុជា ចាប់ពីថ្ងៃទី៥ មិថុនា ឆ្នាំ២០២៣។ *កាលបរិច្ឆេទឈប់ទទួលពាក្យដេញថ្លៃ៖ ថ្ងៃទី៣០ ខែមិថុនា ឆ្នាំ២០២៣ វេលាម៉ោង ១០.៣០នាទីព្រឹក។ ទូរសព្ទទំនាក់ទំនង : 012 78 36 46។
ថ្ងៃសុក្រ, 02 មិថុនា 2023 ម៉ោង 09:21 PM
វគ្គសិក្សាថ្មី សម្រាប់ឆ្នាំសិក្សាថ្មី ឆ្នាំ២០២២-២០២៣ ! សម្រាប់ថ្នាក់បរិញ្ញាបត្រជាន់ខ្ពស់ និងថ្នាក់បណ្ឌិត នៅរាជបណ្ឌិត្យសភាកម្ពុជា ចាប់ផ្តើមទទួលចុះឈ្មោះហើយ.... ព័ត៌មានលម្អិត សូមទាក់ទងមជ្ឈមណ្ឌលបណ្តុះបណ្តាលនិងស្រាវជ្រាវនៃរាជបណ្ឌិត្យសភាកម្ពុជា (អគារឥន្រ្ទទេវី) ឬតាមរយៈទូរសព្ទ៖ 067-811-667 / 010-268-797 / 099-238-677 / 097 728 4444
ថ្ងៃចន្ទ, 22 សីហា 2022 ម៉ោង 03:11 PM
