រាជបណ្ឌិត្យសភាកម្ពុជា

«ប្រជុំដើម្បីពិនិត្យគោលការណ៍ក្នុងការសរសេរអក្សរខ្មែរ ជាអក្សរឡាតាំង....»

កាលពីរសៀល ថ្ងៃពុធ ទី១៣ ខែវិច្ឆិកា ឆ្នាំ២០១៩ ក្រុមប្រឹក្សាជាតិភាសាខ្មែរ ក្រោមអធិបតីភាព ឯកឧត្តមបណ្ឌិត ហ៊ាន សុខុម បានដឹកនាំអង្គប្រជុំរួម ដើម្បីពិនិត្យគោលការណ៍ក្នុងការសរសេរអក្សរខ្មែរ ជាអក្សរឡាតាំងដូចខាងក្រោម៖

RAC Media

  ថ្ងៃព្រហស្បតិ៍, 14 វិច្ឆិកា 2019 ម៉ោង 04:36 PM

កិច្ចប្រជុំត្រួតពិនិត្យការងារ ដើម្បីត្រៀមរៀបចំពិធីសម្ពោធអគារឥន្ទ្រទេវី, ខួប ២០ឆ្នាំ នៃការបង្កើតរាជបណ្ឌិត្យសភាកម្ពុជា និងពិធីចែកសញ្ញាបត្រកិត្តិយស និងសញ្ញាបត្រវិទ្យាសាស្រ្ត

(រាជបណ្ឌិត្យសភាកម្ពុជា)៖ នៅព្រឹកថ្ងៃចន្ទ ១៥កើត ខែកត្តិក ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី១១ ខែវិច្ឆិកា ឆ្នាំ២០១៩ ឯកឧត្តម យូ ស៊ិនឡុង បានដឹកនាំសហការីមកត្រួតពិនិត្យការងារ ដើម្បីត្រៀមរៀបចំពិធីសម្ពោធអគារឥន្ទ្ររទេវី, ខួប ២០ឆ្នាំ នៃការបង្កើតរាជបណ្ឌិត្យសភាកម្ពុជា និងពិធីចែកសញ្ញាបត្រកិត្តិយស និងសញ្ញាបត្រវិទ្យាសាស្រ្ត នៅថ្ងៃទី២១ ខែវិច្ឆិកា ឆ្នាំ២០១៩ ក្រោមអធិបតីភាពដ៏ខ្ពងខ្ពស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា។

សូមជម្រាបជូនថា រាជបណ្ឌិត្យសភាកម្ពុជា បានបង្កើតឡើងតាមព្រះរាជក្រឹត្យ ព្រះរាជក្រឹត្យលេខ នស/រកត /០៥៩៩/៩៧ ចុះថ្ងៃទី១១ ខែឧសភា ឆ្នាំ១៩៩៩។

រាជបណ្ឌិត្យសភាកម្ពុជាមានបេសកកម្មលើកទឹកចិត្ត ណែនាំ គ្រប់គ្រង និងពង្រីកការស្រាវជ្រាវគ្រប់មុខជំនាញនៅក្នុងប្រទេស និង ស្ថាបនាទំនាក់ទំនងសហប្រតិបត្តិការផ្នែកស្រាវជ្រាវជាមួយអង្គការជាតិនិងអន្តរជាតិ ដែលមានគោលបំណងដូចគ្នា។

តាមរយៈអនុក្រឹត្យ លេខ៤៤ អនក្រ.បក ចុះថ្ងៃទី១៧ ខែកក្កដា ឆ្នាំ២០០០ រាជរដ្ឋាភិបាលកម្ពុជា បានកំណត់មុខងារ និងភារកិច្ចដល់ រាជបណ្ឌិត្យសភាកម្ពុជា ដូចតទៅ៖

• គ្រប់គ្រងនិងពង្រីកការស្រាវជ្រាវខេមរវិទ្យា និងគ្រប់មុខជំនាញ នៅក្នុងនិងក្រៅប្រទេស។

• ស្ថាបនាទំនាក់ទំនងសហប្រតិបត្ដិការ ផ្នែកស្រាវជ្រាវជាមួយ ក្រសួង ស្ថាប័ន អង្គការជាតិ និងអន្ដរជាតិដែលមានគោលបំណងដូចគ្នា។

• រៀបចំវេទិកាវិទ្យាសាស្ដ្រ និងអប់រំ ដើម្បីជួយអភិវឌ្ឍប្រទេសលើគ្រប់វិស័យ។

• បណ្ដុះបណ្ដាលថ្នាក់បរិញ្ញាបត្រជាន់ខ្ពស់ និងថ្នាក់បណ្ឌិត។

• បោះពុម្ពផ្សាយឯកសារ និងស្នាដៃស្រាវជ្រាវជាភាសាជាតិឱ្យបានទូលំទូលាយដល់មហាជននៅក្នុងប្រទេស និងជាភាសាបរទេសដើម្បីផ្សព្វផ្សាយខេមរវិទ្យានៅលើវេទិកាអន្ដរជាតិ។

• ប្រមូលនិងតម្កល់ឯកសារស្រាវជ្រាវ អំពីប្រទេសកម្ពុជា អំពីបណ្ដាប្រទេសនៅក្នុងតំបន់ និងលើពិភពលោក។

• ប្រមូលកម្លាំងបញ្ញាញាណរបស់ជាតិ ដើម្បីជំរុញការអភិវឌ្ឍប្រទេសឱ្យបានឆាប់រហ័ស។

• លើកសំណើជូនគោរមងារ និងគ្រឿងឥស្សរិយយសវិទ្យាសាស្ដ្រ ដល់ឥស្សរជនឆ្នើមជាតិនិងអន្ដរជាតិ។

• សហការពិនិត្យនិងវាយតម្លៃសញ្ញាបត្រឧត្ដមសិក្សា និងក្រោយឧត្ដមសិក្សា ពិសេសថ្នាក់ជាតិ។

• រួមចំណែក និងធ្វើសហប្រតិបត្ដិការក្នុងការការពារកម្មសិទ្ធិ ផ្នែកវិទ្យាសាស្ដ្រគ្រប់វិស័យទាំងក្នុងនិង ក្រៅប្រទេស។ បច្ចុប្បន្នបានសហការជាមួយនឹងសាកលវិទ្យាល័យនានា និងបណ្ឌិត្យសភា លើសកលលោកផងដែរ។

• ពិនិត្យ និងវាយតម្លៃ ស្នាដៃស្រាវជ្រាវវិទ្យាសាស្ដ្រនានា។

• ពិនិត្យនិងវាយតម្លៃការវិវត្ដសង្គម និងរួមវិភាគទានជំរុញការអភិវឌ្ឍ ទាំងភាសាជាតិ ប្រវត្ដិសាស្ដ្រ ជាតិ វិទ្យាសាស្ត្រ ចំណីអាហារ។ល។

• សហការរួមចំណែកទំនាក់ទំនងជាមួយក្រសួងនានា ទៅតាមជំនាញនៃផ្នែករបស់វិទ្យាស្ថាននីមួយៗ។

• ត្រៀមបង្កើត និងគ្រប់គ្រងសាខានៃរាជបណ្ឌិត្យសភាកម្ពុជានៅ តាមភូមិភាគនានាលើផ្ទៃប្រទេស។

• សហការជាមួយក្រសួងដែលពាក់ព័ន្ធ ដើម្បីជួយបង្កើត និងណែនាំការគ្រប់គ្រងសារមន្ទីរបុរេប្រវត្ដិ-សាស្ដ្រនៅតាមខេត្ដ/ក្រុងនានា៕

RAC Media 

  ថ្ងៃចន្ទ, 11 វិច្ឆិកា 2019 ម៉ោង 12:41 PM

ឯកឧត្តមបណ្ឌិត យង់ ពៅ អញ្ជើញជាអធិបតីបើក «វគ្គបណ្តុះបណ្តាលគ្រូបង្រៀនភាសាចិនស្ម័គ្រចិត្តនៅកម្ពុជា ឆ្នាំសិក្សា ២០១៩-២០២០»

(ភ្នំពេញ)៖ នៅព្រឹកថ្ងៃចន្ទ ១៥កើត ខែកត្តិក ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី១១ ខែវិច្ឆិកា ឆ្នាំ២០១៩ ឯកឧត្តមបណ្ឌិត យង់ ពៅ អគ្គលេខាធិការរាជបណ្ឌិត្យសភាកម្ពុជាបានអញ្ជើញជាអធិបតីបើក «វគ្គបណ្តុះបណ្តាលគ្រូបង្រៀនភាសាចិនស្ម័គ្រចិត្តនៅកម្ពុជាឆ្នាំសិក្សា ២០១៩-២០២០» ដែលរៀបចំឡើងដោយវិទ្យាស្ថានខុងជឺ នៃរាជបណ្ឌិត្យសភាកម្ពុជា។

វត្តមានអញ្ជើញចូលរួមពិធី រួមមាន ឯកឧត្តម លោកជំទាវ លោកឧកញ៉ា លោក លោកស្រី គណៈអធិបតី តំណាងស្ថានទូតសាធារណរដ្ឋប្រជាមានិតចិនប្រចាំនៅព្រះរាជាណាចក្រកម្ពុជា តំណាងសមាគមសម័្ពន្ធ ខ្មែរ-ចិន សហនាយកវិទ្យាស្ថានខុងជឺនៃរាជបណ្ឌិត្យសភាកម្ពុជា លោកគ្រូ និងអ្នកគ្រូជនជាតិចិនសរុបចំនួន ៣៣០រូប។

នៅក្នុងពិធីបើកវគ្គបណ្តុះបណ្តាល កញ្ញា វុធ សុភ័ក្រណា នាយិកាវិទ្យាស្ថាន ខុងជឺ នៃរាជបណ្ឌិត្យសភាកម្ពុជា បានថ្លែងរបាយការណ៍ស្វាគមន៍ឱ្យដឹងថា ការបណ្តុះបណ្តាលនេះមានគោលបំណងជួយពង្រឹងសមត្ថភាពលោកគ្រូ អ្នកគ្រូបង្រៀនស័្មគ្រចិត្ត និងអាចលើកកម្ពស់គុណភាពបង្រៀន ដើម្បីជំរុញកិច្ចសហប្រតិបត្តិការក្នុងការបណ្តុះបណ្តាលធនធានភាសាចិន នៃប្រទេសយើងទាំងពីរ ឱ្យបានកាន់តែច្រើនថែមទៀតផង។

ថ្លែងសុន្ទរកថាក្នុងពិធីបើកវគ្គបណ្តុះបណ្តាលដែលប្រារព្ធឡើងនៅក្នុងសណ្ឋាគារភ្នំពេញ ឯកឧត្តមបណ្ឌិត យង់ ពៅ អគ្គលេខាធិការរាជបណ្ឌិត្យសភាកម្ពុជា បានសម្តែងសេចក្តីសោមនស្សរីករាយយ៉ាងក្រៃលែងដែលបានចូលរួមជាមួយ ឯកឧត្តម លោកជំទាវ លោកឧកញ៉ា លោក លោកស្រី អ្នកនាង កញ្ញា លោកគ្រូ និងអ្នកគ្រូក្នុងពិធីបើកវគ្គបណ្តុះបណ្តាលគ្រូបង្រៀនភាសាចិនស្ម័គ្រចិត្តនៅកម្ពុជា ឆ្នាំសិក្សា ២០១៩-២០២០ នាឱកាសដ៏ថ្លៃថ្លានេះ។

ឆ្លៀតក្នុងឱកាសដ៏វិសេសវិសាលនេះ ក្នុងនាម ឯកឧត្តមបណ្ឌិតសភាចារ្យ សុខ ទូច ប្រធានរាជបណ្ឌិត្យសភាកម្ពុជា ឯកឧត្តមបណ្ឌិត យង់ ពៅ បានសម្តែងអំណរគុណយ៉ាងជ្រាលជ្រៅចំពោះវត្តមានរបស់គណៈអធិបតី ភ្ញៀវកិត្តិយស ឯកឧត្តម លោកជំទាវ លោក លោកស្រី អ្នកនាង កញ្ញា និងលោកគ្រូ អ្នកគ្រូទាំងអស់មកពីទូទាំងប្រទេសចិនសរុបចំនួន ២៨០នាក់ដែលបានមកបំពេញការងារនៅប្រទេសកម្ពុជា ដែលបានឆ្លៀតពេលវេលាដ៏មមាញឹកអញ្ជើញចូលរួមក្នុងកម្មវិធី នាពេលនេះ។

ជាមួយគ្នានេះ ឯកឧត្តមបណ្ឌិត យង់ ពៅ បានរំលឹកជូនអង្គពិធីទាំងមូលផងដែរថា នេះជាលើកទីពីរហើយដែលលោកគ្រូ អ្នកគ្រូទាំងអស់បានជួបគ្នា។ ឯកឧត្តមបណ្ឌិតបានមានប្រសាសន៍ទៅកាន់អង្គពិធីថា ទំនាក់ទំនងកម្ពុជា-ចិន មានរយៈកាលយូរលង់ណាស់មកហើយ។ ប្រទេសទាំងពីរ គឺជាជិតខាងល្អ ដៃគូល្អ។

តាមរយៈវគ្គបណ្តុះបណ្តាលនេះ ឯកឧត្តមបណ្ឌិតសង្ឃឹមយ៉ាងមុតមាំថា ភាសាគឺជាយានទំនាក់ទំនងប្រទេសយើងទាំងពីរដ៏សំខាន់ ដើម្បីធានាបន្តអភិវឌ្ឍលើគ្រប់វិស័យ ទាំងទំនាក់ទំនងវប្បធម៌ ទំនាក់ទំនងរវាងប្រជាជន និងប្រជាជន សមស្របទៅនឹងតម្រូវការនៃការផ្លាស់ប្តូររវាងប្រទេសកម្ពុជា-ចិន និងសកលលោក។

ជាមួយនេះ ឯកឧត្តមបណ្ឌិត យង់ ពៅ បានមានប្រសាសន៍ជឿជាក់ថា លោកគ្រូ អ្នកគ្រូទាំងអស់នឹងអាចថ្នឹកជាមួយការងារ និងជីវភាពនៅកម្ពុជា ហើយលោកគ្រូ អ្នកគ្រូទាំងអស់នឹងខិតខំចាប់យកឱកាសសិក្សាបន្ថែមពីបច្ចេកទេសក្នុងការបង្រៀន ក្នុងវគ្គបណ្តុះបណ្តាលរយៈពេល២ថ្ងៃនេះ។ ហើយសង្ឃឹមថា លោកគ្រូ អ្នកគ្រូ នឹងបន្តបង្កើនចំណេះដឹងរបស់ខ្លួនបន្ថែមទៀត។

ជាថ្មីម្តងទៀត ក្នុងនាមឯកឧត្តមបណ្ឌិតសភាចារ្យ សុខ ទូច ប្រធានរាជបណ្ឌិត្យសភាកម្ពុជា ឯកឧត្តមបណ្ឌិត យង់ ពៅ សង្ឃឹមថា លោកគ្រូ អ្នកគ្រូ ចេះចាប់ឱកាសលើកនេះ ដើម្បីពង្រឹងសមត្ថភាព និងគុណភាពបង្រៀនរឹតតែអាចបង្ហាញពីទេពកោសល្យរបស់គ្រូបង្រៀនវ័យក្មេងជនជាតិចិនដែលយកចំណេះរបស់ខ្លួនដែលធ្លាប់មានមកអនុវត្តន៍ក្នុងពេលបំពេញការងារ ដើម្បីកែប្រែឱ្យប្រសើរឡើងជាងនេះ។ ម្យ៉ាងទៀត ឯកឧត្តមបណ្ឌិត យង់ ពៅ ជឿជាក់ថា អ្នកទាំងអស់គ្នា នឹងអាចសម្របខ្លួននឹងវប្បធម៌ និងជីវភាពនៅកម្ពុជា ដោយអាចរស់នៅ និងបំពេញបេសកកម្មការងារប្រកបដោយភាពរីករាយ៕

RAC Media 

  ថ្ងៃចន្ទ, 11 វិច្ឆិកា 2019 ម៉ោង 12:29 PM

«ឯកឧត្តមបណ្ឌិត យង់ ពៅ ដឹកនាំសហការី និងប្រជាពលរដ្ឋពិសាអំបុក ដើម្បីការពារជាតិ សាសនា ព្រះមហាក្សត្រ នៅក្នុងមូលដ្ឋានឃុំត្រពាំងធំខាងជើង ស្រុកត្រាំកក់ ខេត្តតាកែវ»

(តាកែវ)៖ នៅថ្ងៃទី៩ ខែវិច្ឆិកា ឆ្នាំ២០១៩នេះ ឯកឧត្តមបណ្ឌិត យង់ ពៅ  អនុប្រធានក្រុមការងារថ្នាក់ជាតិចុះជួយស្រុកត្រាំកក់ និងជាប្រធានក្រុមការងារចុះជួយឃុំត្រពាំងធំខាងជើង ស្រុកត្រាំកក់ ខេត្តតាកែវ បានដឹកនាំសហការីរួមជាមួយប្រជាពលរដ្ឋពិសាអំបុករួមគ្នា ដើម្បីការពារជាតិ សាសនា ព្រះមហាក្សត្រ  ដែលបានប្រារព្ធទៅក្នុងវត្តអារាមទាំង ៥ នៃឃុំត្រពាំងធំខាងជើង រួមមាន វត្តមង្គលមានលក្ខណ៍ វត្តសិរីដំណាក់ វត្តពោធិ៍ដុះ វត្តពោធិ៍រុន និងវត្តអង្គស្អាត។

ប្រជាពលរដ្ឋនៅក្នុងឃុំត្រពាំងធំខាងជើងបានចូលរួមយ៉ាងសប្បាយរីករាយក្នុងពិធីពិសាអំបុក ដើម្បីការពារ សាសនា ព្រះមហាក្សត្រ ស្របតាមការអំពាវនាវរបស់សម្តេចតេជោ ហ៊ុន សែន នាយករដ្ឋមន្រ្តី នៃកម្ពុជា។

ក្នុងឱកាសនេះ ឯកឧត្តមបណ្ឌិត យង់ ពៅ ប្រធានក្រុមការងារថ្នាក់ជាតិចុះជួយឃុំត្រពាំងធំខាងជើង និងសហការីរួមជាមួយប្រជាពលរដ្ឋក្នុងឃុំត្រពាំងធំខាងជើងទាំងមូល បានចូលរួមយ៉ាងសប្បាយរីករាយ និងអបអរសាទរនូវពិធីពិសាអំបុកសន្តិភាព ដើម្បីការពារជាតិ សាសនា ព្រះមហាក្សត្រ នៅគ្រប់ភូមិ និងតាមវត្តអារាមនៅទូទាំងឃុំត្រពាំងធំខាងជើង ស្រុកត្រាំកក់ ខេត្តតាកែវ ដោយមាននូវអំបុក មានចេក មានដូង ផ្លែឈើច្រើនមុខ ភេសជ្ជៈ ទឹកបរិសុទ្ធ និងការរាំច្រៀងកម្សាន្តយ៉ាងសប្បាយរីករាយ។

តំណាងប្រជាពលរដ្ឋក្នុងឃុំត្រពាំងធំខាងជើងដែលអញ្ជើញចូលរួមពិធីបានបង្ហាញចំណាប់អារម្មណ៍ថា សកម្មភាពពិសាអំបុកខ្មែរ ដើម្បីការពារជាតិ សាសនា ព្រះមហាក្សត្រ គឺបានឆ្លុះបញ្ចាំងអំពីកម្ពុជា ក្នុងសុខសន្តិភាព ការអភិវឌ្ឍន៍ វឌ្ឍនៈភាពសង្គម លទ្ធិប្រ ជាធិបតេយ្យ សេរីពហុបក្ស សុខដមនីយកម្មនៃប្រជាជាតិខ្មែរ សំដៅធ្វើយ៉ាងណាឱ្យកម្ពុជាទទួលបាននូវសន្តិភាព ការអភិវឌ្ឍន៍លើគ្រប់វិស័យ ទាំងហេដ្ឋារចនាសម្ព័ន្ធផ្លូវថ្នល់ ស្ពាន សាលារៀន មន្ទីរពេទ្យ វត្តអារាម ព្រមជាមួយសក្តានុពល នៃកំណើនសេដ្ឋកិច្ចជាតិ ប្រកបដោយភាពជឿជាក់ និងទំនូលខុសត្រូវ ចំពោះប្រជាពលរដ្ឋកម្ពុជា។

ប្រជាពលរដ្ឋក្នុងឃុំត្រពាំងធំខាងជើងបានប្តេជ្ញាចូលរួមថែរក្សាសនិ្តភាព ឯករាជ្យភាព បូរណភាពទឹកដី ដើម្បីធានាការអភិវឌ្ឍន៍ប្រកបដោយនិរន្តរភាពទាំងក្នុងជាតិ និងអន្តរជាតិ៕

RAC Media

  ថ្ងៃសៅរ៍, 09 វិច្ឆិកា 2019 ម៉ោង 04:06 PM

«គណិតវិទ្យាគឺជាមុខវិជ្ជាវិទ្យាសាស្ត្រមូលដ្ឋានគ្រឹះដ៏សំខាន់សម្រាប់បម្រើការរស់នៅរបស់មនុស្ស និងតម្រូវការចាំបាច់ផ្សេងៗ»

(រាជបណ្ឌិត្យសភាកម្ពុជា)៖ «គណិតវិទ្យាគឺជាមុខវិជ្ជាវិទ្យាសាស្ត្រមូលដ្ឋានគ្រឹះដ៏សំខាន់សម្រាប់បម្រើការរស់នៅរបស់មនុស្ស និងតម្រូវការចាំបាច់ផ្សេងៗ»។ នេះគឺជាប្រសាសន៍កត់សម្គាល់របស់ឯកឧត្តមបណ្ឌិតសភាចារ្យ នេត បារ៉ុម ថ្លែងក្នុងពិធីបើកសិក្ខាសាលាស្តីពី កត្តា និងបញ្ហាប្រឈមនៃការសិក្សាគណិតវិទ្យានៅមធ្យមសិក្សា នៃប្រទេសកម្ពុជា នៅព្រឹកថ្ងៃពុធ ១០កើត ខែកត្តិក ឆ្នាំកុរ ឯកស័ក ព.ស. ២៥៦៣ ត្រូវនឹងថ្ងៃទី៦ ខែវិច្ឆិកា ឆ្នាំ២០១៩។

នៅក្នុងសិក្ខាសាលាដែលប្រព្រឹត្តទៅនៅសាលប្រជុំវិទ្យាស្ថាន ខុងជឺ នៃរាជបណ្ឌិត្យសភាកម្ពុជា នៅព្រឹកនេះ ក្រុមអ្នកស្រាវជ្រាវវិទ្យាស្ថានវិទ្យាសាស្រ្ត និងបច្ចេកវិទ្យា នៃរាជបណ្ឌិត្យសភាកម្ពុជាបានបង្ហាញពីលទ្ធផលបណ្តោះអាសន្ន នៃការស្រាវជ្រាវលើប្រធានបទ ស្តីពី កត្តា និងបញ្ហាប្រឈមនៃការសិក្សាគណិតវិទ្យានៅមធ្យមសិក្សា នៃប្រទេសកម្ពុជា (Factors and Challenges of Mathematics Studies In Secondary Schools in Cambodia) ដើម្បីធ្វើការបង្ហាញផ្ទៀងផ្ទាត់លទ្ធផលស្រាវជ្រាវរបស់វិទ្យាស្ថាន មុនពេលការបោះពុម្ពផ្សព្វផ្សាយ ជាផ្លូវការ។

ថ្លែងបើកកម្មវិធីសិក្ខាសាលានេះ ឯកឧត្តមបណ្ឌិតសភាចារ្យ នេត បារ៉ុម តំណាងឯកឧត្តមបណ្ឌិតសភាចារ្យ សុខ ទូច ប្រធានរាជបណ្ឌិត្យសភាកម្ពុជា បានមានប្រសាសន៍កត់សម្គាល់ទៅកាន់ឯកឧត្តមបណ្ឌិតសភាចារ្យ ឯកឧត្តម លោកជំទាវបណ្ឌិត សាស្រ្តាចារ្យ វាគ្មិន អស់លោក លោកស្រី អ្នកនាង កញ្ញា និងនិស្សិតថា ប្រធានបទ ស្តីពី កត្តា និងបញ្ហាប្រឈមនៃការសិក្សាគណិតវិទ្យានៅមធ្យមសិក្សា នៃប្រទេសកម្ពុជា គឺជាប្រធានបទមួយដ៏មានសារៈសំខាន់ និងចាំ បាច់ក្នុងការស្រាវជ្រាវឱ្យមានលក្ខណៈវិទ្យាសាស្រ្ត និងបច្ចុប្បន្នភាព ដើម្បីពង្រឹងគុណភាពសិស្ស និងគ្រូបង្រៀនក្នុងវិស័យអប់រំ ជាពិសេសវិស័យគណិតវិទ្យា ដើម្បីរួមចំណែកក្នុងការជួយដោះស្រាយបញ្ហាប្រឈមនានា។

ឯកឧត្តមបណ្ឌិតសភាចារ្យបានមានប្រសាសន៍ដូច្នេះថា៖«គណិតវិទ្យាគឺជាមុខវិជ្ជាវិទ្យាសាស្រ្តមូលដ្ឋានគ្រឹះដ៏មានសារៈ សំខាន់សម្រាប់បម្រើឱ្យរស់នៅរបស់មនុស្ស និងតម្រូវការចាំបាច់ផ្សេងៗលើគ្រប់វិស័យ ការប្រើប្រាស់វិធីស្ថិតិក្នុងការវិភាគទិន្នន័យ និងការប្រើប្រាស់គណិតវិទ្យាក្នុងវិស័យវិទ្យាសាស្រ្ត និងវិទ្យាសាស្ត្រសង្គម»។

ជាមួយនេះដែរ ឯកឧត្តមបណ្ឌិត អ៊ាប បុណ្ណា ប្រធានវិទ្យាស្ថានវិទ្យាស្ថានវិទ្យាសាស្រ្ត និងបច្ចេកវិទ្យា នៃរាជបណ្ឌិត្យ សភាកម្ពុជាបានមានប្រសាសន៍ឱ្យដឹងថា ដោយមើលឃើញថា មុខវិជ្ជាគណិតវិទ្យា គឺជាមុខវិជ្ជាវិទ្យាសាស្រ្តមូលដ្ឋានគ្រឹះដ៏ចាំបាច់ និងពង្រឹងសមត្ថភាពសិស្សនៅថ្នាក់មធ្យមសិក្សាឱ្យកាន់តែច្រើនឡើង ក្រុមអ្នកស្រាវជ្រាវវិទ្យាស្ថានវិទ្យាសាស្រ្ត និងបច្ចេកវិទ្យា នៃរាជបណ្ឌិត្យសភាកម្ពុជាបានចុះស្រាវជ្រាវ ប្រមូលទិន្នន័យស្វែងយល់រកកត្តា និងបញ្ហាប្រឈមនានាដែលកើតឡើងទៅលើសិស្សនៅថ្នាក់មធ្យមសិក្សានៅតាមវិទ្យាល័យមួយចំនួន នៅក្នុងបួនតំបន់ ក្នុងនោះរួមមាន៖ តំបន់និរតី តំបន់ពាយ័ព្យ តំបន់ឦសាន តំបន់អាគ្នេយ៍-បូព៌ា ដើម្បីប្រមូលទិន្នន័យយកមកធ្វើការវិភាគ ហើយរកឱ្យឃើញនូវបញ្ហាប្រឈម ពិសេសគឺ ការធ្លាក់ចុះចំនួនសិស្សសិក្សាមុខវិជ្ជាគណិតវិទ្យា។

ជាទីបញ្ចប់ ឯកឧត្តមបណ្ឌិត អ៊ាប បុណ្ណា បានថ្លែងអំណរគុណយ៉ាងជ្រាលជ្រៅចំពោះរាជរដ្ឋាភិបាលដែលបានផ្តល់ការឧបត្ថម្ភគាំទ្រដល់វិស័យសិក្សាស្រាវជ្រាវជាន់ខ្ពស់ជាតិខ្មែរ នាពេលនេះ និងទៅថ្ងៃអនាគតទៀត៕

RAC Media

  ថ្ងៃពុធ, 06 វិច្ឆិកា 2019 ម៉ោង 02:31 PM

«ឯកឧត្តមបណ្ឌិតសភាចារ្យ សុខ ទូច អនុញ្ញាតឱ្យប្រតិភូចិនចូលជួបពិភាក្សាការងារ ដើម្បីបង្កើនកិច្ចសហប្រតិបត្តិការទ្វេភាគី»

(រាជបណ្ឌិត្យសភាកម្ពុជា)៖ បន្ទាប់ពីបញ្ចប់ជំនួបពិភាក្សាការងារជាមួយមន្ត្រីក្រសួងការបរទេសសហរដ្ឋអាម៉េរិក និងមន្ត្រីស្ថានទូតសហរដ្ឋអាម៉េរិកប្រចាំកម្ពុជានៅរសៀលថ្ងៃអង្គារ ៩កើត ខែកត្តិក ឆ្នាំកុរ ឯកស័ក ព.ស. ២៥៦៣ ត្រូវនឹងថ្ងៃទី៥ ខែវិច្ឆិកា ឆ្នាំ២០១៩នេះរួច ឯកឧត្តមបណ្ឌិតសភាចារ្យ សុខ ទូច ប្រធានរាជបណ្ឌិត្យសភាកម្ពុជា បានបន្តអនុញ្ញាតឱ្យប្រតិភូចិនដែលអញ្ជើញមកពីវិទ្យាស្ថានចិនសម្រាប់សិក្សាទំនាក់ទំនងអន្តរជាតិសហសម័យ ( China Institute of Contemporary International Relations) ដែលវិទ្យាស្ថាននេះបានចុះអនុស្សរណៈយោគយល់ជាមួយរាជបណ្ឌិត្យសភាកម្ពុជាកាលពីឆ្នាំ ២០១៤ ចូលជួបពិភាក្សាការងារ ដើម្បីពង្រីកសកម្មភាពស្រាវជ្រាវរួមគ្នាដើម្បីទំនាក់ទំនងបែបវិទ្យាសាស្ត្រឱ្យកាន់តែប្រសើរឡើង ដោយមានសមាសភាពចូលរួមឯកឧត្តមបណ្ឌិតសភាចារ្យ ឯកឧត្តមបណ្ឌិតប្រធានខុទ្ទកាល័យ ឯកឧត្តម អស់លោក លោកស្រីប្រតិភូចិន និងមន្ត្រីវិទ្យាស្ថានទំនាក់ទំនងអន្តរជាតិកម្ពុជាសរុបចំនួន ១៧រូប។

ថ្លែងក្នុងជំនួបពិភាក្សាការងារដែលប្រព្រឹត្តទៅក្នុងសាលប្រជុំក្រវាន់ នៃរាជបណ្ឌិត្យសភាកម្ពុជា ឯកឧត្តមបណ្ឌិតសភាចារ្យ សុខ ទូច បានមានប្រសាសន៍ស្វាគមន៍ប្រតិភូចិនដែលអញ្ជើញមកពីវិទ្យាស្ថានចិនសម្រាប់សិក្សាទំនាក់ទំនងអន្តរជាតិសហសម័យ ( China Institute of Contemporary International Relations) ដែលបានអញ្ជើញមកដល់រាជបណ្ឌិត្យសភាកម្ពុជាដែលជាស្ថាប័នសិក្សាស្រាវជ្រាវជាន់ខ្ពស់របស់ជាតិខ្មែរ។

ឱកាសនេះ ឯកឧត្តមបណ្ឌិតសភាចារ្យបានមានប្រសាសន៍ទៅកាន់ប្រតិភូចិន ដោយបង្ហាញអំពី ទិដ្ឋភាពការងារទូទៅ រចនាសម្ព័ន្ធ ចក្ខុវិស័យ និងទស្សនវិស័យរបស់រាជបណ្ឌិត្យសភាកម្ពុជា។ ឯកឧត្តមបណ្ឌិតសភាចារ្យ សុខ ទូច បានប្រសាសន៍ថា អំឡុងពេលឯកឧត្តមបណ្ឌិតសភាចារ្យបានចូលកាន់តំណែងជាប្រធានរាជបណ្ឌិត្យសភាកម្ពុជា រយៈពេលអស់ប្រមាណ ២ឆ្នាំមកបច្ចុប្បន្ននេះ រាជបណ្ឌិត្យសភាកម្ពុជាបានទទួលសមិទ្ធផលជារូបវន្ត និងអរូបវន្តជាច្រើន ក្នុងនោះ រួមមាន ការសាងសង់ហេដ្ឋារចនាសម្ព័ន្ធ សំណង់អគារបណ្តុះបណ្តាល និងស្រាវជ្រាវ ការពង្រឹងសមត្ថភាពនិងធនធានមនុស្ស និងរចនាសម្ព័ន្ធស្ថាប័នឧបសម្ព័ន្ធចំណុះរាជបណ្ឌិត្យសភាកម្ពុជា។

លើសពីនេះ ឯកឧត្តមបណ្ឌិតសភាចារ្យបានមានប្រសាសន៍បន្ថែមថា រាជបណ្ឌិត្យសភាកម្ពុជាបានដើរតួនាទីយ៉ាងសំខាន់ក្នុងការដោះស្រាយបញ្ហាជូនជាតិ និងប្រជាជន និងការបណ្តុះបណ្តាល និងស្រាវជ្រាវបញ្ញវន្តជាន់ខ្ពស់ជាតិខ្មែរ ក្នុងនោះ រួមមាន ការបណ្តុះបណ្តាលថ្នាក់ក្រោយឧត្តមសិក្សា (ថ្នាក់បរិញ្ញាបត្រជាន់ខ្ពស់ និងថ្នាក់បណ្ឌិត) ការស្រាវជ្រាវអំពី កិច្ចការងារព្រំដែនកម្ពុជា ការស្រាវជ្រាវអំពី វិស័យមីក្រូហិរញ្ញវត្ថុ វិស័យទេសចរណ៍ និងវិស័យកសិកម្ម។

ដោយផ្តោតលើគោលការណ៍ទ្រឹស្តីផ្សារភ្ជាប់នឹងការអនុវត្តហើយត្រូវមានសីលធម៌ក្នុងការបណ្តុះបណ្តាល និងការស្រាវជ្រាវជាក់ស្តែង ឯកឧត្តមបណ្ឌិតសភាចារ្យ សុខ ទូច បានជម្រាបជូនប្រតិភូចិនបន្ថែមថា ក្រៅពីទទួលសមិទ្ធផលស្នាដៃស្រាវជ្រាវធំៗជូនរាជរដ្ឋាភិបាល រាជបណ្ឌិត្យសភាកម្ពុជាបាន និងកំពុងអនុវត្តការស្រាវជ្រាវការចិញ្ចឹមគោយកទឹកដោះនៅក្នុងឧទ្យានរាជបណ្ឌិត្យសភាកម្ពុជា តេជោសែន ឫស្សីត្រឹប នៅក្នុងស្រុកឆែប ខេត្តព្រះវិហារផង។

នៅក្នុងជំនួបឱកាសនេះ ឯកឧត្តមបណ្ឌិតសភាចារ្យ សុខ ទូច និងប្រតិភូចិន បានពិភាក្សាការងារលើនយោបាយក្នុងតំបន់ ទំនាក់ទំនងអន្តរជាតិ កិច្ចសហប្រតិបត្តិការវិស័យសេដ្ឋកិច្ចចិន និងកម្ពុជា ការអភិវឌ្ឍន៍វិស័យកសិកម្ម កសិឧស្សាហកម្មចិន និងកម្ពុជា កិច្ចសហប្រតិបត្តិការរវាងចិន និងកម្ពុជា ចិន និងអាស៊ាន អាម៉េរិក និងចិន និងពង្រីកសកម្មភាពស្រាវជ្រាវរួមគ្នាដើម្បីទំនាក់ទំនងបែបវិទ្យាសាស្ត្រឱ្យកាន់តែប្រសើរឡើង។ ឯកឧត្តមបណ្ឌិតសភាចារ្យ សុខ ទូច បានមានប្រសាសន៍ទៅកាន់ប្រតិភូចិនថា រាជបណ្ឌិត្យសភាកម្ពុជាស្វាគមន៍អ្នកសិក្សាស្រាវជ្រាវជាតិ និងអន្តរជាតិធ្វើការសិក្សាស្រាវជ្រាវលើបញ្ហាប្រឈមទាំងក្នុងជាត និងអន្តរជាតិរួមគ្នា ដើម្បីបុព្វហេតុជាតិ និងប្រជាជន។

ក្នុងជំនួបពិភាក្សាការងារអស់រយៈពេលប្រមាណពីរម៉ោង លោកបណ្ឌិត FENG Zhongping អនុប្រធាន វិទ្យាស្ថានចិនសម្រាប់សិក្សាទំនាក់ទំនងអន្តរជាតិសហសម័យ បានមានប្រសាសន៍ថ្លែងអំណរគុណជូនឯកឧត្តមបណ្ឌិតសភាចារ្យដែលបានអនុញ្ញាតឱ្យរូបលោក និងសហការីចូលជួបពិភាក្សាការងារ និងបង្ហាញពីគោលបំណងសហប្រតិបត្តិការងារសិក្សាស្រាវជ្រាវ នាពេលនេះ។ លោកបណ្ឌិត FENG Zhongpingបានសន្យាថា លោកនឹងរាយការណ៍អំពី លទ្ធផលពិភាក្សាការងារជូនរដ្ឋាភិបាលចិន ដើម្បីសិក្សាលទ្ធភាពបង្កើនកិច្ចប្រតិបត្តិការរវាងស្ថាប័នសិក្សាស្រាវជ្រាវជាន់ខ្ពស់ភាគីទាំងពីរ នាពេលដ៏ឆាប់ខាងមុខ៕

RAC Media

  ថ្ងៃអង្គារ, 05 វិច្ឆិកា 2019 ម៉ោង 09:20 PM

«ឯកឧត្តមបណ្ឌិតសភាចារ្យ សុខ ទូច អនុញ្ញាតឱ្យមន្ត្រីក្រសួងការបរទេសអាម៉េរិកចូលជួបពិភាក្សាការងារ ដើម្បីបង្កើនកិច្ចសហប្រតិបត្តិការផ្នែកបណ្តុះបណ្តាល និងស្រាវជ្រាវ នៅរាជបណ្ឌិត្យសភាកម្ពុជា»

(រាជបណ្ឌិត្យសភាកម្ពុជា)៖ នៅរសៀលថ្ងៃអង្គារ ៩កើត ខែកត្តិក ឆ្នាំកុរ ឯកស័ក ព.ស. ២៥៦៣ ត្រូវនឹងថ្ងៃទី៥ ខែវិច្ឆិកា ឆ្នាំ២០១៩ ឯកឧត្តមបណ្ឌិតសភាចារ្យ សុខ ទូច បានអនុញ្ញាតឱ្យមន្ត្រីក្រសួងការបរទេសសហរដ្ឋអាម៉េរិក និងមន្ត្រីស្ថានទូតអាម៉េរិកប្រចាំកម្ពុជាចូលជួបពិភាក្សាការងារ ដើម្បីបង្កើនកិច្ចសហប្រតិបត្តិការរវាងរាជបណ្ឌិត្យសភាកម្ពុជា និងស្ថាប័នសិក្សាស្រាវជ្រាវសហរដ្ឋអាម៉េរិក។

នៅក្នុងជំនួបពិភាក្សាការងារដែលប្រព្រឹត្តទៅក្នុងសាលស្លឹករឹតនៃរាជបណ្ឌិត្យសភាកម្ពុជា ឯកឧត្តមបណ្ឌិតសភាចារ្យ សុខ ទូច បានមានប្រសាសន៍ស្វាគមន៍មន្ត្រីក្រសួងការបរទេសសហរដ្ឋអាម៉េរិក និងមន្ត្រីស្ថានទូតអាម៉េរិកប្រចាំកម្ពុជាដែលបានអញ្ជើញមករាជបណ្ឌិត្យសភាកម្ពុជាដែលជាស្ថាប័នសិក្សាស្រាវជ្រាវជាន់ខ្ពស់របស់ជាតិខ្មែរ។

ឱកាសនេះ ឯកឧត្តមបណ្ឌិតសភាចារ្យបានមានប្រសាសន៍ទៅកាន់មន្ត្រីការទូតអាម៉េរិក ដោយបង្ហាញអំពី ទិដ្ឋភាពការងារទូទៅ រចនាសម្ព័ន្ធ ចក្ខុវិស័យ និងទស្សនវិស័យរបស់រាជបណ្ឌិត្យសភាកម្ពុជា។ ឯកឧត្តមបណ្ឌិតសភាចារ្យ សុខ ទូច បានប្រសាសន៍ថា អំឡុងពេលឯកឧត្តមបណ្ឌិតសភាចារ្យបានចូលកាន់តំណែងជាប្រធានរាជបណ្ឌិត្យសភាកម្ពុជា រយៈពេលអស់ប្រមាណ ២ឆ្នាំមកបច្ចុប្បន្ននេះ រាជបណ្ឌិត្យសភាកម្ពុជាបានទទួលសមិទ្ធផលជារូបវន្ត និងអរូបវន្តជាច្រើន ក្នុងនោះ រួមមាន ការសាងសង់ហេដ្ឋា រចនាសម្ព័ន្ធ សំណង់អគារបណ្តុះបណ្តាល និងស្រាវជ្រាវ ការពង្រឹងសមត្ថភាពនិងធនធានមនុស្ស និងរចនាសម្ព័ន្ធស្ថាប័នឧបសម្ព័ន្ធរាជបណ្ឌិត្យសភាកម្ពុជា។

លើសពីនេះ ឯកឧត្តមបណ្ឌិតសភាចារ្យបានមានប្រសាសន៍បន្ថែមថា រាជបណ្ឌិត្យសភាកម្ពុជាបានដើរតួនាទីយ៉ាងសំខាន់ក្នុងការដោះស្រាយបញ្ហាជូនជាតិ និងប្រជាជន និងការបណ្តុះបណ្តាល និងស្រាវជ្រាវបញ្ញវន្តជាន់ខ្ពស់ជាតិខ្មែរ ក្នុងនោះ រួមមាន ការបណ្តុះបណ្តាលថ្នាក់ក្រោយឧត្តមសិក្សា (ថ្នាក់បរិញ្ញាបត្រជាន់ខ្ពស់ និងថ្នាក់បណ្ឌិត) ការស្រាវជ្រាវអំពី កិច្ចការងារព្រំដែនកម្ពុជា ការស្រាវជ្រាវអំពី វិស័យមីក្រូហិរញ្ញវត្ថុ វិស័យទេសចរណ៍ និងវិស័យកសិកម្ម។

ដោយផ្តោតលើគោលការណ៍ទ្រឹស្តីផ្សារភ្ជាប់នឹងការអនុវត្តហើយត្រូវមានសីលធម៌ក្នុងការបណ្តុះបណ្តាល និងការស្រាវជ្រាវជាក់ស្តែង ឯកឧត្តមបណ្ឌិតសភាចារ្យ សុខ ទូច បានជម្រាបជូនមន្ត្រីការបរទេសអាម៉េរិកបន្ថែមថា ក្រៅពីទទួលសមិទ្ធផលស្នាដៃស្រាវជ្រាវធំៗជូនរាជរដ្ឋាភិបាល រាជបណ្ឌិត្យសភាកម្ពុជាបាន និងកំពុងអនុវត្តការស្រាវជ្រាវការចិញ្ចឹមគោយកទឹកដោះនៅក្នុងឧទ្យានរាជបណ្ឌិត្យសភាកម្ពុជា តេជោសែន ឫស្សីត្រឹប នៅក្នុងស្រុកឆែប ខេត្តព្រះវិហារទៀតផង។

ឆ្លៀតក្នុងឱកាសនេះ ឯកឧត្តមបណ្ឌិតសភាចារ្យ សុខ ទូច បានស្នើមន្ត្រីការបរទេសអាម៉េរិកពិចារណាសហការផ្នែកបណ្តុះបណ្តាល និងស្រាវជ្រាវជាភាសាអង់គ្លេស ដើម្បីបង្កើនកិច្ចសហប្រតិបត្តិការរវាងរាជបណ្ឌិត្យសភាកម្ពុជា និងស្ថាប័នសិក្សាស្រាវជ្រាវរបស់អាម៉េរិក។

ជាការឆ្លើយតបនឹងសំណើរបស់ឯកឧត្តមបណ្ឌិតសភាចារ្យ សុខ ទូច ក្នុងជំនួបពិភាក្សាការងារអស់រយៈពេលប្រមាណមួយម៉ោង លោក Steve Goldrup មន្ត្រីក្រសួងការបរទេសអាម៉េរិកបានមានប្រសាសន៍ថ្លែងអំណរគុណជូនឯកឧត្តមបណ្ឌិតសភាចារ្យដែលបានអនុញ្ញាតឱ្យរូបលោក និងសហការីចូលជួបពិភាក្សាការងារ និងបង្ហាញពីគោលបំណងសហប្រតិបត្តិការងារសិក្សាស្រាវជ្រាវ នាពេលនេះ។ លោក Steve Goldrupបានសន្យាថា លោកនឹងរាយការណ៍លទ្ធផលជំនួបពិភាក្សាការងារនាពេលនេះជូនសហការីនៅក្នុងស្ថានទូតអាម៉េរិកប្រចាំនៅព្រះរាជាណាចក្រកម្ពុជា និងក្រសួងការបរទេសអាម៉េរិក ដើម្បីសិក្សាលទ្ធភាពបង្កើនកិច្ចប្រតិបត្តិការរវាងស្ថាប័នសិក្សាស្រាវជ្រាវជាន់ខ្ពស់ភាគីទាំងពីរ នាពេលដ៏ឆាប់ខាងមុខ៕

RAC Media

  ថ្ងៃអង្គារ, 05 វិច្ឆិកា 2019 ម៉ោង 09:12 PM

«ឯកឧត្តមបណ្ឌិត យង់ ពៅ និងឯកឧត្តមបណ្ឌិត គិន ភា អញ្ជើញចូលរួមវេទិកាអន្តរជាតិស្តីពី ការអភិវឌ្ឍក្នុងប្រទេសចិនរយៈពេល៧០ឆ្នាំ និងការកសាងសហគមន៍អនាគតរួមសម្រាប់មនុស្សជាតិ នៅទីក្រុងសៀងហៃ នៃសាធារណរដ្ឋប្រជាមានិតចិន»

(ទីក្រុងសៀងហៃ)៖ តបតាមការអញ្ជើញរបស់វិទ្យាស្ថានជាតិសម្រាប់យុទ្ធសាស្ត្រសកល នៃសាធារណរដ្ឋប្រជាមានិតចិន (National Institute for Global Strategy) ឯកឧត្តមបណ្ឌិត យង់ ពៅ អគ្គលេខាធិការរាជបណ្ឌិត្យសភាកម្ពុជា និងឯកឧត្តមបណ្ឌិត គិន ភា ប្រធានវិទ្យាស្ថានទំនាក់ទំនងអន្តរជាតិកម្ពុជា នៃរាជបណ្ឌិត្យសភាកម្ពុជា បានអញ្ជើញចូលរួមវេទិកាអន្តរជាតិស្តីពី «ការអភិវឌ្ឍក្នុងប្រទេសចិនរយៈពេល៧០ឆ្នាំ និងការកសាងសហគមន៍អនាគតរួមសម្រាប់មនុស្សជាតិ» នៅទីក្រុងសៀងហៃ នៃសាធារណរដ្ឋប្រជាមានិតចិន" ចាប់ពីថ្ងៃទី៤ ដល់ថ្ងៃទី៨ ខែវិច្ឆិកា ឆ្នាំ២០១៩។

វេទិកាអន្តជាតិនេះ គឺជាការផ្តល់ឱកាសដល់ថ្នាក់ដឹកនាំ អ្នកសិក្សា ស្រាវជ្រាវជំុវិញសកលលោកជួបពិភាក្សាស្វែងយល់ស្តីពី «ការអភិវឌ្ឍក្នុងប្រទេសចិនរយៈពេល៧០ឆ្នាំ និងការកសាងសហគមន៍អនាគតរួមសម្រាប់មនុស្សជាតិ» ៕

RAC Media

  ថ្ងៃអង្គារ, 05 វិច្ឆិកា 2019 ម៉ោង 01:47 PM

សិក្ខាសាលាស្តីពី «លំហូរពលករទេសន្តរប្រវេសន៍កម្ពុជា៖ ផលប្រយោជន៍ និងបញ្ហាប្រឈម»

(រាជបណ្ឌិត្យសភាកម្ពុជា)៖ នៅថ្ងៃអង្គារ ៩កើត ខែកត្តិក ឆ្នាំកុរ ឯកស័ក ព.ស. ២៥៦៣ ត្រូវនឹងថ្ងៃទី៥ ខែវិច្ឆិកា ឆ្នាំ២០១៩ វិទ្យាស្ថានមនុស្សសាស្រ្ត និងវិទ្យាសាស្រ្តសង្គម នៃរាជបណ្ឌិត្យសភាកម្ពុជាបានរៀបចំសិក្ខាសាលាស្តីពី លំហូរពលករទេសន្តរប្រវេសន៍កម្ពុជា៖ ផលប្រយោជន៍ និងបញ្ហាប្រឈម ដើម្បីធ្វើការបង្ហាញពីលទ្ធសិក្សាស្រាវជ្រាវលើប្រធានបទ លំហូរពលករទេសន្តរប្រវេសន៍កម្ពុជា៖ ផលប្រយោជន៍ និងបញ្ហាប្រឈម នៅកម្ពុជា ដោយសមាសភាពចូលរួមឯកឧត្តមបណ្ឌិតសភាចារ្យ ឯកឧត្តម អស់លោក លោកស្រី អ្នកនាង និងកញ្ញា និស្សិត ដែលជាតំណាង រាជបណ្ឌិត្យសភាកម្ពុជា តំណាងក្រសួង ការងារ និងបណ្តុះបណ្តាលវិជ្ជាជីវៈ តំណាងអង្គការពលកម្មអន្តរជាតិ តំណាងមន្ទីការងារ និងបណ្តុះបណ្តាលវិជ្ជាជីវៈខេត្តប៉ៃលិន កំពង់ចាម ព្រៃវែង និងតាកែវ ព្រមទាំងតំណាងក្រុមហ៊ុននាំពលករទៅធ្វើការនៅបរទេស សរុបចំនួនប្រមាណ ៨២រូប។

ថ្លែងក្នុងពិធីបើកសិក្ខាសាលាដែលប្រព្រឹត្តទៅនៅក្នុងសាលប្រជុំវិទ្យាស្ថាន ខុងជឺ នៃរាជបណ្ឌិត្យសភាកម្ពុជា លោកបណ្ឌិត ឆេង វណ្ណារិទ្ធ ប្រធានស្តីទី វិទ្យាស្ថានមនុស្សសាស្រ្ត និងវិទ្យាសាស្រ្តសង្គម នៃរាជបណ្ឌិត្យសភាកម្ពុជា បានមានប្រសាសន៍ឱ្យដឹងថា ការធ្វើទេសន្តរប្រវេសន៍ការងារអន្តរជាតិ គឺជាព្រឹត្តិការណ៍ដែលកើតមានតាំងពីយូរមកហើយបានបន្តកើតមានរហូតដល់ពេលបច្ចុប្បន្ន។ ចំពោះស្ថានភាពជាក់ស្តែងនៅប្រទេសកម្ពុជា លោកបណ្ឌិតបានស្រាវជ្រាវឃើញថា កត្តាចម្បងនៃចំណាកស្រុកឆ្លងដែនពីប្រទេសកម្ពុជា គឺដោយសារភាពក្រីក្រ ភាពអត់ការងារធ្វើ ឬមានការងារធ្វើមិនពេញលេញ និងមិនច្បាស់លាស់ និងកង្វះការទទួលបានការអប់រំ ព្រមទាំងសេវាសង្គមផ្សេងៗមួយចំនួនទៀត។

លើសពីនេះ បណ្ឌិត ឆេង វណ្ណារិទ្ធ បានមានប្រសាសន៍បន្ថែមថា បើទោះបីជាប្រទេសកម្ពុជាមានកំណើនសេដ្ឋកិច្ចជាមធ្យមប្រចាំឆ្នាំ ៧ភាគរយក្នុងរយៈជាងកន្លះទសវត្សរ៍កន្លងមកក៏ដោយ ក៏ភាពនៅមានកម្រិតនៃការអភិវឌ្ឍសេដ្ឋកិច្ចសង្គមនៅតែជាចំណោទបញ្ហាសំខាន់នៅឡើយ។ ផ្អែកតាមលទ្ធផលស្រាវជ្រាវ លោកបណ្ឌិតបានបង្ហាញឱ្យដឹងថា ប្រទេសគោលដៅនៃពលករចំណាកស្រុករបស់កម្ពុជា គឺប្រទេសថៃ ម៉ាឡេស៊ី កូរ៉េខាងត្បូង សិង្ហបុរី ជប៉ុន និងមជ្ឈិមបូព៌ា ក្នុងចំណោមនេះប្រទេសថៃ គឺជាប្រទេសដែលពលករចំណាកស្រុកពីប្រទេសកម្ពុជាទៅច្រើនជាងគេ។

ដើម្បីរកដោះស្រាយបញ្ហាប្រឈមការធ្វើចំណាកស្រុក និងឆ្លងដែនទៅធ្វើការនៅបរទេសរបស់ប្រជាពលករខែ្មរ និងការខាតបង់សេដ្ឋកិច្ចជាតិ លោកបណ្ឌិត ឆេង វណ្ណារិទ្ធ បានធ្វើការសិក្សាស្រាវជ្រាវ លំហូរពលករទេសន្តរប្រវេសន៍កម្ពុជា៖ ផលប្រយោជន៍ និងបញ្ហាប្រឈម អស់រយៈពេលចំនួន ៨ខែ ចាប់ពីខែមីនា រហូតដល់ដំណាច់ខែតុលា ឆ្នាំ២០១៩កន្លងមកនេះ។ លោកបណ្ឌិតបានមានប្រសាសន៍បញ្ជាក់ថា ការរៀបចំសិក្ខាសាលានាពេលនេះ មានគោលបំណងផ្តល់ឱកាសដល់ភាគីពាក់ព័ន្ធទាំងអស់ពិភាក្សាផ្ទៀងផ្ទាត់ទិន្នន័យឱ្យមានសង្គតិភាព ប្រសិទ្ធភាព និងប្រសិទ្ធផលសិក្សាស្រាវជ្រាវ ដើម្បីធ្វើជាធាតុចូលដ៏សំខាន់ជូនក្រសួង ស្ថាប័នពាក់ព័ន្ធ។

ឱកាសនេះដែរ ឯកឧត្តមបណ្ឌិតសភាចារ្យ ច័ន្ទ សំណព្វ អនុប្រធានរាជបណ្ឌិត្យសភាកម្ពុជា បានមានប្រសាសន៍ថា លំហូរពលករទេសន្តរប្រវេសន៍កម្ពុជាទៅធ្វើការនៅបរទេស និងក្រោយពេលធ្វើមាតុភូមិនិវត្តន៍នៅតែជាប្រធានបទមួយដែលត្រូវដោះស្រាយក្នុងក្របខណ្ឌគោលនយោបាយជាតិ ហើយតម្រូវឱ្យគ្រប់ក្រសួង ស្ថាប័ន អង្គភាព អាជ្ញាធរ និងសមត្ថកិច្ចគ្រប់ជាន់ថ្នាក់ទាំងអស់រួមគ្នាដោះស្រាយ ដើម្បីបន្តធានាថា ពលករខ្មែរម្នាក់ៗបានចូលធ្វើការងារណាមួយ និងនៅប្រទេសណាមួយដោយស្របច្បាប់ ហើយទទួលបាននូវការការពារសុវត្ថិភាពទាំងផ្លូវកាយ និងផ្លូវចិត្ត ជាមួយនឹងផលប្រយោជន៍សម្រាប់ខ្លួនឯង ក្រុមគ្រួសារផ្ទាល់ ប្រទេសជាតិផងដែរ និងប្រកបដោយកិត្តិយស និងសេចក្តីថ្លៃថ្នូរ តាមរយៈអនុក្រឹត្យលេខ ១៩០ អនក្រ.បក ចុះថ្ងៃទី១៧ ខែសីហា ឆ្នាំ២០១១ ស្តីពី ការគ្រប់គ្រងលើការបញ្ជូនពលករខ្មែរទៅធ្វើការនៅបរទេស តាមរយៈទីភ្នាក់ងារជ្រើសរើសឯកជន៕

RAC Media 

  ថ្ងៃអង្គារ, 05 វិច្ឆិកា 2019 ម៉ោង 01:39 PM

«សមិទ្ធិផលនៃកិច្ចសហការណ៍ចូលរួមរបស់មន្រ្តីនៃរាជបណ្ឌិត្យសភាកម្ពុជា នៅក្នុងកំណាយស្រាវជ្រាវបុរាណវត្ថុវិទ្យាផូស៊ីលឈើ ដែលរៀបចំឡើងដោយក្រសួងបរិស្ថាន នៅក្នុងខេត្តរតនគីរី»

តាមរយៈការសិក្សាភូមិវិទ្យា យើងតែងតែដឹងថាកម្ពុជាជាអតីតបាតសមុទ្រ ប៉ុន្តែសម្រាប់ជាភស្តុតាងសម្រាប់បញ្ជាក់នូវសម្មតិកម្មដែលអាចអោយមានភាពជឿជាក់ច្បាស់លាស់នោះហាក់នៅមានចំនួនតិចតួចនៅឡើយ ជាពិសេសគឺពត៌មានអំពីផូស៊ីលនានានៅក្នុងប្រទេសកម្ពុជា គឺនៅមានចំនួនតិចតួចណាស់ ព្រមទាំងមិនទាន់មានឯកសារណាមួយបាន​ចងក្រងជាផ្លូវការអំពីផូស៊ីលនៅក្នុងប្រទេសកម្ពុជានៅឡើយទេ។ នៅក្នុងធម្មជាតិ ផូស៊ីលជាមរតកធម្មជាតិដែលមាននៅសល់ដោយកម្រ ព្រោះផូស៊ីលដែលនៅសេសសល់នោះមានមិនដល់១ភាគរយទេ ដូចនេះផូស៊ីលគឺជាភស្តុ​តាងតែមួយគត់ដែលអាចបញ្ជាក់ពីប្រវត្តិធម្មជាតិនៃទីតាំង និងប្រវត្តនៃភូគព្ភសាស្រ្តនៃតំបន់ឬប្រទេសណាមួយកាលពីអតីតកាល។

កន្លងមកកាលពីឆ្នាំ២០១៧ ពត៌មាននៃការសិក្សាផូស៊ីលនៅកម្ពុជា គឺក្រុមការងារនៃនាយកដ្ឋានតំបន់បេតិកភណ្ឌនៃក្រសួងបិស្ថាន បានចាប់ផ្តើមសិក្សារកឃើញទីតាំងសំណល់ផូស៊ីលមួយក្នុងពេលចុះសិក្សាបុរាណស្ថាននៅដែនជម្រកសត្វព្រៃគូលែន-ព្រហ្មទេព ខេត្តព្រះវិហារ ជាហេតុនាំអោយមានការបន្តការចាប់ផ្តើមសិក្សាផូស៊ីលពុំដាច់រហូតដល់ឆ្នាំ២០១៩នេះ។ ដោយឡែកនៅក្នុងឆ្នាំ២០១៩នេះ ក៏បានផ្តួចផ្តើមស្រាវជ្រាវបែបកំណាយស្រាវជ្រាវបុរាណវិទ្យា ដែលក្រៅពីមន្រ្តីរបស់នាយកដ្ឋានតំបន់បេតិកភ័ណ្ឌនៃក្រសួងបរិស្ថាន ក៏មានការរៀបចំបន្ថែមនូវសមាសភាពចូលរួមសហការណ៍ពីអ្នកសិក្សាស្រាវជ្រាវមកពីស្ថាប័ននានាបន្ថែមទៀតដូចជា អ្នកស្រាវជ្រាវមកពីស្ថាប័នរាជបណ្ឌិត្យសភាកម្ពុជា អ្នកជំនាញផ្នែកធរណីវិទ្យា អ្នកស្រាវជ្រាវសត្វនិងរុក្ខជាតិ អ្នកជំនាញមកពីក្រសួងវប្បធម៌និងវិចិត្រសិល្បៈ ក្រុមយុវជនស្ម័គ្រចិត្ត និងមន្រ្តីឧទ្យានុរក្សផងដែរ នៅក្នុងដែនអភិរក្សលំផាត់ ស្រុកលំផាត់ ខេត្តរតនគីរី ដែលនឹងប្រព្រឹត្តទៅចាប់ពីថ្ងៃទី២២ ខែតុលា ដល់ថ្ងៃទី១០ ខែវិច្ឆិកា ឆ្នាំ២០១៩។

នៅក្នុងឱកាសនោះដែរ លោក ហឿង សុធារស់ ប្រធានផ្នែកបុរាណវត្ថុវិទ្យានៃវិទ្យាស្ថានវប្បធម៌ និងវិចិត្រសិល្បៈ ក៏ត្រូវបានថ្នាក់ដឹកនាំនៃរាជបណ្ឌិត្យសភាកម្ពុជាចាត់តាំងដើម្បីចូលរួមនៅក្នុងកិច្ចការសហការណ៍ស្រាវជ្រាវនោះ តាមការស្នើសុំពីខាងក្រសួងបរិស្ថានផងដែរ។ លោក ហឿង សុធាស់ បានបង្ហាញឱដឹងពីគោលបំណងនៃកំណាយស្រាវជ្រាវនេះដែរថា «កិច្ចការនេះគឺក្រសួងបរិស្ថានរៀបចំឡើងដើម្បីប្រមូលការសហការណ៍ពីអ្នកជំនាញមកពីស្ថាប័នផ្សេងៗដែលមានវិជ្ជាជីវៈនិងជំនាញពាក់ព័ន្ធចូលរួមជាបច្ចេកទេសនិងបទពិសោធន៍ សម្រាប់ប្រមូលទិន្នន័យនិងរៀបចំចងក្រងការសិក្សានេះជាឯកសារសម្រាប់ជាជំនួយក្នុងការសិក្សាពីសក្តានុពលនៃតំបន់ដែលផូស៊ីលឈើតាំងនៅសម្រាប់រៀបចំជាទីតាំងសម្រាប់អភិរក្សនិងអភិវឌ្ឍក្លាយជាតំបន់ទាក់ទាញទេសចរណ៍បែបធម្មជាតិ និងជាកន្លែងសម្រាប់សិក្សាស្រាវជ្រាវផូស៊ីលផងដែរ»។

ការងារកំណាយស្រាវជ្រាវផូស៊ីលឈើនេះ គឺមានការចាប់អារម្មណ៍ខ្ពស់ពីថ្នាក់ដឹកនាំនៃក្រសួងបរិស្ថាន វិស័យពត៍មាននៅក្នុងខេត្តរតនគីរី ក្រុមហ៊ុនឯកជនដែលប្រកបរបរវិស័យទេសចរណ៍ ជាពិសេសគឺក្រសួងបរិស្ថានបានផលិតនូវកម្រងពត៌មានជាវីដេអូមួយផ្សព្វផ្សាយនៅក្នុង facebook page របស់ក្រសួងផ្សព្វផ្សាយជាសារធារណៈដល់មហាជនទូទៅ ដូចដែលមានតំណភ្ជាប់តាមអាស័យដ្ឋាននេះស្រាប់ https://www.facebook.com/314699302002531/posts/1515866005219182?vh=e&d=n&sfns=mo ។

RAC Media

ប្រភព៖ ហឿង សុធារស់ ប្រធានផ្នែកបុរាណវិទ្យា នៃវិទ្យាស្ថានវប្បធម៌និងវិចិត្រសិល្បៈនៃរាជបណ្ឌិត្យសភាកម្ពុជា។

  ថ្ងៃចន្ទ, 04 វិច្ឆិកា 2019 ម៉ោង 10:59 AM