រាជបណ្ឌិត្យសភាកម្ពុជា

«រាជបណ្ឌិត្យសភាកម្ពុជារៀបចំកិច្ចប្រជុំរួម រវាងថ្នាក់ដឹកនាំនិងមន្ត្រីរាជការនៃរាជបណ្ឌិត្យសភាកម្ពុជា»

ភ្នំពេញ៖ នៅព្រឹកនៅថ្ងៃសុក្រ ៧រោច ខែភទ្របទ ឆ្នាំកុរ ឯកស័ក ព.ស. ២៥៦៣ ត្រូវនឹងថ្ងៃទី២០ ខែកញ្ញា ឆ្នាំ២០១៩ វេលាម៉ោង ៩:០០ នាទីព្រឹក នៅសាលប្រជុំវិទ្យាស្ថានខុងជឺ នៃរាជបណ្ឌិត្យសភាកម្ពុជា មានរៀបចំ កិច្ចប្រជុំរួមមួយរវាងថ្នាក់ដឹកនាំនិងមន្ត្រីរាជការនៃរាជបណ្ឌិត្យសភាកម្ពុជា ដែលមានការចូលរួមពីសំណាក់ ឯកឧត្ដមបណ្ឌិតសភាចារ្យអនុប្រធាន ឯកឧត្ដមបណ្ឌិតជាថ្នាក់ដឹកនាំនៃវិទ្យាស្ថានទាំង៦និងស្ថាប័នឧបសម្ព័ន្ធនៃរាជបណ្ឌិត្យសភាកម្ពុជា និងមន្ត្រីរាជការទាំងអស់នៃរាជបណ្ឌិត្យសភាកម្ពុជា ក្រោមអធិបតីភាព ឯកឧត្តមបណ្ឌិតសភាចារ្យ សុខ ទូច ប្រធានរាជបណ្ឌិត្យសភាកម្ពុជា។
កិច្ចប្រជុំរួមនៃរាជបណ្ឌិត្យសភាកម្ពុជានាព្រឹកនេះ មានប្រធានបទសំខាន់ៗចំនួន៣ ដែលត្រូវបានកំណត់ជារបៀបវារៈគឺ៖
១- ការចុះបញ្ជីទីតាំងបុរាណនៅឧទ្យានរាជបណ្ឌិត្យសភាកម្ពុជាតេជោសែនឫស្សីត្រឹបជាសម្បត្តិវប្បធម៌ជាតិ
២- ការបណ្ដុះបណ្ដាល
៣- ការត្រៀមខ្លួនរបស់មន្ត្រី រាជបណ្ឌិត្យសភាកម្ពុជា ដែលមានសមត្ថភាពទៅជាថ្នាក់ដឹកនាំអង្គភាពចំណុះរាជបណ្ឌិត្យសភាកម្ពុជា
៤- ផ្សេងៗ
នៅក្នុងរៀបវារៈផ្សេងៗ ឯកឧត្ដមបណ្ឌិតសភាចារ្យ ប្រធានរាជបណ្ឌិត្យសភាកម្ពុជា បានមានប្រសាសន៍ក្រើនរំឭកអំពី ស្ថានភាពដំណើរការប្រព្រឹត្តទៅនៃវិទ្យាស្ថាននិងអង្គភាពដែលជាឧបសម្ព័ន្ធនៃរាជបណ្ឌិត្យសភាកម្ពុជា និងជាពិសេសអំពីគម្រោងស្រាវជ្រាវអាទិភាពរបស់រាជបណ្ឌិត្យសភាកម្ពុជាដើម្បីស្វែងរកធាតុចូលជូនរាជរដ្ឋាភិបាលនិងស្ថាប័នដែលពាក់ព័ន្ធនានា។
ជាមួយគ្នានេះដែរ ឯកឧត្តមបណ្ឌិតសភាចារ្យ ប្រធានរាជបណ្ឌិត្យសភាកម្ពុជា ក៏បានផ្ដល់ជាទស្សនវិស័យ សម្រាប់មន្ត្រីរាជការនៃរាជបណ្ឌិត្យសភាកម្ពុជាទាំងអស់ ក្នុងការរៀបចំស្នើសុំគម្រោងស្រាវជ្រាវរបស់រាជបណ្ឌិត្យសភាកម្ពុជា ដោយទាមទារឱ្យពិនិត្យមើលនូវវិស័យដែលជាអាទិភាពជាក់ស្ដែង ដើម្បីបំពេញនូវតម្រូវការនិងផលប្រយោជន៍សំខាន់សម្រាប់សង្គមកម្ពុជានាពេលបច្ចុប្បន្ន៕

RAC Media

  ថ្ងៃសុក្រ, 20 កញ្ញា 2019 ម៉ោង 12:19 PM

«ប្រជុំដើម្បីពិនិត្យ ពិភាក្សា និង អនុម័តបច្ចេកសព្ទគណ:កម្មការភាសាវិទ្យា...»

នៅព្រឹកនិងរសៀលថ្ងៃអង្គារ ទី១៧ ខែកញ្ញា ឆ្នាំ២០១៩ ក្រុមប្រឹក្សាជាតិភាសាខ្មែរ ក្រោមអធិបតីភាពឯកឧត្តមបណ្ឌិត ជួរ គារី បានដឹកនាំប្រជុំដើម្បីពិនិត្យ ពិភាក្សា និង អនុម័តបច្ចេកសព្ទគណ:កម្មការភាសាវិទ្យាបានចំនួន០៧ពាក្យ ដូចខាងក្រោម៖

RAC Media

  ថ្ងៃពុធ, 18 កញ្ញា 2019 ម៉ោង 11:28 AM

«កំណាយឡស្លដែកនៅឧទ្យានរាជបណ្ឌិត្យសភាតេជោសែនឬស្សីត្រឹប»

ចាប់តាំងពីថ្ងៃទី១២ ខែកញ្ញា ឆ្នាំ២០១៩ រហូតដល់ថ្ងៃទី១៧ ខែកញ្ញា ឆ្នាំ២០១៩ អ្នកជំនាញនៃឧទ្យានរាជបណ្ឌិត្យ​សភាកម្ពុជា តេជោសែន ឫស្សី និងអ្នកជំនាញនៃវិទ្យាស្ថានវប្បធម៌ និងវិចិត្រសិល្បៈ នៃរាជបណ្ឌិត្យសភាកម្ពុជា ដោយ​​មានការចូលរួមពីមន្ត្រីក្រសួងវប្បធម៌ និងវិចិត្រសិល្បៈ និងមានការចូលរួមពីអ្នកជំនាញបច្ចេកទេសផែនទី និងជំនាញបុរាណវិទ្យាមកពីតំបន់អង្គរ បានធ្វើកំណាយស្រាវជ្រាវរករចនាសម្ព័ន្ធឡស្លដែកនៅក្នុងឧទ្យានរាជ​បណ្ឌិត្យ​សភាកម្ពុជា តេជោសែន ឫស្សីត្រឹប។

រហូតមកដល់ថ្ងៃនេះក្រុមការងារកំណាយបានធ្វើកំណាយចំនួន២ទីតាំង ដែលទីតាំងទី១ស្ថិតនៅលើទួលសន្លុង (ទួលគំនរអាចម៍ដែក) និងទីតាំងទី២នៅទីរាបដែលជាទីតាំងមនុស្សស្លដែករស់នៅ។

ចំពោះរណ្ដៅកំណាយលើទួលគំនរអាចម៍ដែក ក្រុមការងារបានជីករណ្ដៅកំណាយ ទទឹងប្រវែង ៥ម៉ែត្រ និងបណ្ដោយប្រវែង៦ម៉ែត្រ និងក្នុងជម្រៅ១ម៉ែត្រ។ លទ្ធផលជាបណ្ដោះអាសន្ន យើងបានរកឃើញរចនាសម្ព័ន្ធឡតូចចំនួន២​ត្រួតលើគ្នា ដែលឡនេះមានអង្កត់ផ្ចិតបាតប្រវែង៦០សង់ទីម៉ែត្រ។ យើងសន្និដ្ឋានជាបណ្ដោះអាសន្នថា ឡតូចៗទាំងពីរនេះមិនមែនជាប្រភេទឡស្លដែកនោះទេ ព្រោះឡស្លដែកមានទំហំធំ (ទទឹងប្រវែង១ម៉ែត្រ និងបណ្ដោយប្រវែង​២​ម៉ែត្រ)។ ដោយសារមានរ៉ែស្ពាន់ជាច្រើនដែលត្រូវបានរកឃើញនៅក្នុងរណ្ដៅកំណាយនៅលាយឡំជាមួយអាចម៍​ដែក យើងសន្និដ្ឋានថា ឡតូចទាំង២ជាឡស្លស្ពាន់។

កន្លងមក អ្នកស្រាវជ្រាវជាតិ និងអន្ដរជាតិដែលស្រាវជ្រាវក្នុងប្រទេសកម្ពុជាមិនទាន់រកឃើញស្ថានីយឡស្លស្ពាន់នៅឡើយទេ ទោះបីថា ស្ពាន់ត្រូវបានគេយកមកធ្វើជាបដិមាជាច្រើនក្នុងសម័យអង្គរ។ ប្រសិនបើសម្មតិកម្មនេះបង្ហាញថាជាឡស្លស្ពាន់ ឧទ្យានរាជបណ្ឌិត្យសភាកម្ពុជា តេជោសែន ឫស្សីត្រឹប គឺជាស្ថានីយទី១ក្នុងប្រទេសកម្ពុជាដែលរកឃើញថា ជាទីតាំងផលិតស្ពាន់ក្នុងសម័យអង្គរចាប់ពីសតវត្សទី១១ ដល់សតវត្សទី១៣។

RAC Media| តាកេត ស័ក្កដា

  ថ្ងៃពុធ, 18 កញ្ញា 2019 ម៉ោង 11:18 AM

ឯកឧត្តមអគ្គលេខាធិការនៃរាជបណ្ឌិត្យសភាកម្ពុជា ចុះពិនិត្យការងារកំណាយស្រាវជ្រាវនៅឧទ្យានឫស្សីត្រឹប

នារសៀល ថ្ងៃទី១៤ ខែកញ្ញា ឆ្នាំ២០១៩ ឯកឧត្តមបណ្ឌិត យង់ ពៅ អគ្គលេខាធិការនៃរាជបណ្ឌិត្យសភាកម្ពុជា បានអញ្ជើញចុះមកមើលការងារស្រាវជ្រាវ និងធ្វើកំណាយដល់ទីតាំងកំណាយឡស្លដែកនៅឧទ្យានរាជបណ្ឌិត្យសភាកម្ពុជា តេជោសែនឫស្សីត្រឹប។

រហូតដល់ថ្ងៃនេះ ក្រុមការងារកំណាយឡស្លដែក បានបន្តការងារកំណាយនៅលើទួលសន្លុងលេខ៦ ដោយបានរកឃើញត្រឡែក បំណែកជញ្ជាំងឡ និងបំណែកកុលាលភាជន៍សម័យអង្គរ។

គួរបញ្ជាក់ដែរថា ទីតាំងកំណាយនេះ ពុំធ្លាប់ត្រូវបានគេជីកកកាយពីមុនមកទេ។

  ថ្ងៃសៅរ៍, 14 កញ្ញា 2019 ម៉ោង 05:55 PM

ការរៀបចំសិក្ខាសាលា «បញ្ហាប្រឈមនៃបរិស្ថានរបស់កម្ពុជា និងគោលដៅអភិវឌ្ឍប្រកបដោយចីរភាព»

ដោយមានកិច្ចសហការជាមួយ វិទ្យាស្ថានបរិស្ថានកូរ៉េ (KEI) និង ក្រុមប្រឹក្សាជាតិអភិវឌ្ឍន៍ដោយចីរភាព (NCSD) រាជបណ្ឌិត្យសភាកម្ពុជា នឹងរៀបចំកម្មវិធីសិក្ខាសាលាមួយ ស្តីពី ‌«បញ្ហាប្រឈមនៃបរិស្ថានរបស់កម្ពុជា និងគោលដៅអភិវឌ្ឍប្រកបដោយចីរភាព»។

កម្មវិធីនេះ នឹងរៀបចំឡើងនៅថ្ងៃព្រហស្បតិ៍ ទី១៩ ខែកញ្ញា ឆ្នាំ២០១៩ ខាងមុខនេះ នៅសណ្ឋាគារភ្នំពេញ។ ការរៀបចំកម្មវិធីនេះ នឹងមានការចូលរួមជាអធិបតីពីថ្នាក់ដឹកនាំសំខាន់នៃស្ថាប័នទាំងបី គឺ៖

១. ឯកឧត្តមបណ្ឌិត យង់ ពៅ អគ្គលេខាធិការ រាជបណ្ឌិត្យសភាកម្ពុជា នឹងអញ្ជើញបើកកម្មវិធី
២. បណ្ឌិត Hoseok Kim តំណាងវិទ្យាស្ថានបរិស្ថានកូរ៉េ (KEI) 
៣. ឯកឧត្តមបណ្ឌិត ទិន ពន្លក អគ្គលេខាធិការ ក្រុមប្រឹក្សាជាតិសម្រាប់ការអភិវឌ្ឍដោយចីរភាព (NCSD) 

ក្រៅពីនេះ ក៏មានវាគ្មិនកិត្តិយសជាច្រើនទៀត ចូលរួមក្នុងកម្មវិធីដ៏មានសារៈសំខាន់នេះដែរ។

RAC Media

  ថ្ងៃសុក្រ, 13 កញ្ញា 2019 ម៉ោង 06:41 AM

កិច្ចប្រជុំប្រចាំសប្តាហ៍របស់វិទ្យាស្ថានទំនាក់ទំនងអន្តរជាតិកម្ពុជា

កិច្ចប្រជុំប្រចាំសប្តាហ៍របស់វិទ្យាស្ថានទំនាក់ទំនងអន្តរជាតិកម្ពុជា ក្រោមអធិបតីភាពឯកឧត្តមបណ្ឌិត គិន ភា ប្រធានវិទ្យាស្ថាន និងមន្ត្រីក្រោមឱវាទចំនួន១១រូប កាលពីព្រឹកថ្ងៃពុធ ១៣ កើត ខែភទ្របទ ឆ្នាំកុរ ឯកស័ក ពុទ្ធសករាជ ២៥៦៣ ត្រូវនឹងថ្ងៃទី១១ ខែកញ្ញា ឆ្នាំ២០១៩ នៅសាលប្រជុំរបស់វិទ្យាស្ថានទំនាក់ទំនងអន្តរជាតិកម្ពុជា បានឯកភាពនិងសម្រេចបាន ដូចខាងក្រោម៖

I- ការរៀបចំវេទិកាកិច្ចសហប្រតិបត្តិការកម្ពុជា-ចិន ដែលនឹងប្រព្រឹត្តទៅពីថ្ងៃទី៦ ដល់ថ្ងៃទី៩ ខែធ្នូ ឆ្នាំ២០១៩ នៅក្រុងសៀមរាប មានសមាជិកចូលរួមសរុបចំនួន៩០ នាក់ ដែលក្នុងនោះ ភាគីចិនចំនួន៤២នាក់ ភាគីកម្ពុជាចំនួន៤១នាក់ និងវាគ្មិនមកពីបណ្តាប្រទេសមួយចំនួនក្នុងតំបន់អាស៊ានចំនួន៧នាក់។

II- ក្នុងខែសីហា ឆ្នាំ២០១៩កន្លងទៅ វិទ្យាស្ថានទំនាក់ទំនងអន្តរជាតិកម្ពុជា បានរៀបចំនិងជ្រើសរើសសមាសភាពក្រុមប្រឹក្សាផ្តល់យោបល់អន្តរជាតិចំនួន១៥រូប ដែលបានជ្រើសចេញពីក្នុងចំណោមប្រធានស្ថាប័ន និងអ្នកស្រាវជ្រាវអន្តរជាតិជាន់ខ្ពស់ ទាំងក្នុងនិងក្រៅតំបន់។

III- ផែនការឆ្នាំ២០២០ ខាងមុខ របស់វិទ្យាស្ថាន មានដូចខាងក្រោម ៖

១- រៀបចំគម្រោងស្រាវជ្រាវ ស្តីពី «គោលនយោបាយការបរទេសកម្ពុជា» និង គម្រោងស្រាវជ្រាវ ស្តីពី «ស្ថានភាពអង្គការមិនមែនរដ្ឋាភិបាលជាតិនិងអន្តរជាតិនៅកម្ពុជា»។

២- រៀបចំសន្និសីទអន្តរជាតិពាក់ព័ន្ធនឹងកិច្ចប្រជបុំកំពូលអាស៊ី-អឺរ៉ុប ។

៣- រៀបចំកិច្ចប្រជុំជាមួយក្រុមប្រឹក្សាផ្តល់យោបល់អន្តរជាតិទាំង១៥រូប។

៤- រៀបចំវេទិកាស្រាវជ្រាវ ស្តីពី «ទំនាក់ទំនងអន្តរជាតិនិងគោលនយោបាយការបរទេស»។

៥- រៀបចំបាឋកថាជំនាញ។

៦- បោះពុម្ពស្សនាវដ្តី «Journal of International Relations»។

៧- រៀបចំវេទិកាកិច្ចសហប្រតិបត្តិការកម្ពុជា-ចិន លើកទី២នៅ ប្រទេសចិន។

ដោយ៖ អ៊ុច លាង

  ថ្ងៃព្រហស្បតិ៍, 12 កញ្ញា 2019 ម៉ោង 11:11 AM

«អាស៊ានគឺជាកន្លែងប្រកួតប្រជែងរបស់មហាអំណាច»

ក្នុងនាមឯកឧត្តមបណ្ឌិតសភាចារ្យ សុខ ទូច ប្រធានរាជបណ្ឌិត្យសភាកម្ពុជា ឯកឧត្តមបណ្ឌិត យង់ ពៅ អគ្គលេខាធិការនៃរាជបណ្ឌិត្យសភាកម្ពុជា បានអញ្ជើញជាអធិបតីក្នុងពិធីចុះអនុស្សរណៈយោគយល់រវាងវិទ្យាស្ថានខុងជឺនៃរាជ​បណ្ឌិត្យសភាកម្ពុជា ជាមួយនឹងសាកលវិទ្យាល័យតុងហ័រ នៃសាធារណរដ្ឋប្រជាមានិតចិន។ ការចុះអនុស្សរណៈ យោគយល់នោះធ្វើនៅថ្ងៃចន្ទ១១កើត ខែភទ្របទ ឆ្នាំ កុរ ឯកស័ក ព.ស. ២៥៦៣ ត្រូវនឹងថ្ងៃទី ៩ ខែ កញ្ញា ឆ្នាំ ២០១៩ នៅក្នុងបន្ទប់ប្រជុំរបស់វិទ្យាស្ថានខុងជឺនៃរាជបណ្ឌិត្យសភាកម្ពុជា។

នៅក្នុងឱកាសនៃជំនួបនោះ ឯកឧត្តមបណ្ឌិត យង់ ពៅ បានសូមឱ្យភាគីចិនជួយប្រទេសកម្ពុជាលើការអភិវឌ្ឍវិស័យបច្ចេកវិជ្ជា ព្រោះថាប្រទេសចិនក៏ជាប្រទេសមួយដែលមានបច្ចេកវិជ្ជាជឿនលឿន ហើយនៅពេលនេះប្រទេសកម្ពុជាកំពុងតែត្រូវការវិស័យបច្ចេកវិជ្ជានេះដើម្បីជួយដល់ការអភិវឌ្ឍប្រទេស។ យើងបានដឹងថានៅពេលនេះសហរដ្ឋអាម៉េរិក និងប្រទេសចិនកំពុងតែមានសង្គ្រាមពាណិជ្ជកម្មជាមួយគ្នា ដែលមូលហេតុសំខាន់នៃសង្គ្រាមពាណិជ្ជកម្មនោះ ក៏ព្រោះតែភាពជឿនលឿននៃបច្ចេកវិជ្ជារបស់ចិនផងដែរ។

ឯកឧត្តមបណ្ឌិតក៏បានបន្ថែមទៀតថា នៅពេលបច្ចុប្បន្ននេះ ប្រទេសមហាអំណាចនានាក្នុងពិភពលោក ដែលមានដូចជាសហរដ្ឋអាម៉េរិក រុស្ស៊ី ជប៉ុន កូរ៉េខាងត្បូង និងប្រទេសចិន សុទ្ធតែបានមើលឃើញពីភាពចាំបាច់និងសារៈសំខាន់របស់អាស៊ាន ហើយប្រទេសមហាអំណាចទាំងនោះ បានប្រើគ្រប់មធ្យោបាយដើម្បីបញ្ច្រាបដែនអំណាច ឬឥទ្ធិពលរបស់ពួកគេមកលើតំបន់អាស៊ាន។ ចំណុចនេះបញ្ជាក់ថា ប្រទេសចិនត្រូវតែមានគោលការណ៍ច្បាស់លាស់ក្នុងការពង្រីកមិត្តភាព ឬដៃគូជាមួយប្រទេសនៅក្នុងតំបន់អាស៊ាន ព្រោះថា បើសិនជាចិនមិនមានគោលការណ៍ច្បាស់លាស់នោះទេ ប្រទេសនៅក្នុងតំបន់អាស៊ាន និងងាកទៅរកប្រទេសណាដែលមានភាពច្បាស់លាស់ហើយ។

ប្រតិភូសាកលវិទ្យាល័យតុងហ័រ បានកោតសរសើរ និងទទួលយកយោបល់របស់ឯកឧត្តមបណ្ឌិត យង់ ពៅ អំពីសារៈសំខាន់របស់តំបន់អាស៊ាន ក៏ដូចជាសារៈសំខាន់របស់កម្ពុជា ហើយបានសន្យាថានឹងជួយឱ្យមានទំនាក់ទំនងជាមួយរាជបណ្ឌិត្យសភាកម្ពុជាឱ្យបានកាន់តែស៊ីជម្រៅបន្ថែមទៀត។ នៅក្នុងជំនួបនៃពិធីចុះអនុស្សរណៈយោគយល់នោះ ភាគីចិនក៏បានលើកឡើងអំពីការប្រើប្រាស់ថាមពលស្អាត ដែលកើតចេញពីការប្រើប្រាស់ថាមពលពន្លឺព្រះអាទិត្យ សម្រាប់ប្រើប្រាស់នៅក្នុងការអភិវឌ្ឍប្រទេស ហើយសាកលវិទ្យាល័យតុងហ័រនឹងជួយជ្រោមជ្រែងរាជ​បណ្ឌិត្យសភាកម្ពុជា តាមរយៈការអញ្ជើញមន្ត្រីរាជបណ្ឌិត្យសភាកម្ពុជាទៅចូលរួមក្នុងការបណ្តុះបណ្តាលនៅប្រទេសចិន ការជួយជាជំនួយបច្ចេកទេស និងការអនុវត្តគម្រោងជាក់ស្តែងដែលភាគីទាំងពីរបានព្រមព្រៀងគ្នាជាមុន ជាពិសេសភាគីចិនមានបំណងជួយទីជនបទនៃប្រទេសកម្ពុជាមានភ្លើងអគ្គិសនីសម្រាប់ប្រើប្រាស់គ្រប់គ្រាន់ ដើម្បីរួមចំណែកអភិវឌ្ឍប្រទេសជាមួយរាជរដ្ឋាភិបាលកម្ពុជា។

RAC Media

  ថ្ងៃចន្ទ, 09 កញ្ញា 2019 ម៉ោង 08:21 PM

នាព្រឹកនេះ រាជបណ្ឌិត្យសភាកម្ពុជារៀបចំពិធីសិតរូបបដិមាព្រះនាងឥន្ទ្រទេវី

ភ្នំពេញ៖ នៅព្រឹកថ្ងៃទីចន្ទ ១១កើត ខែភទ្របទ ឆ្នាំកុរ ឯកស័ក ព.ស. ២៥៦៣ ត្រូវនឹងថ្ងៃទី៩ ខែកញ្ញា ឆ្នាំ២០១៩ នេះ រាជបណ្ឌិត្យសភាកម្ពុជា បានរៀបចំពិធីសិតរូបបដិមាព្រះនាងឥន្ទ្រទេវី ដែលស្ថិតនៅមុខអគារឥន្ទ្រីទេវីនៃរាជ បណ្ឌិត្យសភាកម្ពុជាផ្ទាល់ ក្រោមអធិបតីភាពលោកជំទាវកិត្តិសង្គហបណ្ឌិត ម៉ែន សំអន ឧបនាយករដ្ឋមន្ត្រី និងជារដ្ឋមន្ត្រីក្រសួងទំនាក់ទំនងរដ្ឋសភា-ព្រឹទ្ធសភា និងអធិការកិច្ច និងអមជាគណៈអធិបតីដោយ ឯកឧត្ដមបណ្ឌិត សភាចារ្យ សុខ ទូច ប្រធានរាជបណ្ឌិត្យសភាកម្ពុជា លោកជំទាវឧកញ៉ាបណ្ឌិត សៀង ចាន់ហេង ឯកឧត្ដមបណ្ឌិតសភាចារ្យជាអនុប្រធានរាជបណ្ឌិតសភាកម្ពុជា ឯកឧត្ដមបណ្ឌិតសភាចារ្យនិងឯកឧត្ដមបណ្ឌិត ឯកឧត្ដម ជាអគ្គលេខាធិការ អគ្គលេខាធិការរង និងជាប្រធានវិទ្យាស្ថានទាំង៦ ព្រមទាំងមន្ត្រីរាជការនៃរាជបណ្ឌិត្យសភាកម្ពុជាជាច្រើនរូបទៀត។

ក្នុងពិធីសិតរូបបដិមាព្រះនាងឥន្ទ្រទេវីនេះ មានការនិមន្ត/យាងសូត្រប្រោសព្រំប្រសិទ្ធពរជ័យ សិរីសួស្ដី ពីសម្ដេចព្រះសង្ឃរាជទាំងពីរគណៈ សម្ដេចព្រះសង្ឃនាយក និងព្រះតេជគុណជាសមាជិកគណៈសង្ឃនាយកនៃព្រះរាជាណាចក្រកម្ពុជាសរុប ៩ អង្គផងដែរ។

នៅមុនការចាប់ផ្ដើមកម្មវិធីផ្លូវការ នៅក្នុងពិធីសិតរូបបដិមាព្រះនាងឥន្ទ្រទេវីនេះ មានការសែនក្រុងពាលីដោយអមជាមួយរបាំថ្វាយស្ដេចក្រុងពាលី ការច្រៀងចម្រៀងបទនគររាជ ការច្រៀង និងប្រគុំភ្លេងបុរាណថ្វាយ/ជូននិងយាង/អញ្ជើញបារមីទាំងឡាយតាមជំនឿខ្មែរដូចជា ជំទាវស្រីខ្មៅ និងព្រាយក្បាលប្រាំបីជាដើម។

គួរបញ្ជាក់ផងដែរថា រូបបដិមាព្រះនាងឥន្ទ្រទេវីមានកម្ពស់១.៥៧ម៉ែត្រ និងទំហំដងខ្លួន មានទំហំប៉ុនគ្នាទៅនឹងរូបចម្លាក់ព្រះនាងនៅជាប់នឹងប្រាសាទព្រះខ័ន ដែលស្ថិតនៅក្នុងខេត្តសៀមរាប ហើយត្រូវបានសាងសង់ឡើងនៅក្រោមសំណង់បុស្បុកដែលមានទំហំ ៩ម៉ែត្រ x ៩ម៉ែត្រ និងមានទីតាំងស្ថិតនៅខាងមុខអគារឥន្ទ្រីទេវី។ ការសិតរូបបដិមាព្រះនាងឥន្ទ្រទេវីនេះ បានទទួលថវិកាឧបត្ថម្ភ ពីសំណាក់លោកជំទាវឧកញ៉ាបណ្ឌិត សៀង ចាន់ហេង ប្រធានក្រុមហ៊ុន ហេងអភិវឌ្ឍន៍។

ចំណែកឯអគារឥន្ទ្រទេវី ដែលត្រូវបានកសាងឡើង ដោយទទួលបានការឧបត្ថម្ភជាថវិកាពីលោកឧកញ៉ា ពង្ស ខៀវសែ និងដែលជាអគារដែលនឹងបម្រើដល់ការបណ្ដុះបណ្ដាលធនធានបញ្ញវន្តនៅរាជបណ្ឌិត្យសភាកម្ពុជា នឹងត្រូវសម្ពោធជាផ្លូវការក្រោមអធិបតីដ៏ខ្ពង់ខ្ពស់របស់សម្ដេចអគ្គមហាសេនាបតីតេជោបណ្ឌិតសភាចារ្យ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា នៅក្នុងខែវិច្ឆិកា ឆ្នាំ២០១៩ ខាងមុខនេះ។

RAC Media | លឹម សុវណ្ណរិទ្ធ

  ថ្ងៃចន្ទ, 09 កញ្ញា 2019 ម៉ោង 11:46 AM

ឯកឧត្ដមបណ្ឌិតសភាចារ្យ សុខ ទូច៖ ទស្សនវិជ្ជា៥ ដែលព្រះនាងឥន្ទ្រទេវីបានក្លាយទៅជានិមិត្តរូបនៃវិស័យអប់រំរបស់ខ្មែរ

ភ្នំពេញ៖ នៅព្រឹកថ្ងៃចន្ទ ១១កើត ខែភទ្របទ ឆ្នាំកុរ ឯកស័ក ព.ស. ២៥៦៣ ត្រូវនឹងថ្ងៃទី៩ ខែកញ្ញា ឆ្នាំ២០១៩ នេះ ក្នុងពិធីសិតរូបបដិមាព្រះនាងឥន្ទ្រទេវីនៅរាជបណ្ឌិត្យសភាកម្ពុជា ឯកឧត្ដមបណ្ឌិតសភាចារ្យ សុខ ទូច ប្រធានរាជបណ្ឌិត្យសភាកម្ពុជា បានថ្លែងគូសបញ្ជាក់និងរំឭកអំពីគុណបំណាច់យ៉ាងធំធេងក្នុងវិស័យអប់រំខ្មែរ របស់ព្រះនាងឥន្ទ្រទេវី ជាព្រះអគ្គមហេសីព្រះបាទជ័យវរ្ម័នទី៧ ព្រះមហាក្សត្រដ៏ឆ្នើមរបស់ខ្មែរ។

ឯកឧត្ដមបណ្ឌិតសភាចារ្យ បានលើកឡើងនូវហេតុផលជាទស្សនវិជ្ជាចំនួន៥ ដែលព្រះនាងជានិមិត្តរូបនៃវិស័យអប់រំខ្មែរ គឺ៖
១. ព្រះនាងជាស្ត្រីខ្មែរទីមួយដែលបង្កើតវិស័យអប់រំ
២. ព្រះនាងជាស្ត្រីខ្មែរទីមួយដែលផ្លាស់ប្ដូរទូដាក់ចានស្រាក់ចាន ទៅជាទូសម្រាប់ដាក់សៀវភៅ ហើយព្រះនាងបានកែប្រែសាលាឆទានទៅជាបណ្ណាល័យសម្រាប់ការសិក្សា
៣. ព្រះនាងជាអ្នកផ្ដល់យោបល់និងចក្ខុវិស័យដល់ថ្នាក់ដឹកនាំជាតិ
៤. ព្រះនាងបានប្រែក្លាយទស្សនៈយល់ឃើញមួយរបស់ខ្មែរ ដែលមុនសម័យអង្គរ ខ្មែរតែងតែបានឱ្យតម្លៃនារីត្រឹមតែថា «ស្ត្រីនៅមិនឆ្ងាយពីចង្ក្រាន្ត»
៥. ព្រះនាងឥន្ទ្រទេវីបានធ្វើឱ្យមានសុខដុមនីយកម្មរវាងសាសនាព្រះពុទ្ធ និងព្រហ្មញ្ញសាសនា។

គួរបញ្ជាក់ផងដែរថា នៅព្រឹកថ្ងៃចន្ទ ទី៩ ខែកញ្ញា ឆ្នាំ២០១៩ នេះ រូបបដិមាព្រះនាងឥន្ទ្រទេវី នៅរាជបណ្ឌិត្យសភាកម្ពុជា ត្រូវបានប្រារព្ធពិធីសិត ក្រោមអធិបតីលោកជំទាវកិត្តិសង្គហបណ្ឌិត ម៉ែន សំអន ឧបនាយករដ្ឋមន្ត្រី រដ្ឋមន្ត្រីក្រសួងទំនាក់ទំនងរដ្ឋសភា-ព្រឹទ្ធសភា និងអធិការកិច្ច និងជាឧបនាយករដ្ឋមន្ត្រីជាស្ត្រីតែមួយរូបគត់ ក្នុងរាជរដ្ឋាភិបាលនៃព្រះរាជាណាចក្រកម្ពុជា៕

RAC Media | លឹម សុវណ្ណរិទ្ធ

  ថ្ងៃចន្ទ, 09 កញ្ញា 2019 ម៉ោង 10:34 AM

«កិច្ចសហប្រតិបត្តិការជាមួយសាកលវិទ្យាល័យត្រាវិញលើវិស័យស្រាវជ្រាវ»

នៅរសៀលថ្ងៃសុក្រ ទី៦ ខែកញ្ញា ឆ្នាំ២០១៩នេះ ឯកឧត្តមបណ្ឌិតសភាចារ្យសុខ ទូច ប្រធានរាជបណ្ឌិត្យសភាកម្ពុជា អញ្ជើញចុះអនុស្សរណៈយោគយល់គ្នា រវាងសាកលវិទ្យាល័យត្រាវិញ ខេត្តត្រាវិញប្រទេសវៀតណាមដើម្បីធ្វើកិច្ចសហប្រតិបត្តិការរួមគ្នា មានដូចខាងក្រោម៖

១. ការផ្លាស់ប្តូរនិស្សិត និងអ្នកសិក្សាស្រាវជ្រាវ។

២. សហការរៀបចំបង្កើតវចនានុក្រមកម្ពុជា វៀតណាម។

៣. សិក្សាស្រាវជ្រាវរួមគ្នាលើវិស័យកសិកម្ម ទេសចរណ៍ សេដ្ឋកិច្ចរវាងស្ថាប័នទាំងពីរ។

នៅពេលខាងមុខនេះ សាកលវិទ្យាល័យត្រាវិញ នឹងជួយសហការបណ្តុះបណ្តាលផ្នែកបង្កាត់ផ្កាដល់មន្ត្រីរាជបណ្ឌិត្យសភាកម្ពុជា ហើយអ្នកឯកទេសបង្កាត់ពូជផ្កាវៀតណាម នឹងមកសិក្សាស្វែងយល់បន្ថែមពីប្រភេទផ្កាដែលមាននៅក្នុងឧទ្យានរាជបណ្ឌិត្យសភាកម្ពុជាតេជោសែន ឫស្សីត្រឹប។

RAC Media

  ថ្ងៃសៅរ៍, 07 កញ្ញា 2019 ម៉ោង 12:47 PM