រាជបណ្ឌិត្យសភាកម្ពុជា

«វប្បធម៌ដឹងគុណ និងការបន្តនិរន្តរភាពនៃរាជបណ្ឌិត្យសភាកម្ពុជា»

ឯកឧត្តមបណ្ឌិតសភាចារ្យ សុខ ទូច និងសហការី បានអញ្ជើញទៅសួរសុខទុក្ខ និង ជូនពរឯកឧត្តមបណ្ឌិតសភាចារ្យ ស៊ន សំណាង ដែលជាបណ្ឌិតសភាចារ្យ ស្ថាបនិក និងជាអតីតប្រធានរាជបណ្ឌិត្យសភាកម្ពុជាដំបូងបំផុត តាំងពី ពេលបង្កើត រាជបណ្ឌិត្យសភាកម្ពុជា កាលពីថ្ងៃទី១១ ខែឧសភា ឆ្នាំ១៩៩៩ ដោយព្រះករុណា ព្រះមហាវីរក្សត្រ ព្រះបរមរតនកោដ ២០ឆ្នាំមុននេះ។

បើតាមប្រសាសន៍ឯកឧត្តមបណ្ឌិតសភាចារ្យ សុខ ទូច បានឱ្យដឹងថា លោក ចង់ ឱ្យ មាន ការចងចាំ ដល់អ្នកដែលបានផ្តួចផ្តើមឡើងដំបូងពីអ្នកបន្តវេន។ រាជបណ្ឌិត្យសភាកម្ពុជា នឹងមិនមានថ្ងៃនេះនោះទេ បើសិនជាគ្មានការខិតខំ ប្រឹង ប្រែងរបស់ឯកឧត្តមបណ្ឌិតសភាចារ្យស្ថាបនិក និងក្រុមការងារដែលបាន ឈ្មុសឈ្មុលប្រមែប្រមូលបញ្ញវន្តកម្ពុជា រៀបចំស្ថាប័ននេះឡើងតាំងពីបាតដៃ ទទេ ដោយមានការលើកទឹកចិត្តពីសម្តេចនាយករដ្ឋមន្ត្រី។ ឆ្លៀតឱកាសនោះដែរ ឯកឧត្តម បណ្ឌិតសភាចារ្យ សុខ ទូច ក្នុងនាមជាប្រធានជំនាន់ទី៣ នៃ រាជ បណ្ឌិត្យ សភាកម្ពុជា ក៏បានជម្រាបជូនឯកឧត្តមបណ្ឌិតសភាចារ្យ ស៊ន សំណាង ពីវឌ្ឍនភាពនៃស្ថាប័នស្រាវជ្រាវនេះ គិតចាប់ពីពេលដែលឯកឧត្តម បណ្ឌិតសភាចារ្យ បានទទួលសេចក្តីទុកចិត្តពីថ្នាក់ដឹកនាំ តែងតាំង ជា ប្រធាន រាជ បណ្ឌិត្យ សភាកម្ពុជា តាំងពីថ្ងៃទី១១ ខែសីហា ឆ្នាំ២០១៧ មក។

ឯកឧត្តមបណ្ឌិតសភាចារ្យ ស៊ន សំណាង បានបង្ហាញពីទឹកចិត្តរីករាយដោយ បានឃើញអ្នកបន្តវេនពីរូបលោក និងសហការី អញ្ជើញ មកសួរសុខទុក្ខ និង ជូនពរ សម្រាប់ឱកាសពិធីបុណ្យចូលឆ្នាំថ្មីខាងមុខនេះ។ ឯកឧត្តមបានបញ្ជាក់ យ៉ាងច្បាស់ថានៅក្នុងទំព័រហ្វេសប៊ុក «Lokru Sam» ថា៖

«វប្បធម៌កតញ្ញូពីសម័យអង្គរ បានរស់ឡើងវិញនៅរាជបណ្ឌិតសភាកម្ពុជា»...គឺវប្បធម៌កតញ្ញូនេះហើយដែលបាននាំឱ្យសម័យអង្គររុងរឿង៦ស.វ.!
....សំណេះសំណាល២ម៉ោងនៅទីស្នាក់ការដំបូងនៃរាជបណ្ឌិតសភាកម្ពុជាជាការជូនពរ និងទទួលពរជ័យ ក្នុងឱកាសបុណ្យចូលឆ្នាំថ្មីខាងមុខ!....

ការសំណេះសំណាលរវាងរៀមច្បងនិងអ្នកបន្តវេន បានបន្តដោយក្តីសោមនស្ស រយៈពេលជាង ២ម៉ោងកន្លះ តាំងពីម៉ោង ៤រសៀលម្សិលមិញនេះ ដោយ បានលើកឡើងពី រំលែក នូវបទពិសោធន៍ការងារ ពីប្រវត្តិនៃការផ្តួចផ្តើម រៀបចំបង្កើតស្ថាប័ន និងវឌ្ឍនភាពបច្ចុប្បន្នរបស់ស្ថាប័ន។ 

សូមបញ្ជាក់ថា ការសំណេះសំណាលសួរសុខទុក្ខ និងជូនពរ ដល់រៀមច្បង ស្ថាបនិក ដែលជាប្រធានទី១ នៃរាជបណ្ឌិត្យសភាកម្ពុជា គឺរៀបចំឡើងនៅ រសៀល ថ្ងៃទី២៧ ខែមីនា ឆ្នាំ២០១៩ ម្សិលមិញនេះ នៅ ទីតាំងទីស្នាក់ការ ដំបូង បំផុត ដែល ក្រុមបញ្ញវន្តខ្មែរប្រមូលផ្តុំគ្នារៀបចំបែបបទ បង្កើត ស្ថាប័ន រាជបណ្ឌិត្យ សភា កម្ពុជា បច្ចុប្បន្នទីស្នាក់ការដំបូងនោះជាវិទ្យាស្ថានអ៊ីនធឺរេដផ្តួចផ្តើម បង្កើត ឡើង ដោយឯកឧត្តមបណ្ឌិតសភាចារ្យ ស៊ន សំណាង។

RAC Media.

  ថ្ងៃព្រហស្បតិ៍, 28 មីនា 2019 ម៉ោង 11:18 AM

រាជរដ្ឋាភិបាលកម្ពុជា ចេញសេចក្តីសម្រេចទទួលស្គាល់ជាផ្លូវការ នូវសសមាសភាព ក្រុមការងារទាំង១៣ ផ្នែកឯកជននៃវេទិការាជរដ្ឋាភិបាល-ផ្នែកឯកជន

ភ្នំពេញ៖ នៅថ្ងៃទី២៥ ខែមីនា ឆ្នាំ២០១៩ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានចុះហត្ថលេខាលើសេចក្តីសម្រេចទទួលស្គាល់ជាផ្លូវការ នូវសសមាសភាព ក្រុមការងារទាំង១៣ ផ្នែកឯកជននៃវេទិការាជរដ្ឋាភិបាល-ផ្នែកឯកជន ដែលបានរាយនាមបុគ្គលសំខាន់ៗដែលមកពីវិស័យឯកជន ជាសហប្រធាន អនុប្រធាន និងសមាជិក នៃក្រុមការងារទាំង១៣ក្រុម ដូចមានក្នុងសេចក្ដីសម្រេចទទួលស្គាល់ជាផ្លូវការរបស់រាជរដ្ឋាភិបាលដូចខាងក្រោម៖

RAC Media | លឹម សុវណ្ណរិទ្ធ

  ថ្ងៃពុធ, 27 មីនា 2019 ម៉ោង 10:54 AM

«កត្តាដែលនាំឱ្យរីកចម្រើនសេដ្ឋកិច្ចចិន»

(រូបភាព៖ JOHNSON, P. 2018, www.financial-world.org)

បើតាមការសិក្សាស្រាវជ្រាវរបស់លោក ជឹម សុជាតិ មន្ត្រីមជ្ឈមណ្ឌលសិក្សាចិន នៃរាជបណ្ឌិត្យសភាកម្ពុជា បានឱ្យដឹងថា ការរីកចម្រើនសេដ្ឋកិច្ចចិន បានកើនសន្ទុះខ្លាំង ដោយហេតុកត្តាសំខាន់៦៖

១. កំណែទម្រង់សេដ្ឋកិច្ចរបស់ចិនមុនឆ្នាំ២០១២
២. កំណែទម្រង់សេដ្ឋកិច្ចទីផ្សារសេរីរបស់ចិននាពេលបច្ចុប្បន្ន
៣. កត្តាចូលរួមកំណើនពីកម្លាំងពលកម្ម មូលធន
៤. គោលនយោបាយឧស្សាហកម្មត្រូវបានគាំទ្រដោយកម្លាំងពលកម្មរាប់រយលាននាក់
៥. ការអភិវឌ្ឍវិស័យធនធានមនុស្ស និងការកើនឡើងផលិតភាព
៦. ប្រទេសចិនបានចម្លងការផលិតផលិតផលពីប្រទេសមហាអំណាចសេដ្ឋកិច្ច

កត្តាទាំង៦ខាងលើ បានជំរុញឱ្យមហាយក្សចិនក្លាយជាប្រទេសមានការលូតលាស់សេដ្ឋកិច្ច ដែលអាចប្រកួតប្រជែងនឹងប្រទេសមហាអំណាចផ្សេងទៀតជាពិសេសសហរដ្ឋអាម៉េរិក។ បើតាមប្រភពពី IMF បានបង្ហាញថា នៅឆ្នាំ២០១៦ ក្នុងចំណោមបណ្តាប្រទេស​ដែលមានសេដ្ឋកិច្ចលូតលាស់ខ្លាំង ប្រទេសចិន​ គឺឈរនៅលំដាប់លេខរៀង២ បន្ទាប់ពីសហរដ្ឋអាម៉េរិក និងបន្តរត់ពីក្រោយប្រទេសចិនដោយប្រទេសជប៉ុន អាល្លឺម៉ង់ អង់គ្លេស បារាំង និងឥណ្ឌា។ 

ទន្ទឹមនឹងនេះដែរ ទំហំពាណិជ្ជកម្មរបស់ប្រទេសចិន ដែលផ្សាយដោយ European Commission បានបង្ហាញពីការសន្ទុះកំណើនឡើងយ៉ាងខ្លាំងរបស់ប្រទេសចិនក្នុងមួយទសវត្សរ៍ចុងក្រោយ គិតត្រឹមឆ្នាំ២០១៧។ នៅឆ្នាំ២០១៧ ប្រទេសចិន មានការនាំចេញសរុប ២,៣ទ្រីលានដុល្លារ និងការនាំចូលប្រមាណ ១,៨ ទ្រីលានដុល្លារ គឺមានកំណើនខ្លាំងប្រៀបធៀបនឹងឆ្នាំ២០០៧ ដែលមានទំហំនាំចេញត្រឹមតែជា ១ទ្រីលានដុល្លារ។ អតិរេកជញ្ជីងពាណិជ្ជកម្មនៅឆ្នាំ២០១៧ មានប្រមាណ ៤៥៦ ប៊ីលានដុល្លារ ដែលអាចឱ្យប្រទេសចិនទទួលទុនបម្រុងជាដុល្លារបន្ថែមយ៉ាងច្រើន ហើយសព្វថ្ងៃទុនបម្រុងរបស់ចិនមានចំនួន ៣,១៧ ទ្រីលានដុល្លារ ខណៈដែលឆ្នាំ២០០៧ មានអតិរេកជញ្ជីងពាណិជ្ជកម្ម ត្រឹមតែជាង ២១៩ ប៊ីលានដុល្លារ ប៉ុនណោះ។

ទាញយកអត្ថបទជា pdf ពី៖ http://rac.apppeppers.com/royal-academy/research/attachments/original/92.pdf?1553656383

ប្រភពឯកសារ៖ ជឹម សុជាតិ មន្ត្រីមជ្ឈមណ្ឌលសិក្សាចិន នៃរាជបណ្ឌិត្យសភាកម្ពុជា
ប្រភពរូបភាព៖ JOHNSON, P. 2018. China seeks to promote digital economy to further economic growth. Published 26 Sept. 2018. https://www.financial-world.org/news/news/economy/52/china-seeks-to-promote-digital-economy-to-further-economic-growth/ 

  ថ្ងៃពុធ, 27 មីនា 2019 ម៉ោង 10:12 AM

«សិលាចារឹកនៅវត្តពោធិមុនីហៅវត្តស្វាយចេកថ្មី (K.1422) ទើបនឹងបានចុះបញ្ជីការរួចរាល់»

ទីបំផុត ផ្ទាំងសិលាចារឹកនៅវត្តពោធិមុនីហៅវត្តស្វាយចេកថ្មី ដែលក្រុមការងាររាជបណ្ឌិត្យសភាកម្ពុជា បានរកឃើញនោះ ទទួលបានការចុះបញ្ជីការ​ត្រឹម​ត្រូវ និងទទួលស្គាល់ជាផ្លូវការហើយ គឺ K.1422 ដោយក្រសួងវប្បធម៌និងវិចិត្រសិល្បៈ និង សាលាបារាំងចុងបូព៌ា (École française d’extrême-orient) ដែលបានសហការគ្នាចុះបញ្ជីសារពើភណ្ឌសិលាចារឹកនៅវត្តពោធិមុនីហៅវត្តស្វាយចេកថ្មីនេះ។ 

លោកបណ្ឌិត មាឃ បូរ៉ា បានបញ្ជាក់ឱ្យ​ដឹង​ថា មុនការរកឃើញពីក្រុមការងារ​នៃ​រាជ​បណ្ឌិត្យ​សភាកម្ពុជា សិលាចារឹកនេះ ដើម​ឡើយ​ទទួលបាន​ការថែរក្សាការពារ​យ៉ាង​យកចិត្តទុកដាក់ពីព្រះចៅអធិការវត្តពោធិមុនី ព្រះនាម គង់ សំណាង រហូតដល់ពេលដែលលោក លាង សុភាព ប្រធានលេខាធិការដ្ឋាននៃក្រុមប្រឹក្សាជាតិភាសាខ្មែរ បានជូនដំណឹងពីអំពីសិលាចារឹកមួយផ្ទាំងនេះ ដល់លោក ហើយក្រុមការងាររបស់លោក ក៏បានចុះទៅពិនិត្យ និងរាយការណ៍ជូន​ទៅក្រសួងវប្បធម៌​និងវិចិត្រសិល្បៈ ដើម្បីសិក្សានិងធ្វើបញ្ជីការ។

សិលាចារឹកវត្តពោធិមុនីហៅវត្តស្វាយចេកថ្មី (K.1422) នេះ ចារនៅលើគោលសីមាថ្មភក់ពណ៌ក្រហម បើពិនិត្យចំពីមុខ សិលាចារឹកនេះ មានកម្ពស់ ០,៥៨ម៉ែត្រ ទទឹង ០,៤៥ម៉ែត្រ និងកម្រាស់ថ្ម ០,២៩ម៉ែត្រ។ សិលាចារឹកនេះ សរសេរជាភាសាខ្មែរទម្រង់បែបអក្សរជ្រៀង មាន១៦បន្ទាត់ ដែលចុះកាលបរិច្ឆេទឆ្នាំ៨៥៧នៃមហាសករាជ ត្រូវនឹងឆ្នាំ៩៣៥នៃគ្រិស្តសករាជ គឺស្ថិតក្នុងរាជ្យរបស់ព្រះបាទជ័យវរ្ម័នទី៤ (៩២៤-៩៤១ គ.ស.) ដែលទ្រង់មានព្រះនាមក្នុងពេលសោយរាជ្យថា «ធូលីព្រះបាទធូលីជេងព្រះកម្រតេងអញ ជយវម្ម៌ទេវៈ» និងបច្ឆាមរណនាមរបស់ព្រះអង្គ គឺព្រះបាទបរមសិវបទ។

គួររំឭកដែរថា កន្លងទៅថ្មីៗនេះ សិលាចារឹកវត្តពោធិមុនីហៅវត្តស្វាយចេកថ្មី (K.1422) រកឃើញនៅវត្តពោធិមុនី ហៅវត្តស្វាយចេកថ្មី ដែលសិ្ថតនៅក្នុងភូមិស្វាយចេក ឃុំស្វាយចេក ស្រុករំដួល ខេត្តស្វាយរៀង ដែលមានចម្ងាយប្រមាណជា​១៣គីឡូម៉ែត្រ​ពីទីរួមខេត្ត។

RAC Media.

  ថ្ងៃអង្គារ, 26 មីនា 2019 ម៉ោង 05:58 PM

ក្រុមហ៊ុនរបស់ស៊ុយអែត រួមចំណែកជាមួយរាជបណ្ឌិត្យសភាកម្ពុជា អភិរក្សធនធានធម្មជាតិក្នុងឧទ្យានឫស្សីត្រឹប

នៅក្នុងឱកាសចុះអនុស្សរណៈយោគយលល់គ្នារវាង ក្រុមហ៊ុន The Room Design Studio និងឧទ្យានរាជបណ្ឌិត្យសភាកម្ពុជា តេជោសែន ឫស្សីត្រឹប ឯកឧត្តមបណ្ឌិតសភាចារ្យ សុខ ទូច ប្រធានរាជបណ្ឌិត្យសភាកម្ពុជា បានមានប្រសាសន៍ថា រាជ បណ្ឌិត្យសភាកម្ពុជា កំពុងអនុវត្តគោលដៅក្នុងការដាំដើមឈើក្នុងតំបន់ឧទ្យានឡើងវិញឱ្យបាន ១លានដើម ក្នុងអំឡុងពេល៦ឆ្នាំ ហើយបច្ចុប្បន្ន តំបន់ឧទ្យានក៏ទទួលបានការជ្រោមជ្រែងពីឯកឧត្តមបណ្ឌិត លឹម គានហោ ជីកស្រះទឹកចំនួន៦ រួចទៅហើយ។ ស្រះ ទឹកទាំងនេះ មានសារៈសំខាន់ណាស់ក្នុងការផ្តល់ជាជំរកសត្វ និង រក្សាការពារសត្វព្រៃពីការស្រេកឃ្លាន ក៏ដូចជាការសម្លាប់សត្វដែលរត់ចូលភូមិទៅរកទឹកផឹក។ រាជបណ្ឌិត្យសភាកម្ពុជា នឹងខិតខំជួយជំរុញលើកស្ទួយជីវភាពប្រជា ជន ដែលរស់នៅក្បែរតំបន់ឧទ្យានតាមរយៈការផ្តល់ការងារពីការអភិវឌ្ឍនិងប្រែក្លាយតំបន់ឧទ្យាន ទៅជាគោលដៅទេសចរណ៍សំខាន់៣ គឺទេសចរណ៍បរិស្ថាន ទេសចរណ៍វប្បធម៌ និងទេសចរណ៍សិប្បនិមិត្ត។

ស្របពេលជាមួយគ្នានោះដែរ លោកជំទាវ Maria Sargren ឯកអគ្គរដ្ឋទូតស៊ុយអែត ប្រចាំនៅកម្ពុជា បានបញ្ជាក់ដែរ ថា ការចុះអនុស្សរណៈនៃការយោគយល់គ្នានេះ កើតមានឡើងក៏ដោយសារតែភាគីទាំងមានហេតុផលស្រដៀងគ្នាស្របនឹងចក្ខុវិស័យ នៃប្រទេសទាំងពីរលើការសិក្សាស្រាវជ្រាវជាន់ខ្ពស់ និង ការអភិវឌ្ឍប្រកបដោយចីរភាព។ លោកជំទាវ បានបន្ថែមថា នៅ ស៊ុយអែត ព្រៃឈើមិនគ្រាន់ជាអំណោយពីធម្មជាតិ តែព្រៃឈើជាកេរតំណែលសំខាន់សម្រាប់ការរស់នៅ និងសម្រាប់លើកស្ទួយសេដ្ឋកិច្ច ដូច្នេះការអភិរក្ស និងការអភិវឌ្ឍ ជាកត្តាចំបងដែលត្រូវធ្វើចាំបាច់ ហើយសង្ឃឹមថា ស្ថាប័នឯកជនផ្សេងទៀត នឹងមកចូលរួមក្នុងការងារប្រភេទនេះ ជាមួយរាជបណ្ឌិត្យសភាកម្ពុជាថែមទៀត។

កន្លងមកនេះ លោក Love Englund បានចុះទៅធ្វើទស្សនកិច្ចនៅតំបន់ឧទ្យានឫស្សីត្រឹប ហើយបានកត់សម្គាល់ឃើញថា តំបន់ឧទ្យាន សំបូរទៅដោយតម្លៃវប្បធម៌ សម្បត្តិធម្មជាតិ មានព្រៃឈើ និងសត្វព្រៃជាច្រើន។ ក្រុមហ៊ុនលោក បានតាំងចិត្តនឹងជួយជំរុញការអភិរក្សប្រកបដោយចីរភាព និងជួយដល់ការបណ្តុះបណ្តាលក្រុមឧទ្យានុរក្សរបស់ឧទ្យានឫស្សីត្រឹបផងដែរ។ លោកបានបន្ថែមថា រូបលោក និងភរិយា បានឯកភាពគ្នាក្នុងការរួមចំណែកជួយដល់ការដាំដើមឈើយកកាបោននៅក្នុងឧទ្យានរាជបណ្ឌិត្យសភាកម្ពុជា តេជោសែន ឫស្សីត្រឹប នៃរាជបណ្ឌិត្យសភាកម្ពុជា។ គិតតាំងពីឆ្នាំ២០១៧ មក ក្រុមហ៊ុន The Room Design Studio នៅកម្ពុជា មិនត្រឹមតែមានបំណងជួយលើកកម្ពស់បរិស្ថានប៉ុនណោះទេ គឺថែមទាំងលើកស្ទួយការរស់នៅរបស់ប្រជាពលរដ្ឋផងដែរ។ ហេតុនេះ លោករំពឹងថា ក្រុមហ៊ុនរបស់លោក អាចជួយរួមចំណែកបានច្រើនក្នុងគោលដៅដាំដើមឈើឱ្យបាន១លានដើម ក្នុងរយៈពេល៦ឆ្នាំ របស់រាជបណ្ឌិត្យសភាកម្ពុជា ក្រោមការដឹកនាំរបស់ឯកឧត្តមបណ្ឌិតសភាចារ្យ សុខ ទូច៕

RAC Media

  ថ្ងៃអង្គារ, 26 មីនា 2019 ម៉ោង 04:52 PM

ពិធីចុះអនុស្សរណៈយោគយល់គ្នារវាង The Room Design Studio និង រាជបណ្ឌិត្យសភាកម្ពុជា

វេលារសៀលថ្ងៃនេះ គឺជាឱកាសដ៏ល្អដែលបង្ហាញពីការការអនុវត្តនូវការប្តេជ្ញាចិត្តមួយរវាងរាជបណ្ឌិត្យសភាកម្ពុជា និង ក្រុមហ៊ុន The Room Design Studio របស់ប្រទេសស៊ុយអែត ប្រចាំនៅព្រះរាជាណាចក្រកម្ពុជា ក្នុងការចងភ្ជាប់កិច្ចសហប្រតិបត្តិការជាមួយគ្នាក្នុងការសិក្សានិងអភិវឌ្ឍនៅក្នុងឧទ្យានរាជបណ្ឌិត្យសភាកម្ពុជា តេជោសែន ឫស្សីត្រឹប។ ការចុះកិច្ចព្រមព្រៀងនេះ បានកើតឡើងបន្ទាប់ពីមានជំនួបប្រជុំមួយរវាងឯកឧត្តមបណ្ឌិតសភាចារ្យ សុខ ទូច ប្រធានរាជបណ្ឌិត្យសភាកម្ពុជា ជាមួយលោក Love Englund ជាអ្នកជំនួញពីប្រទេសស៊ុយអែត និងជាប្រធានក្រុមហ៊ុន The Room Design Studio ប្រចាំនៅព្រះរាជាណាចក្រកម្ពុជា កាលពីថ្ងៃទី១៤ ខែមករា ឆ្នាំ២០១៩ នៅរាជបណ្ឌិត្យសភាកម្ពុជាកន្លងទៅនេះ។

ថ្ងៃនេះ ភាគីទាំងពីរ បានឯកភាពគ្នា ក្នុងចុះកិច្ចព្រមព្រមលើអនុស្សរណៈនៃការយោគយល់គ្នារវាងឯកឧត្តម សូត្រ សំណាង ប្រធាន ឧទ្យានរាជបណ្ឌិត្យសភាកម្ពុជា តេជោសែន ឫស្សីត្រឹប និង លោក Love Englund ប្រធានក្រុមហ៊ុន The Room Design Studio ក្រោមអធិបតីភាពរបស់ឯកឧត្តមបណ្ឌិតសភាចារ្យ សុខ ទូច ប្រធានរាជបណ្ឌិត្យសភាកម្ពុជា និងលោកជំទាវ Maria Sargren ឯកអគ្គរដ្ឋទូតស៊ុយអែតប្រចាំកម្ពុជា។ 

នៅក្នុងអនុស្សរណៈនេះ បានបង្ហាញថា ភាគីទាំងពីរ ព្រមព្រៀងសហប្រតិបត្តិការក្នុងការអភិវឌ្ឍ និង លើកកំពស់ការងារក្នុងឧទ្យានរាជ បណ្ឌិត្យ សភា កម្ពុជា តេជោសែន ឫស្សីត្រឹប លើចំណុចសំខាន់ៗដូចខាងក្រោម៖ 

១. បង្កើតថ្នាលបណ្តុះកូនឈើ (ដែលជាការបរិច្ចាគឯកជនរបស់លោក Englund)
២. ដាំដើមឈើក្នុងស្រុកឡើងវិញ 
៣. បង្កើតចំការដើមឈើដែលមាននិរន្តភាពដើម្បីជួយសម្រួលការងារដល់ជនជាតិកួយ
៤. ផ្តល់ការបណ្តុះបណ្តាលសម្រាប់ជនជាតិគួយ និងជួយអភិរក្សបេតិកភណ្ឌវប្បធម៌របស់ពួកគេ
៥. បង្កើតតំបន់ជីវៈចម្រុះនៅក្នុងឧទ្យានដើម្បីផ្តល់បរិស្ថានដែលមាននិរន្តរភាពសម្រាប់សត្វ
៦. ជួយផ្លាស់ប្តូរឧទ្យានរាជបណ្ឌិត្យសភាកម្ពុជាតេជោសែនឬស្សីត្រឹបឱ្យទៅជាគោលដៅអេកូទេសចរណ៍
៧. ផ្តល់ការបណ្តុះបណ្តាលចំពោះឧទ្យាននុរក្ស ដែលការពារនៅក្នុងឧទ្យានរាជបណ្ឌិត្យសភាកម្ពុជាតេជោសែនឬស្សីត្រឹប។

RAC Media

  ថ្ងៃអង្គារ, 26 មីនា 2019 ម៉ោង 04:38 PM

សរុបព័ត៌មានប្រចាំសប្តាហ៍៖ «បច្ចេកសព្ទចំនួន ១១ ត្រូវបានអនុម័ត កាលពីសប្តាហ៍ទី៣ ក្នុងខែមីនា ឆ្នាំ២០១៩ ដោយក្រុមប្រឹក្សាជាតិភាសាខ្មែរ(ក.ជ.ភ.ខ)នៃរាជបណ្ឌិត្យសភាកម្ពុជា»

បច្ចេកសព្ទចំនួន ១១ ត្រូវបានអនុម័ត នៅសប្តាហ៍ទី៣ ក្នុងខែមីនា  ឆ្នាំ២០១៩នេះ​ ក្នុងនោះមាន៖

- បច្ចេកសព្ទគណៈ កម្មការអក្សរសិល្ប៍  ចំនួន០៣ បានអនុម័ត កាលពីថ្ងៃអង្គារ ១៤កើត ខែផល្គុន ឆ្នាំច សំរឹទ្ធិស័ក ព.ស.២៥៦២ ក្រុមប្រឹក្សាជាតិភាសាខ្មែរ ក្រោមអធិបតីភាពឯកឧត្តមបណ្ឌិត ជួរ គារី ក្នុងនោះមាន៖​១. ការផ្តើមរឿង២. ដំណើររឿង ៣. បញ្ចប់រឿង។

-បច្ចេកសព្ទគណ:កម្មការគីមីវិទ្យា និង រូបវិទ្យា ចំនួន៨ បានអនុម័ កាលពីថ្ងៃពុធ ១៥កើត ខែផល្គុន ឆ្នាំច សំរឹទ្ធិស័ក ព.ស.២៥៦២ ក្រុមប្រឹក្សាជាតិភាសាខ្មែរ ក្រោមអធិបតីភាពឯកឧត្តមបណ្ឌិត ហ៊ាន សុខុម ក្នុងនោះមាន៖ ១. ដែក  ២.កូបាល /កូបាល់ ៣.នីកែល  ៤.ទង់ដែង  ៥.ស័ង្កសី  ៦.ហ្កាល្យ៉ូម ៧.ហ៊្សែម៉ាញ៉ូម ៨.អាសេនិក។

សទិសន័យ៖

១.ការផ្តើមរឿង អ. introduction បារ. Introduction(f…)៖ ផ្នែកមួយនៃអត្ថរូបដែលជាការតាំង ប្រារព្ធសេចក្តីតាមមធ្យោបាយ វិធីផ្សេងៗ ក្នុងការបើកឆាកបង្ហាញដើមរឿងរបស់អ្នកនិពន្ធទៅតាមគោលនិយមនៃស្នាដៃ។ការផ្តើមរឿងក្នុងអ្សរសិល្ពិ៍មានលក្ខណៈប្លែកៗគ្នា ទៅតាមគោលនិយមនៃស្នាដៃដូចជា៖
- រឿងបែបព្រហ្មណ៍និយម ការផ្តើមរឿងដោយប្រកាសរំលឹកសើសើរនូវគុណ ឥទ្ធិពលនៃអាទិទេពក្នុងជំនឿព្រហ្មណ៍សាសនា។
- រឿងបែបពុទ្ធនិយម ការផ្តើមរឿងដោយធ្វើបទនមស្ការ ព្រះរតនត្រ័យ( ព្រះពុទ្ធ ព្រះធម៌ ព្រះសង្ឃ) រំលឹកគុណគ្រូបាអាចារ្យ មាតាបិតា...ប្រាប់ ឈ្មោះអ្នកនិពន្ធកាលបរិទ្ឆេទនៃរឿងជាដើម។
-​រឿងបែបខេមរនិយម ការផ្តើមរឿងអាស្រ័យលើវិធីសាស្ត្ររបស់អ្នកនិពន្ធ ដោយផ្អែកលើតថភាពនៃជីវភាពជាក់ស្តែងក្នុងសង្គមខ្មែរ។
២.ដំណើររឿង អ. plot បារ. déroulement des faits៖ ផ្នែកមួយនៃអត្ថរូបដែលជាគម្រោង ផែនការ ការចនា ឈុត​ឆាក នៃព្រឹត្តិការណ៍ នៅក្នុងរឿងល្ខោន រឿងប្រលោមលោក។ល។ ដែលជាតំណសកម្មភាពតាមរយៈការបង្ហាញទំនាស់វិបត្តិ និងដំណោះស្រាយទៅតាមល្បិចរបស់អ្នកនិពន្ធនិងតាមគោលនិយមនៃស្នាដៃ។
៣.ការបញ្ចប់រឿង អ. ending បារ.fin(f.) ៖ ផ្នែកមួយនៃអត្ថរូបដែលជាការតាំង ប្រារព្ធសេចក្តីតាមមធ្យោបាយ ដើម្បី​បិទបញ្ចប់រឿងទៅតាមគោលនិយមនៃស្នាដៃ។ការបញ្ចប់រឿងក្នុងអក្សរសិល្បិ៍ខ្មែរ មានលក្ខណៈប្លែកៗគ្នាទៅតាមគោលនិយមនៃស្នាដៃដូចជា៖
- រឿងបែបព្រហ្មណ៍និយម ការបញ្ចប់រឿងដោយឱ្យតួអង្គតំណាងសភាវៈល្អទទួលជ័យជម្នះលើតួអង្គដែលតំណាងសភាវៈអាក្រក់។
-រឿងបែបពុទ្ធនិយម ការបញ្ចប់រឿងភាគច្រើនដោយឱ្យតួអង្គសជាតិ។
-​រឿងបែបខេមរនិយម ការបញ្ចប់រឿងភាគច្រើនពុំមានលក្ខណៈឯកភាពគ្នាទេ វាអាស្រ័យទៅលើឧត្តមគតិរបស់អ្នកនិពន្ធឬតថភាពសង្គម។
៤.ដែក  អ. iron បារ. fer (m.)៖ ធាតុគីមីទី២៦ក្នុងតារាងខួប ដែល​មាននិមិត្តសញ្ញា​ Fe ជាលោហៈឆ្លង មានម៉ាសអាតូម​ 55.847 ខ.អ។
៥.កូបាល /កូបាល់ អ. cobalt  បារ. cobalt (m.)៖ធាតុគីមីទី២៧ក្នុងតារាងខួប ដែល​មាននិមិត្តសញ្ញា​ Co ជាលោហៈឆ្លងមាន​ម៉ាសអាតូម​ 58.9332 ខ.អ។
៦.នីកែល  អ. nickel  បារ. nickel (m.)៖ធាតុគីមីទី២៨ក្នុងតារាងខួប ដែល​​មាននិមិត្តសញ្ញា​ Ni ជាលោហៈឆ្លង​មាន​ម៉ាសអាតូម​ 58.6934 ខ.អ។
៧.ទង់ដែង  អ. copper បារ. zuivre៖ ធាតុគីមីទី២៩ក្នុងតារាងខួប ដែល​​មាននិមិត្តសញ្ញា​ Cu ជាលោហៈឆ្លង​មាន​ម៉ាស​​អាតូម​ 63.546 ខ.អ។
៨.ស័ង្កសី  អ. zinc  បារ. zinc ៖ ធាតុគីមីទី៣០ក្នុងតារាងខួប ដែល​មាននិមិត្តសញ្ញា​ Zn មានលក្ខណៈអំហ្វូទែមានម៉ាសអាតូម​ 65.39 ខ.អ។
៩.ហ្កាល្យ៉ូម អ. gallium បារ. gallium (m.) ៖​ ធាតុគីមីទី៣១ក្នុងតារាងខួប ដែល​​មាននិមិត្តសញ្ញា​ Ga ជាលោហៈ​មានម៉ាស​អាតូម 69.723 ខ.អ។
១០.ហ៊្សែម៉ាញ៉ូម អ. germanium បារ. germanium (m.)៖ ធាតុគីមីទី៣២ក្នុងតារាងខួប​ដែល​មាននិមិត្តសញ្ញា​ Ge ជាលោហៈមាន​លក្ខ​ណៈ​​​​អំហ្វូទែមានម៉ាសអាតូម​ 72. 61 ខ.អ។
១១.អាសេនិក  អ. arsenic បារ. arsenic (m.)៖ ធាតុគីមីទី៣៣ក្នុងតារាងខួប​ ដែល​មាននិមិត្តសញ្ញា​ As ជាធាតុ​អំ​ហ្វូទែ​មាន​ម៉ាសអាតូម 74.9216 ខ.អ។

RAC Media

  ថ្ងៃចន្ទ, 25 មីនា 2019 ម៉ោង 06:16 PM

«វិមានរំឭកដល់អ្នកស្លាប់ក្នុងសង្គ្រាមលោកលើកទី១» - ភាគទី៥ - វគ្គទី២ ដោយ៖ លោកស្រី ស៊ន ច័ន្ទអមរា មន្ត្រីលេខាធិការដ្ឋាននៃក្រុមប្រឹក្សាបណ្ឌិតសភាចារ្យ នៃរាជបណ្ឌិត្យសភាកម្ពុជា

នៅក្នុងភាគទី៥ វគ្គទី២នេះ យើងសូមរៀបរាប់បន្តនូ​វសុន្ទរកថារបស់លោកចៅហ្វាយក្រុងភ្នំពេញ ក្នុងពិធីសម្ពោធ«ផ្ទាំងរំឭក»(Plaque commémorative) អំពីការស្នាក់នៅក្នុងសាលាក្រុងភ្នំពេញនៃលោកសេនាប្រមុខ សុព​ (Maréchal Joffre) កាលពីខែធ្នូ ឆ្នាំ១៩២១ ដែលមានខ្លឹមសារដើមនិងការកែសម្រួលមួយចំនួនដូចខាងក្រោម៖ 

មូលហេតុដែលរាជការក្រុមមឿង(សាលាក្រុង)អញ្ជើញអស់លោក អស់អ្នក មកក្នុងថ្ងៃនេះគឺដើម្បីមករៀបចំបោះ«ផ្ទាំងរំឭក»នេះឯងហើយ។

មនុស្សជំនាន់ក្រោយ ដែលមិនបានភិតភ័យនឹងចម្បាំងក្នុងគ្រានោះនឹងមានសេចក្តីភ្លេចឆាប់ណាស់ ចំពោះស្នាដៃរបស់អ្នកដែលនាំឱ្យបានជ័យជម្នះនេះ។ ប្រសិនបើមិនធ្វើ«ផ្ទាំងរំឭក»នេះទេ ដល់យូរៗទៅកូនចៅរបស់យើងនឹងភ្លេចអំពី«ចម្បាំងឡាម៉ានន៍» (Guerre de la Marne) និងឈ្មោះមេទ័ពម្នាក់ដែលនាំឱ្យមានជោគជ័យនៅទីនោះ។ ដូចនេះមិនត្រូវឱ្យមានសេចក្តីអកតញ្ញូនៅក្នុងចិត្តបារាំងសេសដែលនៅស្រុកខ្មែរ និង ក្នុងចិត្តអាណាប្រជានុរាស្ត្រខ្មែរឡើយ។ «ផ្ទាំងរំឭក»ធ្វើអំពីសំរឹទ្ធដែលបោះនៅត្រង់រុក្ខវិថីសុព (Avenue Joffre) នៅចំពោះមុខលោកសេនាប្រមុខតែម្តងនោះ ជារបស់តឹកតាង១ ធ្វើមុនគេបង្អស់ដើម្បីឱ្យដឹងអង្វែងតទៅមុខ ថាលោកសេនាប្រមុខបានអញ្ជើញមកក្រុងភ្នំពេញ។ «ផ្ទាំងរំឭក» ធ្វើអំពីថ្មកែវ១ផ្ទាំង ដែលបោះ​នៅបន្ទប់សម្រាប់អ្នកទាំងពួងនៅផ្ទះរាជការក្រុមមឿង(សាលាក្រុង)នោះ នឹងនាំឱ្យរឹតតែចាំពីលោកដែលបានអញ្ជើញមកក្រុងភ្នំពេញនេះថែមទៀត។

ខ្ញុំសូមជម្រាប អស់លោកអស់អ្នកជ្រាបថា មូលហេតុដែលរាជការក្រុមមឿងក្រុងភ្នំពេញ ធ្វើក្នុងគ្រាឥឡូវនេះមិនមែនធ្វើឱ្យតែមេទ័ពធំតែម្នាក់ឯង ដោយបាននាំកងទ័ពទៅតយុទ្ធឥតរុញរាទេ។ ការធ្វើនេះគឺធ្វើឱ្យទាំងពួកកងទ័ពនោះផង ដោយបាន​ជួយ​សង្គ្រោះនគរឱ្យរួចបានដោយសារតែមានចិត្តក្លាហាន។​ យើងរាល់គ្នាគ្មាននរណាហើយដែលមិនចាំអំពីខ្សែលួស​(ទូរលេខ) ពីប្រទេស​បារាំងដែលបានបញ្ជូនដំណឹងស្តីពីការព្រួយរបស់មេដឹកនាំបារាំងមកឱ្យយើងដឹងថាទ័ពយើងចេះតែថយបន្តិចម្តងៗ និង​អំពីការព្រួយរបស់យើង ដោយបានទទួលដំណឹងនេះ។ ប៉ុន្តែយើងនៅតែមិនបាត់សេចក្តីសង្ឃឹម។

ផែនទីបង្ហាញអំពីព្រែកឡាម៉ានន៍ ដែលជាដៃទន្លេសែននៅខាងកើតក្រុងប៉ារីស Marne River/ Rivière de la Marne

ក្រោយមកដំណឹងថាបានគ្រាន់បើនៅព្រែកឡាម៉ានន៍ (Rivière de la Marne) ហើយឃើញសេចក្តីបង្គាប់ពីលោកសេនាប្រមុខ​សុព ដូច្នេះថា៖ យើងកំពុងតែចូលតយុទ្ធដើម្បីឱ្យនគរនឹងបានជ័យជម្នះលើពួកអាល្លឺម៉ង់។ យើងត្រូវតែរំឭកអ្នកទាំងអស់គ្នាថាក្នុងគ្រានេះអ្នកមិនត្រូវគិតពីរឿងដកថយក្រោយទេ ត្រូវខំវាយនិងខំដេញសង្ខុញពួកខ្មាំង ឱ្យវាថយទៅក្រោយវិញឱ្យពេញទំហឹង។ ពួកទាហានដែលខំប្រឹងទៅមុខទៀតមិនរួច ត្រូវតែខំក្រាញនៅៗ ទីតាំងដែលខ្លួនយកបាន ហើយមិនត្រូវថយទេ ត្រូវ​ស៊ូឱ្យទាល់តែអស់ជីវិតនៅទីនោះ។ ក្នុងគ្រាឥឡូវនេះតែមានធ្វើខុសហើយ នឹងអនុញ្ញាតទោសមិនបានសោះឡើយ ហើយឮដំណឹង​ថា​ទ័ពខ្មាំងវាបាត់រត់តត្រាត់តត្រាយ [1] តាមផ្លូវ ដែលវាចូលមកកាលវាកំពុងនៅមានជ័យ។

ស្រុកបារាំងតាំងពីនោះមកបានរួចខ្លួនហើយៗ បានរៀបចំតយុទ្ធធន់យូរដែលមានមកក្រោយៗទៀតបានដោយពួកទាហាននោះនៅរាំងដូចជារបងដែក១គ្មាននរណាទម្លាយបានសោះតាំងអំពីនោះរៀងមក។ ម្យ៉ាងទៀត លោកមើលយល់អំពីស្ថានភាពបានច្បាស់លាស់ និងចេះរៀនចំយុទ្ធវិធីជាបន្ត។ គឺលោកសេនាប្រមុខនេះហើយដែលចេះបញ្ជាឱ្យកងទ័ពដកថយដល់ឡាមានន៍ (la Marne) និងឱ្យទប់ទល់នៅទីនោះ ហើយចេះរកពេលវាយបកវិញរហូតដល់បានជោគជ័យ។ លោកសេនាប្រមុខសុព ដែលល្បីឈ្មោះនេះឯង គួរតែយើងចាំកុំភ្លេចសោះពីលោកដែលបានអញ្ជើញមកសំណាក់នៅផ្ទះរាជការក្រុមមឿងនេះ។

ខ្ញុំសូមជម្រាបអស់លោកអស់អ្នកជ្រាប ថាលោកមេកងទ័ពដែលមានកេរ្តិ៍ឈ្មោះល្បីនោះ មិនដែលធ្វើឱ្យមានកំហុស, មិនដែលបាត់សង្ឃឹម និងមិនដែលគិតថាបារាំងមិនក្លាហាន និងមិនតស៊ូនោះទេ។ ម្យ៉ាងទៀត លោកមើលយល់អំពីស្ថានភាពបានច្បាស់លាស់ និងចេះរៀនចំយុទ្ធវិធីជាបន្ត។ គឺលោកសេនាប្រមុខនេះហើយដែលចេះបញ្ជាឱ្យកងទ័ពដកថយដល់ឡាមានន៍ (la Marne) និងឱ្យទប់ទល់នៅទីនោះ ហើយចេះរកពេលវាយបកវិញរហូតដល់បានជោគជ័យ។ លោកសេនាប្រមុខសុព្វ ដែលល្បីឈ្មោះនេះឯង គួរតែយើងចាំកុំភ្លេចសោះពីលោកដែលបានអញ្ជើញមកសំណាក់នៅផ្ទះរាជការក្រុមមឿងនេះ។

នៅលើផ្ទាំងថ្មកែវនេះមានអក្សររំឭកអំពីលោកដែលបានអញ្ជើញមកក្រុងភ្នំពេញ ដើម្បីរំឭកគុណលោក។  

អក្សរនៅលើផ្ទាំងថ្មនេះមានខ្លឹមសារទាំងស្រុងដូចខាងក្រោម៖

«ក្នុងរវាងដែលមានកិច្ចធុរៈដំណើរមកជារាជការក្នុងស្រុកទិសបូព៌[2]ចុងបំផុត “អិស្សត្រែមអូរីយ៉ង”[3]
នោះលោកម៉ារេសាល់សុព
ដែលមានជ័យជម្នះក្នុងចម្បាំងឡាម៉ានន៍ បានអញ្ជើញមកសំណាក់នៅទីផ្ទះរាជការក្រុមមឿងនេះ
នៅថ្ងៃ១៣-១៤ និង ១៨ ខែដេសម ឆ្នាំ១៩២១»។ 
អស់លោក អស់អ្នក ដែលបានទៅជួបជុំក្នុងឱកាសនេះ ក៏បានចូលរួមគ្នាទះដៃទទួលគំនាប់សេចក្តីបង្ហើយនៃសេចក្តីអធិប្បាយនេះ[4]។

(សូមរង់ចាំអានភាគបន្ត…)

------------------------------------------------------

[1] តត្រាត់តត្រាយ ជាភាសានិយាយនៅសម័យនោះដែលមានន័យស្មើនឹងរប៉ាត់រប៉ាយ។
[2] ទិសបូព៌ គឺទិសបូព៌ា។
[3] អិស្សត្រែមអូរីយ៉ង(Extrême-Orient) គឺចុងបូព៌ា។
[4] បុន្យ៍ឆ្លងវិមានដែរសាងក្នុងក្រុងក័ម្ពូជាធិប្តី, ជាទីរំឭកដល់អស់អ្នក ដែលទទួលអនិច្ចកម្ម ក្នុងចំបាំងធំ(ពីឆ្នាំ១៩១៤ដល់ឆ្នាំ១៩១៨), នៅក្នុងរាជកិច្ចរាជការ ឆ្នាំ១៩២៥, ទំព័រ៦៥-៦៨។

ទាញយកអត្ថបទភាគទី៥ វគ្គ២ ជា .pdf ពី៖
http://rac.apppeppers.com/royal-academy/research/attachments/original/90.pdf?1553498895

  ថ្ងៃចន្ទ, 25 មីនា 2019 ម៉ោង 02:51 PM

«ប្រជុំពិនិត្យ ពិភាក្សា និង អនុម័តបច្ចេកសព្ទគណៈកម្មការគីមីវិទ្យា និង រូបវិទ្យា»

កាលពីថ្ងៃពុធ ១៥កើត ខែផល្គុន ឆ្នាំច សំរឹទ្ធិស័ក ព.ស.២៥៦២ ក្រុមប្រឹក្សាជាតិភាសាខ្មែរ ក្រោមអធិបតីភាពឯកឧត្តមបណ្ឌិត ហ៊ាន សុខុម ប្រធានក្រុមប្រឹក្សាជាតិភាសាខ្មែរ បានបន្តដឹកនាំប្រជុំពិនិត្យ ពិភាក្សា និង អនុម័តបច្ចេកសព្ទគណៈកម្មការគីមីវិទ្យា និង រូបវិទ្យា បានចំនួន០៨ពាក្យ ដូចខាងក្រោម៖

  ថ្ងៃព្រហស្បតិ៍, 21 មីនា 2019 ម៉ោង 12:32 PM

«ប្រជុំពិនិត្យ ពិភាក្សា និង អនុម័តបច្ចេកសព្ទគណៈកម្មការអក្សរសិល្ប៍»

កាលពីថ្ងៃអង្គារ ១៤កើត ខែផល្គុន ឆ្នាំច សំរឹទ្ធិស័ក ព.ស.២៥៦២ ក្រុមប្រឹក្សាជាតិភាសាខ្មែរ ក្រោមអធិបតីភាពឯកឧត្តមបណ្ឌិត ជួរ គារី បានបន្តប្រជុំ ពិនិត្យ ពិភាក្សា និង អនុម័តបច្ចេកសព្ទគណៈកម្មការអក្សរសិល្ប៍ បានចំនួន០៣ពាក្យ ដូចខាងក្រោម៖

RAC Media

  ថ្ងៃព្រហស្បតិ៍, 21 មីនា 2019 ម៉ោង 12:24 PM