រាជបណ្ឌិត្យសភាកម្ពុជា

«ជំនួបស្វាគមន៍រវាងថ្នាក់ដឹកនាំ និងមន្ត្រីនៃវិទ្យាស្ថានវិទ្យាសាស្ត្រនិងបច្ចេកវិទ្យានៃរាជបណ្ឌិត្យសភាកម្ពុជា ជាមួយប្រធានសមាគមគ្រូគណិតវិទ្យាអាម៉េរិក...»

ភ្នំពេញ៖ នាព្រឹក ថ្ងៃព្រហស្បតិ៍ ១កើត ខែកត្តិក ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី៨ ខែវិច្ឆិកា ឆ្នាំ២០១៨ នៅសាលប្រជុំវិទ្យាស្ថានវិទ្យាសាស្ត្រ និងបច្ចកវិទ្យានៃរាជបណ្ឌិត្យសភាកម្ពុជា បានរៀបចំស្វាគមន៍ដំណើេរទស្សនៈកិច្ចរបស់ លោកសាស្ត្រាចារ្យបណ្ឌិត ម៉ាយឃើល ដោហ្វ(Michael Dorff) ជាគណៈប្រតិភូដែលបានអញ្ជើញមកពីសាកលវិទ្យាល័យ BRIGHAM YOUNG UNIVERSITY សហរដ្ឋអាម៉េរិក ហើយលោកជាប្រធានសមាគមគ្រូគណិតវិទ្យាសហរដ្ឋអាម៉េរិក។​ 

វត្តមាននៃជំនួបស្វាគមន៍នោះ​ ក៏មានការអញ្ជើញចូលរួមជាកិត្តិយស របស់ លោកបណ្ឌិត​ ច័ន្ទ រ័ត្ន ប្រធានសមាគមអ្នកគណិតវិទ្យាកម្ពុជា មានថ្នាក់ដឹកនាំវិទ្យាស្ថានវិទ្យាសាស្ត្រ និងបច្ចកវិទ្យានៃរាជបណ្ឌិត្យសភាកម្ពុជា ឯកឧត្តមបណ្ឌិត អ៊ាប ​ប៉ុណ្ណា លោកយឹម អាយុវឌ្ឍនៈវិជ្ជា ប្រធានផ្នែកគណិតវិទ្យា និងស្ថិតិរួមទាំងមន្ត្រីជំនាញ និងស្រាវជ្រាវខាងផ្នែកគណិតវិទ្យាជាច្រើនរូបរបស់វិទ្យាស្ថានវិទ្យាសាស្ត្រ និងបច្ចកវិទ្យានៃរាជបណ្ឌិត្យសភាកម្ពុជា។

ស្ថិតនៅក្នុងបរិយាកាសនៃជំនួបនោះ លោកសាស្ត្រាចារ្យ​បណ្ឌិត ម៉ាយឃើល ដោហ្វ (Michael Dorff) ក៏បានធ្វើបទបង្ហាញការងារស្រាវជ្រាវរបស់លោកជូនដល់ថ្នាក់ដឹកនាំ មន្ត្រីរបស់វិទ្យាស្ថានដើម្បីបានចែករំលែកបទពិសោធន៍ខ្លះៗ រួមទាំងកិច្ចការស្រាវជ្រាវផ្ទាល់ខ្លួនរបស់លោកជាច្រើនបន្ថែមនៅក្នុងវិស័យវិទ្យាសាស្ត្រ រួមទាំងលទ្ធផលបានមកពីបណ្តាអ្នកស្រាវជ្រាវរកឃើញបញ្ហាថ្មីៗនៅសហរដ្ឋអាម៉េរិក ក៏ដូចអ្នកប្រាជ្ញតាមសាកលវិទ្យាល័យធំៗនានាកំពុងតែបន្តធ្វើ។

ការធ្វើបទបទបង្ហាញនោះ មានវិស័យធំៗចំនួន៣ ដែលអាចជួយដល់អ្នកសិក្សាស្រាវជ្រាវខាងផ្នែកវិទ្យាសាស្ត្រមិនអាចរំលងបានរួមមាន៖ ១- ផ្នែកស្ថិតិ ២- ផ្នែកគណិតវិទ្យា​និង ៣-ផ្នែកវិទ្យាសាស្ត្រកុំព្យូទ័រ។ លោកសាស្ត្រាចារ្យ បណ្ឌិតបានលើកថា «ផ្នែកទាំងបីនេះគឺត្រូវដើរទន្ទឹមគ្នាដើម្បីស្វែងរកភាពជោគជ័យខាងផ្នែកវិទ្យាសាស្ត្រ ហើយវាបានស៊ីជម្រៅដល់ការវិភាគ​ផ្នែកទិន្ន័យផ្សេងៗដែលកំពុងមានប្រជាប្រិយភាពនៅសហរដ្ឋអាម៉េរិកនាពេលបច្ចុប្បន្ន ពី ព្រោះ ផ្នែកវិភាគទិន្នន័យ វាបានជួយដល់ជម្រើសការងារមនុស្សជាច្រើន គឺមានលទ្ធភាពបានធ្វើការងារលើគ្រប់វិស័យ បើទោះជាការងារផ្នែកនយោបាយ តុលាការ បទស៊ើបអង្កេត ឬបទឧក្រិដកម្មផ្សេង។ល។

បន្ទាប់ពីបទបង្ហាញបានបញ្ចប់ លោកសាស្ត្រាចារ្យបណ្ឌិត បានធ្វើការសិក្សាលើវិស័យមួយចំនួនដែលខាងវិទ្យាស្ថានវិទ្យាសាស្ត្រ និងបច្ចេកវិទ្យានៃរាជបណ្ឌិត្យសភាកម្ពុជាបាននឹងកំពុងតែស្រាវជ្រាវ ជាពិសេសផ្នែកវិទ្យាសាស្ត្រផ្ទាល់។ លោក ឃឹម អាយុវឌ្ឃនៈវិជ្ជា ប្រធានផ្នែកគណិតវិទ្យា និងស្ថិតិ នៃរាជបណ្ឌិត្យសភាកម្ពុជាបានលើកបង្ហាញ ពីរចនា សម្ព័ន្ធការងារនៅក្នុងវិទ្យាស្ថាន ដោយលោកបានបញ្ជាប់ប្រាប់ថា គណិតវិទ្យានិងស្ថិតិ ជាផ្នែកមួយរបស់វិទ្យាស្ថាន មានមន្ត្រីទាំងអស់ចំនួន៨ រូប សុទ្ធតែមានជំនាញខាងគណិតវិទ្យា ទាំងបណ្ឌិតនិងបេក្ខជនបណ្ឌិត។

បច្ចុប្បន្នផ្នែកនេះមានចំនួនប្រាំ(៥)ការិយាល័យ ក្នុងនោះមាន ​១-ការិយាល័យគណិតវិទ្យាទ្រឹស្តី ២- ការិយាល័យស្ថិតិវិទ្យា និងការវិភាគទិន្នន័យ ៣- ការិយាល័យគណិតវិទ្យាអនុវត្តន៍ ៤- ការិយាល័យគណិតវិទ្យាអប់រំ និង ៥-ការិយា ល័យកម្មវិធីកុំព្យូទ័រសម្រាប់គណិតវិទ្យា។ កិច្ចការកន្លងមក ផ្នែកគណិត វិទ្យា និងស្ថិតិបានធ្វើការស្រាវជ្រាវ បណ្តុះបណ្តាល និងបានចងក្រងស្នាដដៃបោះពុម្ភផ្សាយជាច្រើនទាក់ទងនិងផ្នែកគណិតវិទ្យាផ្ទាល់រួមទាំងកម្មវិធីកុំព្យូទ័រ និងបានធ្វើកិច្ចសហប្រតិបត្តិការជាមួយស្ថាប័នជាតិ និងអន្តរជាតិផងដែរ។

ឆ្លៀតនៅក្នុងឱកាសនោះ ឯកឧត្តមបណ្ឌិត អ៊ាប ប៉ុណ្ណា ប្រធានវិទ្យាស្ថានវិទ្យាសាស្ត្រ និងបច្ចកវិទ្យានៃរាជបណ្ឌិត្យ សភាកម្ពុជាបានសម្តែងការគាំទ្រ និងកោតសរសើរចំពោះស្នាដៃដែលលោកសាស្ត្រាចារ្យបណ្ឌិត ម៉ាយឃើល ដោហ្វ (Michael Dorff) បានអញ្ជើញមកទស្សនកិច្ចស្វែងយល់ដោយផ្ទាល់ចំពោះវិទ្យាស្ថានវិទ្យាសាស្ត្រ និងបច្ចេកវិទ្យា ហើយឯកឧត្តមបណ្ឌិត ក៏បានសំណូមពរដល់លោកសាស្ត្រាចារ្យបណ្ឌិត ដើម្បីបានជួយរួមចំណែកសិក្សាស្វែងយល់ពីកិច្ចការស្រាវជ្រាវលើវិស័យវិទ្យាសាស្ត្រដែលវិទ្យាស្ថានមាន មិនចំពោះតែផ្នែកគណិតវិទ្យានោះទេ នឹងសង្ឃឹមថា មានកិច្ចសហការណ៏ល្អជាមួយរាជបណ្ឌិត្យសភាកម្ពុជាទាំងមូល។

លោក ឃឹម អាយុវឌ្ឃនៈវិជ្ជា ប្រធានផ្នែកគណិតវិទ្យា និងស្ថិតិក៏បានបន្ថែម និងស្នើសុំលទ្ធភាព ក្នុងនាមលោកសាស្ត្រា ចារ្យបណ្ឌិតជាប្រធានសមាគមគ្រូគណិតវិទ្យានៅសហរដ្ឋអាម៉រិក ជួយដល់មន្ត្រីផ្នែកគណិតវិទ្យារបស់វិទ្យាស្ថានវិទ្យា សាស្ត្រ និងបច្ចកវិទ្យាបានចូលរួម តាមអង្គសិក្ខាសាលា ក៏ដូចជាកម្មវិធីអភិវឌ្ឍន៍នានាក្នុងនាមជាវាគ្មិនផងដែរ។

សូមបញ្ជាក់ផងដែរថា នេះគឺជាលើកទី៣នៃជំនួបទស្សនកិច្ចស្វែងយល់របស់លោកសាស្ត្រាចារ្យបណ្ឌិត ម៉ាយឃើល ដោហ្វ(Michael Dorff) នៅវិទ្យាស្ថានវិទ្យាសាស្ត្រ និងបច្ចកវិទ្យានៃរាជបណ្ឌិត្យសភាកម្ពុជា បន្ទាប់ពីលោកបានអញ្ជើញចូលរូមជំនួបថ្នាក់ដឹកនាំនានានៅក្នុងវិទ្យាស្ថានខ្មែរជំនាន់ថ្មី និងសាកលវិទ្យាល័យភូមិន្ទភ្នំពេញ។  

RAC Media | ស៊ាង រ៉ូហ្សាត

​

  ថ្ងៃព្រហស្បតិ៍, 08 វិច្ឆិកា 2018 ម៉ោង 08:59 PM

«រាជរដ្ឋាភិបាល នឹងបង្កើតគោលនយោបាយជាតិគ្រប់គ្រង និងអភិវឌ្ឍន៍សហគមន៍ទេសចរណ៍ បន្ទាប់ពីគោលនយោបាយជាតិអេកូទេសចរណ៍»

(ភ្នំពេញ)៖ ដោយសម្លឹងឃើញនូវផលប្រយោជន៍ដ៏សំខាន់ នៃវិស័យអេកូទេសចរណ៍ វិស័យទេសចរណ៍សហគមន៍ និងយល់ច្បាស់ពីនិន្នាការរបស់ភ្ញៀវទេសចរពិភពលោក នាពេលបច្ចុប្បន្នផងនោះ រាជរដ្ឋាភិបាលកម្ពុជា បានបង្កើនការយកចិត្តទុកដាក់យ៉ាងខ្លាំង ចំពោះវិស័យអេកូទេសចរណ៍ និងទេសចរណ៍សហគមន៍។

ដោយហេតុនេះហើយ រាជរដ្ឋាភិបាលកម្ពុជា ក្រោមការដឹកនាំរបស់សម្ដេចតេជោ ហ៊ុន សែន នាយករដ្ឋមន្ត្រី បានសម្រេចបង្កើតក្រុមការងារអន្តរក្រសួងមួយ មានឈ្មោះថា «ក្រុមការងារអន្តរក្រសួងគ្រប់គ្រង និងអភិវឌ្ឍន៍ សហគមន៍ទេសចរណ៍ និងអេកូទេសចរណ៍» ដែលមានលោក ថោង ខុន រដ្ឋមន្ត្រីទេសចរណ៍ ជាប្រធាន លោក សាយ សំអាល់ រដ្ឋមន្ត្រី ក្រសួងបរិស្ថាន ជាអនុប្រធានអចិន្ត្រៃយ៍ លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ជាអនុប្រធាន និងក្រសួង-ស្ថាប័នពាក់ព័ន្ធជាសមាជិក។

បន្ទាប់ពីទទួលបានការសម្រេចបង្កើតក្រុមការងារអន្តរក្រសួង កាលពីថ្ងៃទី៣០ខែតុលាឆ្នាំ២០១៧រួចមកក្រុមការងារអន្តរក្រសួងខាងលើ បានបើកកិច្ចប្រជុំលើកទី៣របស់ខ្លួន នៅទីស្ដីការក្រសួងទេសចរណ៍ នាថ្ងៃទី០៧ ខែវិច្ឆិកា ឆ្នាំ២០១៨នេះ ក្រោមអធិបតីភាពលោក ថោង ខុន និង លោក សាយ សំអាល់។

ក្រោយបញ្ចប់កិច្ចប្រជុំ លោករដ្ឋមន្ត្រី ថោង ខុន បានថ្លែងថា ដោយកាលពីកិច្ចប្រជុំលើកទី២ អង្គប្រជុំបានពិនិត្យឆ្លងរួចហើយនូវគោលនយោបាយជាតិស្តីពីអេកូទេសចរណ៍ រីឯកិច្ចប្រជុំអន្តរក្រសួងលើកទី៣ នាព្រឹកនេះ គឺដើម្បីពិនិត្យ ទៅលើគោលនយោបាយជាតិ ស្ដីពីការគ្រប់គ្រង និងអភិវឌ្ឍន៍សហគមន៍ទេសចរណ៍។លោកថា ក្រោយពីប្រជុំលើកទី ៣នេះចប់ សមាជិកនីមួយៗនឹងយកសេចក្ដីព្រាងគោលនយោបាយនេះ ទៅពិនិត្យបន្តនៅតាមក្រសួង-ស្ថាប័នរៀងៗខ្លួន និងបំពេញធាតុចូលនានាបន្ថែមទៀត ដើម្បីបន្តកិច្ចប្រជុំលើកក្រោយទៀត មុនដាក់សេចក្ដីព្រាងចុងក្រោយនោះ ជូនគណៈរដ្ឋមន្ត្រីដើម្បីពិនិត្យ និងសម្រេច។

លោកបន្តថា គោលនយោបាយជាតិនេះ មានសារសំខាន់ចាំបាច់សម្រាប់ការគ្រប់គ្រង និងអភិវឌ្ឍន៍សហគមន៍ទេស ចរណ៍នៅកម្ពុជា ដែលទាមទារឱ្យមានការចូលរួមពីគ្រប់ភាគីពាក់ព័ន្ធ (4Ps) មានដូចជា៖ ភាគីរដ្ឋ ឬសាធារណៈ (Public) ភាគីឯកជន (Private) ដៃគូអភិវឌ្ឍន៍ (Partnership) និងប្រជាសហគមន៍-ទេសចរ (People)។

លោក ថោង ខុន បានសង្កត់ធ្ងន់ថា «តួនាទសំខាន់របស់វិស័យសាធារណៈ ក្នុងក្របខណ្ឌសហគមន៍ទេសចរណ៍នេះ គឺត្រូវជួយដល់សហគមន៍ ដូចជា ការធ្វើផ្លូវទៅកាន់សហគមន៍ ការរៀបចំគោលនយោបាយគ្រប់គ្រង និងអភិវឌ្ឍន៍ ការបណ្ដុះបណ្ដាលធនធានមនុស្ស គោលនយោបាយលើកទឹកចិត្ត ផ្នែកពន្ធដារ គោលនយោបាយក្នុងការប្រើប្រាស់អគ្គិសនី និងប្រព័ន្ធទូរស័ព្ទ អ៊ីនធឺរណេត ព្រមទាំងត្រូវបំពេញការងារជាច្រើនទៀត»។

លោករដ្ឋមន្ត្រីបានបន្ថែមទៀតថា អង្គប្រជុំក៏បានពិភាក្សាលើការងារជាច្រើនទៀតផងដែរ ដូចជា ការអភិវឌ្ឍនៅសហ គមន៍ទេសចរណ៍ជ្រាវ នៅខេត្តសៀមរាប ដែលជាសហគមន៍មួយដ៏សំខាន់ ក្នុងចំណោមសហគមន៍ទេសចរណ៍ នៅកៀកនឹងគោលដៅទេសចរណ៍អង្គរ។

លោកថា ក្នុងចំណោមភ្ញៀវទេសចរដែលទៅទស្សនាប្រាសាទអង្គរវត្តប្រមាណ ៥០% គឺបានបន្តដំណើរទៅទស្សនានៅសហគមន៍ទេសចរណ៍នានា ដែលនៅជាប់តំបន់បឹងទន្លេសាបរៀងរាល់ថ្ងៃ ក្នុងនោះមាន៥សហគមន៍ រួមមាន៖ សហគមន៍ចុងឃ្នាស សហគមន៍កំពង់ភ្លុក សហគមន៍កំពង់ឃ្លាំង សហគមន៍ជ្រាវ និងសហគមន៍មេជ្រៃ៕

ប្រភព៖ ក្រសួងទេសចរណ៍

RAC MEDIA | ហេង​ សុភី

​

  ថ្ងៃព្រហស្បតិ៍, 08 វិច្ឆិកា 2018 ម៉ោង 04:16 PM

«សម្ដេចតេជោប្រតិកម្មនឹងការដែលលោក សម រង្ស៊ី ថាសម្ដេចនឹងដោះលែងលោក កឹម សុខា»

ភ្នំពេញ៖ ប្រមុខរាជរដ្ឋាភិបាលកម្ពុជា សម្ដេចអគ្គមហាសេនាបតីតេជោ ហ៊ុន សែន បានប្រតិកម្មទៅនឹងការលើកឡើងរបស់លោក សម រង្ស៊ី ដែលថាសម្ដេចនឹងដោះលែងលោក កឹម សុខា នៅក្នុងឱកាសនៃទិវានយោបាយឈ្នះ-ឈ្នះ ថ្ងៃទី២៩ ខែធ្នូ ឆ្នាំ២០១៨ខាងមុខនេះ ថាឱ្យដេករង់ចាំទៅ។

សម្ដេចតេជោបានថ្លែងបែបនេះនៅក្នុងពិធីជួបសំណេះសំណាលជាមួយកម្មករ កម្មការិនី និងនិយោជិតប្រមាណ ២៣ ៤៦៦ នាក់ ដែលមកពី សហគ្រាសចំនួន២០ ពីតាមបណ្ដាស្រុកនានាក្នុងខេត្តតាកែវ នាព្រឹកថ្ងៃទី០៧ ខែវិច្ឆិកា ឆ្នាំ២០១៨ នេះ។

សម្ដេចតេជោបានមានប្រសាសន៍ពន្យល់ដល់លោក សម រង្ស៊ី អតីតអ្នកនយោបាយដែលបានភៀសខ្លួននៅក្រៅប្រទេស ឱ្យបានយល់ពីផ្លូវច្បាប់កម្ពុជាថា លោក កឹម សុខា ពុំទាន់ត្រូវបានតុលាការកម្ពុជាកាត់ទោសនិងមិនមានសាលក្រមណាមួយចេញជាស្ថាពរនៅឡើយទេ ហេតុនេះហើយ លោក កឹម សុខា មិនទាន់មានទោសណាមួយ ដែលអាចឱ្យប្រមុខរដ្ឋាភិបាលស្នើថ្វាយព្រះមហាក្សត្រព្រះរាជទានទោសនោះឡើយ ហើយសម្ដេចក៏នឹងមិនស្នើថ្វាយព្រះមហា ក្សត្រ ដើម្បីដោះលែងលោក កឹម សុខា នោះដែរ។

គួរបញ្ជាក់ផងដែរថា លោក សម រង្ស៊ី បានបង្ហោះសារនៅក្នុងទំព័រ Facebook របស់ខ្លួនថា «[...] លោក ហ៊ុន សែន នឹងដោះលែងលោក កឹម សុខា នៅថ្ងៃ ២៩ ធ្នូ ២០១៨ នេះ ក្នុងឱកាសខួបទី ២០ នៃ "នយោបាយឈ្នះៗ" ដែលលោក ហ៊ុន សែន តែងតែយកមកអួតអាង។ តាមការពិត ការដោះលែងលោក កឹម សុខា នេះ គឺធ្វើឡើងក្រោមសម្ពាធអន្តរជាតិសុទ្ធសាធ ហើយជាជំហានទី១ ដើម្បីជៀសវាងទណ្ឌកម្មពាណិជ្ជកម្ម ពីសហភាពអឺរ៉ុប។ ជំហានទី២ ដែលលោក ហ៊ុន សែន កំពុងតែទីទើនៅឡើយ គឺការបើកផ្លូវឲ្យគណបក្សសង្គ្រោះជាតិ ដំណើរការឡើងវិញ។ [...]»។

សូមជម្រាបថា បើយោងតាមច្បាប់ស្ដីពី ពន្ធនាគារ ដែលត្រូវបានអនុម័ត កាលពីឆ្នាំ២០១១ ត្រង់មាត្រា ៧៧ ប្រមុខរាជរដ្ឋាភិបាលមានបុព្វសិទ្ធិធ្វើសំណើថ្វាយព្រះមហាក្សត្រសុំលើកលែងទោសឲ្យទណ្ឌិតនៅពេលណាក៏បាន៕

RAC Media | លឹម សុវណ្ណរិទ្ធ

  ថ្ងៃព្រហស្បតិ៍, 08 វិច្ឆិកា 2018 ម៉ោង 04:01 PM

«ក្រុមប្រឹក្សាអភិវឌ្ឍន៍កម្ពុជា បានសម្រេចចុះបញ្ជីដល់ក្រុមហ៊ុន៦ វិនិយោគនៅកម្ពុជាដែលមានទឹកប្រាក់វិនិយោគប្រមាណ១៧២,៩៨លានដុល្លារ»

ក្រុមប្រឹក្សាអភិវឌ្ឍន៍កម្ពុជា (CDC) បានសម្រេចចេញ “វិញ្ញាបនបត្រចុះបញ្ជីជាស្ថាពរ” ជូនដល់ក្រុមហ៊ុនចំនួន៦។ តាមក្រុមប្រឹក្សាអភិវឌ្ឍន៍កម្ពុជា (CDC) បានបញ្ជាក់ថា ក្រុមហ៊ុនចំនួន៦នោះរួមមាន៖

១-“NORO MALL CO.,LTD.” គម្រោងវិនិយោគបង្កើតផ្សារទំនើប ដែលមានទីតាំងវិនិយោគស្ថិតនៅភូមិ៨ សង្កាត់ បឹងកេងកងទី១ ខណ្ឌចំការមន រាជធានីភ្នំពេញ មានទុនវិនិយោគចំនួន ៩,២លានដុល្លារអាម៉េរិក និងអាចបង្កើតការងារបាន ៤៩៤កន្លែង។

២-“SCHNEITEC RENEWABLE CO.,LTD.” គម្រោងសាងសង់ស្ថានីយ៍ផលិតថាមពលអគ្គិសនីដើរដោយថាម ពលពន្លឺព្រះអាទិត្យ កម្លាំង៦០មេហ្គាវ៉ាត់ ដែលមានទីតាំងវិនិយោគស្ថិតនៅភូមិទំនប់បាក់ ឃុំដំណាក់រាំង ស្រុកឧដុង្គ ខេត្តកំពង់ស្ពឺ មានទុនវិនិយោគប្រមាណ ៥៨,២៣លានដុល្លារអាម៉េរិក និងអាចបង្កើតការងារបាន ៣៥កន្លែង។

៣-“LING XIU INT’L CO.,LTD” គម្រោងសាងសង់ និងអាជីវកម្មសណ្ឋាគារថ្នាក់ផ្កាយ៥ ចំនួន៤១០បន្ទប់ ដែលមានទីតាំងវិនិយោគស្ថិតនៅភូមិ៦ សង្កាត់លេខ៤ ក្រុងព្រះសីហនុ ខេត្តព្រះសីហនុ មានទុនវិនិយោគប្រមាណ ៦៨,៩៨លានដុល្លារអាម៉េរិក និងអាចបង្កើតការងារបាន ១៣៣កន្លែង។

៤-“CATH PHARMA CO.,LTD.” គម្រោងបង្កើតរោងចក្រផលិតថ្នាំពេទ្យ ដែលមានទីតាំងវិនិយោគស្ថិតនៅដីឡូតិ៍ លេខ៩៦ ភូមិទីទុយ សង្កាត់ព្រៃស ខណ្ឌដង្កោ រាជធានីភ្នំពេញ មានទុនវិនិយោគចំនួន ៦,៣លានដុល្លារអាម៉េរិក និងអាចបង្កើតការងារបាន ១៣កន្លែង។

៥-“SAIER (CAMBODIA) GARMENT CO.,LTD.” គម្រោងបង្កើតរោងចក្រកាត់ដេរសម្លៀកបំពាក់ ដែលមានទីតាំងវិនិយោគស្ថិតនៅភូមិព្រៃសណ្តែក សង្កាត់ចោមចៅទី២ ខណ្ឌពោធិ៍សែនជ័យ រាជធានីភ្នំពេញ មានទុនវិនិយោគប្រមាណ ៤,០៦លានដុល្លារអាម៉េរិក និងអាចបង្កើតការងារបាន ១.០២៥កន្លែង។

៦-“HERSHEY PLASTIC INDUSTRIAL (CAMBODIA) CO.,LTD.” គម្រោងបង្កើតរោងចក្រផលិតទុយោ និងផលិតផលប្លាស្ទិកគ្រប់ប្រភេទ ដែលមានទីតាំងវិនិយោគស្ថិតនៅភូមិកែវឧត្តម ឃុំត្រពាំងគង ស្រុកសំរោងទង ខេត្តកំពង់ស្ពឺ មានទុនវិនិយោគប្រមាណ ២៦,២១លានដុល្លារអាម៉េរិក និងអាចបង្កើតការងារបាន ៣៩១កន្លែង។

ដកស្រង់៖ គេហទំព័រក្រសួងព័ត៌មាន

RAC Media | ផាញ់ សារឿន

  ថ្ងៃព្រហស្បតិ៍, 08 វិច្ឆិកា 2018 ម៉ោង 03:48 PM

«ជប៉ុនផ្តល់ជំនួយឥតសំណងជាង ៦៨ ម៉ឺនដុល្លារអាមេរិក សម្រាប់អភិវឌ្ឍន៍វិស័យ សុខាភិបាល អប់រំ និង ហេដ្ឋារចនាសម្ព័ន្ធនៅកម្ពុជា»

ចុះផ្សាយថ្ងៃទី០៨ ខែវិច្ឆិកា ឆ្នាំ២០១៨ ម៉ោង៖ ៣ : ២០ នាទីរសៀល

ភ្នំពេញ៖ កាលពីថ្ងៃអង្គារ៍ ទី០៦ ខែវិច្ឆិកា ឆ្នាំ២០១៨ ម្សិលមិញ រាជរដ្ឋាភិបាលជប៉ុន បានឯកភាពផ្តល់ថវិកាសរុបចំនួន ៦៨៣,២៥៤ ដុល្លារអាមេរិក ដល់កម្ពុជាដើម្បីធ្វើការអភិវឌ្ឍទៅលើវិស័យសុខាភិបាល អប់រំ និងហេដ្ឋារចនាសម្ព័ន្ធ។

នេះបើតាមការប្រកាសឱ្យដឹងនៅលើទំព័រ Facebook ផ្លូវការរបស់ស្ថានទូតជប៉ុនប្រចាំកម្ពុជា។បើតាមការប្រកាសរបស់ស្ថានទូតជប៉ុនប្រចាំកម្ពុជា ថវិកាទាំងនោះ នឹងត្រូវផ្ដល់ទៅឱ្យ មន្ទីរខេត្តចំនួន៥ និងអង្គការក្រៅរដ្ឋាភិបាលចំនួន២ ក្រោមគ្រោងការណ៍ជំនួយឧបត្ថម្ភឥតសំណងសម្រាប់គម្រោងទ្រង់ទ្រាយតូចសន្តិសុខមនុស្សជាតិ ដែលក្នុងនោះមានដូចជា៖

១. ផ្តល់ជូន ១៧៥,២៥០ ដុល្លារអាមេរិកដល់មន្ទីរសុខាភិបាលខេត្តព្រះវិហារ។

២. ផ្តល់ជូន ៧៩,០៨៤ ដុល្លារអាមេរិកដល់អង្គការសុខភាពត្រជៀកកម្ពុជា។

៣. ផ្តល់ជូន ៨៨,៦៣៤ ដុល្លារអាមេរិកដល់មន្ទីរអប់រំយុវជននិងកីឡាខេត្តរតនគីរី។

៤. ផ្តល់ជូន ៨៥,៣០០ ដុល្លារអាមេរិកដល់មន្ទីរអប់រំយុវជននិងកីឡាខេត្តក្រចេះ។

៥. ផ្តល់ជូន ៧៧,១៦៦ ដុល្លារអាមេរិកដល់អង្គការមូនិធិខ្មែរជំនួយការសិក្សា។

៧. ផ្តល់ជូន ៨៩,២៨៥ ដុល្លារអាមេរិកដល់មន្ទីរសាធារណការនិងដឹកជញ្ជូនខេត្តប៉ៃលិន។

៨. ផ្តល់ជូន ៨៨,៥៣៥ ដុល្លារអាមេរិកដល់មន្ទីរសាធារណការនិងដឹកជញ្ជូនខេត្តបន្ទាយមានជ័យ។

គួរបញ្ជាក់ផងដែរថា ជប៉ុនធ្លាប់ជាម្ចាស់ជំនួយធំជាងគេបំផុតរបស់កម្ពុជា ហើយត្រឹមតែក្នុងរយៈពេល ១០ឆ្នាំ ថវិកា ៧២០ លានដុល្លារអាមេរិក ត្រូវបានផ្តល់ដើម្បីគាំទ្រដល់ការអភិវឌ្ឍរបស់ប្រទេសកម្ពុជា ព្រមទាំងការរីកចម្រើន និងការចូលរួមនៅក្នុងអាស៊ានតាមរយៈក្របខណ្ឌដែលបានដាក់ចេញដោយគណៈកម្មាធិការជំនួយអភិវឌ្ឍ។

បន្ថែមពីលើនេះទៅទៀត កាលពីថ្ងៃទី០៨ ខែមេសា ឆ្នាំ២០១៨ ក្នុងដំណើរទស្សនកិច្ចរយៈពេល ១ថ្ងៃ របស់រដ្ឋមន្ត្រីការបរទេសជប៉ុន លោក តារ៉ូ កូណូ (Taro Kono) មកកាន់កម្ពុជា ជប៉ុនបានចុះហត្ថលេខាសម្រេចផ្ដល់ហិរញ្ញប្បទាន សរុបជាទឹកប្រាក់ជាង ៩០លានដុល្លារអាមេរិក ដល់របបលោក ហ៊ុន សែន ក្នុងនោះរួមមាន ទឹកប្រាក់ជាង ៤.៦លានដុល្លារជាជំនួយឥតសំណង សម្រាប់អនុវត្តន៍គម្រោងកម្មវិធីអភិវឌ្ឍន៍សេដ្ឋកិច្ច និងសង្គមនៅកម្ពុជា និងទឹកប្រាក់ជិត ៨៦លានដុល្លារ ជាទឹកប្រាក់កម្ចី ឥណទានសម្បទាន សម្រាប់អនុវត្តគម្រោងពង្រីកប្រព័ន្ធខ្សែបញ្ជូន និងចែកចាយអគ្គិសនីនៅរាជធានីភ្នំពេញ ជំហានទី២។

ក្នុងជំនួបជាមួយសម្ដេចតេជោនាយករដ្ឋមន្ត្រី រដ្ឋមន្ត្រីការបរទេសជប៉ុនបានជម្រាបសម្ដេចតេជោថា គោលបំណងរបស់ជប៉ុន គឺធ្វើយ៉ាងណាដើម្បីជួយដល់កម្ពុជាឱ្យក្លាយទៅជាប្រទេសដែលមានប្រាក់ចំណូលមធ្យមកម្រិតខ្ពស់នៅឆ្នាំ២០៣០។ ហើយលើសពីនេះទៅទៀត រដ្ឋមន្ត្រីជប៉ុនរូបនេះ ក៏បានសម្ដែងចំណាប់អារម្មណ៍ ក្នុងការជួយដល់ប្រទេសកម្ពុជា លើវិស័យមួយចំនួនដូចជា វិស័យដឹកជញ្ជូន ឡូជីស្ទីក រួមមានការគ្រប់គ្រងកំពង់ផែ តំបន់សេដ្ឋកិច្ចពិសេស និងការអភិវឌ្ឍធនធានមនុស្សជាដើម៕

RAC Media | លឹម សុវណ្ណរិទ្ធ

  ថ្ងៃព្រហស្បតិ៍, 08 វិច្ឆិកា 2018 ម៉ោង 03:24 PM

«សិក្ខាសាលាពាណិជ្ជកម្មសេរីរវាងអាស៊ាន-ចិន និងការចុះអនុស្សរណយោគយល់ជាមួយសាកលវិទ្យាល័យយូណាន់នៃសាធារណរដ្ឋប្រជាមានិតចិន»

ឯកឧត្តមបណ្ឌិត យង់ ពៅ អគ្គលេខាធិការរាជបណ្ឌិត្យសភាកម្ពុជា តំណាងឱ្យ ឯកឧត្តមបណ្ឌិតសភាចារ្យ​  សុខ ទូច ប្រធានរាជបណ្ឌិត្យសភាកម្ពុជា បានអញ្ជើញជាគណៈប្រតិភូ ទៅចូលរួមក្នុងសិក្ខាសាលាស្តីពី «ពាណិជ្ជកម្មសេរីរវាងអាស៊ាន-ចិន» និងអញ្ជើញទៅចុះអនុស្សរណយោគយល់រវាងរាជបណ្ឌិត្យសភាកម្ពុជាជាមួយនឹងសាកលវិទ្យាល័យ យូណាន់នៃសាធារណរដ្ឋប្រជាមានិតចិន។

សូមបញ្ជាក់ជូនថា កាលពីថ្ងៃទី ២៥ សីហា ឆ្នាំ ២០១៨   រាជបណ្ឌិត្យសភាកម្ពុជា បានចុះអនុស្សរណ​យោគយល់ជាមួយនឹងមជ្ឈមណ្ឌលអភិវឌ្ឍន៍ពាណិជ្ជកម្មខេត្តយូណាន ហើយនៅពេលនោះភាគីទាំងពីរបានព្រមព្រាងនូវខ្លឹមសារមួយចំនួនដូចខាងក្រោម៖ ១-បង្កើតទិន្នន័យផលិតផលកសិកម្មដែលមានអាជ្ញាប័ណ្ណក្នុងប្រទេសកម្ពុជា ២-បង្កើត វែបសាយពាណិជ្ជកម្មអេឡិចត្រូនិចជាភាសាខ្មែរសម្រាប់បង្ហាញផលិតផលកសិកម្មកម្ពុជា ៣- បង្កើតវែបសាយពាណិជ្ជកម្មអេឡិចត្រូនិចជាភាសាចិនសម្រាប់បង្ហាញផលិតផលកសិកម្មកម្ពុជាដែលគាំទ្រដល់ការធ្វើពាណិជ្ជកម្មអេឡិចត្រឡិចឆ្លងដែន និងការទិញដោយផ្ទាល់តាមអនឡាញ ៤- បង្កើតប្រព័ន្ធផ្ទុកទិន្នន័យលើអាកាស ( cloud Storage System)សម្រាប់ផលិតផលកសិកម្មកម្ពុជា តាមរយៈកិច្ចសហប្រតិបត្តិការ ដែលរួមទាំងឃ្លាំងឥវ៉ាន់សម្រាប់ការនាំចេញផលិតផលកសិកម្មមួយនៅក្នុងផែក្រុងព្រះសីហនុ និងឃ្លាំងទីស្នាក់ការកណ្តាលប្រាំ(៥)ទៀត ដែលមានទីតាំងនៅក្នុងទីតាំងផលិត ៥- បង្កើតប្រព័ន្ធតាមដានមួយ សម្រាប់ផលិតផលកសិកម្មកម្ពុជា ដើម្បីធ្វើឱ្យសម្រេចនូវការតាមដាន និងធានាគុណភាពសម្រាប់ផលិតផលសំខាន់ៗរបស់កម្ពុជា ៦- បង្កើតទីតាំងបណ្តុះបណ្តាលពាណិជ្ជកម្មអេឡិចត្រូនិចចំនួនដប់កន្លែង (១០)សម្រាប់ផលិតផលកសិកម្មកម្ពុជា ៧- ការផ្លាស់ប្តូរទស្សនកិច្ចបញ្ញវន័្ត  អ្នកស្រាវជ្រាវ ធ្វើបាឋកថា និងការស្រាវជ្រាវ ការបោះពុម្ពស្នាដៃវិទ្យាសាស្ត្រ សម្ភារៈស្រាវជ្រាវ សិក្ខាកាម និងនិស្សិត ថា្នក់បណ្ឌិត ៨- សិក្ខាសាលា គម្រោងស្រាវជ្រាវ និងសន្និសីទរួមគ្នា លើប្រធានបទដែលបានព្រមព្រៀងគ្នា។

ការអញ្ជើញទៅចូលរួមក្នុងសិក្ខាសាលានៅពេលនេះ ក៏ដើម្បីពិភាក្សាបន្ថែមលើអនុស្សរណៈដែលភាគីទាំងពីរបានព្រមព្រៀងគ្នារួចហើយ ដើម្បីជម្រុញកិច្ចការនេះឱ្យបានជាការអនុវត្តជាក់ស្តែង សម្រាប់ជាប្រយោជន៍ដែលរួមចំណែកជាការអភិវឌ្ឍប្រទេសជាមួយនឹងរាជរដ្ឋាភិបាលកម្ពុជាផងដែរ។

ក្រៅអំពីការអញ្ជើញទៅចូលរួមក្នុងសិក្ខាសាលា គណៈប្រតិភូរាជបណ្ឌិត្យសភាកម្ពុជា ក៏នឹងអញ្ជើញទៅចុះអនុស្សរណ យោគយល់ជាមួយនឹងសាកលវិទ្យាល័យយូណាន់ ដែលស្ថិតនៅក្នុងទីក្រុងគុនមីង នៃសាធារណរដ្ឋប្រជាមានិតចិនផងដែរ។

នៅក្នុងអនុស្សរណនៃការយោគយល់គ្នានោះ រាជបណ្ឌិត្យសភាកម្ពុជា និងសាកលវិទ្យាល័យយូណាន់ នឹងព្រមព្រៀងគ្នាលើចំណុចដូចជា៖ (១) ការផ្លាស់ប្តូរសាស្ត្រាចារ្យ និងអ្នកស្រាវជ្រាវ(២) ការផ្លាស់ប្តូរនិស្សិត និងការបើកកម្មវិធីបណ្តុះបណ្តាលរួមគ្នា(៣) រៀបចំគម្រោងស្រាវជ្រាវ សន្និសីទ និងកិច្ចប្រជុំរួមគ្នា(៤) ការផ្លាស់ប្តូរព័ត៌មាន និងការបោះពុម្ពផ្សាយ(៥) រួមគ្នាបង្កើតមជ្ឈមណ្ឌលស្រាវជ្រាវវប្បធម៌ចិន និងកម្ពុជា(៦) សកម្មភាពផ្សេងៗដែលបានព្រមព្រៀងគ្នាដោយស្ថាប័នទាំងពីរ។

រាជបណ្ឌិត្យសភាកម្ពុជា នឹងបន្តកិច្ចការរបស់ខ្លួន ដើម្បីពង្រីកឱកាសនៃការសិក្សាស្រាវជ្រាវ ពង្រីកចំណេះដឹង ទំនាក់ទំនងថា្នក់ជាតិ និងអន្តរជាតិ ដើម្បីបណ្តុះបណ្តាលធនធានមនុស្ស ហើយជាពិសេស រាជបណ្ឌិត្យសភាកម្ពុជានឹងបន្តពង្រីកសកម្មភាពរបស់ខ្លួនដើម្បីរួមចំណែកអភិវឌ្ឍន៍ប្រទេសជាមួយរាជរដ្ឋាភិបាលផងដែរ។

(គណៈប្រតិភូរាជបណ្ឌិត្យសភាកម្ពុជាបានអញ្ជើញសាធារណរដ្ឋប្រជាមានិតចិននៅថ្ងៃទី ១ កើត ខែ កក្តិក ឆ្នាំ ច សំរឹទ្ធិស័ក ព.ស ២៥៦១ ត្រូវនឹងថ្ងៃទី ៨ វិច្ឆិកា ឆ្នាំ ២០១៨)។

RAC Media

  ថ្ងៃព្រហស្បតិ៍, 08 វិច្ឆិកា 2018 ម៉ោង 01:43 PM

«កិច្ចប្រជុំសម្រេចរចនាសម្ពន្ធ័​ តួនាទី​ ភារកិច្ច​ រូបសញ្ញា​សៀវភៅផ្នត់​ បូកសរុបសមិទ្ធផលការងារឆ្នាំ២០១៨​ និងទិសដៅការងារអនុវត្តឆ្នាំ២០១៩»

ព្រឹកថ្ងៃពុធ ១៤រោច ខែអស្សុជ ឆ្នាំច សំរឹទ្ធិស័ក ពុទ្ធសករាជ ២៥៦២ត្រូវនឹងថ្ងៃទី៧ ខែវិច្ឆិកា ឆ្នាំ២០១៨ លោកបណ្ឌិត ឆេង​ វណ្ណរិទ្ធ​ប្រធានស្តីទីវិទ្យាស្ថានមនុស្សសាស្រ្តនិងវិទ្យាសាស្រ្តសង្គម​ បានដឹកនាំអង្គប្រជុំដើម្បីរៀបចំរចនាសម្ពន្ធ័​ តួនាទី​ភារកិច្ច​ រូបសញ្ញា​សៀវភៅផ្នត់​ បូកសរុបសមិទ្ធផលការងារឆ្នាំ២០១៨​ និងលើកទិសដៅការងារអនុវត្តសំរាប់ឆ្នាំ២០១៩។

ពិធីនេះមានការចូលរួមពី​ទីប្រឹក្សា​វិទ្យាស្ថាន ប្រធានផ្នែក​ និងអ្នកតំណាង​ផ្នែក​ បានពិភាក្សាសម្រេចជាគោលការណ៍នូវតួនាទីភារកិច្ចសំរាប់ផ្នែកទាំង៨បានដោយជោគជ័យ​ និងប្រគល់ភារកិច្ចជូនលោកបណ្ឌិតហាក់​ វ៉ាន់ដារា​ ប្រធានផ្នែក នរវិទ្យានិងពន្ទុវិទ្យារៀបចំសៀវភៅផ្នត់​ជាភាសា​ខ្មែរ និងអង់គ្លេស​ ប្រគល់ភារកិច្ចជូនលោកឃិន​ យ៉ង់​ លេខាអចិន្ត្រៃ​ រៀបចំនិមិត្តសញ្ញាតំណាងវិទ្យាស្ថាន​។

នាឱកាសនោះអង្គប្រជុំបានសម្រេចអោយផ្នែកទាំង៨ត្រូវប្រគល់របាយការណ៍សមិទ្ធផលការងារ​ឆ្នាំ២០១៨​និងទិសដៅអនុវត្តការងារឆ្នាំ២០១៩​ អោយបានមុនថ្ងៃទី១០វិច្ឆិកា​ឆ្នាំ២០១៨ជូនទៅខាងលេខាអចិន្ត្រៃ។

ពិធីបានបញ្ចប់នៅម៉ោង​ ១២ថ្ងៃត្រង់​ដោយបរិយាកាសរីករាយនិងស្នាមញញឹម។

RAC Media | ហេង​ សុភី​

  ថ្ងៃពុធ, 07 វិច្ឆិកា 2018 ម៉ោង 09:25 PM

«ក្រុមប្រឹក្សាជាតិភាសាខ្មែរអនុម័តបច្ចេកសព្ទគណៈកម្មការគីមីវិទ្យានិងរូបវិទ្យាបានចំនួន១៣ ពាក្យ»

ថ្ងៃពុធ ១៤រោច ខែអស្សុជ ឆ្នាំច សំរឹទ្ធិស័ក ព.ស.២៥៦២ ក្រុមប្រឹក្សាជាតិភាសាខ្មែរ ក្រោមអធិបតីភាពឯកឧត្តមបណ្ឌិត ហ៊ាន សុខុម បានបន្តប្រជុំពិនិត្យ ពិភាក្សា និងអនុម័តបច្ចេកសព្ទគណៈកម្មការគីមីវិទ្យានិងរូបវិទ្យា បានចំនួន១៣ពាក្យ ដូចខាងក្រោម៖

​

  ថ្ងៃពុធ, 07 វិច្ឆិកា 2018 ម៉ោង 09:02 PM

«៩ វិច្ឆិកា ២០១៨៖ ខួប៦៥ឆ្នាំ នៃឯករាជ្យជាតិកម្ពុជា និងជាថ្ងៃកំណើតនៃកងយោធពលខេមរភូមិន្ទ»

ចុះផ្សាយថ្ងៃទី៧  ខែវិច្ឆិកា ឆ្នាំ២០១៨ - ម៉ោង៖ ៤ :៣០ នាទីរសៀល

ភ្នំពេញ៖ ក្រោយពីទទួលបានឯករាជ្យបរិបូណ៌ពីសាធារណរដ្ឋបារាំង មកដល់ពេលនេះ មានរយៈពេល៦៥ឆ្នាំមកហើយ។

ថ្ងៃសុក្រ ទី០៩ ខែវិច្ឆិកា ឆ្នាំ២០១៨ នេះ ប្រទេសនិងប្រជាជនកម្ពុជានឹងប្រារព្ធទិវាបុណ្យឯករាជ្យរបស់ខ្លួនដែលបានទទួលតាំងពីឆ្នាំ១៩៥៣រៀងមក ហើយបើតាមការប្រកាសរបស់រាជរដ្ឋាភិបាល នៅឆ្នាំនេះទិវាបុណ្យឯករាជ្យជាតិ នឹងត្រូវបានធ្វើយ៉ាងអធិកអធមជាងឆ្នាំមុនៗ។

នៅពេលដែលនិយាយពីទិវាបុណ្យឯករាជ្យជាតិ ប្រជាពលរដ្ឋខ្មែរគ្រប់រូបប្រាកដជានឹកឃើញដល់អតីតព្រះមហាក្សត្រកម្ពុជា សម្តេចព្រះនរោត្តម សីហនុ ដែលបានខិតខំប្រឹងប្រែងបំពេញព្រះរាជបូនីយកិច្ច ក្នុងបុព្វហេតុឯករាជ្យភាពនៃប្រទេសជាតិមាតុភូមិ និងបានទទួលព្រះគោរម្យងារជា ព្រះបិតាឯករាជ្យជាតិ នៃព្រះរាជាណាចក្រកម្ពុជា។ការតស៊ូទាមទារឯករាជ្យរបស់កម្ពុជាបានចាប់ផ្ដើមទទួលផ្លែផ្កានៅឆ្នាំ១៩៤៩ ដែលកាលណោះ តាមសន្ធិសញ្ញាដែលចុះថ្ងៃទី៨ ខែវិច្ឆិកា ឆ្នាំ ១៩៤៩ បារាំងបានទទួលស្គាល់តាមផ្លូវច្បាប់នូវ ឯករាជ្យរបស់ព្រះរាជាណាចក្រកម្ពុជា ក៏ប៉ុន្តែទោះជាយ៉ាងនេះក្ដី ឯករាជ្យដែលបារាំងបានអះអាងថាបានទទួលស្គាល់នេះ គឺមានតែឈ្មោះនិងរូបរាងតែប៉ុណ្ណោះ ដោយនៅក្នុងឯករាជ្យនេះ វិស័យសំខាន់ៗជាច្រើន ដែលបារាំងនៅតែបន្តកាន់កាប់ ពុំទាន់ផ្ដល់ជូនកម្ពុជា មានដូចជា អធិបតេយ្យខាងយុត្ដិធម៌ នគរបាល បញ្ជាការយោធា ការទូត ការប្ដូរនិងការឱ្យចាយធនប័ត្រជាដើម។

ក្រោយមកទៀត ព្រះករុណាព្រះបាទសម្តេចព្រះនរោត្តម សីហនុ បានយាងទៅគង់នៅតំបន់ស្វយ័តមួយដែល រួមមានខេត្តសៀមរាប បាត់ដំបងនិងកំពង់ធំដើម្បីបន្តការទាមទារឯករាជ្យពេញលេញជូនជាតិមាតុភូមិ ហើយទ្រង់បានប្រ កាសថា ព្រះអង្គនឹងយាង ចូលរាជធានីវិញ នៅពេលណាដែលបារាំង ព្រមផ្ទេរមកឱ្យប្រទេសកម្ពុជាវិញនូវកេតន ភ័ណ្ឌចុង ក្រោយនៃឯករាជ្យរបស់ខ្លួន។ គួរបញ្ជាក់ផងដែរថា ស្វយ័តភាពផ្នែកយោធានៃខេត្ដទាំងនេះ ត្រូវបានប្រគល់ ឱ្យប្រទេសកម្ពុជា ដោយមានការទាមទារមួយរបស់ព្រះមហាក្សត្រកម្ពុជា ដែលបានធ្វើឡើងនៅឆ្នាំ១៩៤៩ សម្រាប់ខេត្តសៀមរាបនិងខេត្ដកំពង់ធំ និងនៅឆ្នាំ១៩៥២ សម្រាប់ខេត្ដបាត់ដំបង។ដើម្បីគាំទ្រដល់ព្រះរាជបូជនីយកិច្ចទាមទារឯករាជ្យពេញលេញនេះ ព្រះករុណាព្រះបាទ សម្ដេចព្រះនរោត្ដម សីហនុ បានបង្កើតកងកម្លាំងជីវពលនារីក្លាហានមួយដែលក្រោយមកមានតួនាទីយ៉ាងធំធេងក្នុងបុព្វហេតុទាមទារឯករាជ្យភាព។

ជាលទ្ធផល នៅថ្ងៃទី២៩ ខែសីហា ឆ្នាំ១៩៥៣ ការចុះហត្ថលេខារវាងបារាំងនិងកម្ពុជា លើកិច្ចព្រមព្រៀងផ្ទេរអំណាចតុលាការត្រូវបានធ្វើឡើង។ ហើយនៅថ្ងៃទី២៩ ខែសីហា ឆ្នាំ ១៩៥៣ មានការចុះហត្ថលេខាលើកិច្ចព្រមព្រៀងផ្ទេរសមត្ថកិច្ចរបស់កងនគររបាល និងបន្ថែមពីលើនេះគឺការចុះហត្ថលេខាទៅលើកិច្ចព្រមព្រៀងស្ដីពីអធិបតេយ្យខាងយោធារបស់ព្រះរាជាណាចក្រកម្ពុជា នៅថ្ងៃទី១៧ ខែតុលា ឆ្នាំ១៩៥៣។

ជាចុងក្រោយ អធិបតេយ្យពេញលេញនៅលើវិស័យការទូតត្រូវបានធ្វើឡើងតាមរយៈការប្ដូរលិខិតរវាងរដ្ឋាភិបាលបារាំងនិងរាជរដ្ឋាភិបាលកម្ពុជា (ជាចម្លើយរបស់រដ្ឋាភិបាលនៃសាធារណរដ្ឋបារាំង ចំពោះកំណត់មួយរបស់រាជរដ្ឋា ភិបាលនៃព្រះរាជាណាចក្រកម្ពុជានៅថ្ងៃទី១២ ខែកក្កដា ឆ្នាំ១៩៥៣ ដែលប្រគល់ដោយអគ្គស្នងការរបស់សាធារណ រដ្ឋបារាំង លេខ៣៩៣អ៊ែ ចុះថ្ងៃ ទី២៤ ខែកក្កដា ឆ្នាំ ១៩៥៣)។

នៅថ្ងៃទី៨ ខែវិច្ឆិកា ឆ្នាំ១៩៥៣ ព្រះករុណាព្រះបាទសម្ដេចព្រះនរោត្ដម សីហនុ ស្ដេចបានយាងចូលមកក្នុងរាជធានីភ្នំពេញវិញ នៅលើចម្ងាយផ្លូវប្រមាណជា ៣០០គីឡូម៉ែត្រដែលព្រះអង្គបានយាងដំណើរ ប្រជារាស្ដ្រខ្មែរក្នុងទឹកមុខរំភើប រីករាយ និងរំជួលចិត្តជាខ្លាំង ចំពោះឯករាជ្យភាពពេញលេញដែលព្រះអង្គបានទទួលជោគជ័យជាប្រវត្តិសាស្ត្រសម្រាប់មាតុភូមិកម្ពុជា។

នៅថ្ងៃទី៩ ខែវិច្ឆិកា ឆ្នាំ១៩៥៣ លោកឧត្ដមសេនីយ៍ឡង់ក្លាត បានប្រគល់យ៉ាងមហោឡារិកនូវអំណាចបញ្ជាការរបស់ខ្លួនថ្វាយព្រះករុណាព្រះបាទសម្ដេចព្រះនរោត្ដម សីហនុ ហើយកងទ័ពនិងអគ្គសេនាធិការរបស់បារាំង បានដកថយពីព្រះរាជាណាចក្រកម្ពុជា គឺនៅពេលនោះហើយដែលឯករាជ្យរបស់កម្ពុជាបានក្លាយទៅជាឯករាជ្យដ៏ពេញលេញបរិបូរណ៌។ ហើយនោះក៏ជាថ្ងៃដែលកងយោធពលខេមរភូមិន្ទនៃព្រះរាជាណាចក្រកម្ពុជា ចាប់បដិសន្ធិជាផ្លូវការផងដែរ ដោយបានបង្កើតអគ្គសេនាធិការនៃកងយោធពលខេមរភូមិន្ទ បញ្ជាការដ្ឋានកងទ័ពជើងអាកាសភូមិន្ទ បញ្ជាការដ្ឋានកងទ័ពជើងទឹកភូមិន្ទ។

គួរបញ្ជាក់ផងដែរថា នៅថ្ងៃអាទិត្យទី០៤ ខែវិច្ឆិកានេះ កងកម្លាំងប្រដាប់អាវុធមកពី៣ស្ថាប័នគឺ កងរាជអាវុធហត្ថ លើផ្ទៃប្រទេស កងកម្លាំងទាហាន និងកងកម្លាំងនគរបាលជាតិ ចំនួនប្រមាណជាជិត ៦ពាន់នាក់ ដែលចែកចេញជា ៥៤ផែន បានចូលរួមហ្វឹកហាត់រួមគ្នានៅមុខព្រះបរមរាជវាំង។ ហើយការហ្វឹកហាត់លើកទី២ នឹងធ្វើឡើងនៅថ្ងៃទី០៧ ខែវិច្ឆិកា ឆ្នាំ២០១៨ខាងមុខនេះ៕

RAC Media | លឹម សុវណ្ណរិទ្ធ

                                              ​

  ថ្ងៃពុធ, 07 វិច្ឆិកា 2018 ម៉ោង 04:36 PM

«បរិស្ថាននិងវិស័យពាក់ព័ន្ធក្នុងកម្មវិធីសិក្សាគោលនយោបាយបរិស្ថានតាមប្រព័ន្ធអនឡាញ E-Learning នៅកម្ពុជា...»

E-learning! ឱកាសសិក្សាដ៏ល្អ សម្រាប់សិស្ស និស្សិត អ្នកសិក្សាស្រាវជ្រាវ អ្នកកំពុងបំពេញការងារក្នុងវិស័យបរិស្ថាននិងវិស័យពាក់ព័ន្ធ ក្នុងកម្មវិធីសិក្សាគោលនយោបាយបរិស្ថានតាមប្រព័ន្ធអនឡាញ E-Learning នៅកម្ពុជា ឆ្នាំ២០១៨នេះ។

ចុះឈ្មោះ ចាប់ពីថ្ងៃទី១៤ ខែវិច្ឆិកា នេះតទៅ។

(សូមចូលអាន និងទាញយកខិតបណ្ណដែលមានជូនភ្ជាប់សម្រាប់ព័ត៌មានបន្ថែមខាងក្រោមឬចូលទៅកាន់វេបសាយ edu.kei.re.kr ដើម្បីទទួលបានព័ត៌មានបន្ថែម)ឬទំនាក់ទំនងផ្ទាល់តាមរយៈលេខទូរស័ព្ទ 093 785 609

  ថ្ងៃពុធ, 07 វិច្ឆិកា 2018 ម៉ោង 03:38 PM