រាជបណ្ឌិត្យសភាកម្ពុជា

ប្រធានរាជបណ្ឌិត្យសភាកម្ពុជា ក្នុងពិធីបើកអង្គសន្និសីទអន្តរជាតិ អបអរខួប៤០ឆ្នាំនៃសហប្រតិបត្តិការអាស៊ាន-អឺរ៉ុប

នៅថ្ងៃនេះ វិទ្យាស្ថានទំនាក់ទំនងអន្តរជាតិកម្ពុជានៃរាជបណ្ឌិត្យសភាកម្ពុជា បានរៀបចំសន្និសីទអន្តរជាតិ ស្តីពី «៤០ឆ្នាំ​នៃកិច្ចសហប្រតិបត្តិការអាស៊ាន-សហភាពអឺរ៉ុប៖ សមិទ្ធផល និងមាគ៌ាឆ្ពោះទៅមុខ» ជាមួយវត្តមានភ្ញៀវជាតិ អន្តរជាតិ ដែលជាឥស្សរជនសំខាន់ៗ អង្គទូត សាស្ត្រាចារ្យ អ្នកស្រាវជ្រាវ បញ្ញវន្ត និស្សិត អញ្ជើញពីសហភាពអឺរ៉ុប និងអាស៊ាន ចំនួនជាង២៤០នាក់ក្រោមកិច្ចសហការ និងឧបត្ថម្ភដោយ មូលនិធិខុនរ៉ាដ អាដិនណៅអ៊ែរ នៅសណ្ឋាគារសុខាភ្នំពេញ ថ្ងៃពុធ ៧រោច ខែអស្សុជ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី៣១ ខែតុលា ឆ្នាំ២០១៨។

ឯកឧត្តមបណ្ឌិតសភាចារ្យ សុខ ទូច ប្រធានរាជបណ្ឌិត្យសភាកម្ពុជា បានបញ្ជាក់ក្នុងកម្មវិធីបើកសន្និសីទអន្តរជាតិនេះ ថាបើទោះជាតំបន់ទាំងពីរ មានអាយុកាលខុសគ្នាក៏ដោយ ក៏កិច្ចសហប្រតិបត្តិការតំបន់ទាំងពីរនេះ មានភាពចាស់ទុំ និងល្អូកល្អឺននឹងគ្នា។ តំបន់ទាំងពីរមានកិច្ចសន្ទនាស្មើមុខស្មើមាត់កម្រិតតំបន់ និងជាដៃគូពាណិជ្ជកម្មដ៏សកម្មមិនអាចខ្វះបាន។ ឯកឧត្តមបណ្ឌិតសភាចារ្យ សុខ ទូច បានគូសបញ្ជាក់ដែរថា អាស៊ានជាទីផ្សារធំទី២របស់សហភាព​អឺរ៉ុប ហើយសហភាពអឺរ៉ុបជាទីផ្សារធំទី៥របស់អាស៊ាន។ បើគិតពីទំហំពាណិជ្ជកម្មរបស់អាស៊ាន នំចូលទៅកាន់តំបន់អឺរ៉ុប គឺមានប្រមាណ ១៣៦ពាន់លានអឺរ៉ូ រីឯអឺរុបវិញ នាំទំនិញមកតំបន់អាស៊ានមានទំហំប្រមាណ ២៦៣ពាន់លានអឺរ៉ូ។ 

ការកសាងសម្ព័ន្ធភាព និងកិច្ចសហប្រតិបត្តិការទីផ្សារសម្រាប់តំបន់នីមួយៗ មិនមែនទើបតែឆ្លងកាត់និង​អាចកើតឡើងត្រឹមមួយឬពីរឆ្នាំនេះទេ។ កិច្ចព្រមព្រៀងពាណិជ្ជកម្ម ត្រូវការពេលវេលាក្នុងការយល់ពីគ្នា សហការគ្នា ផ្តល់អត្ថប្រយោជន៍ដល់គ្នាទៅវិញទៅមក ទម្រាំការចរចារឈានដល់សេចក្តីសម្រេចមួយ​ដែល​អាច​ឱ្យប្រទេសក្នុងតំបន់អាស៊ាន និងតំបន់អឺរ៉ុប អាចមានកិច្ចសហប្រតិបត្តិការឈានដល់កម្រិតខ្ពស់មួយ។ ទិដ្ឋភាពជាក់ស្តែងមួយពាក់ព័ន្ធនឹងបញ្ហាការអនុគ្រោះពន្ធលើរាល់ទំនិញពីប្រទេសកម្ពុជា លើកលែងតែអាវុធ ជាកិច្ចប្រឹងប្រែងរបស់រាជរដ្ឋាភិបាលកម្ពុជា ក្នុងការទំនាក់ទំនងជាមួយសហភាពអឺរ៉ុប តែដោយសារតែបញ្ហាអ្នក​នយោបាយមួយចំនួនតូច សហភាពអឺរ៉ុប បានធ្វើការសម្រេចមួយដែលធ្វើឱ្យកម្មករប្រមាណ ៨០ម៉ឹននាក់ ត្រូវប្រឈមនឹងការខ្វះការងារ។ ពាក់ព័ន្ធបញ្ហានេះ ឯកឧត្តមបណ្ឌិតសភាចារ្យ សុខ ទូច បានបញ្ជាក់ដែរ​ថា ការដកចេញ​គឺងាយស្រួល តែការផ្តួចផ្តើមកសាងទេដែលពិបាក។ ដូចគ្នានេះដែរ ការដកខ្លួនចេញពីសហភាពអឺរ៉ុបរបស់ប្រទេសអង់គ្លេស គឺអាចធ្វើបានយ៉ាងងាយស្រួល តែបើក្រឡេកទៅមើលពីការរៀបចំផ្តួចផ្តើម​បង្កើតសហគមន៍សេដ្ឋកិច្ចអឺរ៉ុបពីដំបូងគឺមិនងាយស្រួលនោះទេ។ ហេតុនេះ សហភាពអឺរ៉ុប គួរពិចារណា ពី​ផលប៉ះពាល់នៃការសម្រេចចិត្តដែលប៉ះពាល់ដល់កម្រិតជីវភាពរបស់នៅរបស់ប្រជាជនខ្មែររាប់សិបម៉ឺននាក់ ហើយការសម្រេចចិត្តគួរឈរគោលការណ៍ដែលផ្តល់ផលប្រយោជន៍រួមច្រើន។

ឯកឧត្តមបណ្ឌិតសភាចារ្យ បានលើកឡើងបន្ថែមថា តំបន់ទាំងពីរ គួរចាប់អារម្មណ៍លើបញ្ហាដែលកំពុងកើតមានជា​សកល និងរួមគ្នាដោះស្រាយបញ្ហាមានដូចជា ចលនាសាកលភាវូបនីយកម្ម បញ្ហាគំលាតសេដ្ឋកិច្ចរវាងប្រទេសក្នុងតំបន់ បញ្ហាអស្ថិរភាពនយោបាយ ភាពក្រីក្រ ការឡើងកំំដៅផែនដី ការប្រែប្រួលអាកាសធាតុ ភេរវកម្ម និងឧក្រិដ្ឋកម្មឆ្លងដែន ជំងឺឆ្លងជាសកល និងបញ្ហាជម្លោះនានាដែលកំពុងកើតមាន និងធ្វើឱ្យរាំងស្ទះដល់កិច្ចការអភិវឌ្ឍ សន្តិសុខ និងសុវត្ថិភាពតំបន់។

សូមបញ្ជាក់ថា អស់រយៈកាលជាង៤០ឆ្នាំកន្លងមកនេះ កិច្ចសហប្រតិបត្តិការនៃតំបន់ទាំងពីរ គឺអាស៊ាន-សហភាពអឺរ៉ុប ទំនាក់ទំនងកាន់តែពង្រឹងនិងពង្រីកក្នុងភាពស្មើមុខស្មើមាត់គ្នាលើឆាកអន្តរជាតិ សម្រាប់ផ្តល់នូវចក្ខុវិស័យកិច្ចសហប្រតិបត្តិការនៃតំបន់ទាំងពីរ។ ទំនាក់ទំនងអាស៊ាន-សហភាពអឺរ៉ុប បានចាប់ផ្តើមសហប្រតិបត្តិការតាំងពីឆ្នាំ១៩៧៧មកម្លេះ ក្នុងពេលកិច្ចប្រជុំរដ្ឋមន្ត្រីការបរទេសអាស៊ាន លើកទី១០។ កាលនោះសហភាពអឺរ៉ុប ត្រូវគេស្គាល់និងហៅថាជា សហគមន៍សេដ្ឋកិច្ចអឺរ៉ុប (European Economic Community - EEC) ក្រោយមកទើបប្តូរឈ្មោះមកជា សហគមន៍អឺរ៉ុប (European Community) និងក្រោយមកជា សហភាពអឺរ៉ុប (European Union) រហូតសព្វថ្ងៃនេះ។ នៅឆ្នាំដំបូងនៃកិច្ចសហប្រតិបត្តិការ មានតែសមាជិកសហគមន៍សេដ្ឋកិច្ចអឺរ៉ុបចំនួន៩ និងសមាជិកអាស៊ានចំនួន៥ បានចាប់ដៃធ្វើការជាមួយគ្នា ហើយរយៈពេល៤០ឆ្នាំនេះ កិច្ចសហប្រតិបត្តិការបានពង្រីករហូតដល់ចំនួន ៣៨ប្រទេសពីតំបន់ទាំងពីរ។ ក្រោយមក ភាគីទាំងពីរបានបន្តចុះកិច្ចព្រមព្រៀងកិច្ចសហប្រតិបត្តិការអាស៊ាន-សហភាពអឺរ៉ុបជាច្រើនជាបន្តបន្ទាប់។ បច្ចុប្បន្ន កិច្ចសហប្រតិបត្តិការ និងភាពជាដៃគូនៃអាស៊ាន-សហភាពអឺរ៉ុប បានគ្របដណ្តប់លើវិស័យជាច្រើន រាប់តាំងពីកិច្ចសន្ទនានយោបាយ សន្តិសុខ ពាណិជ្ជកម្ម សម្ព័ន្ធភាពនានាក្នុងតំបន់អាស៊ាន។

RAC Media 

  ថ្ងៃពុធ, 31 តុលា 2018 ម៉ោង 03:01 PM

«៤០ឆ្នាំនៃកិច្ចសហប្រតិបត្តិការ អាស៊ាន- សហភាពអឺរ៉ុប៖ សមិទ្ធិផលនិងមាគ៌ាឆ្ពោះទៅមុខ...»

ថ្ងៃពុធ ៧រោច ខែអស្សុជ ឆ្នាំច សំរឹទ្ធិស័ក ពុទ្ធសករាជ២៥៦២ ត្រូវនឹងថ្ងៃទី៣១ ខែតុលា ឆ្នាំ២០១៨ វិទ្យាស្ថាន ទំនាក់ទំនងអន្តរជាតិកម្ពុជា នៃរាជបណ្ឌិត្យសភាកម្ពុជា ក្រោមកិច្ចសហប្រតិបត្តិការ និងឧបត្ថម្ភពីមូលនិធិ ខុនរ៉ាដ អាដិនណៅអ៊ែរប្រចាំនៅព្រះរាជាណាចក្រកម្ពុជា ប្រារពធ្វើ សន្និសីទអន្តរជាតិ ស្ដីពី «៤០ឆ្នាំនៃកិច្ចសហប្រតិបត្តិការ អាស៊ាន- សហភាពអឺរ៉ុប៖ សមិទ្ធិផលនិងមាគ៌ាឆ្ពោះទៅមុខ» នៅសណ្ឋាគារសុខាភ្នំពេញ។

សន្និសីទអន្តរជាតិនេះមានគោលបំណងរំឭកខួបអនុស្សាវរីយ៍ខួបលើកទី៤០ នៃកិច្ចសហប្រតិបត្តិការរវាងអាស៊ាននិងសហភាពអឺរ៉ុប។ សន្និសីទអន្តរជាតិនេះជាមជ្ឈមណ្ឌលជួបប្រជុំគ្នារវាងអ្នកស្រាវជ្រាវ អ្នកការទូត អ្នករៀបចំ គោលនយោបាយ និងអ្នកពាក់ព័ន្ធផ្សេងទៀត ធ្វើការរួមគ្នាក្នុងគោលបំណងពិនិត្យមើលសមិទ្ធផលសំខាន់ៗចំណុចខ្លាំង ចំណុចខ្សោយ ភាពជោគជ័យ និងចំណុចខ្វះខាតនៃកិច្ចសហប្រតិបត្តិការរវាងអាស៊ាន និងសហភាពអឺរ៉ុបក្នុងរយៈពេល ៤០ឆ្នាំមកនេះ និងប្រមូលផ្តុំគំនិត បទពិសោធន៍ អនុសាសន៍ និងយុទ្ធសាស្រ្តសម្រាប់កិច្ចសហប្រតិបត្តិការតំបន់, សន្តិភាព, ភាពសុខុដម និងវិបុលភាព និងដើម្បីផ្តល់ចក្ខុវិស័យសម្រាប់កិច្ចសហប្រតិបត្តិការអាស៊ាន-សហភាពអឺរ៉ុប នាពេលអនាគត។

ប្រធានបទសំខាន់ៗនៃសន្និសីទនេះ គឺផ្តោតលើកិច្ចសហប្រតិបត្តិការរវាងអាស៊ាន និងសហភាពអឺរ៉ុប ក្នុងរយៈពេលក្នុងរយៈពេល ៤០ឆ្នាំកន្លងមកនេះ ដែលផ្តោតសំខាន់លើទិដ្ឋភាពបី៖(១)- កិច្ចសហប្រតិបត្តិការនយោបាយនិងសន្តិសុខ (២)-សហប្រតិបត្តិការសេដ្ឋកិច្ច(៣)-កិច្ចសហប្រតិបត្តិការសង្គម-វប្បធម៌និងការតភ្ជាប់និងមានការចូលរួមយ៉ាងច្រើនកុះករពីសំណាក់ឯកឧត្តម លោកជំទាវឯកអគ្គរាជទូត ឯកអគ្គរដ្ឋទូត លោក លោកស្រី តំណាងអង្គទូតប្រចាំនៅព្រះរា ជាណាចក្រកម្ពុជា ឯកឧត្តម លោកជំទាវ អស់លោក លោកស្រីភ្ញៀវកិត្តិយសជាតិ-អន្តរជាតិ ជាពិសេស វាគ្មិនជាតិ និងវាគ្មិនអន្តរជាតិ អញ្ជើញមកពីប្រទេសចំនួនពីរនៃសហភាពអឺរ៉ុបនិងមកពីបណ្តាប្រទេសមួយចំនួនទៀតដែលជាសមាជិកអាស៊ាន។

RAC Media







 

  ថ្ងៃពុធ, 31 តុលា 2018 ម៉ោង 12:08 PM

«ឯកឧត្តមបណ្ឌិត យង់ ពៅ អគ្គលេខាធិការនៃរាជបណ្ឌិត្យសភាកម្ពុជាតំណាងឯកឧត្តមបណ្ឌិតសភាចារ្យ សុខ ទូច ប្រធានរាជបណ្ឌិត្យសភាកម្ពុជា បានអញ្ជើញចូលរួមកម្មវិធីលាងសាយភោជននៅក្នុងឱកាសនៃ ខួបអនុស្សាវរីយ៍៩៥ឆ្នាំនៃការប្រកាសជាសាធារណរដ្ឋតួកគី»

នៅល្ងាចថ្ងៃទី៣០ ខែតុលា ឆ្នាំ២០១៨ ឯកឧត្តមបណ្ឌិត យង់ ពៅ អគ្គលេខាធិការនៃរាជបណ្ឌិត្យសភាកម្ពុជាតំណាង ឯកឧត្តមបណ្ឌិតសភាចារ្យ សុខ ទូច ប្រធានរាជបណ្ឌិត្យសភាកម្ពុជា បានអញ្ជើញចូលរួមកម្មវិធីលាងសាយភោជននៅសណ្ឋាគារ រ៉ាហ្វលឡឺរ៉ូយ៉ាល់ នៃខួបអនុស្សាវរីយ៍៩៥ឆ្នាំនៃការប្រកាសជាសាធារណរដ្ឋតួកគី បន្ទាប់ពីដំណើរវិវត្តខ្លួនដ៏វែងឆ្ងាយពីអាណាចក្រ Seljuk Empire ទៅជាអាណាចក្រ Ottoman Empire រហូតក្លាយទៅជាសាធារណរដ្ឋដ៏ក្មេង​វ័យដូចពេលបច្ចុប្បន្ន។

លោកស្រី Ayda Unlu អគ្គរដ្ឋទូតនៃសាធារណរដ្ឋតួកគីប្រចាំកម្ពុជាបានថ្លែងថា ខែតុលាឆ្នាំ ២០១៨នេះ ជាពេលវេលាប្រវត្តិសាស្ត្រនៃទំនាក់ទំនងរវាងតួកគីនិងកម្ពុជាដោយសារមានទស្សនកិច្ចប្រវត្តិសាស្ត្រពីរសម្រាប់ខែតុលាឆ្នាំ២០ ១៨នេះពីកម្ពុជាទៅកាន់សាធារណរដ្ឋតួកគី គឺកាលពីថ្ងៃទី១-៣មានទស្សនកិច្ចថ្នាក់រដ្ឋមន្ត្រីមួយនិង ដំណើរទស្សនកិច្ចដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា មួយទៀតកាលពីថ្ងៃទី២០ ដល់ ថ្ងៃទី២២ ខែតុលាដដែលដែលចាត់ទុកថាជាព្រឹត្តិការណ៍ដ៏សំខាន់នៃទំនាក់ទំនងរបស់ប្រទេសទាំងពីរ។

លោកស្រីបានបន្តថា កម្ពុជានិងតួកគីជាដៃគូដ៏សំខាន់និងអាចជឿទុកចិត្តបាននៅក្នុងតំបន់ ហើយតម្លៃនៃប្រទេសទាំងពីរមិនមែនតែក្នុងន័យនយោបាយប៉ុណ្ណោះទេ ប៉ុន្តែក្នុងន័យទស្សនវិជ្ជានិងវប្បធម៌ថែមទៀតផង។ ហើយលោកស្រីសង្ឃឹមថាប្រទេសទាំងពីរនឹងបន្តរឹតចំណងទំនាក់ទំនងឱ្យកាន់តែរឹងមាំជាងនេះទៅទៀតក្នុងពេលអនាគត។

គួរបញ្ជាក់ផងដែរថា ក្នុងឱកាសនោះ ឯកឧត្តម ប្រាក់ សុខុន ឧបនាយករដ្ឋមន្ត្រីនិងជារដ្ឋមន្ត្រីក្រសួងការបរទេសនិងកិច្ចសហប្រតិបត្តិការអន្តរជាតិ បានអញ្ជើញជាអធិបតីព្រមទាំងភ្ញៀវជាតិនិងភ្ញៀវអន្តរជាតិ ក្រសួង ស្ថាប័ន និង អង្គការអញ្ជើញចូលរួមជាច្រើន។ 

RAC Media ម៉ៅ សុគន្ធា

  ថ្ងៃពុធ, 31 តុលា 2018 ម៉ោង 11:45 AM

«បច្ចេកសព្ទគណៈកម្មការអក្សរសិល្ប៍ចំនួន០៦ ត្រូវបានអនុម័ត...»

ថ្ងៃអង្គារ ៦រោច ខែអស្សុជ ឆ្នាំច សំរឹទ្ធិស័ក ព.ស.២៥៦២ ក្រុមប្រឹក្សាជាតិភាសាខ្មែរ ក្រោមអធិបតីភាពឯកឧត្តមបណ្ឌិត ជួរ គារី បានដឹកនាំអង្គប្រជុំ ពិនិត្យ ពិភាក្សា និងអនុម័តបច្ចេកសព្ទគណៈកម្មការអក្សរសិល្ប៍បានចំនួន០៦ ពាក្យ ដូចខាងក្រោម៖

​

  ថ្ងៃអង្គារ, 30 តុលា 2018 ម៉ោង 11:39 PM

«ការអភិវឌ្ឍសហគមន៍ទេសចរណ៍បាននឹងកំពុងដើរតួនាទីយ៉ាងសំខាន់ ក្នុងការ​លើក​កម្ពស់​ជីវភាពរស់​នៅ និងការកាត់បន្ថយភាពក្រីក្ររបស់ប្រជាពលរដ្ឋ​នៅសហគមន៍​មូលដ្ឋាន»

នាថ្ងៃចន្ទ ទី២៩ ខែតុលា ឆ្នាំ២០១៨ ឯកឧត្តម ថោ ង ខុន រដ្ឋមន្ត្រីក្រសួងទេសចរណ៍ បានដឹកនាំមន្ត្រីចុះពិនិត្យស្ថានភាពនិងការគ្រប់គ្រងអាជីវកម្មទេសចរណ៍ សន្តិសុខ សុវត្ថិភាពទេសចរណ៍ អនាម័យ បរិស្ថាន និង កាណូតដឹកជញ្ជូន ទេសចរណ៍នៅតំបន់ទេសចណ៍ចុងឃ្នៀស សហគមន៍ទេសចណ៍កំពង់ភ្លុក និងសហគមន៍ទេសចរណ៍ជ្រាវ ខេត្តសៀមរាប ដោយបានជួបប្រជំជាមួយប្រធានសមាគមកាណូត អ្នកគ្រប់គ្រងផែទេសចរណ៍ ប្រធានសហគមន៍ទេសចរ ណ៍អាជ្ញាធរមូលដ្ឋាន លោកមេឃុំ សមត្ថកិច្ចពាក់ព័ន្ធ និងប្រជាពលរដ្ឋនៅតំបន់ទាំងបីនេះ។

បន្ទាប់ពីបានស្តាប់របាយ កាណ៍របស់ប្រធានសមាគម តំណាងកំពង់ផែ ម្ចាស់កាណូត អ្នកបើកកាណូត អាជ្ញាធរមូលដ្ឋាន លោកមេឃុំ និងប្រជាពលរដ្ឋរួចមក ឯកឧត្តម ថោង ខុន បានកោតសរសើរ និងបានណែនាំដល់ភគីពាក់ព័ន្ធទាំងអស់ អោយបន្តសហការគ្នាពង្រឹងការងារគ្រប់គ្រងសហគមន៍ទេសចរណ៍ លើកកំពស់គុណភាពសេវាកម្មទេសចរណ៍ទាំងអស់ ដោយត្រូវខិតខំប្រឹងប្រែង សហការគ្នា រួមគិត រួមធ្វើ និងរួមទទួលខុសត្រូវ ជាអាទិត្រូវរៀបចំកាណូតអោយបានស្អាតល្អ មានពោងសុវត្ថិភាព អ្នកបើកកាណូតត្រូវមានឯកសណ្ឋានត្រឹមត្រូវ និងត្រូវឆ្លងកាត់ការបណ្តុះបណ្តាលវិជ្ជា ជីវះជំនាញមានកាណូតទេសចរណ៍ទាំងអស់ត្រូវមានការត្រួតពិនិត្យ ផ្នែកបច្ចេកទេសជំនាញពីក្រសួងសាធារណការជា ប្រចាំ និងត្រូវមានអាជ្ញាបណ្ណ៍ទេសចរណ៍ជាចាំបាច់។ ត្រូវនាំគ្នាសិក្សារៀនសូត្រពីការគ្រប់គ្រងសហគមន៍ ទេសចរណ៍ អោយបានល្អស្របតាមស្តង់ដារសហគមនិជាតិ និង សហគមន៍ទេសចរអាស៊ាន សំខាន់បំផុត ការធានាអោយបាននូវគុណភាពសេវា និង ការ បែងចែកផលប្រយោជន៏ប្រកបដោយសមធម៌ ត្រូវធានាថាសហគមន៍យើងជាសហគមន៏ទេសចរណ៍ស្អាត បៃតង មានអនាម័យស្អាតល្អគ្មានសំរាម បន្ទប់ទឹក ស្អាត សេវាពោរពេញដោយគុណភាព។ ដើម្បីធានាការដឹកនាំពីក្រសួង មន្ទីរទេសចរណ៍ខេត្តត្រូវចាត់តាំងមន្ត្រីថ្នាក់អនុប្រធានមន្ទីរ ០១រូប ចុះពិនិត្យ តាមដាន និងរាយការណ៍ជាប្រចាំជូនមន្ទីរ ខេត្ត និងក្រសួង។

ឯកឧត្តមរដ្ឋមន្ត្រីបានលើកឡើងថា ការអភិវឌ្ឍសហគមន៍ទេសចរណ៍បាននិងកំពុងដើរតួនាទីយ៉ាងសំខាន់ក្នុងការ​លើក​ កម្ពស់​ជីវភាពរស់​នៅ និងការកាត់បន្ថយភាពក្រីក្ររបស់ប្រជាពលរដ្ឋ​នៅសហគមន៍​មូលដ្ឋាន តាមរយៈការផ្តល់ឱកាសការងារ និងការ​បង្កើត​ប្រាក់​​ចំណូលដែលទទួលបានពីសេវាស្នាក់នៅ (Home Stay) សេវាមគ្គុទ្ទេសក៏ សេវាម្ហូបអាហារ ដឹកជញ្ជូន។ល។ ព្រមទាំងរួមចំណែកដល់ការកាត់បន្ថយចំណាកស្រុក ការអភិរក្ស ការថែរក្សា ការការពារធន ធានធម្មជាតិ និង​ជីវៈ​ជម្រុះ​ប្រកប​ដោយ​និរន្តរភាព ទប់ទល់​ការ​បម្រែ​បម្រួលអាកាសធាតុនិងការបង្កើតទម្លាប់ស្រ ឡាញ់បរិស្ថាន។ ប៉ុន្តែជារួម ការអភិវឌ្ឍន៍សហគមន៍ទេសចរណ៍មូលដ្ឋានទាមទារឲ្យមានការចូលរួមពីគ្រប់ភាគីពាក់ព័ន្ធ ក្នុងបំណងតែមួយគត់គឺដើម្បីថែរក្សា ការពារ និងអភិរក្សធនធានវប្បធម៌ ធម្មជាតិ និងលើកកំពស់ជីវភាពរស់ នៅរបស់បបរជាពលរដ្ឋសហគមន៍តាមរយ:ចំណូលបន្ថែមដែលបានមកពីវិស័យទេសចរណ៍។

សូមជម្រាបថា តំបន់ទន្លេសាបជាគោលដៅទេសចណ៍ប្រកបដោយភាពទាក់ទាញបន្ទាប់ពីតំបន់អង្គរ ដោយទេសចរប្រមាណ៥០% ទៅទស្សនាតំបន់ទន្លេសាប ( មិនទាន់រាប់បញ្ចូលភ្ញៀវទេសចរក្នុងស្រុក)ក្នុងនោះ តំបន់ចុងឃ្នៀសទទួលទេសចរបានប្រមាណពី១០០០-១៥០០នាក់ ក្នុងមួយថ្ងៃនិងសហគមន៍ទេសចរណ៍កំពង់ភ្លុក ទទួលបានទេសចរ ប្រមាណ៨០០-១០០០នាក់ក្នុងមួយថ្ងៃ ហើយក្រៅពីនេះទេសចរបានទៅទស្សនានៅសហគមន៍ជ្រាវ មេជ្រៃ និង សហ គមន៍ទេសចរណ៍ផ្សេងៗទៀត។

បច្ចុប្បន្ននទេសចរអន្តរជាតិទៅទស្សនាតំបន់អង្គរមានប្រមាណ ៦ពាន់នាក់ក្នុងមួយថ្ងៃ ហើយនៅពេលរដូវមានភ្ញៀវច្រើន (High Season) ទេសចរកើនដល់ប្រមាណ ១ម៉ឺននាក់ក្នុងមួយថ្ងៃ។

ប្រភព: ក្រសួងទេសចរណ៍

RAC Media | ហេង​ សុភី​

  ថ្ងៃអង្គារ, 30 តុលា 2018 ម៉ោង 10:57 PM

មហាព្រឹត្តិការណ៍ដ៏អស្ចារ្យដែលមិនធ្លាប់មាន«ក្រសួងនិងស្ថាប័នជាច្រើនចូលរួមតាំងពិព័រណ៍ ក្នុងឱកាសសម្ពោធវិមានឈ្នះ-ឈ្នះ» នៅចុងឆ្នាំ២០១៨ខាងមុខ...

គិតទៅដល់ថ្ងៃទី២៩ ខែធ្នូ ឆ្នាំ២០១៨ គោលនយោបាយឈ្នះ ឈ្នះ របស់រាជរដ្ឋាភិបាលកម្ពុជាមានរយៈពេល២០ឆ្នាំហើយ ស្របគ្នានោះដែរ ថ្ងៃនោះក៏ជាថ្ងៃសម្ពោធវិមានឈ្នះ ឈ្នះ ដែលបានសាងសង់លើផ្ទៃដី ៨ហិចតា ស្ថិតក្នុងតំបន់អភិវឌ្ឍន៍ លី យ៉ុងផាត់ ខ័ណ្ឌជ្រោយចង្វារ រាជធានីភ្នំពេញ។

យោងតាមសារព័ត៌មានរបស់ FreshNews ដែលបានចុះផ្សាយកាលពីថ្ងៃទី៧ ខែសីហា ឆ្នាំ២០១៨កន្លងមក បានឱ្យដឹងថាការសាងសង់វិមានឈ្នះ ឈ្នះ សម្រេច៨០%ហើយ ហើយវិមាននោះតំណាងឱ្យការធ្វើដំណើររបស់សមមិត្តហ៊ុន សែន កាលពីថ្ងៃទី២០ ខែមិថុនា ឆ្នាំ១៩៧៧ ទៅកាន់ប្រទេសវៀតណាមដើម្បីផ្តួលរំលំរបបប៉ុលពត និង រំដោះកម្ពុជាពីរបបខ្មៅងងឹតនោះ។តាមប្រសាសន៍របស់ឯកឧត្តម ថោង ខុន រដ្ឋមន្ត្រីក្រសួងទេសចរណ៍តាមរយៈទំព័រហ្វេស ប៊ុករបស់ក្រសួងទេសចរណ៍កាលពីថ្ងៃទី២៦ ខែតុលា ឆ្នាំ២០១៨ថ្មីៗនេះ បានឱ្យដឹងថា មហាព្រឹត្តិការណ៍ដ៏ធំដែលនឹងមានការចូលរួមពីក្រសួងនិងស្ថាប័នជាតិជាច្រើនក្នុងការដាក់តាំងពិព័រណ៍ទៅតាមវិស័យរបស់ខ្លួន នឹងប្រព្រឹត្តិទៅរយៈពេល៣ថ្ងៃ គឺចាប់ពីថ្ងៃ ទី ២៩-៣០-៣១ ខែធ្នូ ឆ្នាំ២០១៨ខាងមុខ និងដើម្បីចូលរួមពិធីឆ្លង ឆ្នាំសកល២០១៨- ២០១៩ តែម្តង។ហេតុនេះ រដ្ឋាភិបាលបានអំពាវនាវឱ្យប្រជាពលរដ្ឋចូលរួមក្នុងពិធីនេះឱ្យបានច្រើនកុះករ។

លោករដ្ឋមន្ត្រីបានបញ្ជាក់ថាបន្ទាប់ពីបង្កើត«គណៈកម្មការអន្តរក្រសួង ដើម្បីរៀបចំពិធីសម្ពោធវិមានអនុស្សាវរីយ៍នៃន យោបាយ ឈ្នះ ឈ្នះនិងពិធីអបអរសាទរខួបលើកទី២០នៃការបញ្ចប់សង្គ្រាមស៊ីវិលនៅកម្ពុជានិងការអនុវត្តប្រកប ដោយជោគជ័យនូវនយោបាយ ឈ្នះ ឈ្នះ របស់សម្ដេចតេជោ ហ៊ុន សែន» ដែលមានសម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ ជាប្រធាន ហើយសម្តេចពិជ័យសេនា ក៏បានប្រគល់ភារកិច្ចឱ្យក្រ សួងទេសចរណ៍ ក្នុងនាមគណៈកម្មការអន្តរក្រសួងខាងលើ ដឹកនាំការរៀបចំពិព័រណ៍តាមវិស័យទាំងឡាយបន្ថែមពី លើភារកិច្ចរបស់អនុគណៈកម្មការរៀបចំពិព័រណ៍ទេសចរណ៍ ពាណិជ្ជកម្ម ម្ហូបអាហារ កីឡា និងពិធីឆ្លងឆ្នាំសកល។

នេះគឺជាឱកាសដ៏ពិសេសដែលក្រសួង និង ស្ថាប័នទាំងអស់មានឱកាសតាំងបង្ហាញស្នាដៃរបស់ខ្លួនទៅតាមវិស័យនិងជំនាញដល់ប្រជាពលរដ្ឋដែលនឹងចូលរួមក្នុងព្រឹត្តិការណ៍ដ៏អស្ចារ្យនោះ ដែលត្រូវបានចាត់ទុកថាជាមហាពិធីបុណ្យប្រវត្តិសាស្ត្រថែមទៀតផង។

ប្រភព៖ ទំព័រហ្វេសប៊ុកក្រសួងទេសចរណ៍

RAC Media ម៉ៅ​ សុគន្ធា

  ថ្ងៃចន្ទ, 29 តុលា 2018 ម៉ោង 04:30 PM

«គ្រប់មុខទំនិញលើកលែងសព្វាវុធ...»

ដោយ៖ លោកស្រីបណ្ឌិត​ ព្រុំ​ ទេវី អនុប្រធានវិទ្យាស្ថានមនុស្សសាស្ត្រ និងវិទ្យាសាស្ត្រសង្គមនៃ រាជបណ្ឌិត្យសភាកម្ពុជា។

RAC Media

  ថ្ងៃចន្ទ, 29 តុលា 2018 ម៉ោង 04:10 PM

«ឯកឧត្តមបណ្ឌិត្យសភាចារ្យ សុខ ទូច ប្រធានរាជបណ្ឌិត្យសភាកម្ពុជា អញ្ជើញចូលរួមជាគណៈអធិបតីក្នុងពិធីបើកវគ្គបណ្តុះបណ្តាលគ្រូឯកទេស និងគ្រូភាសាចិនក្នុងតំបន់ នៅវិទ្យាស្ថានខុងជឺនៃរាជបណ្ឌិត្យសភាកម្ពុជា»

ថ្ងៃអាទិត្យ ៤រោច ខែអស្សុជ ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី២៨  ខែតុលា ឆ្នាំ ២០១៨ នៅសាលប្រជុំលេខ៣១ វិទ្យាស្ថានខុងជឺនៃរាជបណ្ឌិត្យសភាកម្ពុជា មានរៀបចំពិធីបើកវគ្គបណ្តុះបណ្តាលគ្រូឯកទេស និងគ្រូភាសាចិនក្នុងតំបន់ រៀបចំដោយវិទ្យាស្ថានខុងជឺនៃរាជបណ្ឌិត្យសភាកម្ពុជា។

អង្គពិធីនេះបានអញ្ជើញចូលរួមជាគណៈអធិបតីបើក ដោយ ឯកឧត្តមបណ្ឌិតសភាចារ្យ សុខ ទូច ប្រធានរាជបណ្ឌិត្យ សភាកម្ពុជា នៅក្នុងអង្គពិធីក៏មានវត្តមាន ថ្នាក់ដឹកនាំជា អនុប្រធានអចិន្ត្រៃសមាគមសម្ព័ន្ធខ្មែរ-ចិននៅកម្ពុជាសហនាយកនៃវិទ្យាស្ថានខុងជឺនៃរាជបណ្ឌិត្យសភាកម្ពុជា មន្រ្តីជាន់ខ្ពស់ការិយាល័យគ្រប់គ្រងគ្រូបង្រៀន រួមទាំងលោកគ្រូ អ្នគ្រូជាគ្រូបង្រៀនជនជាតិ ចិន និងខ្មែរផងជាច្រើននាក់។

ខ្លឹមសារសំខាន់ៗដែលទាក់ទងទៅនឹងគរុកោសល្យនៃការបង្រៀន យុទ្ធសាស្ត្រ អត្ថន័យនៃភាសា សារៈប្រយោជន៍ជាច្រើនដែលភាសាបានរួមចំណែកសំខាន់និងជាមធ្យបាយសម្រាប់ការជួយដល់ការកិច្ចអភិវឌ្ឍប្រទេស ត្រូវបានលើកឡើងនៅក្នុងអង្គពីធីបើកសន្ទុរកថារបស់ឯកឧត្តមបណ្ឌិតសភាចារ្យ សុខ ទូច ប្រធានរាជបណ្ឌិតសភាកម្ពុជា ដោយឯកឧត្តមបណ្ឌិត្យសភាចារ្យប្រធានថ្លែងថា៖ កាលពី១០ ឆ្នាំមុន ការបង្រៀនគរុកោសល្យជារៀងរាល់ឆ្នាំ? ការពិតណាស់ហេតុអ្វីការបង្រៀនគរុកោសល្យកាន់តែប្រែប្រួល? ពីព្រោះវិទ្យាសាស្ត្រកាន់តែរីកចំរើន គរុកោសល្យក៏ត្រូវតែប្រែ​ប្រួលតាមពីមួយឆ្នាំទៅមួយឆ្នាំ ​កាលពីមុនគ្រូបង្រៀនកាន់ដីសមកបង្រៀន ប៉ុន្តែឥឡូវគ្រូបង្រៀនកាន់ហ្វឺតនិងស្លាយ មកបង្រៀន។ រៀនភាសាចិនសម្រាប់បរទេសមិនមែនរៀនភាសាចិនសម្រាប់ចិនទេ​ រៀនភាសាចិនសម្រាប់មនុស្សពេញវ័យ និងក្មេង ថាតើត្រូវបញ្ចូលគរុកោលស្យតាមរបើអ្វីដើម្បីទាក់ទាញ?ការបង្រៀនក្នេងត្រូវការកាយវិការដើម្បី ឱ្យគេទាក់ទាញ។

ការបង្រៀនប្រទេសណាក៏ដូចជាប្រទេសណាដែល គេត្រូវការគ្រូក្មេងដើម្បីភាពទាក់ទាញសិស្ស។ ចំណុចសំខាន់មនុស្ស ខុសពីសត្វ គឺមានសំណេរ ដែលមានភាសាមុនរួចត្រូវមានសំណេរតាមក្រោយ ដូចមានគំនូសជា ក្នុងនោះវាបានបង្កើតនូវទិដ្ឋភាព​៤យ៉ាង​៖

-១/ពត់សម្លេងតាមគំនូសឬហៅថាសំណេរ

-២/សរសេរឃ្លាប្រយោគដើម្បីឆ្លើយតបតាមសំនៀងឬភាសារបស់ខ្លួន

-៣/រៀនវេយ្យាករណ៍

-៤/សរសេរលក្ខណៈបច្ចេកទសទៅតាមវិទ្យាសាស្ត្រនីមួយៗ គឺទៅតាមការរីកចំរើនរបស់សង្គម។

ជាការពិត ភាសាដើរតួសំខាន់ ប្រសិនបើមិនចេះភាសា គឺយើងលំបាកក្នុងការរៀបចំសង្គម មានភាសាបច្ចេកទេសដូច ជា ភាសាច្បាប់ ភាសាហៃទី ភាសាសេដ្ឋកិច្ចជាដើម​។ ដូចេ្នះរាជបណ្ឌិត្យសភាកម្ពុជា ដើរតួរសំខាន់ ជាមួយខាង ហាន់ប៉ាន់ ដើម្បីបង្កើតភាសាឱ្យទៅជាភាសា​ចិននិយាយតាមបែបបច្ចេកទេសជំនាញ។

ប្រជាជនចិនពីមុនមកស្រុកខ្មែរ ដោយការហែលទឹកប៉ុន្តែរយៈពេលតែ៤ឆ្នាំ ចិនមានផ្ទះថ្មរស់នៅហើយបានក្តោបទីផ្សារ ទាំងអស់របស់កម្ពុជាបានប្រហែល៨០ភាគរយ គឺវាខុសពីប្រទេសថៃបានត្រឹម៧៥ភាគរយ។ប៉ុន្តែពេលនេះនៅក្នុងសតវត្ស ទំនើបចិនបានជួយដល់ការអភិវឌ្ឍទីផ្សាររបស់កម្ពុជាតាមរយៈផ្លូវមួយខ្សែរក្រវ៉ាត់មួយ។

បន្ថែមនៅក្នុងអង្គពិធីនោះ ឯកឧត្តមបណ្ឌិតសភាចារ្យប្រធានរាជបណ្ឌិត្យសភាកម្ពុជាបានដាក់សំណួរថា «ហេតុអ្វីប្រទេសអង់គ្លេស​មានប្រជា ជនតែជាង៦៦លាននាក់ ជាប្រទេសតូច ប៉ុន្តែ នៅលើពិភពលោក គឺគេត្រូវតែរៀនភាសា អង់គ្លេស​?»ចំណែកប្រទេស បារាំង ហេតុអ្វីបារាំងអាចផ្សព្វផ្សាយភាសារបស់ខ្លួនបានដល់តំបន់អាហ្រិក និងអាស៊ីអាគ្នេយ៍? ពីព្រោះបារាំមានប្រ ជាជនប្រមាណត្រឹមតែជាង៦០លានប្រហែលគ្នានឹងអង់គ្លេស ហើយមនុស្សនៅទស្សវត្ស៍ទី៦០និងទី៧០កម្ពុជាក៏និយាយភាសាបារំាង ដូចតំបន់អាហ្រិកលើកលែងតែប្រទេសសេរ៉ាឡេអូនដែលប្រើប្រាស់ ភាសាអង់គ្លេស។

ឯកឧត្តមបណ្ឌិត្យសភាចារ្យប្រធានរាជបណ្ឌិតសភាកម្ពុជា បានលើកថា«ចម្លើយខ្លីបំផុ គឺដោយសារតែបដិវត្តន៍ឧស្សា ហកម្មនៅសតវត្សទី១៨ ដូច្នេះការចង់ចេះ ចង់ដឹងគឺត្រូវតែរៀនភាសាអង់គ្លេស។ ចំណែកឯបារាំងបានយកប្រទេសតូចដាក់ក្រោមអណានិគមន៍របស់ខ្លួននិងបានដាក់បញ្ចូលភាសាបារាំងសម្រាប់ប្រើប្រាស់។ រីឯចំណែកភាសាចិន ចិនបាននាំ៤យ៉ាង មកដល់កម្ពុជា ដែលចិនមានចំនួនជាង១៤០០លាននាក់នៅលើទឹកដីចិន

១-ចិនតែងតែដើររូបភាពជាដៃគូដើម្បីពង្រីកមនោគមន៍និងវប្បធម៌របស់ខ្លួន ជាក់ស្តែងនៅកម្ពុជា កម្រមានគ្រួសារ ណាដែលគ្មានខ្សែរស្រឡាយជាចិនទេ រួមទាំងដាក់អក្សរចិនតាមផ្ទះ និងជំនឿលើអ្នកតាចិនជាដើម។

២-ចិនបាននាំម្ហូប ចិនបានបង្រៀនខ្មែរហូបម្ហូបចិន ពីនំបញ្ចុកមកគុទាវ នំអន្សមមកនំប៉ាវ  ពីទឹកត្នោតមកទឹកតែ

៣- ចិនបានផ្តល់ជំនួយដោយមិនលូកចូលកិច្ចការផ្ទៃក្នុងរបស់កម្ពុជា។

៤- ចំនុចសំខាន់បំផុត នៅសតវត្សទី២១នេះ បើកម្ពុជាជាប្រទេសផ្តល់ និងទទួលសេវាកម្ម  ប្រសិនបើកម្ពុជាមិនចេះភាសាចិនស្របពេលដែលចិនកំពុងតែរីកចំរើនក្នុងវិស័យឧស្សាហកម្ម បច្ចេកវិទ្យា និងវិស័យទីផ្សារ តើយុវជនត្រូវត្រៀមខ្លួនធ្វើយ៉ាងដូចម្តេច?គឺយើងមិនបណ្តុះកម្មករបន្តទៀតទាំងស្រុងនោះទេ ប៉ុន្តែយើងនឹងបណ្តុះ​យុវជនកម្ពុជាឱ្យក្លាយជាអ្នកគ្រប់គ្រងអ្នកទីផ្សារ និងអ្នកបម្រើសេវាកម្មនិងផ្តល់សេវាកម្មបានល្អ។

ថ្លៃងនៅក្នុងពិធីដ៏មានអត្ថន័យនោះ តាមរយៈសម្តេច នាយករដ្ឋមន្ត្រី ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ឯកឧត្តមបណ្ឌិតសភាចារ្យ សុខ ទូច ប្រធានរាជបណ្ឌិត្យសភាកម្ពុជាក៏បានលើកថ្លែងអំណរគុណយ៉ាងដល់អ្នក ឧកញ៉ា ពង ខៀវសែ បានឧបត្ថម្ភ អគារមានទំហំធំអាចផ្ទុកបានសិស្សិតចំនួ ៧០០ នាក់​ ​ដែលនឹងសាងសង់រួចនៅក្នុងកំឡុងខែសីហាឆ្នាំ២០១៩​ ខាងមុខ នេះជាសមិទ្ធផលមួយក្នុងចំណោមសមិទ្ធផលជាច្រើនរបស់រាជបណ្ឌិត្យសភាកម្ពុជា ដែលបានជួយដល់ថ្នាលអប់រំ និងបណ្តុះបណ្តាលនៅកម្ពុជា។

RAC Media I ស៊ាង រ៉ូហ្សាត

  ថ្ងៃអាទិត្យ, 28 តុលា 2018 ម៉ោង 02:15 PM

«ក្រសួងមហាផ្ទៃបានបិទគណនីហ្វេសប៊ុកយ៉ាងតិចចំនួន៤ និងបានបញ្ជាក់អត្តសញ្ញាណជូនគេហទំព័រហ្វេសបុកផ្លូវការ (Verified Facebook Page) ចំនួន១០ នៃក្រសួងស្ថាប័នចំនួន៦»

ភ្នំពេញ៖ មានគណនីហ្វេសប៊ុកយ៉ាងតិចចំនួន ៤ ដែលត្រូវបានក្រសួងមហាផ្ទៃចាត់វិធានការបិទចោលតែម្ដង ហើយជាមួយគ្នានេះដែរក្រសួងក៏បានបញ្ជាក់អត្តសញ្ញាណជូនគេហទំព័រហ្វេសបុកផ្លូវការ(Verified Facebook Page) ចំនួន១០ នៃក្រសួងស្ថាប័នចំនួន៦ផងដែរ។នេះបើយោងតាមព័ត៌មានដែលចេញផ្សាយដោយគេហទំព័ររបស់ក្រសួងមហាផ្ទៃ នៅថ្ងៃសៅរ៍ទី២៧ ខែតុលា ឆ្នាំ២០១៨នេះ។

ក្នុងគោលដៅរក្សាអោយបាននូវសុវត្តិភាព និងភាពត្រឹមត្រូវក្នុងការប្រើប្រាស់បណ្ដាញទំនាក់ទំនងសង្គម(Facebook) មួយនេះជូនថ្នាក់ដឹកនាំ នាយកដ្ឋានព័ត៌មានវិទ្យា នៃអគ្គលេខាធិការដ្ឋាន ក្រសួងមហាផ្ទៃ បានដាក់ចេញនូវយន្តការក្នុងការបង្ការទប់ស្កាត់ និងបង្ក្រាបចំពោះបទល្មើសបច្ចេកវិទ្យា ស្របតាមតួនាទីភារកិច្ចដែលបានដាក់ចេញ ជាក់ស្តែង ក្នុងរយៈកាលកន្លងមកនេះ បទល្មើសក្នុងបណ្ដាញទំនាក់ទំនងសង្គមមួយចំនួនត្រូវបាននាយកដ្ឋាន សហការជាមួយស្ថាប័ន និងអង្គភាពពាក់ព័ន្ធ រហូតឈានដល់ការបិទជាស្ថាពរនូវគណនី ក្លែងក្លាយមួយចំនួនរួមមាន៖

១-ទំព័រ Facebook ឈ្មោះ សមាគមន៍ វៀតណាមនៅកម្ពុជា

២-ទំព័រ Facebook ឈ្មោះ Hun Mannet (ឧត្តមសេនីយ៍ឯក ហ៊ុន ម៉ាណែត), Hun Manet, Prime Minister of Cambodia, Hun Manet (របស់ ឯកឧត្តម ហ៊ុន ម៉ាណែត)

៣-ទំព័រ Facebook ឈ្មោះ Vong Bunintreavuth

៤-ទំព័រ សមាគមវៀតណាមនៅកម្ពុជា -ល-

ដូចគ្នាផងដែរ ដើម្បីផ្ដល់ជូននូវភាពច្បាស់លាស់ជូនសាធារណជន ក្រុមការងាររបស់នាយកដ្ឋាន បានសហការបញ្ជាក់គណនីគេហទំព័រហ្វេសបុកផ្លូវការ (Verified Facebook Page) ចំនួន១០ រួចរាល់ជូនក្រសួងស្ថាប័នរាជរដ្ឋាភិបាលចំនួន៦ (ដោយមានសញ្ញាធីកពណ៌ខៀវជាសម្គាល់) រួមមាន៖

១-ទំព័រផ្លូវការរបស់ក្រសួងមហាផ្ទៃ ដែលមានឈ្មោះ “ក្រសួងមហាផ្ទៃ Ministry of Interior Cambodia” និងមានអាស័យដ្ឋាន៖ https://www.facebook.com/ministry.interior/

២-ទំព័រផ្លូវការរបស់ក្រសួងសេដ្ឋកិច្ច និងហិរញ្ញវត្ថុ ដែលមានឈ្មោះ “ក្រសួងសេដ្ឋកិច្ច និងហិរញ្ញវត្ថុ Ministry of Economy and Finance” និងមានអាស័យដ្ឋាន៖ https://www.facebook.com/ministry.economy.finance/

៣-ទំព័រផ្លូវការរបស់ក្រសួងការងារនិងបណ្តុះបណ្តាលវិជ្ជាជីវៈ ដែលមានឈ្មោះ “ក្រសួងការងារ និងបណ្តុះបណ្តាលវិជ្ជាជីវៈ” និងមានអាស័យដ្ឋាន៖ https://www.facebook.com/mlvt.gov.kh/

៤-ទំព័រផ្លូវការរបស់អគ្គនាយកដ្ឋានរតនាគារជាតិ ដែលមានឈ្មោះ“ អគ្គនាយកដ្ឋានរតនាគារជាតិ - General Department of National Treasury ” និងមានអាស័យដ្ឋាន៖ https://www.facebook.com/treasury.gov.kh/

៥-ទំព័រផ្លូវការរបស់អគ្គនាយកដ្ឋានពន្ធដារ ដែលមានឈ្មោះ“ អគ្គនាយកដ្ឋានពន្ធដារ General Department of Taxation” និងមានអាស័យដ្ឋាន៖ https://www.facebook.com/cambodiataxation/

៦-ទំព័រផ្លូវការរបស់រដ្ឋមន្រ្តីនៃក្រសួងការងារនិងបណ្តុះបណ្តាលវិជ្ជាជីវៈ ដែលមានឈ្មោះ “អ៊ិត សំហេង -Ith Sam heng” និងមានអាស័យដ្ឋាន៖ https://m.facebook.com/ithsamheg/

៧-ទំព័រផ្លូវការរបស់ ឯកឧត្តម ហ៊ុន ម៉ាណែត ដែលមានឈ្មោះ “Hun Manet” និងមានអាស័យដ្ឋាន៖ https://www.facebook.com/Hun-Manet-482663735152092/

៨-ទំព័រផ្លូវការរបស់ ឯកឧត្តម វង្ស ប៊ុនឥន្រ្ទាវុធ អគ្គនាយក នៃអគ្គនាយកដ្ឋានរតនាគារជាតិ ដែលមានឈ្មោះ ““ Vong Bunintreavuth” និងមានអាស័យដ្ឋាន៖ https://www.facebook.com/Vong.Bunintreavuth/-

៩-ទំព័រផ្លូវការរបស់រដ្ឋលេខាធិការនៃ ក្រសួងការងារ និងបណ្តុះបណ្តាលវិជ្ជាជីវៈ ដែលមានឈ្មោះ “Pich Sophoan-ពេជ សោភ័ន” និងមានអាស័យដ្ឋាន៖ https://www.facebook.com/pichsophoan1/

១០-ទំព័រផ្លូវការរបស់អ្នកនាំពាក្យរបស់ក្រសួងការងារ និងបណ្តុះបណ្តាលវិជ្ជាជីវៈ ដែលមានឈ្មោះ “HENG Sour” និងមានអាស័យដ្ឋាន៖ https://www.facebook.com/hengsour4all/

គួរបញ្ជាក់ផងដែរថា បច្ចុប្បន្ននេះ ដោយសារតែការបើកទូលាយនូវសេរីភាពសារព័ត៌មាន និងពិសេសសេរីភាពក្នុងការបញ្ចេញមតិនៅក្នុងព្រះរាជាណាចក្រកម្ពុជា មានជនអនាមិក ក៏ដូចជាគេហទំព័រ (website) និងទំព័របណ្ដាញសង្គម (page) អនាមិកមួយចំនួន បានបង្កើតព័ត៌មាន និងដំណឹងមិនពិតជាច្រើន ហើយធ្វើការចែកចាយ និងផ្សព្វផ្សាយជាបន្តបន្ទាប់ ដែលធ្វើឱ្យសាធារណៈមតិមានការភាន់ច្រឡំ ធ្វើឱ្យប៉ះពាល់កិត្តិយសបុគ្គល ក៏ដូចជាស្ថាប័នសាធារណៈនិងឯក ជន និងនាំឱ្យមានផលប៉ះពាល់ដល់សណ្ដាប់ធ្នាប់ របៀបរៀបរយ និងសន្តិសុខសាធារណៈជាដើម អាស្រ័យហេតុនេះ ក្រសួង ស្ថាប័ន និងអាជ្ញាធរមានសមត្ថកិច្ចក៏បានចាត់វិធានការឆ្លើយតបយ៉ាងសស្រាក់ស្រាំផងដែរ៕

RAC Media | លឹម សុវណ្ណរិទ្ធ

  ថ្ងៃសៅរ៍, 27 តុលា 2018 ម៉ោង 11:40 PM

«វិទ្យាស្ថានវប្បធម៌ និងវិចិត្រសិល្បៈ៖ រចនាសម្ព័ន្ធឡកុលាលភាជន៍ និងផលិតផលកុលាលភាជន៍ សម័យមុនអង្គរ និងអង្គរ នៅស្ថានីយជើងឯក...»

អាណាចក្រអង្គរដែលមានអាយុកាលចាប់ពីសតវត្សទី៩ ដល់សតវត្សទី១៥ នៃគ្រិស្ត​សករាជ ត្រូវបានចាត់​ទុកថាជាយុគមាសនៃ​ប្រវត្តិសាស្រ្តកម្ពុជា ដោយអាណាចក្រនេះមានវិសាលភាពទឹកដីគ្របដណ្តប់​មួយភាគ​ធំនៃ​តំបន់​អាស៊ី​អាគ្នេយ៍​ដីគោក។ គេជឿថា អាណាចក្រអង្គរបានក្លាយជាអាណាចក្ររុងរឿងដោយសារវិស័យច្រើនយ៉ាង ​ដែលក្នុងនោះវិស័យផលិតកម្មក៏ជាវិស័យជួយជំរុញដល់ការរីកចម្រើនរបស់អាណាចក្រមួយនេះដែរ រួមទាំងវិស័យផលិតកម្មរាប់ទាំងផលិតកម្មលោហៈ (ផលិតកម្មដែក និង សំរឹទ្ធ) និងផលិតកម្ម​កុលាល​ភាជន៍។

នៅតំបន់អង្គរ ខេត្តសៀមរាប ដែលជារាជធានីខ្មែរក្នុងសម័យអង្គរក្រៅពីជាទីតាំងប្រាសាទធំៗត្រូវបានកសាង ក៏ជាទីតាំងផលិតកុលាលភាជន៍ដ៏ធំសម្រាប់ផ្គង់ផ្គង់តម្រូវការប្រើប្រាស់ក្នុងនគរ។ តាមការធ្វើកំណាយបុរាណវត្ថុវិទ្យាក្រៅពី កុលាល​ភាជន៍ផលិតក្នុងស្រុកផលិតនៅតំបន់អង្គរ នៅមានកុលាលភាជន៍នាំចូលពីប្រទេសចិនដែរ ប៉ុន្តែគ្មានភស្តុតាងណាមួយបង្ហាញថាមានកុលាលភាជន៍ពីប្រទេសឥណ្ឌាឡើយ ទោះបីប្រទេសឥណ្ឌាមានទំនាក់ទំនងខាងសាសនា និងកិច្ច ការនយោបាយជាមួយកម្ពុជាក្ដី។

ការសិក្សាស្រាវជ្រាវថ្មីៗបានរកឃើញថា ក្រៅពីទីតាំងផលិតកុលាលភាជន៍នៅតំបន់អង្គរ នៅមានទីតាំង​ផ្សេងទៀត ក៏ជាទីតាំងផលិតកុលាលភាជន៍មួយ​ដែរគឺស្ថានីយជើងឯកស្ថិតនៅភាគខាងត្បូងរាជធានីភ្នំពេញ។ នៅជើងឯកមានកុ លាលភាជន៍រឹង មិនសង់នៅលើខ្នងទំនប់ដូចឡមួយចំនួននៅតំបន់អង្គរទេ។កុលាលភាជន៍ផលិតនៅជើងឯកមានប្រ ភេទតិចតួច ដែលយើងអាចកំណត់បាន​ដោយសារការ​សិក្សាស្រាវជ្រាវធ្វើកំណាយកន្លងមក មិនបានរកឃើញកុលា លភាជន៍មានរូបរាង​ពេញលេញ។

កុលាល​​​ភាជន៍​ដែលប្រមូលកន្លងមក ច្រើនបានមកពីការប្រមូលពីស្រទាប់លើ ដែលសុទ្ធសឹងជា​បំណែក​​កុលាលភាជន៍ តួយ៉ាងដូចជា ថូ ឆ្នាំង ក្អម ពួច ឪទិន ក្រឡ ផើង ជាដើម។ នៅស្ថានីយជើងឯកអាចចាត់ថា ជាមជ្ឈមណ្ឌលផលិតកុលាលភាជន៍មួយក្នុងចំណោមមជ្ឈមណ្ឌលផលិតកុលាល​ភាជន៍ ផ្សេងទៀតក្នុងប្រទេសកម្ពុជា។ 

ដោយ៖ បណ្ឌិត ផុន កសិកា អនុប្រធានវិទ្យាស្ថានវប្បធម៌ និងវិចិត្រសិល្បៈនៃរាជបណ្ឌិត្យសភាកម្ពុជា 

​

​

  ថ្ងៃសៅរ៍, 27 តុលា 2018 ម៉ោង 10:55 PM