រាជបណ្ឌិត្យសភាកម្ពុជា

«ថ្នាក់ដឹកនាំវិទ្យាស្ថានទំនាក់ទំនងអន្តរជាតិកម្ពុជានៃរាជបណ្ឌិត្យសភាកម្ពុជាអញ្ជើញទៅបំពេញទស្សនកិច្ចការងារនៅប្រទេសចិន»

កាលពីរាត្រីថ្ងៃអង្គារ ៤កើត ខែមិគសិរ ឆ្នាំច ព.ស. ២៥៦២ ត្រូវនឹងថ្ងៃទី១១​ ខែធ្នូ ឆ្នាំ២០១៨ ថ្នាក់ដឹកនាំវិទ្យាស្ថានទំនាក់ទំនងអន្តរជាតិកម្ពុជានៃរាជបណ្ឌិត្យសភាកម្ពុជា ឯកឧត្តមបណ្ឌិត គិន ភា បានអញ្ជើញធ្វើដំណើរទៅបំពេញការងារនៅទីក្រុង ប៉េកាំង នៃសាធារណរដ្ឋប្រជាមានិតចិន ។
តាមរយៈការអញ្ជើញបំពេញការងារនៅប្រទេសចិននេះ គឺមានគោលបំណងចំនួន៤ធំៗ ក្នុងនោះមាន៖
១- អមដំណើរឯកឧត្តមបណ្ឌិតសភាចារ្យ សុខ ទូច ប្រធានរាជបណ្ឌិត្យសភាកម្ពុជា (កំពុងស្នាក់នៅទីក្រុងប៉េកាំង) ដើម្បីចុះ MOU ជាមួយសាកលវិទ្យាល័យភាសាបរទេសប៉េកាំង (១២ ធ្នូ ២០១៨)។
២- ពិភាក្សាការងារជាមួយវិទ្យាស្ថានជាតិសម្រាប់សិក្សាយុទ្ធសាស្ត្រសាកលនៃបណ្ឌិត្យសភាវិទ្យាសាស្ត្រសង្គមចិន ដើម្បីរៀបចំវេទិកាកិច្ចសហប្រតិបត្តិការកម្ពុជា-ចិន ប្រចាំឆ្នាំលើកទី១ (១៣ ធ្នូ ២០១៨)។
៣- អមដំណើរឯកឧត្តមបណ្ឌិតសភាចារ្យ សុខ ទូច ប្រធានរាជបណ្ឌិត្យសភាកម្ពុជា (កំពុងស្នាក់នៅទីក្រុងប៉េកាំង) ដើម្បីចុះ MOU ជាមួយសាកលវិទ្យាល័យប៉េកាំង (១៤ ធ្នូ ២០១៨)។
៤- ចូលរួមសន្និសីទឈីងហួរប្រចាំឆ្នាំ (Tsinghua Symposium) (១៥-១៦ ធ្នូ ២០១៨)។

សូមរំលឹកដែរថា ទាក់ទងនឹងដំណើរទស្សនកិច្ចការងាររបស់ថ្នាក់ដឹកនាំនៃរាជបណ្ឌិត្យសភាកម្ពុជា ក៏ដូចជាថ្នាក់ដឹកនាំតាមវិទ្យាស្ថានរបស់រាជបណ្ឌិត្យសភាកម្ពុជា គឺវាបានបង្ហាញពីចំណងមិត្តភាព កិច្ចសហប្រតិបត្តិការអន្តរជាតិ រវាង​រាជបណ្ឌិត្យសភាកម្ពុជារបស់ព្រះរាជាណាចក្រកម្ពុជា និងសាកលវិទ្យាល័យនានាដែលមាននៅក្នុងសាធារណរដ្ឋប្រជាមានិតចិន ក្នុងនោះមាន៖
- នៅថ្ងៃទី២ ខែធ្នូ ឆ្នាំ២០១៨ កន្លងទៅនេះ ឯកឧត្តមបណ្ឌិតសភាចារ្យ សុខ ទូច ប្រធានរាជបណ្ឌិត្យសភាកម្ពុជា បានអញ្ជើញទៅកាន់សាកលវិទ្យាល័យជីវជាំង ស្ថិតនៅក្រុងជីវជាំង ខេត្តជាំងស៊ី និងបានជួបសំណេះសំណាលជាមួយនិស្សិតអាហារូបករណ៍កម្ពុជា ដែលកំពុងសិក្សានៅសាកលវិទ្យាល័យដែលសាកលវិទ្យា ល័យនេះជាដៃគូរបស់វិទ្យាស្ថានខុងជឺនៃរាជបណ្ឌិត្យសភាកម្ពុជា ក្រៅពីនោះ ឯកឧត្តមបណ្ឌិតសភាចារ្យ ប្រធានរាជ បណ្ឌិត្យសភាកម្ពុជា ក៏មានជំនួបជាមួយអតីតអភិបាលរងក្រុង ជីវជាំង ដើម្បីពិភាក្សាអំពីបញ្ហាអភិវឌ្ឍភូមិ ឃុំ ក្នុងក្រុងនេះផ្ទាល់ និងបានអញ្ជើញជួបសំណេះសំណាលជាមួយថ្នាក់ដឹកនាំ និងមន្ត្រីមន្ទីរកសិកម្មក្រុងជីវជាំង ខេត្តជាំងស៊ី សាធារណរដ្ឋប្រជាមានិតចិន ស្តីអំពីការអភិវឌ្ឍវិស័យកសិកម្មនៅតាមទីជនបទ។
- នៅថ្ងៃទី០៩ ខែធ្នូ ឆ្នាំ២០១៩ ឯកឧត្តមបណ្ឌិតសភាចារ្យប្រធាន រាជបណ្ឌិត្យសភាកម្ពុជា ក៏បានអញ្ជើញជួបពិភាក្សាជាមួយលោកសាស្រ្តាចារ្យ ចាង លី សាកលវិទ្យាធិការរងនៃសាកលវិទ្យាល័យយូណាន ទទួលបន្ទុកទំនាក់ទំនងអន្តរជាតិ និងសហការី ក្នុងគោលបំណងដើម្បី ធ្វើកិច្ចសា្រវជ្រាវរួមគ្នាលើគម្រោងវិនិយោគចិននៅកម្ពុជា ការរៀបចំសិក្ខាសាលារួមគ្នា ការផ្តល់អាហារូបករណ៍ដល់និស្សិតកម្ពុជា ការផ្តល់ឱកាសដល់អ្នកស្រាវជ្រាវកម្ពុជាមកធ្វើការស្រាវជ្រាវនៅសាកលវិទ្យាល័យយូណាន និងនៅពេលថ្មីៗនេះដែរ កាលពីថ្ងៃទី១១ ខែធ្នូ ឆ្នាំ២០១៨ ប្រធានមជ្ឈមណ្ឌលសិក្សាចិន ក្នុងនាមជាតំណាង ឯកឧត្តមបណ្ឌិតសភាចារ្យ ប្រធានរាជបណ្ឌិត្យសភាកម្ពុជាលោកបណ្ឌិត គីសេរីវឌ្ឍន៍  ក៏បានចូលរួមដាំដើមឈើនៅក្នុងសាកលវិទ្យាល័យយូណានប្រទេសចិន ដើម្បីជានិម្មិតសញ្ញានៃមិត្តភាពរវាងរាជបណ្ឌិត្យសភាកម្ពុជា និងសាកលវិទ្យាល័យយូណាន​ប្រទេសចិន។

RAC Media

  ថ្ងៃពុធ, 12 ធ្នូ 2018 ម៉ោង 04:52 PM

«ត្រឹមរយៈពេលបួនថ្ងៃ ថតបានសត្វស្លាប ១២៥ប្រភេទ នៅឧទ្យានឫស្សីត្រឹប»

នេះជាការថតរូបសត្វស្លាបលើកដំបូងដែលក្រុមការងារឧទ្យានឫស្សីត្រឹប បានសហការជាមួយក្រុមអ្នកថតរូបវត្តមានសត្វស្លាបនៅកម្ពុជា (Photographers of Existent Birds In Cambodia) ចុះថតរូបសត្វស្លាបនៅក្នុងតំបន់ឧទ្យានឫស្សីត្រឹប ដែលមានទីតាំងនៅស្រុកឆែប ខេត្តព្រះវិហារ។

បើតាមលោក អៀង ពិសី និងលោក ស៊ុត ស៊ីណាល់ ក្រុមការងារអ្នកថតរូបវត្តមានសត្វស្លាបនៅកម្ពុជា បានឱ្យដឹងថា ក្នុងរយៈពេល៤ថ្ងៃនេះ ក្រុមការងារថតរូបសត្វស្លាបបានចំនួន ១២៥ប្រភេទ ដែលក្នុងនោះមានទាំងប្រភេទសត្វកម្រ សត្វជិតផុតពូជដែលបានចុះបញ្ជីរួច ហើយក៏មានសត្វមួយចំនួនទៀតមិនទាន់បានចុះបញ្ជីរបស់ពិភពលោក។ 

បើតាមប្រភពព័ត៌មានពីអង្គការ WWF Cambodia បានឱ្យដឹងថា កម្ពុជា ជាតំបន់សំបូរជីវចម្រុះច្រើនប្រភេទ។ ប្រភេទសត្វស្លាបនៅកម្ពុជា ក៏មានច្រើនប្រភេទដែរ ដែលក្នុងនោះប្រភេទសត្វស្លាបដែលកំពុងរងគ្រោះថ្នាក់នៅកម្ពុជា មានចំនួន៨ប្រភេទ ដែលអង្គការ WWF កំពុងយកចិត្តទុកដាក់ក្នុងការសិក្សានិងអភិរក្សនៅតំបន់ព្រៃភាគខាងជើងប្រទេសដូចជា៖ សត្វត្រយ៉ងយក្ស (Giant Ibis), សត្វត្រយ៉ងចង្កំកស (White-shouldered Ibis), សត្វទុង Greater Adjutant, សត្វក្រៀល (Sarus Crane), សត្វទាព្រៃស្លាបស (White-winged Duck), សត្វ Masked Finfoot, សត្វក្ងោក (Green Peafowl), និងសត្វត្មាត (Vultures)។

តាមការផ្តល់ព័ត៌មានពីលោក ស្រី សីហា មន្ត្រីឧទ្យានរាជបណ្ឌិត្យសភាកម្ពុជា តេជោសែន ឫស្សីត្រឹប បានឱ្យដឹងថា នៅក្នុងតំបន់ឧទ្យាន មានប្រភេទសត្វ ដែលកំពុងរងគ្រោះជាច្រើនប្រភេទដែលក្រុមការងារកំពុងធ្វើការស្រាវជ្រាវ និងការពារ ក្នុងនោះបានរកឃើញថាមានវត្តមានសត្វត្រយ៉ងយក្ស និងសត្វកេងកងក៏មាននៅទីនេះដែរ។

RAC Media

(ក្រុមអ្នកថតរូបនៅឧទ្យានឫស្សីត្រឹប @ Photographer of Existent Birds in Cambodia)

(Giant Ibis, birdlife.org)

(White-shouldered Ibis, WWF-Cambodia)

(Greater Adjutant, IUCNRedlist)

(Sarus Crane, WWF-Cambodia)

(White-Winged Duct, Wikipedia)

(Masked Finfoot, Khmer Times)

(Green Peafowl, WWF-Cambodia)

(Vultures, WWF-Cambodia)

  ថ្ងៃពុធ, 12 ធ្នូ 2018 ម៉ោង 02:46 PM

«ដំណើរនយោបាយកម្ពុជា៖ ជំហរនិងសម្បទានដើម្បីឧត្ដមប្រយោជន៍ជាតិ (ភាគទី២)»

ចុះផ្សាយថ្ងៃទី១២ ខែធ្នូ ឆ្នាំ២០១៨ - ម៉ោង៖ ១០ : ៣០នាទី

បន្ទាប់ពីកម្ពុជាធ្លាក់ក្នុងសង្គ្រាមស៊ីវិលជាង៣ទស្សវត្សរ៍ ការបោះឆ្នោតថ្នាក់ជាតិលើកទីមួយ ដែលបានគ្រោងធ្វើឡើងនៅខែឧសភា ឆ្នាំ១៩៩៣ ត្រូវបានរៀបចំឡើងដោយស្ថិតនៅក្នុងភាពស្រពិចស្រពិលនៅឡើយ ដោយសារតែការព្រួយបារម្ភអំពីការវាយប្រហាររបស់កម្លាំងខ្មែរក្រហម ដែលបានជ្រើសយកការតស៊ូប្រដាប់អាវុធជាថ្មីម្ដងទៀត។ កងយោធពលខេមរភូមិន្ទ បានពង្រឹងនិងត្រៀមកម្លាំងដើម្បីបង្កបរិយាកាសល្អប្រសើរសម្រាប់ការបោះឆ្នោតនៅខែឧសភាខាងមុខ ហើយទោះជាយ៉ាងនេះក្ដី ទីតាំងដែលកម្លាំងរបស់ខ្មែរក្រហមអាចគ្រប់គ្រងបានមានតែ៣ប៉ុណ្ណោះគឺ ម៉ាឡៃ ប៉ៃលិន និងអន្លង់វែង។

ជាមួយគ្នានេះដែរកងកម្លាំងរបស់អាជ្ញាធរបណ្ដោះអាសន្នរបស់អង្គការសហប្រជាជាតិប្រចាំកម្ពុជាហៅកាត់ថាអ៊ុនតាក់ ត្រូវបានដាក់ពង្រាយនៅតាមទីតាំងនិងតំបន់ដែលរដ្ឋកម្ពុជាបានគ្រប់គ្រងតែប៉ុណ្ណោះដើម្បីសង្កេតការណ៍និងធ្វើរបាយការណ៍អំពីស្ថានការណ៍របស់ប្រទេសកម្ពុជានាពេលនោះ។ នៅទីបំផុតសង្គ្រាមវាយឆ្មក់របស់ខ្មែរក្រហមបានកើតឡើងដោយមិននឹកស្មានទុកជាមុន គឺនៅផ្លូវលេខ១២ ដែលភ្ជាប់ភាគខាងកើតនិងភាគខាងលិចនៃប្រទេសកម្ពុជា និងការដណ្ដើមបានទីរួមខេត្តសៀមរាបដោយមិននឹកស្មានដល់របស់កម្លាំងខ្មែរក្រហម។

ជាការពិត ការនឹកស្មានមិនដល់នេះ គឺដោយសារក្រៅតែពីមូលដ្ឋានទាំង៣ខាងលើនេះ ខ្មែរក្រហមមិនមានមូលដ្ឋាន ណានៅជិតខេត្តនេះទៀតនោះទេ ហេតុនេះហើយគេក៏មិននឹកស្មានថាខ្មែរក្រហមនឹងវាយប្រហារដណ្ដើមយកខេត្តសៀមរាបនោះដែរ។ លើសពីនេះទៅទៀត នៅក្នុងកិច្ចព្រមព្រៀងសន្តិភាពទីក្រុងប៉ារីស របបរដ្ឋកម្ពុជាបានអនុវត្តទៅតាមអ្វីដែលមានចែងនៅក្នុងកិច្ចព្រមព្រៀងនេះ ដោយធ្វើការកាត់បន្ថយកម្លាំង ពិសេសប្រមូលអាវុធយុទ្ធភ័ណ្ឌមួយចំនួនទុកនៅក្នុងឃ្លាំង ប៉ុន្តែសម្រាប់ខ្មែរក្រហមដែលបានចុះហត្ថលេខាលើកិច្ចព្រមព្រៀងដែរនោះ ពុំបានអនុវត្តដូចនេះឡើយ។ ទោះជាយ៉ាងណាក៏ដោយ ខ្មែរក្រហមដណ្ដើមកាន់កាប់បានទីរួមខេត្តសៀមរាបត្រឹមតែ៥ម៉ោងតែប៉ុណ្ណោះ ព្រោះនៅក្រោយពីកម្លាំងរបស់របបរដ្ឋកម្ពុជាប្រមូលនិងត្រៀមកម្លាំងរួច ក៏បានវាយប្រហារទៅលើទីតាំងបញ្ជាការរបស់កម្លាំងខ្មែរក្រហមនៅសៀមរាបដោយជោគជ័យ។

បើទោះជាមានហេតុការណ៍ដូចនេះក្ដី ការបោះឆ្នោតថ្នាក់ជាតិនៅឆ្នាំ១៩៩៣ ក៏បានប្រព្រឹត្តទៅរហូតដល់ចប់សព្វគ្រប់ ក៏ប៉ុន្តែគេនៅចាំបានថា នៅពេលនោះគណបក្សហ្វ៊ុនស៊ិនប៉ិចបានធ្វើការឃោសនាដោយយកព្រះកិត្តិនាមរបស់សម្ដេចព្រះនរោត្ដមសីហនុ (ព្រះបរមរតនកោដ្ឋ) ធ្វើជាដើមទុនយ៉ាងធំសម្រាប់ស្វែងរកប្រជាប្រិយភាពនិងការគាំទ្រជាសន្លឹកឆ្នោត ពីប្រជាជន ចាប់តាំងពីការប្រើប្រាស់ពាក្យពេចន៍ថា «ស្រុកមានសង្គ្រាមដោយសារគ្មានស្ដេច ចុះបើស្ដេចមកដល់ហើយ ហេតុអ្វីមិនថ្វាយអំណាចទៅស្ដេច ដើម្បីស្រុកសុខសាន្ត?» រហូតដល់នៅក្នុងពាក្យពេចន៍ខ្លះ ថែមទាំងបានលើកឡើងថា «បើហ្វ៊ុនស៊ិនប៉ិចឈ្នះឆ្នោត នឹងថ្វាយអំណាចជូនសម្ដេចព្រះនរោត្ដមសីហនុ» ថែមទៀតផង។

តាមការពិតទៅ សម្ដេចព្រះនរោត្ដមសីហនុ ព្រះបររមរតនកោដ្ឋ ព្រះអង្គបានប្រកាសដោយអង្គឯងថា ព្រះអង្គប្រកាន់យកជំហរអព្យាក្រឹត្យនៅចំពោះកម្លាំងនយោបាយទាំងអស់របស់កម្ពុជារួចទៅហើយនោះ។ នៅទីបំផុតទៅ ក្រោយការប្រកាសលទ្ធផលនៃការបោះឆ្នោត មានប្រតិកម្មជាច្រើនបានផ្ទុះឡើង ដែលក្នុងនោះ អ្វីដែលគួរឱ្យកត់ សម្គាល់ជាខ្លាំងនោះគឺ មានសែរាជវង្សមួយព្រះអង្គបានប្រកាសមិនទទួលស្គាល់ការបោះឆ្នោត រហូតដល់ប្រកាសបង្កើតតំបន់អប្បគមន៍នៅខេត្តស្ថិតនៅត្រើយខាងកើតទន្លេមេគង្គថែមទៀតផង។

ដោយមើលឃើញពីស្ថានភាពផុយស្រួយដែលនាំទៅដល់ការបែកបាក់ជាតិ និងអាចផ្ទុះជាសង្គ្រាមផ្ទៃក្នុងជាថ្មី ក៏ដូចជាការមើលឃើញអំពីលទ្ធភាពនៃការគ្រប់គ្រងស្ថានការណ៍ប្រទេសទាំងមូលរបស់គណបក្សហ្វ៊ុនស៊ិនប៉ិច សម្ដេចព្រះនរោត្ដមសីហនុ បានសម្រេចប្រកាសថាព្រះអង្គនឹងដោះស្រាយបញ្ហារវាងកូនចៅរបស់ព្រះអង្គ ជំនួសអាជ្ញាធរបណ្ដោះអាសន្ននៃអង្គការសហប្រជាជាតិប្រចាំកម្ពុជាហៅកាត់ថាអ៊ុនតាក់។

នៅទីបញ្ចប់ ក្រោមការសម្របសម្រួលរបស់សម្ដេចព្រះនរោត្ដមសីហនុ រាជរដ្ឋាភិបាលថ្មីក្នុងនីតិកាលទីមួយនៃរដ្ឋសភាជាតិកម្ពុជា ត្រូវបានបង្កើតឡើងក្រោមរូបភាពឆន្ទៈនយោបាយបង្រួបបង្រួមឯកភាពផ្ទៃក្នុងជាតិ។ប៉ុន្តែទោះបីជាមានព្រះរាជបូជនីយកិច្ចពីសម្ដេចព្រះនរោត្ដមសីហនុ ព្រះមហាក្សត្រនៃព្រះរាជាណាចក្រកម្ពុជាយ៉ាងដូចនេះក្ដី ក៏ការ ប៉ះទង្គិចប្រដាប់អាវុធជាទ្រង់ទ្រាយធំមួយក្នុងជួររាជរដ្ឋាភិបាលថ្មីនេះ បានផ្ទុះឡើងដោយជៀសមិនផុតនៅចុងនីតិកាលទី១នៃរដ្ឋសភា...(សូមរង់ចាំអានភាគបន្ត...)

RAC Media | លឹម សុវណ្ណរិទ្ធ

​

​

  ថ្ងៃពុធ, 12 ធ្នូ 2018 ម៉ោង 10:57 AM

«និម្មិតសញ្ញានៃមិត្តភាពរវាង រាជបណ្ឌិត្យសភាកម្ពុជានិងសាកលវិទ្យាល័យយូណាន ប្រទេសចិន»

ថ្ងៃអង្គារ៍ ៤កើត ខែមិគសិរ ឆ្នាំច សំរឹទ្ធស័ក ព.ស ២៥៦២ត្រូវនឹងថ្ងៃទី១១ ខែធ្នូ ឆ្នាំ២០១៨ ប្រធានមជ្ឈមណ្ឌលសិក្សាចិន លោកបណ្ឌិត គីសេរីវឌ្ឍន៍  តំណាងឯកឧត្តមបណ្ឌិតសភាចារ្យប្រធានរាជបណ្ឌិត្យសភាកម្ពុជាបានចូលរួមដាំដើមឈើនៅក្នុងសាកលវិទ្យាល័យយូណានប្រទេសចិន ដើម្បីជានិម្មិតសញ្ញានៃមិត្តភាពរវាងស្ថាប័នទាំងពីរ។

RAC Media

  ថ្ងៃអង្គារ, 11 ធ្នូ 2018 ម៉ោង 11:30 PM

«ប្រជុំអនុម័តបច្ចេកសព្ទគណៈកម្មការអក្សរសិល្បិ៍»

ថ្ងៃអង្គារ ៤កើត ខែមិគសិរ ឆ្នាំច សំរឹទ្ធិស័ក ព.ស.២៥៦២ ក្រុមប្រឹក្សាជាតិភាសាខ្មែរ ក្រោមអធិបតីភាពឯកឧត្តមបណ្ឌិត ជួរ គារី បានបន្តប្រជុំពិនិត្យ ពិភាក្សា និងអនុម័តបច្ចេកសព្ទគណៈកម្មការអក្សរសិល្បិ៍ បានចំនួន០៩ពាក្យ ដូចខាងក្រោម៖

​

  ថ្ងៃអង្គារ, 11 ធ្នូ 2018 ម៉ោង 11:10 PM

«សាកលវិទ្យាល័យយូណាន សម្ភោធដាក់ឱ្យដំណើរការមជ្ឈមណ្ឌលសិក្សាកម្ពុជា»

ខណៈដែលមជ្ឈមណ្ឌលសិក្សាចិន ទើបនឹងបានបង្កើតឡើងនៅរាជបណ្ឌិត្យសភាកម្ពុជា ក្នុងគោលដៅសិក្សាអំពីគម្រោងធំៗនិងសំខាន់ៗ ព្រមទាំងសិក្សាអំពីសេដ្ឋកិច្ចប្រទេសចិន ថ្មីៗនេះ នៅសាធារណរដ្ឋប្រជាមានិតចិនក៏មានបង្កើតមជ្ឍមណ្ឌលសិក្សាកម្ពុជាមួយដែរ។

ឆ្លៀតក្នុងឱកាសបំពេញទស្សនកិច្ចរយៈពេលវែងទៅកាន់សាធារណរដ្ឋប្រជាមានិតចិន ចាប់តាំងពីថ្ងៃទី០១ ខែធ្នូឆ្នាំ២០១៨ រហូតមក កាលពីព្រឹកថ្ងៃចន្ទ ៣កើត ខែមិគសិរ ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី១០ ខែធ្នូ ឆ្នាំ២០១៨ ម្សិលមិញនេះ ឯកឧត្តមបណ្ឌិតសភាចារ្យ សុខ ទូច ប្រធានរាជបណ្ឌិត្យសភាកម្ពុជាបានអញ្ជើញចូលរួមសម្ភោធមជ្ឈមណ្ឌលសិក្សាកម្ពុជា នៅសាកលវិទ្យាល័យ​យូណាន ខេត្តយូណាន សាធារណរដ្ឋប្រជាមានិតចិន។

គួរបញ្ជាក់បន្ថែមផងដែរថា កាលពីថ្ងៃទី០៩ ខែធ្នូ ឆ្នាំ២០១៩ ឯកឧត្តមបណ្ឌិតសភាចារ្យ សុខ ទូច ក៏បានអញ្ជើញជួបពិភាក្សាជាមួយលោកសាស្រ្តាចារ្យ ចាង លី សាកលវិទ្យាធិការរងនៃសាកលវិទ្យាល័យយូណាន ទទួលបន្ទុកទំនាក់ទំនងអន្តរជាតិ និងសហការី។

ខ្លឹមសារសំខាន់ៗនៅក្នុងជំនួបនៃកិច្ចពិភាក្សា រួមមាន៖
១- កិច្ចសា្រវជ្រាវរួមគ្នាលើគម្រោងវិនិយោគចិននៅកម្ពុជា
២- ការរៀបចំសិក្ខាសាលារួមគ្នា
៣- ការផ្តល់អាហារូបករណ៍ដល់និស្សិតកម្ពុជា
៤- ការផ្តល់ឱកាសដល់អ្នកស្រាវជ្រាវកម្ពុជាមកធ្វើការស្រាវជ្រាវនៅសាកលវិទ្យាល័យយូណាន ព្រមទាំងបំពេញសកម្មភាពការងារជាច្រើនផ្សេងទៀត៕

RAC Media

​

  ថ្ងៃអង្គារ, 11 ធ្នូ 2018 ម៉ោង 11:37 AM

«ដំណើរនយោបាយកម្ពុជា៖ ជំហរនិងសម្បទានដើម្បីឧត្ដមប្រយោជន៍ជាតិ»

ដោយ លឹម សុវណ្ណរិទ្ធ

ចុះផ្សាយថ្ងៃទី០៥ ខែធ្នូ ឆ្នាំ២០១៨ - ម៉ោង៖  ១០:៣០ នាទីយប់

ភ្នំពេញ៖ មកទល់នឹងឆ្នាំ២០១៨នេះ មានរយៈពេល៣៩ឆ្នាំហើយដែលរបបប្រល័យមនុស្សជាតិត្រូវបានផ្ដួលរំលំ ហើយដែលប្រជាជាតិកម្ពុជាបានស្គាល់ជាថ្មីនូវតម្លៃក្នុងការរស់នៅជាមនុស្សជាតិពេញលេញឡើងវិញ។ ជាមួយគ្នានេះដែរ អស់រយៈពេល២៥ឆ្នាំ ដែលកិច្ចព្រមព្រៀងសន្តិភាពមួយបាននាំមកនូវប្រជាធិបតេយ្យសេរីពហុបក្សមកឱ្យកម្ពុជា ប៉ុន្តែបើយើងមើលឱ្យកាន់តែស៊ីជម្រៅបន្ថែមទៀតនោះ មកត្រឹមឆ្នាំ២០១៨នេះ វាទើបតែកន្លងផុតបាន២០ឆ្នាំប៉ុណ្ណោះ ដែលកម្ពុជាបានចាកផុតពីការគ្រប់គ្រងតាមរបៀបស្បែកខ្លា។

បើក្រឡេកទៅមើលប្រវត្តិសាស្ត្រឡើងវិញ គេត្រូវរំឭកអំពីចលនាតស៊ូមួយដែលកើតចេញអំពីប្រជាជនប្រឆាំងនឹងការដឹកនាំដ៏ឃោរឃៅ ព្រៃផ្សៃ និងអមនុស្សធម៌នៃរបបកម្ពុជាប្រជាធិបតេយ្យ។ ដោយមានការចូលរួមយ៉ាងផុសផុលពីបណ្ដាជនអ្នកស្នេហាជាតិទាំងឡាយ រណសិរ្សសាមគ្គីសង្គ្រោះជាតិកម្ពុជាត្រូវបានបង្កើតឡើងនៅថ្ងៃទី០២ ខែធ្នូ ឆ្នាំ១៩៧៨ ដឹកនាំដោយសមមិត្ត ហេង សំរិន ដែលរណសិរ្សនេះមានគោលដៅវាយរំលំរបបកម្ពុជាប្រជាធិបតេយ្យ និងដោយមានការជួយជ្រោមជ្រែងពីកងទ័ពស្ម័គ្រចិត្តវៀតណាម។ នៅទីបំផុត រណសិរ្សសាមគ្គីសង្គ្រោះជាតិកម្ពុជា បានទទួលជោគជ័យលើកម្លាំងនៃរបបកម្ពុជាប្រជាធិបតេយ្យនៅថ្ងៃទី០៧ ខែមករា ឆ្នាំ១៩៧៩ ហើយបង្កើតរដ្ឋាភិបាលថ្មីមួយនៅកម្ពុជាដែលមានឈ្មោះថា «សាធារណរដ្ឋប្រជាមានិតកម្ពុជា»។ បើទោះបីជារដ្ឋាភិបាលនៃរបបសាធារណរដ្ឋប្រជាមានិតកម្ពុជា បានគ្រប់គ្រងលើទឹកដីប្រមាណជាង៩០%ទៅហើយក្ដី ក៏នៅលើឆាកអន្តរជាតិ ប្រទេសលោកសេរីទាំងឡាយ ពុំបានទទួលស្គាល់រដ្ឋាភិបាលដែលកើតចេញពីការតស៊ូរបស់ប្រជាជនកម្ពុជានេះដែរ ហើយផ្ទុយទៅវិញ គេបែរជាប្រគល់អសនៈរបស់កម្ពុជានៅក្នុងអង្គការសហប្រជាជាតិទៅឱ្យរបបកម្ពុជាប្រជាធិប​តេយ្យ ដែលបានប្រល័យជីវិតមនុស្សជាតិយ៉ាងរង្គាលដោយមិនរើសមុខ មិនរើសជាតិសាសន៍ និងទាំងដោយគ្មានការកាត់សេចក្ដីណាមួយនោះឡើយ។ នេះក៏ដោយសារតែនាពេលនោះ សាធារណរដ្ឋប្រជាមានិតចិន និងសហរដ្ឋអាម៉េរិកបានចាប់ដៃគ្នា រួមគ្នាប្រឈមនឹងសហភាពសូវៀត ដែលកំពុងតែកើនឥទ្ធិពលខ្លាំងនៅក្នុងនយោបាយមនោគមវិជ្ជាពិភពលោក ហើយចិននិងអាម៉េរិកនៅតែបន្តគាំទ្រដល់របបកម្ពុជាប្រជាធិបតេយ្យដែលក្រោយមកបានរួមគ្នាជាមួយនឹងចលនាពីរផ្សេងទៀត​គឺ​ហ្វ៊ុនស៊ិនប៉ិច និងកម្លាំងរបស់លោកតាស៊ឺនសានបង្កើតជារដ្ឋាភិបាលត្រីភាគី។ បើទោះជាយ៉ាងនេះក្ដី របបសាធារណរដ្ឋប្រជាមានិតកម្ពុជា បានបន្តដំណើររបស់ខ្លួនទាំងដោយប្រឈមនឹងការហ៊ុមព័ទ្ធនយោបាយនិងសេដ្ឋកិច្ចពីបស្ចិមប្រទេស ក៏ដូចជាប្រឈមនឹងការប៉ុនប៉ងវិលត្រឡប់មកដណ្ដើមអំណាចវិញរបស់ពួកខ្មែរក្រហម។

ទោះបីជាសាធារណរដ្ឋប្រជាមានិតកម្ពុជាបានកាន់កាប់ទឹកដីស្ទើរតែទាំងស្រុង និងមានកម្លាំងទ័ពមានប្រៀបទៅលើក្រុមខ្មែរត្រីភាគីក្ដី ក៏មេដឹកនាំនៃរបបនេះ ពិសេសសមមិត្ត ហ៊ុន សែន បានយល់យ៉ាងច្បាស់ថា មានតែការចរចាគ្នារវាងខ្មែរនឹងខ្មែរប៉ុណ្ណោះ ដែលអាចឈានទៅដោះស្រាយបានទាំងស្រុងនូវវិបត្តិនយោបាយនិងសង្គ្រាមជាង៣ទសវត្សរ៍មកនេះ។ ហេតុនេះហើយទើប សមមិត្ត ហ៊ុន សែន ចាប់ផ្ដើមបោះដៃចរចាជាមួយនឹងក្រុមខ្មែរត្រីភាគី ដែលនៅពេលនោះជំនាញការវៀតណាមនៅកំពុងមានវត្តមានពាសពេញប្រទេសកម្ពុជា។ ម្យ៉ាងដោយសារតែឧត្ដមគតិនិងមនសិការជាតិនេះហើយ ទើបនៅទីបំផុត វរជននយោបាយ​ដ៏មានឥទ្ធិពលពីររូបរបស់កម្ពុជាគឺ សម្ដេចនរោត្ដមសីហនុ (ព្រះបរមរតនកោដ្ឋ) ដែលជាប្រមុខនៃក្រុមខ្មែរត្រីភាគី និង សមមិត្ត ហ៊ុន សែន ដែលតំណាងឱ្យរដ្ឋាភិបាលនៃរបបរដ្ឋកម្ពុជា សម្រេចបាននូវសមិទ្ធផលនិងជោគជ័យរួមគ្នាជាប្រវត្តិសាស្ត្រ​សម្រាប់នយោបាយ និងសន្តិភាពនៅកម្ពុជាគឺ កិច្ចព្រមព្រៀងសន្តិភាពទីក្រុងប៉ារីស ស្ដីពីបញ្ហាកម្ពុជា នៅថ្ងៃទី២៣ ខែតុលា ឆ្នាំ១៩៩១។ 

ក្រោយកិច្ចព្រមព្រៀងនេះចូលជាធរមាន កម្ពុជាបានស្គាល់នូវការបោះឆ្នោតតាមបែបប្រជាធិបតេយ្យ សេរី ពហុបក្ស ជាលើកដំបូង ក្រោយសង្គ្រាមស៊ីវិលជាង៣ទសវត្សរ៍ ប៉ុន្តែនៅក្នុងក្រុមខ្មែរត្រីភាគីឯណោះ អតីតកម្លាំងនៃរបបកម្ពុជាប្រជាធិប​តេយ្យ​(ខ្មែរក្រហម) បានបោះបង់ចោលនូវឱកាសនៃការចូលរួមប្រកួតប្រជែងយកអំណាចដឹកនាំរដ្ឋតាមបែបប្រជាធិបតេយ្យ ហើយចាប់​កាន់អាវុធឡើងវិញ ដែលបង្ខំឱ្យកម្លាំងនៃរបបរដ្ឋកម្ពុជា ត្រូវបដិសេធមិនព្រមទុកអាវុធតាមការស្នើសុំរបស់អាជ្ញាធរបណ្ដោះអាសន្ននៃអង្គការសហប្រជាជាតិប្រចាំកម្ពុជា (UNTAC) ដែលប្រការនេះបានបណ្ដាលឱ្យមានការព្រួយបារម្ភជាថ្មីទៀត អំពីការលាប់ឡើងវិញនៃដំបៅសង្គ្រាមស៊ីវិលនៅកម្ពុជា... (សូមរង់ចាំអានភាគបន្ត...)

RAC Media 

  ថ្ងៃពុធ, 05 ធ្នូ 2018 ម៉ោង 10:41 PM

«ប្រជុំអនុម័តបច្ចេកសព្ទគណៈកម្មការគីមីវិទ្យា និង រូបវិទ្យា...»

ថ្ងៃពុធ ១៣រោច ខែកត្តិក ឆ្នាំច សំរឹទ្ធិស័ក ព.ស.២៥៦២ ក្រុមប្រឹក្សាជាតិភាសាខ្មែរ ក្រោមអធិបតីភាពឯកឧត្តមបណ្ឌិត ហ៊ាន សុខុម បានបន្តប្រជុំពិនិត្យ ពិភាក្សា និងអនុម័តបច្ចេកសព្ទគណៈកម្មការគីមីវិទ្យា និង រូបវិទ្យា បានចំនួន១០ពាក្យ ដូចខាងក្រោម៖

  ថ្ងៃពុធ, 05 ធ្នូ 2018 ម៉ោង 10:24 PM

«ដំណើរសាងសង់អគារខេមរវិទូ របស់រាជបណ្ឌិត្យសភាកម្ពុជា...»

ថ្ងៃពុធ១៣ រោច ខែកត្តិក ឆ្នាំច សំរឹទ្ធិស័ក ព.ស. ២៥៦២ត្រូវនឹងថ្ងៃទី៥ ខែធ្នូ ឆ្នាំ២០១៨ ជំនួសមុខដោយឯកឧត្តមបណ្ឌិតសភាចារ្យ សុខ ទូចប្រធានរាជបណ្ឌិត្យសភាកម្ពុជា  ឯកឧត្តមបណ្ឌិត យង់ ពៅ អគ្គលេខាធិការនៃរាជបណ្ឌិត្យសភាកម្ពុជា និងជាក្រុមការងារគណៈកម្មការ ត្រួតពិនិត្យការសាងសង់អគារខេមរវិទូនៃរាជបណ្ឌិត្យសភាកម្ពុជា បានចុះធ្វើការត្រួតពិនិត្យ ដំណើរការសំណង់អគារខេមរវិទូរបស់រាជបណ្ឌិត្យសភាកម្ពុជា។

នៅក្នុងដំណើរការនៃការចុះត្រួតពិនិត្យការដ្ឋានសាងសង់អគារ​ ឯកឧត្តមបណ្ឌិតអគ្គលេខាធិការ​  និងក្រុមការងារវិស្វកម្មសំណង់អគារ​ បានចុះពិនិត្យ ស្ថានភាពនៃការសាងសង់ផ្ទាល់។ បើតាមការសង្កេតមើលជាក់ស្តែងក្រុមការងារកសាងអគារខេមរវិទូនេះកំពុងតែមញាញឹកខ្លាំងនៅក្នុងការងារ ចាប់តាំងពីបានចាប់ផ្តើមការបើកការដ្ឋានសាងសង់ នាខែកញ្ញា ឆ្នាំ២០១៧ កន្លងមក ហើយក៏ជាដំណាក់កាលទី៤នៃដំណើរការនៃការចុះត្រួតពិនិត្យផ្ទាល់។

យោងតាមប្រធាន ក្រុមការងារបច្ចេកទេសវិស្វកម្មរបស់រាជបណ្ឌិត្យសភាកម្ពុជា លោក លឹម សូក្រាត  បានបញ្ជាក់ និងសង្ឃឹមថា កិច្ចការសាងសង់នេះនឹងបញ្ចប់ការងាររបស់ខ្លួនស្របតាមផែនការគម្រោងដែលបានគ្រោងនៅពេលខាងមុខនេះ។

គួររំឭកថា អាគារខេមរវិទូនេះ ជាចំណងដៃដ៏ថ្លៃថ្លារបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា តាំងពីនីតិកាលទី៥ បានផ្តល់ជូនរាជបណ្ឌិត្យសភាកម្ពុជា សម្រាប់ប្រើប្រាស់បម្រើការងារដល់វិស័យស្រាវជ្រាវនៅរាជបណ្ឌិត្យសភាកម្ពុជា។ សំណង់អគារនេះ រចនាឡើងដោយក្រុមស្ថាបត្យករ និងវិស្វករ ដោយយកលំនាំតាមរចនាបទខ្មែរបែបទំនើប ដោយបង្កប់នូវមូលដ្ឋាននៃឧត្តមភាពស្ថាបត្យកម្មសំខាន់ៗ និងមានលក្ខណៈទស្សនវិជ្ជារបស់ខ្មែរ។ ប្លង់ស្ថាបត្យកម្មអគារខេមរវិទូ បង្កើតឡើងដោយឈរលើទស្សនៈលោកធាតុទាំង៤ និងសាងសង់តាមបែបប្រាសាទភ្នំ មានទំហំផ្ទៃសរុប ១៦ ១១៨ម៉ែត្រការ៉េ មានសរុបចំនួន ៤ជាន់។ ស្ថាបត្យកម្មអគារខេមរវិទូ បានប្រតិស្ថឡើងក្រោមស្មារតីនៃដួងព្រលឹងរបស់ថ្នាក់ដឹកនាំនៃរាជរដ្ឋាភិបាល និងថ្នាក់ដឹកនាំនៃរាជបណ្ឌិត្យ សភាកម្ពុជា ដោយផ្តើមចេញពីការកំណត់មាត្រដ្ឋានដែលមាន៧ខ្នាតសម្រាប់គណនារាល់ប្រវែង និងសមាមាត្រគ្រប់បែបយ៉ាងនៃសំណង់នេះ។ លេខ៧ នេះ សម្រាប់ឧទ្ទិសថ្វាយចំពោះព្រះបាទជ័យវរ្ម័នទី៧ ហើយក៏សម្រាប់អរិយទ្រព្យទាំង៧ និងសញ្ញាខន្ធទាំង៧នៅក្នុងព្រះពុទ្ធសាសនា។

*** សូមបញ្ជាក់ថា គម្រោងនិងថវិការចំណាយទំាងអស់គឺ មិនមែនស្ថិតក្រោមការគ្រប់គ្រងរបស់រាជបណ្ឌិត្យសភាកម្ពុជានោះទេ។

RAC Media

  ​

  ថ្ងៃពុធ, 05 ធ្នូ 2018 ម៉ោង 04:27 PM

«ប្រជុំអនុម័តបច្ចេកសព្ទគណៈកម្មការអក្សរសិល្បិ៍ »

ថ្ងៃអង្គារ ១២រោច ខែមិគសិរ ឆ្នាំច សំរឹទ្ធិស័ក ព.ស.២៥៦២ ក្រុមប្រឹក្សាជាតិភាសាខ្មែរ ក្រោមអធិបតីភាពឯកឧត្តមបណ្ឌិត ជួរ គារី បានបន្តប្រជុំពិនិត្យ ពិភាក្សា និងអនុម័តបច្ចេកសព្ទគណៈកម្មការអក្សរសិល្បិ៍ បានចំនួន០៧ពាក្យ ដូចខាងក្រោម៖

  ថ្ងៃអង្គារ, 04 ធ្នូ 2018 ម៉ោង 09:15 PM