ព័ត៌មាន
«បេក្ខជនបណ្ឌិតមកពីអាម៉េរិក សិក្សាពីវប្បធម៌ខ្មែរ»
កញ្ញា អេមីលី ហាវ ជាបេក្ខជនបណ្ឌិត ជនជាតិអាម៉េរិក មកពីសាកលវិទ្យាល័យបូស្តុន សហរដ្ឋអាមេរិក សិក្សា ពីវប្បធម៌ខ្មែរ ហើយកញ្ញាជាស្រ្តីបរទេសដែលកំពុងតែជក់ចិត្តនឹងការសិក្សាពីតូរតន្ត្រីរបស់កម្ពុជា ជាមួយឯកឧត្តមបណ្ឌិត ហ៊ឹម សុភី នៅឯសាលាតូរតន្ត្រីហ៊ឹមសុភី។
កាលពីវេលាព្រឹកម៉ិញនេះ ក្នុងឱកាសធ្វើបាឋកថាស្តីពី៖ «ស្នាដៃតន្ត្រីបង្សុកូល៖ អតីតកាលជាមេរៀនសម្រាប់បច្ចុប្បន្ន បច្ចុប្បន្នដើម្បីអនាគត» ដែលប្រព្រឹត្តឡើងនៅរាជបណ្ឌិត្យសភាកម្ពុជា កញ្ញា អេមីលី ហាវ ក៏ជាតន្ត្រីការិនីម្នាក់នៅក្នុងវង់ភ្លេងសំដែងបទ «បង្សុកូល» នេះដែរ។ កញ្ញា អាចប្រើប្រាស់និងដេញព្យ៉ាណូ បានយ៉ាងស្ទាត់ជំនាញ ប្រដេញគ្នាយ៉ាងពិរោះរណ្តំ អមជាមួយនឹងសូរសៀងនៃឧបករណ៍ភ្លេងបុរាណខ្មែរយើងផ្សេងទៀត រួមគ្នាបង្កើតជាបទភ្លេង «បង្សុកូល» ឡើង។ សូមបញ្ជាក់ថា បទភ្លេងបង្សុកូល នេះ ជាបទនិពន្ធដោយឯកឧត្តមបណ្ឌិត ហ៊ឹម សុភី ជាមួយនឹងលោក ប៉ាន ឫទ្ធី ដោយរួមបញ្ចូលសាច់ភ្លេងពីឧបករណ៍បុរាណខ្មែរ ជា មួយនឹងឧបករណ៍ភ្លេងរបស់បស្ចឹមប្រទេស។
បើតាមការបង្ហាញរបស់ឯកឧត្តមបណ្ឌិត ហ៊ឹម សុភី កញ្ញា អេមីលី ហាវ បានជក់ចិត្តនឹងស្នាដៃតន្ត្រី បង្សុកូល ដែលក្រុមតន្ត្រីកររបស់របស់ឯកឧត្តម បានទៅសំដែងនៅសហរដ្ឋអាម៉េរិក កាលពីឆ្នាំ២០១៧ ហើយបានតាមទៅចូលរួមស្តាប់ទាំងនៅបូស្តុន និងនៅញ៉ូវយ៉ក។ បច្ចុប្បន្នកំពុងសិក្សាបន្ថែមពីតន្ត្រីនៅសាលាតូរតន្ត្រី ហ៊ឹម សុភី។
ខាងក្រោមនេះ ជាសកម្មភាពហាត់ច្រៀងរបស់ កញ្ញា អេមីលី ហាវ ដែលកំពុងហាត់សូត្រកំណាព្យខ្មែរ បទ «អនិច្ចា តោថ្ម» ជាមួយអ្នកគ្រូ កែម ចន្ធូ ថ្នាក់ចម្រៀងបុរាណខ្មែរ នៅសាលាតូរ្យតន្រ្តី ហុឹម សុភី នៅទួលគោក ខាងជើង TK AVENUE ។
RAC Media