ព័ត៌មាន

បណ្ឌិត យង់ ពៅ៖ អ្នកនយោបាយខ្មែរគួរតែបញ្ឈប់នយោបាយជាន់ពន្លិចប្រជាជាតិខ្លួន ចៀសវាងក្លាយខ្លួនទៅជាសត្រូវរបស់ប្រជាជាតិខ្លួនឯង

2025-01-22 03:12:41 ថ្ងៃពុធ, 22 មករា 2025 ម៉ោង 10:12 AM
អ្នកមើល 1896
post_detail1

ស្របពេលដែលកម្ដៅនយោបាយនៅក្នុងប្រទេសកម្ពុជា ហាក់មិនថមថយ ដោយសារតែអ្នកនយោបាយមាននិន្នាការប្រឆាំងនៅបរទេស បានបន្តដុតរោល និងញុះញង់ឱ្យមានការបែកបាក់ជាតិក្នុងចំណោមស្រទាប់ប្រជាពលរដ្ឋខ្មែរ តាមរយៈការទាញព្រឹត្តិការណ៍ ក៏ដូចជាករណីផ្សេងៗ ដែលកើតមានទាំងក្នុងប្រទេស ក្នុងតំបន់ និងក្នុងពិភពលោកផ្សេងៗ ហើយអំពាវនាវ ឱ្យមានការក្រោកឡើងប្រឆាំងនឹង​រាជរដ្ឋាភិបាលស្របច្បាប់នៅកម្ពុជានោះ លោកបណ្ឌិត យង់ ពៅ អ្នកជំនាញវិទ្យាសាស្ត្រនយោបាយ បានគូសបញ្ជាក់ថា អ្នកនយោបាយដែលមាននិន្នាការប្រឆាំង និងអ្នកនយោបាយប្រឆាំងដែលនិរទេសខ្លួននៅក្រៅស្រុក គួរតែដល់ពេលវេលាបញ្ឈប់ការធ្វើសកម្មភាពនយោបាយ ដែលជាន់ពន្លិចប្រជាជាតិខ្មែរបន្តទៅទៀតហើយ។ បើតាមលោកបណ្ឌិត ការធ្វើនយោបាយនៅក្នុងរូបភាពនេះ មិនត្រឹមតែជានយោបាយហួសសម័យកាល មិនបានចូលរួមចំណែកនៅក្នុងការកសាងជាតិមាតុភូមិនោះទេ ប៉ុន្តែគឺជាការធ្វើនយោបាយដែលនាំមកនូវភាពគ្រោះថ្នាក់ចំពោះប្រទេសជាតិខ្លួនទៅវិញ។

លោកបណ្ឌិត យង់ ពៅ បានមានប្រសាសន៍លើកឡើងថា អ្នកនយោបាយដែលមាននិន្នាការមិនស្របនឹងរាជរដ្ឋាភិបាល ក៏ដូចជាអ្នកនយោបាយប្រឆាំង គួរតែផ្លាស់ប្ដូរវិធីសាស្ត្រធ្វើនយោបាយរបស់ខ្លួន ដោយត្រូវឈ្វេងយល់ថា ការរីកចម្រើនរបស់ប្រទេសកម្ពុជាក្រោមការដឹកនាំរបស់រាជរដ្ឋាភិបាល គឺជាការរីកចម្រើនសម្រាប់ប្រជាជាតិខ្មែរទាំងមូល និងជាការរីកចម្រើន ដែលនាំមកនូវផលប្រយោជន៍ ទាំងកិត្តិយសក្នុងនាមជាប្រជាជាតិស៊ីវិល ទាំងផលប្រយោជន៍ខាងសេដ្ឋកិច្ច សង្គម និងនយោបាយអភិវឌ្ឍនៅក្នុងវិស័យផ្សេងៗរួមផ្សំជាមួយគ្នាផងដែរ។ បើតាមលោកបណ្ឌិត បើទោះបីជាមិនបានចូលរួមចំណែកជួយដល់ការអភិវឌ្ឍប្រទេសជាតិ ក្រុមអ្នកនយោបាយគ្រប់និន្នាការ ក៏គួរបញ្ឈប់នយោបាយជាន់ពន្លិចប្រទេសជាតិខ្លួន ដែលគួរតែជនបរទេសទេ ដែលមានបំណងជាន់ពន្លិចប្រជាជាតិខ្មែរ មិនមែនជាជនរួមជាតិខ្មែរ ដែលមានដើមកំណើត សញ្ជាតិ និងសាវតាចេញពីប្រទេសជាតិខ្មែរខ្លួនឯងនោះទេ។ លោកបណ្ឌិតបន្ថែមថា គេមិនមានអ្វីជាចម្ងល់នោះទេ សម្រាប់ជនបរទេសដែលមានបំណងជៀតជ្រែកកិច្ចការផ្ទៃក្នុង និងបំពានបំផ្លាញផលប្រយោជន៍ខ្មែរ នឹងជាន់ពន្លិចប្រទេសកម្ពុជា ប៉ុន្តែសម្រាប់អ្នកដែលមានឈាមជ័រ និងដើមកំណើតជាជនជាតិខ្មែរ ពិតជាមិនគួរបន្តនយោបាយបំផ្លាញជាតិសាសន៍ខ្លួននោះទេ ពុំនោះទេ បុគ្គលទាំងនោះ នឹងក្លាយទៅជាសត្រូវរបស់ប្រជាជាតិខ្លួន។

បន្ថែមពីលើនេះ លោកបណ្ឌិតបានចាត់ទុកអ្នកនយោបាយ ដែលបន្តធ្វើនយោបាយប្រឆាំងផលប្រយោជន៍ជាតិសាសន៍ខ្លួន គឺជាអ្នកនយោបាយដែលមានភាពចាស់គំរិល ដើម្បីតែផលប្រយោជន៍នយោបាយខ្លួននិងបក្ខពួក បែរជាហ៊ានជាន់ពន្លិចប្រទេសជាតិខ្លួន។ លោកបណ្ឌិត យង់ ពៅ បន្តថា អ្ន​កនយោបាយខ្មែរគួរតែទទួលស្គាល់ថា សង្វៀននយោបាយកម្ពុជា អនុវត្តតាមលទ្ធិប្រជាធិបតេយ្យ ដែលមានការប្រកួតប្រជែងគ្នារៀងរាល់៥ឆ្នាំម្ដង ហើយអ្នកនយោបាយខ្មែរ គួរតែរៀបចំគោលនយោបាយនៅក្នុងការដឹកនាំនិងអភិវឌ្ឍប្រទេសជាតិ ដើម្បីបង្ហាញទៅដល់ម្ចាស់ឆ្នោត ហើយទុកឱ្យម្ចាស់ឆ្នោតជាអ្នកវិនិច្ឆ័យ ហើយអ្នកនយោបាយក្រៅរដ្ឋាភិបាលអាចបញ្ជាក់ឬបង្អួតទៅម្ចាស់ឆ្នោតថា ខ្លួនមានអ្វីល្អលើសរាជរដ្ឋាភិបាល ដើម្បីទទួលបានការគាំទ្រ។ លោកបណ្ឌិត បានជំរុញឱ្យអ្នកនយោបាយខ្មែរទាំងអស់ ជួយជំរុញផ្សព្វផ្សាយរូបភាពជាវិជ្ជមាននានាអំពីប្រទេសកម្ពុជា ដើម្បីផ្ដល់ផលចំណេញដល់ប្រទេសជាតិខ្លួន ហើយក្រុមអ្នកនយោបាយប្រឆាំងក៏អាចទាញប្រជាប្រិយភាពតាមរយៈរូបភាពនេះផងដែរ ថាខ្លួនពិតជាបានចូលរួមចំណែកនៅក្នុងការរីកចម្រើននៃប្រទេសជាតិ។

ជាមួយគ្នានេះ ថ្វីដ្បិតតែអ្នកនយោបាយប្រឆាំងមិនមានតួនាទីផ្លូវការនៅក្នុងស្ថាប័ននីតិប្រតិបត្តិ (រាជរដ្ឋាភិបាល) ក្ដី ប៉ុន្តែក្នុងនាមជាពលរដ្ឋកម្ពុជា ក៏គួរតែមានមនសិកាស្នេហាជាតិ និងទស្សនៈជាមូលដ្ឋានចង់ឱ្យ​ប្រជាជាតិខ្លួនមានវឌ្ឍនភាពឆ្ពោះទៅមុខផងដែរ ហើយអ្នកនយោបាយខ្មែរគ្រប់រូប ពិតជាអាចចូលរួមចំណែកនៅក្នុងការថែរក្សា ការពារ និងពូនជ្រុំលើកតម្កើងផលប្រយោជន៍ជាតិខ្មែរ ទៅតាមលទ្ធភាពដែលខ្លួនអាចធ្វើបាន ពិសេសការផ្សព្វផ្សាយសារវិជ្ជមានជាច្រើនដូចជា សក្ដានុពលទេសចរណ៍ សេដ្ឋកិច្ច និងកសិកម្មជាដើម។ លោកបណ្ឌិត បានលើកករណីលោក ថាក់ស៊ីន ស៊ីណាវាត់ត្រា អតីតនាយករដ្ឋមន្ត្រីថៃ ដែលត្រូវបាននិរទេសទៅក្រៅប្រទេសទៅហើយក្ដី ក៏អ្នកនយោបាយថៃរូបនេះបានចូលរួមចំណែកផ្សព្វផ្សាយអំពីផលិតផលថៃ និងរួមចំណែកជំរុញផលប្រយោជន៍របស់ប្រទេសថៃផងដែរ។ ត្រង់ចំណុចនេះ ត្រូវបានលោកបណ្ឌិត យង់ ពៅ អះអាងថា គឺជាស្មារតីនយោបាយសម័យទំនើប ដែលក្រុមអ្នកនយោបាយខ្មែរនៅក្រៅប្រទេសរៀនសូត្រ ដោយត្រូវលះបង់នូវនយោបាយពន្លិចប្រជាជាតិខ្លួន ចាប់ផ្ដើមធ្វើនយោបាយដើម្បីប្រជាជាតិខ្មែររឹងមាំ ចៀសវាងធ្វើនយោបាយ ដើម្បីតែផលប្រយោជន៍នយោបាយសួនតួរបស់ខ្លួននិងក្រុម។ លោកបណ្ឌិត បានថ្លែងសង្កត់ធ្ងន់ជាថ្មីថា នៅពេលដែលប្រជាជាតិខ្លួនមានការរីកចម្រើន ប្រជាពលរដ្ឋខ្មែរក៏នឹងអាចនឹកឃើញដល់ការចូលរួមចំណែកជំរុញការរីកចម្រើនប្រទេសជាតិ ពីសំណាក់អ្នកនយោបាយខ្មែរនៅក្រៅប្រទេសផងដែរ ហើយនោះគឺជាកិត្តិយស និងគុណតម្លៃ ដែលអ្នកនយោបាយខ្មែរទទួលបានពីការចូលរួមចំណែកដើម្បីផលប្រយោជន៍ជាតិផងដែរ៕

RAC Media | លឹម សុវណ្ណរិទ្ធ

អត្ថបទទាក់ទង

បណ្ឌិត យង់ ពៅ៖ វិទ្យាសាស្ត្រនយោបាយ គឺជាវិទ្យាសាស្ត្រដឹកនាំមនុស្ស

(រាជបណ្ឌិត្យសភាកម្ពុជា)៖ «វិទ្យាសាស្ត្រនយោបាយ គឺជាវិទ្យាសាស្ត្រដឹកនាំមនុស្ស ព្រោះគ្រប់ការសម្រេចចិត្តទាំងអស់សុទ្ធសឹងតែពាក់ព័ន្ធនឹងនយោបាយ ហើយគ្មានវិទ្យាសាស្ត្រណាមួយដែលគេចផុតពីនយោបាយនោះទេ» នេ...

2024-11-11 10:29:47   ថ្ងៃចន្ទ, 11 វិច្ឆិកា 2024 ម៉ោង 05:29 PM
បណ្ឌិតសភាចារ្យ សុខ ទូច៖ ជ្រើសរើសមុខជំនាញតាមទេពកោសល្យ ទើបមនុស្សអាចបញ្ចេញសក្ដានុពលរបស់ខ្លួន និងធ្វើជាម្ចាស់លើជោគវាសនារបស់ខ្លួនបាន

(រាជបណ្ឌិត្យសភាកម្ពុជា)៖ ថ្លែងក្នុងឱកាសអញ្ជើញជាវាគ្មិននៅក្នុងកិច្ចពិភាក្សាតុមូល ស្ដីពី «ការជ្រើសរើសមុខជំនាញនៅថ្នាក់ឧត្ដមសិក្សា» នាព្រឹកថ្ងៃទី១១ ខែវិច្ឆិកា ឆ្នាំ២០២៤ ឯកឧត្ដមបណ្ឌិតសភាចារ្យ ស...

2024-11-11 07:21:01   ថ្ងៃចន្ទ, 11 វិច្ឆិកា 2024 ម៉ោង 02:21 PM
បណ្ឌិត យង់ ពៅ៖ នៅក្នុងទំនាក់ទំនងជាមួយនឹងមហាអំណាច កម្ពុជាត្រូវត្រៀមខ្លួនឱ្យបានរួចរាល់គ្រប់ទិដ្ឋភាព និងព្យាយាមស្វែងយល់ពីឥរិយាបថរបស់មហាអំណាច

          ក្រោយការប្រកាសលទ្ធផលបោះឆ្នោតជ្រើសរើសប្រធានាធិបតីសហរដ្ឋអាម៉េរិក ដែលបង្ហាញថា លោក ដូណាល់ ត្រាំ បានជាប់ឆ្នោតជាថ្មីក្លាយជាប្រធានាធិបតីសហរដ្ឋអាម៉េរិក ថ្នាក់ដឹកនាំកម្ពុជាបា...

2024-11-08 13:42:36   ថ្ងៃសុក្រ, 08 វិច្ឆិកា 2024 ម៉ោង 08:42 PM
មិនគួរយកបញ្ហានិទ្ទេសកំណត់ព្រំដែននៃការគិតអំពីដំណើរឆ្ពោះទៅមុខនោះទេ

ក្រោយការប្រកាសលទ្ធផលប្រឡងមធ្យមសិក្សាទុតិយភូមិ (បាក់ឌុប) បច្ចុប្បន្ន នៅមានឪពុកម្ដាយមួយចំនួន តែងប្រៀបធៀបលទ្ធផលសិក្សារបស់កូនខ្លួនជាមួយសិស្សដទៃ ដែលករណីនេះ ធ្វើឱ្យប៉ះពាល់ដល់អារម្មណ៍កូន បង្កឱ្យមានសម្ពាធ ឬភា...

2024-11-08 07:01:36   ថ្ងៃសុក្រ, 08 វិច្ឆិកា 2024 ម៉ោង 02:01 PM
រាជបណ្ឌិត្យសភាកម្ពុជារៀបចំសន្និសីទអន្តរជាតិ ស្ដីពី «ប្រវត្តិសាស្ត្រប្រទេសកម្ពុជា : កម្ពុជានៅក្នុងសម័យអាណានិគមបារាំង»

(រាជបណ្ឌិត្យសភាកម្ពុជា)៖ នៅព្រឹកថ្ងៃព្រហស្បតិ៍ ៧ កើត ខែកត្ដិក ឆ្នាំរោង ឆស័ក ព.ស. ២៥៦៨ ត្រូវនឹងថ្ងៃទី៧ ខែវិច្ឆិកា ឆ្នាំ២០២៤ រាជបណ្ឌិត្យសភាកម្ពុជា បានរៀបចំសន្និសីទអន្តរជាតិ ស្ដីពី «ប្រវត្តិសាស្ត្រ...

2024-11-07 06:28:34   ថ្ងៃព្រហស្បតិ៍, 07 វិច្ឆិកា 2024 ម៉ោង 01:28 PM
បណ្ឌិត យង់ ពៅ៖ ការវិលមកកាន់តំណែងជាថ្មីរបស់លោក ដូណាល់ ត្រាំ នឹងនាំមកនូវការផ្លាស់ប្ដូរដ៏ធំជាថ្មីទៀតចំពោះសណ្ដាប់ធ្នាប់ និងភូមិសាស្ត្រនយោបាយពិភពលោក

          នៅថ្ងៃទី៦ ខែវិច្ឆិកា ឆ្នាំ២០២៤នេះ ជាថ្ងៃបោះឆ្នោតជ្រើសរើសប្រធានាធិបតី​សហ​រដ្ឋអាម៉េរិក ដែលបេក្ខជនលេចធ្លោមកពីគណបក្សធំៗទាំងពីរគឺ លោក ដូណាល់ ត្រាំ បេក្ខភាពប្រធានាធិបតីគណប...

2024-11-06 10:35:12   ថ្ងៃពុធ, 06 វិច្ឆិកា 2024 ម៉ោង 05:35 PM

សេចក្តីប្រកាស