ព័ត៌មាន

បណ្ឌិត យង់ ពៅ៖ ព្រឹត្តិការណ៍ ១៨ មីនា បាននាំកម្ពុជាធ្លាក់ចូលក្នុងភ្លើងសង្គ្រាម ដែលអ្នកនយោបាយខ្មែរគួរតែរៀនសូត្រនិងបញ្ចៀសឱ្យផុតពីការរងគ្រោះដោយសារការប្រកួតប្រជែងរបស់មហាអំណាច

2025-03-18 09:30:12 ថ្ងៃអង្គារ, 18 មីនា 2025 ម៉ោង 04:30 PM
អ្នកមើល 820
post_detail1

          ឆ្លើយតបទៅនឹងសំណួររបស់អ្នកសារព័ត៌មាន លោកបណ្ឌិត យង់ ពៅ អ្នកជំនាញវិទ្យាសាស្ត្រនយោបាយបានលើកឡើងថា គិតមកដល់ពេលនេះ ព្រឹត្តិការណ៍ទម្លាក់សម្ដេចព្រះនរោត្ដមសីហនុពីតំណែងប្រមុខរដ្ឋ មានរយៈពេល ៥៥ឆ្នាំកន្លងទៅហើយ ដែលបាននាំប្រទេសកម្ពុជាចូលក្នុងភ្នក់ភ្លើងសង្គ្រាមជាង៣ទសវត្សរ៍ ដែលធ្វើឱ្យប្រទេសកម្ពុជារងគ្រោះ​ដោយការបាត់បង់ធនធានមនុស្ស និងធនធានធម្មជាតិ ក៏ដូចជារចនាសម្ព័ន្ធសង្គម បានខ្ទេចខ្ទាំដល់ដំណាក់កាលសូន្យតែម្ដង ទម្រាំប្រទេសកម្ពុជាអាចស្វែងរកសន្តិភាពពេញលេញមកវិញនៅឆ្នាំ១៩៩៨ និងស្ដារសេដ្ឋកិច្ចនិងសង្គមឡើងវិញរហូតមកដល់បច្ចុប្បន្ន។

          លោកបណ្ឌិត យង់ ពៅ បានលើកឡើងអំពីដើមចមនៃការទម្លាក់សម្ដេចព្រះនរោត្ដម​ សីហនុ ពីតំណែងប្រមុខរដ្ឋចំនួន ៥ចំណុចគឺ៖

១. ជាការប្រកួតប្រជែងមនោគមវិជ្ជាមូលធននិយម និងកុម្មុយនីស្តរបស់មហាអំណាចពិភពលោក នៅក្នុងដំណាក់កាលសង្គ្រាមត្រជាក់ ដែលបែងចែកពិភពលោកទៅតាមប្លុករៀងៗ​ខ្លួន​។ នៅក្នុងពេលនោះ មានការអូសទាញប្រទេសកម្ពុជាឱ្យចូលរួមនៅក្នុងប្លុករៀងៗពីសំណាក់មហាអំណាច ដែលជាហេតុធ្វើឱ្យសម្ដេចព្រះនរោត្ដម សីហនុ បានប្រកាសដាក់ប្រទេសកម្ពុជាក្នុងជំហរអព្យាក្រឹត្យ មិនចូលបក្សសម្ព័ន្ធណាមួយឡើយ បើទោះបីជាមានការព្យាយាមទាញកម្ពុជាចូលក្នុងអង្គការសន្ធិសញ្ញាយោធាសេអាតូ ដើម្បីទប់ទល់នឹងឥទ្ធិពល​នៃការរីករាលដាលលទ្ធិកុម្មុយនីស្តនៅឥណ្ឌូចិនក្ដី។ នេះជាចំណាប់ផ្ដើមមួយដែលនាំទៅដល់វិបត្តិផ្សេងៗទៀតជាបន្តបន្ទាប់។

២. សង្គ្រាមឥណ្ឌូចិនលើកទីពីរ រវាងវៀតណាមនិងសហរដ្ឋអាម៉េរិក ដែលបានរុញច្រានវិបត្តិកម្ពុជា ឈានទៅដល់ការទម្លាក់សម្ដេចព្រះនរោត្ដម សីហនុ ពីតំណែងព្រះប្រមុខរដ្ឋ ព្រោះសម្ដេចព្រះនរោត្ដម សីហនុ តែងតែប្រឆាំងតវ៉ាយ៉ាងដាច់អហង្ការចំពោះការទាញកម្ពុជាចូលក្នុងសង្គ្រាមនេះ និងការទម្លាក់គ្រាប់បែករបស់សហរដ្ឋអាម៉េរិក ដែលបានទម្លាក់ចូលដែនបូរណភាពទឹកដីនៃព្រះរាជាណាចក្រកម្ពុជា ហើយដែលកាលនោះ សម្ដេចព្រះនរោត្ដមសីហនុធ្លាប់បានយកផែនទីប្រទេសកម្ពុជាចំនួន១៨ផ្ទាំង ទៅប្ដឹងតវ៉ានៅអង្គការសហប្រជាជាតិ ស្ដីពីការទម្លាក់គ្រាប់បែកពីសំណាក់សហរដ្ឋអាម៉េរិកចូល​ដែនអធិបតេយ្យភាពរបស់កម្ពុជា។ គួរបញ្ជាក់ផងដែរថា នៅព្រឹកថ្ងៃទី១៨ ខែមីនា ឆ្នាំ១៩៦៩ ពោលគឺមុនមួយឆ្នាំគត់នៃការទម្លាក់សម្ដេចព្រះនរោត្ដម សីហនុ ពីព្រះប្រមុខរដ្ឋ លោកប្រធានាធិបតីអាម៉េរិក និច សុន បានដាក់ឈ្មោះដល់ប្រតិបត្តិការទម្លាក់គ្រាប់បែកជាសម្ងាត់មួយ មកលើប្រទេសកម្ពុជាថា “អាហារពេលព្រឹក”។ ក្រោយមក នៅថ្ងៃទី៣០ ខែមេសា ឆ្នាំ១៩៧០ ទើបលោក និច សុន បាន  បង្ហាញពីផែនទីទម្លាក់គ្រាប់បែកលើប្រទេសកម្ពុជា នៅតាមកញ្ចក់ទូរទស្សន៍ ពាក់ព័ន្ធនឹងអន្តរាគមន៍យោធាដោយផ្ទាល់លើប្រទេសកម្ពុជា។

៣. វិបត្តិសេដ្ឋកិច្ចនៅក្នុងប្រទេសកម្ពុជា ដែលអូសបន្លាយពីវិបត្តិបង្កឡើងដោយការប្រកួតប្រជែងមនោគមវិជ្ជានយោបាយ ការប្រកួតប្រជែងភូមិសាស្ត្រនយោបាយ និងវិបត្តិកើតចេញពីសង្គ្រាមវៀតណាមជាដើម ដែលបានឈានដល់ការហ៊ុមព័ទ្ធសេដ្ឋកិច្ចកម្ពុជា និងការបិទច្រកពាណិជ្ជកម្មកម្ពុជាទាំងជាមួយប្រទេសថៃ និងទាំងជាមួយវៀតណាមខាងត្បូង ដែលនាំឱ្យកម្ពុជាប្រឈមនឹងវិបត្តិសេដ្ឋកិច្ចនាពេលនោះ។

៤. វិបត្តិនយោបាយផ្ទៃក្នុង ដែលនាំទៅដល់ការទម្លាក់សម្ដេចព្រះនរោត្ដម សីហនុ ដោយមានចរន្តឆ្វេងនិយម ចាប់ផ្ដើមបំផុសបំផុលនិងសម្ដែងការមិនពេញចិត្តចំពោះនយោបាយរបស់សម្ដេចព្រះនរោត្ដម សីហនុ ដោយសារខ្លួនចង់ឱបក្រសោបនយោបាយសហរដ្ឋអាម៉េរិកនៅក្នុងសង្គ្រាមវៀតណាម។

៥. ការជ្រៀតជ្រែកពីពិភពលោកខាងក្រៅ ទាំងបណ្ដាប្រទេសជិតខាង និងមហាអំណាចទាំងពីរមនោគមវិជ្ជានយោបាយ ដែលបានដុតរោលវិបត្តិកម្ពុជា នាំទៅដល់ចរន្តប្រឆាំងជាលក្ខណៈបាតុកម្ម និងចលនាតស៊ូ ដែលរាប់ចាប់តាំងពីចលនាខ្មែរសេរីដែលគាំទ្រដោយប្រទេសថៃនិងសហរដ្ឋអាម៉េរិក និងចលនាតស៊ូកុម្មុយនីស្តគាំទ្រដោយវៀតណាមខាងជើងនិងចិន។

          លោកបណ្ឌិត យង់ ពៅ បានគូសបញ្ជាក់ថា ព្រឹត្តិការណ៍រដ្ឋប្រហារ ថ្ងៃទី១៨ ខែមីនា ឆ្នាំ១៩៧០ គឺជាមេរៀនប្រវត្តិសាស្ត្រ ដែលខ្មែរគ្រប់រូប មិនថាជាពលរដ្ឋឬអ្នកនយោបាយទាំងក្នុងនិងក្រៅស្រុកនោះទេ ត្រូវតែសិក្សារៀនសូត្រឈ្វេងយល់ឱ្យបានស៊ីជម្រៅ និងធ្វើយ៉ាងណា​បញ្ចៀសឱ្យផុតពីការនាំប្រទេសជាតិរបស់ខ្លួនធ្លាក់ចូលទៅក្នុងភ្លើងសង្គ្រាម និងចេញពីប្រទេសដែលសម្បូរសប្បាយ មានមូលធនមនុស្សសម្រាប់ការអភិវឌ្ឍជាតិ ទៅជាប្រទេស​ដែលខ្ទេចខ្ទាំដោយសារសង្គ្រាមរាប់ចាប់តាំងពីធនធានមនុស្ស និងរចនាសម្ព័ន្ធសង្គម ពោលគឺធ្លាក់ចុះដល់ចំណុចសូន្យ។ ទាំងនេះ គឺជាមេរៀនដ៏ជូរចត់នៅក្នុងប្រវត្តិសាស្ត្រ ដែលខ្មែរគ្រប់រូបត្រូវតែរៀនសូត្រ និងចៀសវាងឱ្យផុតពីការជាន់ដានប្រវត្តិសាស្ត្រ ហើយធ្លាក់ចូលក្នុងវិបត្តិជាថ្មីម្ដងទៀត។ បើតាមលោកបណ្ឌិត ដើម្បីចៀសផុតពីគ្រោះថ្នាក់សម្រាប់ជាតិនេះ រាជរដ្ឋាភិបាលកម្ពុជា ត្រូវតែពង្រឹងសមត្ថភាពជាតិ ដែលផ្ដោតលើគ្រប់វិស័យទាំងអស់ ចៀសវាងការពឹងពាក់ទៅលើបរទេសទាំងស្រុងដូចអតីតកាល ព្រោះនៅពេលដែលជួបនឹងវិបត្តិនៃការប្រកួតប្រជែងមនោគមវិជ្ជានយោបាយដ៏ស្រួចស្រាល់នៅក្នុងសម័យសង្គ្រាមត្រជាក់ នៅពេលដែលកម្ពុជានៅទន់ខ្សោយ កម្ពុជាពិតជាមិនអាចគេចផុតពីការរងគ្រោះដោយសារតែ​ការប្រកួតប្រជែងនោះឡើយ។

          ដូច្នេះហើយ បើទោះបីជាកន្លងមកនេះ រាជរដ្ឋាភិបាលកម្ពុជាបានដាក់ចេញនូវគោលនយោបាយ និងយុទ្ធសាស្ត្រនៅក្នុងការអភិវឌ្ឍ និងពង្រឹងទំនាក់ទំនងការបរទេសយ៉ាងល្អក៏ដោយក្ដី ប៉ុន្តែត្រូវធានាឱ្យបានថា គោលនយោបាយនិងយុទ្ធសាស្ត្រទាំងនេះ នឹងមានភាពជាក់ស្ដែងនៅក្នុងការអនុវត្តពិតប្រាកដ ធ្វើយ៉ាងណាធានាបាននូវសមត្ថភាពជាតិខ្លាំងក្លាឡើង និងមានលទ្ធភាពទប់ទល់នឹងសភាពការណ៍វិវត្តនៃនយោបាយសាកលលោកដែល​ប្រៀបបានទៅនឹងការរើឡើងវិញនៃសង្គ្រាមត្រជាក់ថ្មីរបស់ពិភពលោក ដែលបង្កទៅជាវិបត្តិនៅតាមតំបន់និងប្រទេសនានាលើពិភពលោក។ បន្ថែមពីនេះ កម្ពុជាត្រូវតែការពារស្ថិរភាពសង្គម និងនយោបាយ ឆ្ពោះទៅកាន់ការរក្សាបាននូវសន្តិភាពដែលកំពុងមានអត្ថិភាពឱ្យ​បានរឹងមាំ និងស្ថិតស្ថេរ ព្រោះប្រសិនបើប្រទេសជាតិបាត់បង់ស្ថិរភាពនយោបាយ និងបណ្ដាលឱ្យកើតចេញជាវិបត្តិផ្សេងៗទៀត ដែលនាំឱ្យសន្តិភាពប្រេះស្រាំ និងអាចធ្លាក់ចូលក្នុងជ្រោះនៃសង្គ្រាមសារជាថ្មី។ សម្រាប់លោកបណ្ឌិត ប្រសិនបើអ្នកនយោបាយបណ្ដោយឱ្យកម្ពុជាធ្លាក់ចូលទៅក្នុងសង្គ្រាមសារជាថ្មីនោះ ប្រទេសកម្ពុជាអាចនឹងពិបាកស្វែងរកសន្តិភាពឡើងវិញជាក់ជាមិនខាន ដូចជាបទពិសោធន៍ដែលកម្ពុជាធ្លាប់ជួបនៅក្នុងសតវត្សរ៍មុននេះជាក់ស្ដែង។

          ជាមួយគ្នានេះដែរ នៅក្នុងបរិបទនៃការប្រកួតប្រជែងរបស់មហាអំណាចពិភពលោក​នាពេលបច្ចុប្បន្ន កម្ពុជាពិតជាគ្មានអ្វីក្រៅតែពីការប្រកាន់ខ្ជាប់នយោបាយការបរទេសអព្យាក្រឹត្យ មិនចូលបក្សសម្ព័ន្ធ ដូចដែលមានចែងក្នុងមាត្រា ៥៣ថ្មី នៃរដ្ឋធម្មនុញ្ញនៃព្រះរាជាណាចក្រកម្ពុជា ដោយប្រកាន់ខ្ជាប់ឱ្យបានដាច់ខាតថា កម្ពុជានឹងមិនចូលរួមក្នុងសម្ព័ន្ធយោធាណាមួយ ប្រឆាំងនឹងភាគីណាមួយឡើយ។ ទោះជាយ៉ាងណា កម្ពុជាក៏មានសិទ្ធិនៅក្នុងការទទួលយកជំនួយយោធា ការអភិវឌ្ឍសមត្ថភាពយោធារបស់ខ្លួនក្នុងន័យការពារខ្លួន និងធ្វើកិច្ចសហប្រតិបត្តិការយោធាល្អជាមួយនឹងបណ្ដាមហាអំណាច និងបណ្ដាប្រទេសជាដៃគូនានា ដើម្បីថែរក្សានិងធានាបាននូវសន្តិសុខ និងសន្តិភាពក្នុងតំបន់ផងដែរ។

          លើសពីនេះទៅទៀត កម្ពុជាត្រូវតែពង្រឹងការឯកភាពផ្ទៃក្នុងរបស់ខ្លួនជាចាំបាច់ ដើម្បីធានា។ ការឯកភាពផ្ទៃក្នុងនេះ ពុំសំដៅទៅលើការកំណត់ឱ្យមានគណបក្សនយោបាយតែមួយ ឬអវត្តមាននូវគណបក្សប្រឆាំងនោះទេ ប៉ុន្តែត្រូវធានាបានថា នៅពេលមានការតទល់ជាមួយនឹងបរទេស កម្ពុជាត្រូវតែមានការឯកភាពគ្នាជាធ្លុងមួយក្នុងនាមប្រជាជាតិខ្មែរ ដើម្បីការពារឧត្ដមប្រយោជន៍នៃប្រជាជាតិរបស់ខ្លួន។ បន្ថែមពីលើនេះ កម្ពុជាក៏ត្រូវបន្តពង្រឹងនិងពង្រីកនយោបាយការបរទេសរបស់ខ្លួនបន្ថែមទៀត ដើម្បីពង្រឹងតួនាទីដ៏ចាំបាច់របស់កម្ពុជានៅក្នុងទំនាក់ទំនងអន្តរជាតិ ដើម្បីទាញយកសារៈប្រយោជន៍នានាពីដៃគូ ទាំងនៅក្នុងទិដ្ឋភាពនយោបាយ សេដ្ឋកិច្ច និងការអភិវឌ្ឍសង្គមជាតិ៕

RAC Media

អត្ថបទទាក់ទង

ឯកឧត្តមបណ្ឌិត យង់ ពៅ ទទួលជួបជាមួយលោក ឆៃ យ៉ុងឈីង ប្រធានក្រុមហ៊ុន ហង់ចូវ ម៉ូហ្កង់ តិចណូឡូជី (Hangzhou Mogong Technology Co., Ltd.)

(រាជបណ្ឌិត្យសភាកម្ពុជា)៖ នៅព្រឹកថ្ងៃទី៥ ខែវិច្ឆិកា ឆ្នាំ២០២៤នេះ ឯកឧត្តមបណ្ឌិត យង់ ពៅ អគ្គលេខាធិការ​នៃរាជបណ្ឌិត្យសភាកម្ពុជា បានទទួលជំនួបជាមួយលោក ឆៃ យ៉ុងឈីង ប្រធានក្រុមហ៊ុន ហង់ចូវ ម៉ូហ្កង់ តិចណូឡូជី (Ha...

2024-11-05 10:12:30   ថ្ងៃអង្គារ, 05 វិច្ឆិកា 2024 ម៉ោង 05:12 PM
ឯកឧត្ដមបណ្ឌិតសភាចារ្យ សុខ ទូច ទទួលជួបពិភាក្សាការងារជាមួយនឹងប្រតិភូសាកលវិទ្យាល័យYunnan Minzu នៃខេត្តយូណាន សាធារណរដ្ឋប្រជាមានិតចិន ដឹកនាំដោយលោកសាស្ត្រាចារ្យ Yin Shitang

នៅរសៀលអង្គារ ៥ កើត ខែកត្ដិក ឆ្នាំរោង ឆស័ក ពុទ្ធសករាជ ២៥៦៨ ត្រូវនឹងថ្ងៃទី៥ ខែវិច្ឆិកា ឆ្នាំ២០២៤ ឯកឧត្ដមបណ្ឌិតសភាចារ្យ សុខ ទូច  ប្រធានរាជបណ្ឌិត្យសភាកម្ពុជា បានទទួលជួបជាមួយនឹងប្រតិភូសាកលវិទ្យាល័យYun...

2024-11-05 10:00:46   ថ្ងៃអង្គារ, 05 វិច្ឆិកា 2024 ម៉ោង 05:00 PM
ការបើកការដ្ឋានកសាងផ្លូវក្រវាត់ព្រំដែន៖ រដ្ឋាភិបាលបានប្រែក្លាយការចូលរួមក្នុងន័យមនសិកាជាតិរបស់ពលរដ្ឋ ទៅជាសមិទ្ធផលជាក់ស្ដែងពិតប្រាកដ

ដោយ៖ បណ្ឌិត យង់ ពៅ           ក្រោយរាជរដ្ឋាភិបាល បានបិទបញ្ចប់ការទទួលថវិកានៅក្នុងគម្រោងកសាងហេដ្ឋារចនាសម្ព័ន្ធតាមព្រំដែន កងវិស្វកម្មនៃកងយោធពលខេមរភូមិន្ទ បានក...

2024-11-04 10:26:58   ថ្ងៃចន្ទ, 04 វិច្ឆិកា 2024 ម៉ោង 05:26 PM
រាជបណ្ឌិត្យសភាកម្ពុជាចុះអនុស្សារណៈនៃការយោគយល់គ្នា ស្ដីពី «កិច្ចសហប្រតិបត្តិការស្រាវជ្រាវ និងគម្រោង» ជាមួយនឹងក្រសួងអប់រំ យុវជន និងកីឡា និងសាកលវិទ្យាល័យជាតិសេអ៊ូល នៃសាធារណរដ្ឋកូរ៉េ

(រាជធានីភ្នំពេញ)៖ នៅព្រឹកថ្ងៃចន្ទ ៤ កើត ខែកត្ដិក ឆ្នាំរោង ឆស័ក ពុទ្ធសករាជ ២៥៦៨ ត្រូវនឹងថ្ងៃទី៤ ខែវិច្ឆិកា ឆ្នាំ២០២៤នេះ ឯកឧត្ដមបណ្ឌិតសភាចារ្យ សុខ ទូច ប្រធានរាជបណ្ឌិត្យសភាកម្ពុជា បានអញ្ជើញចុះអនុស្សារណៈន...

2024-11-04 04:09:39   ថ្ងៃចន្ទ, 04 វិច្ឆិកា 2024 ម៉ោង 11:09 AM
តើគួរចាត់វិធានការយ៉ាងណា ឆ្លើយតបនឹងការផ្សព្វផ្សាយអវិជ្ជមានអំពីប្រទេសកម្ពុជា?

ដោយ៖ លឹម សុវណ្ណរិទ្ធ ថ្មីៗកន្លងទៅនេះ មានការផ្សព្វផ្សាយក្នុងន័យអវិជ្ជមានជាច្រើនប្រឆាំងនឹងប្រទេសកម្ពុជា រាប់ចាប់តាំងពីរការផលិតជាខ្សែភាពយន្ត មាតិកាជាវីដេអូ មាតិកាព័ត៌មាន និងសារព្រមានផ្សេងៗទៀត ដែលបានចង្...

2024-11-01 10:29:27   ថ្ងៃសុក្រ, 01 វិច្ឆិកា 2024 ម៉ោង 05:29 PM
លទ្ធផលប្រឡងបាក់ឌុប បង្ហាញពីនិន្នាការឱ្យតម្លៃលើការអប់រំនិងផ្លែផ្កានៃកំណែទម្រង់ ហើយក៏ជាការដាស់ស្មារតីយុវជនថា ខ្លួនត្រូវក្លាយជាមនុស្សពេញវ័យ ដែលត្រូវមានភាពរឹងមាំនៅក្នុងការគិតពិចារណា

          ក្រោយការប្រកាសលទ្ធផលនៃការប្រឡងមធ្យមសិក្សាទុតិយភូមិ (បាក់ឌុប) ឆ្នាំ២០២៤ បានបង្ហាញថា ចំនួនសិស្សថ្នាក់ទី១២ ដែលបានប្រឡងជាប់ជាស្ថាពរមានកំណើនឡើងជាងឆ្នាំមុនៗ ដែល​មានរហូតដល់...

2024-10-31 04:22:57   ថ្ងៃព្រហស្បតិ៍, 31 តុលា 2024 ម៉ោង 11:22 AM

សេចក្តីប្រកាស