News
«តើនំអន្សម និង នំគម កើតចេញមកពីជំនឿអ្វី?»
ថ្ងៃសៅរ៍ ទី២៩ ខែកញ្ញា ឆ្នាំ២០១៨
ប្រជាពលរដ្ឋគ្រប់ឋានៈនាំគ្នាយកចង្ហាន់ទៅប្រគេនព្រះសង្ឃគង់ចាំព្រះវស្សានៅតាមបណ្តាវត្តនានា។ប្រជាពលរដ្ឋគ្រប់ឋានៈនាំគ្នាយកចង្ហាន់ទៅប្រគេនព្រះសង្ឃគង់ចាំព្រះវស្សានៅតាមបណ្តាវត្តនានា។
ភ្នំពេញ៖ យោងតាមឯកសាររបស់លោកព្រឹទ្ធាចារ្យ មៀច ប៉ុណ្ណ អតីតសមាជិកក្រុមជំនុំទំនៀមទម្លាប់ខ្មែរនៃពុទ្ធ សាសនបណ្ឌិត្យនឹងបង្ហាញឱ្យយដឹងថា តើបុណ្យភ្ជុំបិណ្ឌមានប្រភពមកពីណា គេត្រូវធ្វើដើម្បីអ្វី ហើយនៅក្នុងរយៈពេលនៃការរៀបចំពិធីនេះតើប្រជាពលរដ្ឋខ្មែរគួរធ្វើអ្វីខ្លះនោះ?បុណ្យភ្ជុំបិណ្ឌ ជាបុណ្យសាសនាប្រពៃណីដែលធំជាងគេមួយរបស់ប្រជាជនខ្មែរយើង។បុណ្យនេះ មានលក្ខណៈជាពិធីបុណ្យគោរពវិញ្ញាណក្ខន្ធដល់បុព្វបុរស ញាតិសន្ដាន ដែលធ្វើមរណកាលទៅ និងជាពិធីជួបជុំគ្នានៃញាតិសន្ដាន សាច់ញាតិទាំងអស់ដែលនៅទីឆ្ងាយ។ពិសេសនោះគឺជាបុណ្យនៃការចែករំលែកជួយដល់ព្រះសង្ឃដែលគង់ចាំវស្សា ដែលព្រះសង្ឃត្រូវការទាំងចង្ហាន់ និងបច្ច័យផងនោះ។ ការធ្វើទានរបស់ប្រជាពលរដ្ឋនៅខាងក្រៅវត្តនៅក្នុងអំឡុងនៃពិធីបុណ្យភ្ជុំបិណ្ឌ។ការធ្វើទានរបស់ប្រជាពលរដ្ឋនៅខាងក្រៅវត្តនៅក្នុងអំឡុងនៃពិធីបុណ្យភ្ជុំបិណ្ឌ។
ប្រវត្ដិនៃពិធីបុណ្យភ្ជុំបិណ្ឌ៖បុណ្យភ្ជុំបិណ្ឌ ជាបុណ្យដ៏សំខាន់មួយដែលប្រារឰធ្វើពីថ្ងៃ១រោច ដល់ថ្ងៃ១៥រោច ខែភទ្របទជារៀងរាល់ឆ្នាំត្រូវនឹងខែកញ្ញា ឬតុលា។ រីឯថ្ងៃ១៥រោចហៅថាភ្ជុំបិណ្ឌ។ ក្នុងរយៈពេលភ្ជុំបិណ្ឌនេះ ចាស់ៗបានលះបង់ផ្ទះសម្បែងកូនចៅទៅនៅវត្តសមាទានសីល៥ ចាំសីល៨ បម្រើព្រះសង្ឃសម្អាតទីអារាម។ ចំណែកឯប្រជាពលរដ្ឋវិញ បានចែកវេនគ្នា ជាវេនចំនួន១៥ថ្ងៃ ឬបិណ្ឌ។ ក្នុងបិណ្ឌនីមួយៗ គេតែងធ្វើដូចជា ពេលយប់ជួបជុំពុទ្ធបរិស័ទ ប្រគេន ភេសជ្ជៈចំពោះព្រះសង្ឃ និងជូនចំពោះចាស់ព្រឹទ្ធាចារ្យ នមស្ការ គោរពព្រះរតនត្រ័យ និមន្ដព្រះសង្ឃចម្រើនព្រះបរិត្ដ និងសម្ដែងធម៌ទេសនា។ពេលព្រឹកប្រគេនអាហារ ចំពោះព្រះសង្ឃឧទ្ទិសកុសលជូនចំពោះវិញ្ញាណក្ខន្ធបុព្វការីជនដែលធ្វើមរណកាលទៅហើយនោះ។ទាក់ទិនទៅនឹងប្រវត្ដិបុណ្យភ្ជុំបិណ្ឌនេះដែរ បើតាមគម្ពីរលោកុត្តរសូត្របានបរិយាយថា ព្រះបាទពិម្ពិសារមានញាតិមួយក្រុម បានបំពេញទានមិនបរិសុទ្ធ គឺស៊ីបាយមុនលោក ពេលលាចាកខាងមុខក៏កើតជា«ប្រេត»។លុះដល់ព្រះសម្ពុទ្ធ ព្រះនាមកុក្ក បានត្រាស់ដឹងឡើងក្នុងលោក ពួកប្រេតទាំងនោះទៅសួរព្រះថា ចុះយើងខ្ញុំកាលណាបានអាហារបរិភោគ? ព្រះពុទ្ធត្រាស់ថា ចាំសួរព្រះពុទ្ធជាន់ក្រោយចុះក្នុងសាស នាតថាគត អ្នកទាំងឡាយនឹងបានអាហារបរិភោគ។ លុះដល់ព្រះពុទ្ធនាម នាគមនោ ក៏បានត្រាស់ដូចព្រះពុទ្ធមុនទៀត ដល់ពុទ្ធកាលព្រះកស្សបោ ក៏ត្រាស់ប្រាប់ដូចនេះទៀត ទើបតែដល់ព្រះសមណគោតមត្រាស់ដឹង ទ្រង់បានត្រាស់ថា ចាំមើលព្រះបាទពិម្ពិសារ ជាញាតិរបស់អ្នកទាំងឡាយហើយ។លុះពិម្ពិសារបានថ្វាយទាន ជាដំបូងហើយ មិនផ្សាយទៅឱ្យពួកញាតិក៏ស្រាប់តែពួកប្រេតទាំងឡាយដែលជាញាតិនោះស្រែកយំទ្រហឹងក្នុងពេលរាត្រី។ ព្រះបាទពិម្ពិសារស្ដេចយាង ទៅកាន់វត្ដវេឡុវ័ន ហើយទូលសួរព្រះពុទ្ធ ព្រះពុទ្ធត្រាស់ថា ពួកប្រេត ជាញាតិរបស់ព្រះអង្គនាំគ្នាយំទារអាហារ ព្រោះពួកប្រេតទាំងនោះ ត្រូវបានអាហារបរិភោគក្នុងសាសនាតថាគត ប៉ុន្ដែព្រះអង្គធ្វើបុណ្យហើយ មិនបានផ្សាយទៅឱ្យ។ ពេលព្រះបាទពិម្ពិសារទ្រង់ជ្រាបហើយក៏បានធ្វើបុណ្យចាត់ចែងបញ្ជូនទៅឲ្យ។ ពួកប្រេតទាំងនោះ ក៏បានកើតនៅក្នុងទិព្វវិមាន ដោយសុខរៀងដរាប តទៅ។ ចាប់តាំងពីពេលនោះមក ពិធីកាន់បិណ្ឌ ក៏ចាប់ផ្ដើមមានកំណើតឡើងរហូតមកទល់ពេលនេះ។សាសនានិកនាំគ្នារាប់បាត្រឧទ្ទិសកុសលផលបុណ្យជូនដល់សាច់ញាតិរបស់ខ្លួន។សាសនានិកនាំគ្នារាប់បាត្រឧទ្ទិសកុសលផលបុណ្យជូនដល់សាច់ញាតិរបស់ខ្លួន។ អ្នកសាងល្អបានល្អ អ្នកសាងអាក្រក់បានផលអាក្រក់៖បើតាមគម្ពីរព្រះពុទ្ធសាសនា បានចែងថា មនុស្សដែលស្លាប់ទៅតែងទៅកើតទីផ្សេងៗតាមកម្មរបស់ខ្លួន។ មនុស្សចិត្ដអា ក្រក់ដែលបានធ្វើបាបកម្មផ្សេងៗលុះស្លាប់ទៅ តែងតែកើតជាប្រេត៤ប្រភេទ គឺប្រេតដែលចិញ្ចឹមជីវិតដោយខ្ទុះឈាម ប្រេតស្រេកឃ្លានអាហារជានិច្ច ប្រេតដែលភ្លើងឆេះជានិច្ច និងប្រេតដែលចិញ្ចឹមជីវិតដោយផលដែលបុគ្គលដទៃឧទ្ទិសទៅឲ្យ។ គេតែងនិយមជ្រើសរើសចំថ្ងៃរនោច ខែភទ្របទ ព្រោះពេលវេលានោះ ព្រះចន្ទពុំសូវមានពន្លឺ ហើយចេះតែងងឹតទៅៗ ព្រោះឱកាសនោះហើយ ដែលយមរាជដោះលែងពួកប្រេតទាំងនោះឲ្យមករស់នៅលាយឡំជាមួយមនុស្ស ចាំទទួលភោគផល ដែលបងប្អូនញាតិសន្ដាន ដែលញាតិឧទ្ទិសឲ្យ ព្រោះពួកប្រេតខ្លាចពន្លឺណាស់។ ប្រសិនបើរយៈពេល១៥ថ្ងៃ ពួកប្រេតដើររកគ្រប់វត្ដ ពុំមានឃើញបងប្អូនញាតិសន្ដានណាធ្វើបុណ្យ បញ្ជូនកុសលទៅឱ្យទេពួក គេនឹងអត់បាយ អត់ទឹក ស្រេកឃ្លានរងទុក្ខវេទនាយ៉ាងក្រៃលែង ហើយនឹងជេរប្រទេចដាក់បណ្ដាសាដល់បងប្អូនញាតិ កាទាំងឡាយឱ្យហិនហោចទ្រព្យសម្បត្ដិ ព្រាត់ប្រាសឪពុកម្ដាយ ប្ដីប្រពន្ធ កូនចៅ ញាតិផៅទាំងប្រាំពីរសន្ដាន។ប្រជាពលរដ្ឋខ្មែរទូទាំងប្រទេសតែងតែមានជំនឿទៅលើបុណ្យភ្ជុំបិណ្ឌ នេះជានិច្ច ទោះបីមានក្ដី ក្រក្ដី ទោះយ៉ាងណា ត្រូវធ្វើបុណ្យនេះ ដោយខានមិនបានមួយឆ្នាំម្ដងៗ គឺត្រូវយកនំចំណី ទៀន ធូប រៀងរាល់ថ្ងៃ ចាប់ពីថ្ងៃ១រោច ដល់ថ្ងៃ១៥រោច ក្នុងខែភទ្របទ។ បុណ្យភ្ជុំបិណ្ឌនេះ កាលដើមឡើយ គឺធ្វើឡើងរយៈពេល៣ខែ គឺ៩០ថ្ងៃ ដោយគិតតាំងពីថ្ងៃចូលព្រះវស្សា រហូតដល់ថ្ងៃចេញព្រះវស្សា។
ប៉ុន្ដែរហូតមកដល់បច្ចុប្បន្ន បុណ្យភ្ជុំបិណ្ឌ ត្រូវកាត់បន្ថយនៅសល់តែ១៥ថ្ងៃប៉ុណ្ណោះ ព្រោះដោយសារពេលវេលាមិនអំណោយផល បងប្អូនយើងមានភាពមមាញឹកខ្លាំង ក្នុងមុខរបរទទួលទាន ដូច្នេះ ត្រូវកាត់បន្ថយឲ្យខ្លីទៅវិញ។ បុណ្យភ្ជុំបិណ្ឌនេះមានអត្ថន័យធំធេងណាស់ សម្រាប់ប្រជាពុទ្ធបរិស័ទខ្មែរយើង ព្រោះបុណ្យភ្ជុំបិណ្ឌនេះ ធ្វើឡើងដើម្បីឧទ្ទិសថ្វាយដល់វិញ្ញាណក្ខន្ធបុព្វបុរស ញាតិកាទាំងប្រាំពីរសន្ដាន ដែលបានចែកឋានទៅកើតជាប្រេត នរក ឬក៏សភាវៈផ្សេង។ មួយវិញទៀតនោះ បុណ្យភ្ជុំបិណ្ឌជាបុណ្យជួបជុំបងប្អូនញាតិផៅគ្រប់ទិសទី សម្ដែងនូវសេចក្ដីសាទររីករាយ គ្រប់ៗគ្នា និងអ្វីដែលសំខាន់នោះ កាលណាមនុស្សយើងមានសទ្ធាជ្រះថ្លា ក្នុងព្រះធម៌ ក្នុងការធ្វើបុណ្យធ្វើទាននោះ វាជាបច្ច័យមួយ ជួយធ្វើឲ្យមនុស្សយើងមានចិត្ដស្ងប់ រំលស់នូវភាពសៅហ្មងគ្រប់ៗគ្នា។
ពិធីសំខាន់ ក្នុងរយៈពេលបុណ្យភ្ជុំបិណ្ឌ មានដូចជា ពិធីសូត្រមន្ដបង្សុកូល បោះបាយបិណ្ឌជាដើម។ជំនឿលើពិធីពូនភ្នំខ្សាច់ ក្នុងពិធីបុណ្យភ្ជុំបិណ្ឌ៖ទាក់ទិនទៅនឹងជំនឿ ដែលពុទ្ធបរិស័ទ លើកឡើងអំពីការពូនភ្នំខ្សាច់ នៅអំឡុងពេលបុណ្យភ្ជុំបិណ្ឌនេះ វាជាជំនឿមួយដែលខ្មែរយើងទូទៅ យល់ឃើញថា វាល្អហើយមានប្រយោជន៍ ទើបពួកគាត់ធ្វើហើយបានដាក់លុយទៅតាមភ្នំខ្សាច់នីមួយៗ ព្រមទាំងអុជធូបស្មារលានូវរាល់កំហុសបាបមួយចំនួន ដែលខ្លួនបានសាងឡើង ដោយមិនបានចាប់អារម្មណ៍កន្លងមក។ ការពូនភ្នំខ្សាច់នេះ ក៏ជាការឧទ្ទិសកុសលផលបុណ្យមួយ ជូនដល់ឧបការីជនទាំងឡាយ ដែលបានលាចាកលោកផងដែរ។ជំនឿរបស់ពលរដ្ឋលើការបោះបាយបិណ្ឌ៖នៅព្រលឹមម៉ោង៤ព្រឹកប្រជាពលរដ្ឋតែងតែនាំគ្នា ដើរទៅវត្ដអារាមនានា នៅក្នុងភូមិឬនៅក្បែរផ្ទះរបស់ខ្លួន ជាមួយនឹងនំចំណី ដែលធ្វើរួចជាស្រេច ដាក់ក្នុងចាន ឬស្បោង ដើម្បីទៅវត្ដ គេហៅថា «បោះបាយបិណ្ឌ»។ ការបោះបាយបិណ្ឌ ជាជំនឿអរូបីមួយផងដែរដែលប្រជាពលរដ្ឋខ្មែរយើងនិយមធ្វើជារៀងរាល់ព្រឹកព្រហាមដើម្បីបញ្ជូនឬឧទ្ទិសកុសលឱ្យទៅញាតិសន្ដានសាច់សាលោហិតដែលបានចែកឋានទៅបរលោក។ ប៉ុន្តែនាពេលបច្ចុប្បន្ន ការបោះបាយបិណ្ឌនៅតាមបណ្តាវត្តខ្លះគេធ្វើតាំងពីល្ងាចមកម្ល៉េះ លុះព្រឹកឡើងទើបព្រះសង្ឃជួយវេរធម៌តាមក្រោយ។
ដំបូន្មានរបស់អ្នកជំនាញបុណ្យភ្ជុំបិណ្ឌ៖បុណ្យភ្ជុំបិណ្ឌជាបុណ្យមួយដែលមានសារៈសំខាន់ណាស់ សម្រាប់ប្រជាជាតិខ្មែរយើង។ ដូច្នេះហើយបងប្អូនទាំងឡាយ ត្រូវតែប្រកាន់ខ្ជាប់នូវពិធីបុណ្យនេះ ជាដរាប ព្រោះជាបុណ្យដែលបង្កើតឡើងសម្រាប់ផ្ដល់ឱកាសឲ្យពុទ្ធបរិស័ទទាំងឡាយធ្វើបុណ្យធ្វើទាន ឧទ្ទិសកុសលដល់បុព្វការីជន និងសាច់ញាតិ ដែលបានចែកឋានទៅ និងជាបុណ្យសាសនាមួយផងដែរ ដែលប្រជាពលរដ្ឋទូទៅមិនអាចបំភ្លេចបាន៕
ប្រភព: Post khmer
RAC M edia| ហេង សុភី
ខ្លឹមសារទាំងស្រុងនៃសុន្ទរកថា របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា នៅក្នុងមហាសន្និបាតអង្គការសហប្រជាជាតិ នាបុរី ញ៉ូវ យ៉ក សហរដ្ឋអាម៉េរិក ថ្ងៃទី២៨ ខែកញ្ញា ឆ្នាំ២០១៨។
ថ្ងៃសុក្រ ទី២៨ ខែកញ្ញា ឆ្នាំ២០១៨
(ចិន)៖ នៅក្នុងលំហូរពាណិជ្ជកម្មពិភពលោក នាពេលបច្ចុប្បន្ន គេកំពុងសង្កេតឃើញថា កត្តាដែលជំរុញកំណើនសេដ្ឋកិច្ច កំពុងផ្លាស់ប្តូរកាន់តែលឿន ដែលជាហេតុនាំឱ្យ បច្ចេកវិទ្យាបញ្ញាសិប្បនិម្មិត ឬ AI ក្លាយជាបច្ចេកវិទ្យាដ៏កាន់តែសំខាន់ សម្រាប់គ្រប់គ្រងហានិភ័យ ដែលអាចកើតមានឡើងនៅក្នុងលំហូរ ពាណិជ្ជកម្មពិភពលោក។
អនុប្រធានក្រុមប្រឹក្សាភិបាលក្រុមហ៊ុន ដឺឡយត៍ ឆៃណា (Deloitte China) អ្នកនាង វីវាន ជាំង (Vivian Jiang) បានរៀបរាប់អំពីការប្រើបច្ចេកវិទ្យាបញ្ញាសិប្បនិម្មិត AI សម្រាប់គ្រប់គ្រងហានិភ័យ។ អ្នកនាងបានរៀបរាប់យ៉ាងដូច្នេះ ក្រោយពីបញ្ចប់កិច្ចប្រជុំជើងឯកថ្មីប្រចាំឆ្នាំ ដែលបានធ្វើឡើងនៅប្រទេសចិន។អ្នកនាង វីវាន ជាំង អនុប្រធានក្រុមប្រឹក្សាភិបាលក្រុមហ៊ុន ដឺឡយត៍ ឆៃណា និយាយថា «កិច្ចការនេះ ត្រូវការប្រើរូបមន្តអភិវឌ្ឍផ្នត់គំនិត វិធីប្រមូលពន្ធសំខាន់ៗ ក្បួនវិភាគការយល់ឃើញរបស់មនុស្ស ក្បួនដោះស្រាយបញ្ហា និងបច្ចេកវិទ្យាទិន្នន័យធំ ដើម្បីប្រមូលយក ទិន្ន័យសំខាន់ៗ យ៉ាងច្រើនដែលមាននៅក្នុងសេវាសាធារណៈ សម្រាប់ផ្តល់ឱ្យអតិថិជននិងសម្រាប់ប្រើក្នុងស្ថានភាពណាមួយ ដែលតម្រូវឱ្យយើងប្រើទិន្នន័យរបស់ក្រុមហ៊ុន ដើម្បីឱ្យយើងអាចព្យាករណ៍អត្រាទូទៅឬត្រាប័ណ្ណបំណុលដែលគេដាក់លក់ឱ្យសាធារណៈជនទិញ ទុកជាការវិនិយោគ»។
បច្ចេកវិទ្យា AI ក៏អាចយកមកប្រើសម្រាប់ទប់ស្កាត់ការឆបោកយកប្រាក់ផងដែរ ស្របពេលដែលពិភពវិនិយោគក្នុងពិភពលោកនាពេលសព្វថ្ងៃ កំពុងខ្វះទំនុកចិត្តលើគ្នា បើនិយាយជារួម។ អ្នកនាង វីវាន ជាំង អនុប្រធានក្រុមប្រឹក្សា ភិបាលក្រុមហ៊ុន ដឺឡយត៍ ឆៃណា និយាយថា «នៅក្នុងសង្គមសាធារណៈ មានគេផ្តល់សេវាឬកម្មវិធីដោះស្រាយបញ្ហាច្រើនណាស់ ដែលពិតជាមានប្រសិទ្ធភាពមែន ដោយគេប្រើក្បួនដោះស្រាយបញ្ហា ប្រើទិន្នន័យធំ និងបច្ចេកវិទ្យាផ្ទុកទិន្នន័យនៅក្នុងលំហរអាកាសដើម្បីប្រមូលយកទិន្នន័យសំខាន់ៗសម្រាប់ផ្តល់ព័ត៌មានដែលចាំបាច់ ជូនដល់រដ្ឋាភិបាល នានា ដើម្បីទប់ស្កាត់បទល្មើសឆបោកយកប្រាក់។ នេះហើយ គឺជាវិធីមួយដែលជួយគ្រប់គ្រងហានិភ័យផ្នែកហិរញ្ញវត្ថុបានខ្លះៗដែរ»។ដើម្បីឱ្យសេវាឬកម្មវិធីនេះ អាចដំណើរការទៅមុខបាន ក្រុមហ៊ុនទាំងឡាយត្រូវការបើកប្រព័ន្ធវិភាគទិន្នន័យរបស់គេ តាមប្រព័ន្ធផ្ទុកទិន្នន័យក្នុងលំហរអាកាស ដើម្បីឱ្យគេអាចប្រមូលលទ្ធផលវិភាគបានលឿន។លោក ឌូក មែររីត ប្រធាននិងនាយកប្រតិបត្តិ ក្រុមហ៊ុន Splunk និយាយថា «ប្រព័ន្ធផ្ទុកទិន្នន័យក្នុងលំហរអាកាស ឬ ក្លោដ គឺពិតជាជួយឱ្យយើងអាចរីកចម្រើនបានខ្លាំងណាស់។ វាជួយឱ្យក្រុមហ៊ុនរបស់យើង អាចទាញយកទិន្នន័យ ហើយទទួលបានលទ្ធផល យ៉ាងលឿននិងយ៉ាងស្រួលតែម្តង។ ប៉ុន្តែយើងមានផលិតផលច្រើនណាស់ បន្ថែមពីលើប្រព័ន្ធទិន្នន័យរបស់យើង ដែលជួយឱ្យយើងអាចប្រឡូកក្នុងវិស័យជាច្រើនដូចជា សេវាការពារសន្តិសុខក្នុងអ៊ីនធើណេត ប្រព័ន្ធប្រតិបត្តិការផ្នែកIT និងការអភិវឌ្ឍsoftwareជំនាន់ក្រោយជាដើម ដែលសុទ្ធសឹងតែត្រូវការប្រើទិន្នន័យច្រើនណាស់»។ចំពោះក្រុមហ៊ុនទាំងឡាយដែលមិនអាចបង្កើតបច្ចេកវិទ្យា AI ដោយខ្លួនឯងបាន គេអាចទិញបច្ចេកវិទ្យានេះ ពីក្រុមហ៊ុនផ្សេងបាន ក្នុងតម្លៃដ៏ខ្ពស់។លោក ហ្វីលីព ហ្គឺបឺត ដៃគូជាន់ខ្ពស់ ក្រុមហ៊ុន BCG និយាយថា «មុនពេលយើងគិតដល់ធាតុផ្សំ ក យើងគួរតែមានផែនការរយៈពេលវែងសម្រាប់បច្ចេកវិទ្យា AI។ យើងរកឃើញថា ក្រុមហ៊ុនជាច្រើន មិនទាន់មានផែនការរយៈពេលវែងសម្រាប់បច្ចេកវិទ្យានេះទេ។ បើសិនជាយើងចង់ទិញបច្ចេកវិទ្យានេះពីក្រុមហ៊ុនផ្សេង ក្រុមហ៊ុននៅអឺរ៉ុបអាចជាកន្លែងដ៏គួរឱ្យចាប់អារម្មណ៍មួយ។ យើងឃើញមានក្រុមហ៊ុនអាម៉េរិកច្រើនណាស់ ដែលទិញបច្ចេកវិទ្យានេះពីអឺរ៉ុប ដោយសារអឺរ៉ុបមិនសូវសំបូរក្រុមហ៊ុនដែលប្រកួតប្រជែងគ្នា ផ្តល់សេវា AI នោះទេ។នេះគឺពិតជាឱកាសដែលគួរឱ្យចាប់អារម្មណ៍មែនទែន។ ប៉ុន្តែសព្វថ្ងៃ បច្ចេកវិទ្យានេះ កាន់តែមានតម្លៃថ្លៃទៅៗហើយ»។
បច្ចេកវិទ្យា AI ក៏មានគេរិះគន់ដែរ ថាវាអាចនាំឱ្យមានគ្រោះថ្នាក់ទៅវិញ ជាពិសេសគឺគេបារម្ភថាវានឹងធ្វើឱ្យមនុស្សបាត់បង់ការងារធ្វើ។ ប៉ុន្តែក្រុមហ៊ុនប្រឹក្សាយោបល់ អាក់ស៊ែនឆ័រ (Accenture) មិនគិតដូច្នេះទេ។លោក ភីធ័រ លេស៊ី នាយកគ្រប់គ្រងជាន់ខ្ពស់ ក្រុមហ៊ុន Accenture Strategy ប្រចាំប្រទេសអង់គ្លេស និង ប្រទេសអៀកឡង់ និយាយថា «ការពិតដែលកើតមាននៅកន្លែងធ្វើការរបស់យើង បង្ហាញថា គំនិតនេះ មិនត្រឹមតែជាការយល់ឃើញដែលខុសប៉ុណ្ណោះទេ តែក៏បង្ហាញថាយើងអាចប្រើបច្ចេកវិទ្យាបញ្ញាសិប្បនិម្មិតសម្រាប់ធ្វើការងារដែលស្វ័យប្រវត្ត និងសម្រាប់ ជួយបង្កើនសមត្ថភាពមនុស្ស។ វាក៏ជួយឱ្យមនុស្សមិនចាំបាច់ធ្វើការងារដែលគ្រោះថ្នាក់ ការងារដែលដដែលៗ ហើយអនុញ្ញាតឱ្យយើងអាចបង្កើតការងារថ្មីៗដែលកាន់តែច្នៃប្រឌិត កាន់តែទំនើប និងកាន់តែសាកសម។ ហើយមនុស្សនៅតែមានតួនាទីសំខាន់ដែលត្រូវធ្វើដដែល»។
ប្រភព: Fresh News
RAC Media|ហេង សុភី
ថ្ងៃសុក្រ ទី២៨ ខែកញ្ញា ឆ្នាំ២០១៨
ភ្នំពេញ៖ យោងតាមសេចក្ដីប្រកាសព័ត៌មានរបស់ក្រសួងការបរទេស និងកិច្ចសហប្រតិបត្តិការអន្តរជាតិ ដែលចេញផ្សាយនៅរសៀលថ្ងៃទី២៨ ខែកញ្ញា ឆ្នាំ២០១៨ នេះ ព្រះរាជាណាចក្រកម្ពុជា នឹងបើកស្ថានឯកអគ្គរាជទូតរបស់ខ្លួន នៅរដ្ឋធានីអង់ការ៉ា ប្រទេសតួកគី ក្នុងឆ្នាំ២០១៩ខាងមុខ។
នៅក្នុងសេចក្ដីប្រកាសព័ត៌មានបានបញ្ជាក់ថា ឯកឧត្ដមរដ្ឋមន្ត្រីក្រសួងការបរទេស និងកិច្ចសហប្រតិបត្តិការអន្តរជាតិ នឹងអញ្ជើញបំពេញទស្សនកិច្ចផ្លូវការនៅសាធារណរដ្ឋតួកគីចាប់ពីថ្ងៃទី១ដល់ថ្ងៃទី៣ ខែតុលា ឆ្នាំ២០១៨ ។ ក្នុងដំណើរទស្សនកិច្ចផ្លូវការនេះ ឯកឧត្ដមរដ្ឋមន្ត្រី នឹងអញ្ជើញជួបប្រជុំជាមួយ ឯកឧត្ដម ម៉េវលូត សាវូសូគ្លូរ រដ្ឋមន្ត្រីការបរទេសនៃសាធារណរដ្ឋ តួកគី ដើម្បីពិភាក្សាអំពីបញ្ហាផ្សេងៗដែលជាការព្រួយបារម្ភ និងយកចិត្តទុកដាក់រួមក្នុងបរិបទនៃកិច្ចសហប្រតិបត្តិការទ្វេភាគី តំបន់ និងអន្តរជាតិ ព្រមទាំងផ្ដោតលើកិច្ចខិតខំប្រឹងប្រែងនានាដើម្បីពង្រឹងបន្ថែមទៀតនូវទំនុកចិត្តផ្នែកនយោបាយ និងស្វែងរកសក្ដានុពលថ្មីៗក្នុងការជម្រុញផលប្រយោជន៍ទៅវិញទៅមករបស់ប្រទេសទាំងពីរ។
ជាមួយគ្នានេះដែរ នៅចុងបញ្ចប់នៃជំនួប រដ្ឋមន្ត្រីការបរទេសទាំងពីរ នឹងធ្វើជាអធិបតីក្នុងពិធីចុះហត្ថលេខាលើអនុ ស្សរណៈនៃការយោគយល់គ្នាស្ដីពី «កិច្ចសហប្រតិបត្តិការរវាងវិទ្យាស្ថានជាតិការទូតនិងទំនាក់ទំនងអន្តរជាតិនៃក្រសួងការបរទេស និងសហប្រតិបត្តិការអន្តរជាតិ នៃព្រះរាជាណាចក្រកម្ពុជា និងបណ្ឌិតសភាការទូតនៃក្រសួងការបរទេសនៃសាធារណរដ្ឋតួកគី» ហើយក៏នឹងមានសន្និសីទសារព័ត៌មានផងដែរ។
គួរបញ្ជាក់ផងដែរថា រដ្ឋាភិបាលតួកគី បានសម្រេចបើកស្ថានទូតរបស់ខ្លួននៅកម្ពុជាកាលពីចុងឆ្នាំ២០១៣មកម្ល៉េះ ហើយចាប់ពីឆ្នាំ១៩៩២មក សាធារណរដ្ឋតួកគីធ្លាប់បានផ្ដល់អាហារូបករណ៍ដល់និស្សិតកម្ពុជាចំនួន ៤៨ កន្លែងមកហើយ៕
ដកស្រង់ពី៖ សេចក្ដីប្រកាសព័ត៌មានរបស់ក្រសួងការបរទេសកម្ពុជា និង គេហទំព័រក្រសួងការបរទេសតួកគី
RAC Media | លឹម សុវណ្ណរិទ្ធ
ថ្ងៃសុក្រ ទី២៨ ខែកញ្ញា ឆ្នាំ២០១៨
(តូក្យូ-ជប៉ុន)៖ ដោយវិស័យទេសចរណ៍សហគមន៍ ពិតជាបានរួមចំណែកយ៉ាងសំខាន់ដល់ការកាត់បន្ថយភាពក្រីក្រ កាត់បន្ថយចំណាកស្រុកពីជនបទមកទីក្រុង រួមចំណែកដល់កិច្ចការពារបរិស្ថាន ទើបបានជាព្រឹត្តិការណ៍ពិព័រណ៍ទេសចរណ៍ជប៉ុន ឆ្នាំ២០១៨ (Japan Tourism Expo 2018) នៅទីក្រុងតូក្យូ ប្រទេសជប៉ុន និងកិច្ចប្រជុំតុមូលរដ្នមន្ត្រីទេសចរណ៍លើកទី២ លើកយកប្រធានបទតែមួយគត់មកពិភាក្សាគ្នាយ៉ាងល្អិតល្អន់ស៊ីជម្រៅ គឺ «និរន្តរភាពទេសចរណ៍ ដើម្បីអភិវឌ្ឍសហគមន៍ (Sustainable Tourism for Community Development)»។
កិច្ចប្រជុំតុមូលរដ្ឋមន្ត្រីទេសចរណ៍លើកទី២នេះ បានធ្វើឡើងនាថ្ងៃទី២០ ខែកញ្ញា ឆ្នាំ២០១៨ ក្នុងនោះក៏មានការចូលរួមពីរដ្ឋមន្រ្តីមកពី ១៩ប្រទេស និងពីតំណាងអង្គការអន្តរជាតិធំៗ រួមមាន៖ លោក Zurab Pololikashvili អគ្គលេខាធិការនៃអង្គការទេសចរណ៍ពិភពលោក (UNWTO) លោកស្រី Gloria Guevara ប្រធានអង្គការទេសចរណ៍ និងធ្វើដំណើរពិភពលោក (WTTC) និងលោក Mario HARDY អគ្គនាយកនៃសមាគម Pacific Association of Travel Agents (PATA) និងលោក Shannon Stowell ប្រធានសមាគមទេសចរណ៍ផ្សងព្រេង (Adventure Tourism Association= ATA)។ កម្មវិធីនេះ ធ្វើឡើងដើម្បីចែករំលែកបទពិសោធន៍ ពិភាក្សាគ្នារិះរកយន្តការ និងយុទ្ធសាស្រ្ត ដើម្បីអភិវឌ្ឍសហគមន៍ទេសចរណ៍ប្រកបដោយនិរន្តរភាពសម្រាប់ប្រទេស និងតំបន់។
ក្នុងឱកាសនោះ ឯកឧត្តម ថោង ខុន រដ្ឋមន្ត្រីក្រសួងទេសចរណ៍ បានគូសបញ្ជាក់ពីរូបមន្តគំរូ 4Ps ដែលបានរកឃើញនៅកម្ពុជា ហើយត្រូវបានទទួលស្គាល់ជាសាកល៖
- P1= Public (ផ្នែកសាធារណៈ)៖ រដ្ឋាភិបាលថ្នាក់ជាតិ និងថ្នាក់ក្រោមជាតិ ត្រូវយកចិត្តទុកដាក់អភិវឌ្ឍហេដ្ឋារចនាសម្ព័ន្ធ (ផ្លូវចូលទស្សនា) រៀបចំគោលនយោបាយ បទដ្ឋានគតិយុត្តនានា និងច្បាប់ដើម្បីគាំទ្រ ការពារសហគមន៍។ល។
- P2= Partnership (ដៃគូអភិវឌ្ឍន៍)៖ ដៃគូអភិវឌ្ឍន៍ជាតិ និងអន្តរជាតិ ដូចជា អង្គការទេសចរណ៍ពិភពលោក (UNWTO) ធនាគាអភិវឌ្ឍន៍អាស៊ី (ADB), សមាគមទេសចរណ៍អាស៊ីប៉ាស៊ីហ្វីក (PATA) Wild Life Alliance និងប្រទេសអ្នកផ្តល់ជំនួយត្រូវផ្តល់ហិរញ្ញប្បទាន និងជំនួយបច្ចេកទេសក្នុងការអភិវឌ្ឍធនធានមនុស្ស ការគ្រប់គ្រងអភិវឌ្ឍន៍សហគមន៍ ការបណ្តុះបណ្តាលព័ត៌មានវិទ្យា ការផ្សព្វផ្សាយពីសហគមន៍ដែលមានការទទួលខុសត្រូវ តាមរយៈបណ្តាញសហគមន៍អន្តរជាតិ។
- P3= Private (ផ្នែកឯកជន)៖ ការីទេសចរណ៍ ទីភ្នាក់ងារទេសចរណ៍ និងធុរជនទេសចរណ៍ត្រូវជួយផ្សព្វផ្សាយ ព្រមទាំងរៀបចំកញ្ចប់ទស្សនកិច្ច ដែលមានការទទួលខុសត្រូវទៅកាន់សហគមន៍ទេសចរណ៍ និងអាចជួយពិចារណានាំ គម្រោងវិនិយោគខ្នាតតូច (Small Scale) ដូចជា Eco-lodges មកកាន់សហគមន៍។
- P4= People (ប្រជាសហគមន៍ និងទេសចរ)៖ ប្រជាសហគមន៍ជាបញ្ហាគន្លឹះ ពួកគាត់ត្រូវឆ្លងកាត់ការអប់រំ បណ្តុះបណ្តាល ដើម្បីឱ្យពួកគាត់យល់អំពីគុណតម្លៃ និងអត្ថប្រយោជន៍ ពិសេសចំណូលថវិកាដែលបានពីសកម្មភាពទេសចរណ៍ ជាជាងចំណូលដែលបានមកពីការប្រមាញ់សត្វព្រៃ និងការកាប់បំផ្លាញព្រៃឈើ។
អត្ថប្រយោជន៍ពីសកម្មភាពទេសចរណ៍ រួមមាន៖ ចំណូលពីសេវាកម្មផ្ទះស្នាក់ ការធ្វើមគ្គុទេសក៍ទេសចរណ៍ សេវាកម្មម្ហូបអាហារ និងការផ្គត់ផ្គង់ភេសជ្ជៈ និងសេវាកម្មដឹកជញ្ជូន។ល។ ចំពោះអ្នកទេសចរក្នុងស្រុក និងទេសចរអន្តរជាតិ ពួកគេក៏ត្រូវឆ្លងកាត់ការអប់រំឱ្យបានល្អអំពីដំណើរទេសចរណ៍ប្រកបដោយការទទួលការខុសត្រូវគោរពប្រពៃណីទំនៀមទម្លាប់របស់ប្រជាសហគមន៍មូលដ្ឋាន ក៏ដូចជាកិច្ចការពារបរិស្ថាន និងធម្មជាតិ។ គួររំឭកថា គន្លឹះនៃនិរន្តរភាពទេសចរណ៍ដើម្បីអភិវឌ្ឍន៍សហគមន៍ គឺការបែងចែកអត្ថប្រយោជន៍ដល់ប្រជាសហគមន៍ប្រកបដោយសមធម៌ (équitable benefit sharing)។
ឯកឧត្តមរដ្ឋមន្ត្រីបានបញ្ជាក់ទៀតថា អាស៊ានក៏បានដាក់ចេញស្តង់ដាទេសចរណ៍ជាច្រើន សំដៅធានាបាននូវផលិតផល និងសេវាកម្មទេសចរណ៍ ប្រកបដោយគុណភាព ដូចជា ស្តង់ដាសហគមន៍ទេសចរណ៍អាស៊ាន ស្តង់ដាផ្ទះស្នាក់អាស៊ាន។ ដោយឡែក ក្នុងចំណោមស្តង់ដាទាំងនោះ កម្ពុជាមានកិត្តិយសក្នុងនាមជាប្រទេសនាំមុខ ក្នុងការរៀបចំស្តង់ដាសហគមន៍ទេសចរណ៍អាស៊ាន និងស្តង់ដាទីក្រុងស្អាតអាស៊ាន។ ស្របជាមួយគ្នានោះ កម្ពុជាក៏បានរៀបចំឱ្យមានស្តង់ដារបស់ខ្លួន ដើម្បីធានាគុណភាពផលិតផល និងសេវាកម្មទេសចរណ៍ សំដៅធានាឱ្យបាននូវទេសចរណ៍ប្រកបដោយនិរន្តរភាព។
ម្យ៉ាងទៀត ឯកឧត្តមរដ្ឋមន្ត្រីបានជម្រាបអង្គវេទិកាថា ដោយកម្ពុជាមានសហគមន៍ជាង ២ ០០០កន្លែង ដែលបានចុះបញ្ជីក្នុងស្ថាប័នផ្សេងគ្នា ដូចជាក្រសួងបរិស្ថាន ក្រសួងកសិកម្ម រុក្ខាប្រមាញ់ និងនេសាទ ក្រសួងធនធានទឹក និងឧតុនិយមជាដើម និងដោយពិនិត្យឃើញថា ក្នុងចំណោមសហគមន៍ទាំងអស់នោះ ក៏អាចមានសហគម៍ខ្លះមានសក្តានុពលអាចអភិវឌ្ឍន៍បន្ថែមជាសហគមន៍ទេសចរណ៍ ដែលអាចរកចំណូលបន្ថែមពីសកម្មភាពទេសចរណ៍ជូនសហគមន៍បាន។
រាជរដ្ឋាភិបាលកម្ពុជា ក៏បានបង្កើតឱ្យមានក្រុមការងារអន្តរក្រសួងមួយ ដែលមានក្រសួងទេសចរណ៍ជាប្រធាន ក្រសួងបរិស្ថានជាអនុប្រធានអចិន្ត្រៃយ៍ ក្រសួងកសិកម្ម រុក្ខាប្រមាញ់ និងនេសាទ និងក្រសួងពាក់ព័ន្ធផ្សេងទៀតជាសមាជិក ដើម្បីពិនិត្យមើលជាក់ស្តែង ក្នុងគោលបំណងសំខាន់អភិវឌ្ឍន៍ទៅជាសហគមន៍ទេសចរណ៍នេះ។ កិច្ចប្រជុំតុមូលរដ្ឋមន្ត្រីបានយកចិត្តទុកដាក់ស្តាប់ កោតសរសើរ និងអរគុណដល់កម្ពុជា ដែលបានចែករំលែកបទពិសោធន៍នេះ៕
ប្រភព: ក្រសួងទេសចរណ៍ រូបភាពៈអុិនធើណែត
RAC Media | ហេង សុភី
(ក្រុងដាលី)៖ កាលពីថ្ងៃទី២៧ ខែកញ្ញា ឆ្នាំ២០១៨ កន្លងទៅនេះ ឯកឧត្តមបណ្ឌិត យង់ ពៅ អគ្គលេខាធិការនៃរាជបណ្ឌិត្យសភាកម្ពុជា បានទទួលជំនួបមួយជាមួយ លោក Lyu Xing និងលោក Bi Shihong សាស្ត្រាចារ្យពីមជ្ឍមណ្ឌលសិក្សាផ្នែកការទូតប្រទេសជិតខាងនៃប្រទេសចិន (Center for China’s Neighbor Diplomacy Studies) នៃសាកលវិទ្យាល័យយូណាន នៅឯសាកលវិទ្យាល័យដាលី ទីក្រុងដាលី នៃខេត្តយូណាន សាធារណៈរដ្ឋប្រជាមានិតចិន។ ឆ្លៀតក្នុងជំនួបនោះដែរ កិច្ចពិភាក្សារវាងស្ថាប័នទាំងពីរ បានផ្តោតសំខាន់លើប្រធានបទសំខាន់ពីរ ៖
- កិច្ចសហប្រតិបត្តិការរវាងស្ថាប័នស្រាវជ្រាវទាំងពីរដើម្បីសិក្សារួមគ្នាស្វែងរកធាតុចូលសម្រាប់ជូនដល់រដ្ឋាភិបាលទាំងពីរ។
- សិក្សារួមគ្នាពីឥរិយាបថរបស់ជនជាតិចិនដែលចូលមករស់នៅប្រទេសកម្ពុជានាពេលបច្ចុប្បន្ន។
ឯកឧត្តមបណ្ឌិត យង់ ពៅ បានមានប្រសាសន៍ថា បញ្ហាដែលបានលើកឡើងមកនេះ ជារឿងសំខាន់ដែលស្ថាប័នទាំងពីរគួរតែចាប់ផ្តើមធ្វើអ្វីមួយដើម្បីជាប្រយោជន៍នៃប្រទេសទាំងពីរ។ ចំណែកលោកសាស្ត្រាចារ្យ Lyu Xing បានបង្ហាញពីចំណាប់អារម្មណ៍ក្នុងការរួមសហការគ្នា ដើម្បីសិក្សារួមគ្នាក្នុងនាមជាអ្នកស្រាវជ្រាវ។
ជាលទ្ធផលនៃកិច្ចប្រជុំ ភាគីទាំងពីរបានព្រមព្រៀងគ្នាពិចារណាលើ៣ចំណុចសម្រាប់ជាចំណុចចាប់ផ្តើមនៃកិច្ចសហប្រតិបត្តិការរវាងរាជបណ្ឌិត្យសភាកម្ពុជា និងសាកលវិទ្យាល័យយូណាន ដូចខាងក្រោម៖
- ផ្អែកលើរបៀបវារៈទី១ ភាគីទាំងពីឯកភាពគ្នា នឹងធ្វើកិច្ចសហការគ្នាដោយមានមជ្ឍមណ្ឌលសិក្សាចិនខាងភាគីរាជបណ្ឌិត្យសភាកម្ពុជា និងមជ្ឍមណ្ឌលសិក្សាកម្ពុជានៅខាងភាគីសាកលវិទ្យាល័យយូណាន។
- ស្ថាប័នទាំងពីរនឹងរៀបចំធ្វើការផ្លាស់ប្តូរអ្នកស្រាវជ្រាវជាមួយគ្នាទៅវិញទៅមកទាក់ទងនឹងបញ្ហាព័ត៌មាន ការស្រាវជ្រាវ ហើយនឹងមានការផ្តល់ជាអាហារូបករណ៍ថ្នាក់បរិញ្ញាបត្រជាន់ខ្ពស់ដល់និស្សិតពីភាគីរាជបណ្ឌិត្យសភាកម្ពុជា។
- ស្ថាប័នទាំងពីរនឹងសហការគ្នាដើម្បីសិក្សារួមគ្នាពីបញ្ហាផ្សេងៗ ហើយការស្រាវជ្រាវគប្បីនឹងបន្តមានច្រើនទៀតនៅថ្ងៃអនាគត។ ការសហការគ្នានេះ អាចជាការរៀបចំវេទិកាអន្តរជាតិ ដោយមានការចូលរួមពីភាគីទាំងពីរ នៅកម្ពុជា ឬនៅប្រទេសចិន។
ថ្ងៃសុក្រ ទី២៨ ខែកញ្ញា ឆ្នាំ២០១៨
តាមការព្យាករណ៍របស់ក្រសួងធនធានទឹកនិងឧតុនិយមបានប្រកាសឱ្យដឹងថា ប្រព័ន្ធសម្ពាធទាបបន្តអូសកាត់លើព្រះរាជាណាចក្រកម្ពុជាដែលបង្កឱ្យអាកាសធាតុនៅទូទាំងប្រទេសមានស្ថានភាពដូចខាងក្រោម៖
- ចាប់ពីថ្ងៃទី២៩ ដល់ថ្ងៃទី៣០ ខែកញ្ញា អាចនឹងមានភ្លៀងធ្លាក់ពីតិចទៅបង្គួរក្នុងក្របខ័ណ្ឌទូទាំងប្រទេស។
- ចាប់ពីថ្ងៃទី០១ ដល់ថ្ងៃទី០៧ ខែតុលា អាចនឹងមានភ្លៀងធ្លាក់ពីបង្គួរទៅច្រើនក្នុងក្របខ័ណ្ឌទូទាំងប្រទេស។
នៅក្នុងសេចក្ដីជូនដំណឹងដដែលរបស់ក្រសួងធនធានទឹក និងឧតុនិយម ដែលបានចេញផ្សាយនៅថ្ងៃទី២៨ ខែកញ្ញាឆ្នាំ ២០១៨នេះក៏ បានអំពាវនាវដល់ប្រជាពលរដ្ឋកម្ពុជា ត្រូវមានការប្រុងប្រយ័ត្ន ជាពិសេសនៅតំបន់ទំនាបកណ្ដាល និងតំបន់ខ្ពង់រាបដែលអាចនឹងមានភ្លៀងធ្លាក់ច្រើនរហូតដល់បង្កជាជំនន់ទឹកភ្លៀងផងដែរ។
ប្រភព៖ ការព្យាករណ៍របស់ក្រសួងធនធានទឹកនិងឧតុនិយម
RAC Media | លឹម សុវណ្ណរិទ្ធ
ថ្ងៃសុក្រ ទី២៨ ខែកញ្ញា ឆ្នាំ២០១៨
តាមការផ្សាយរបស់សារព័ត៌មានភ្នំពេញប៉ុស្តិ៍ ថ្ងៃទី២៨ ខែកញ្ញានេះ គឺពាណិជ្ជករជាង ៨០នាក់មកពីប្រទេស កម្ពុជា និងឥណ្ឌូនេស៊ី បានជួបប្រជុំគ្នាកាលពីថ្ងៃទី២៦ ខែកញ្ញា នៅទីក្រុងភ្នំពេញដើម្បីសម្លឹងទៅរកការសហការវិនិយោគលើវិស័យដែលមានសក្ដានុពលរបស់កម្ពុជា។
ការផ្គូផ្គងពាណិជ្ជកម្មនេះ ត្រូវបានរៀបចំឡើងដោយស្ថានទូតឥណ្ឌូនេស៊ីប្រចាំកម្ពុជា ស្របនឹងវេទិកាពាណិជ្ជកម្ម និងការលើកកម្ពស់ទេសចរណ៍របស់ប្រទេសឥណ្ឌូនេស៊ី ឆ្នាំ២០១៨។ លោក Sudiraman Haseng ឯកអគ្គរដ្ឋទូតឥណ្ឌូនេស៊ីបានឱ្យដឹងថា ខណៈការកត់សម្គាល់ពាណិជ្ជកម្មទ្វេភាគីរវាងប្រទេសទាំងពីររក្សាបានកំណើន និងកិច្ចសហប្រតិបត្តិការជាច្រើននៅតែកំពុងរង់ចាំសមភាគី និងភាពជាដៃគូរវាងប្រទេសទាំងពីរ។ ឯកអគ្គរដ្ឋទូតបានបន្តថ្លែងថា៖ «ឱកាស និងកិច្ចសហប្រតិបត្តិការនៅរង់ចាំក្នុងការស្វែងរកដើម្បីការរីកចម្រើន»។ ក្នុងឱកាសនោះដែរ ក្រុមហ៊ុនជាង៣០ របស់ប្រទេសឥណ្ឌូនេស៊ី និងក្រុមហ៊ុនជាង៥០ នៃប្រទេសកម្ពុជា បានចូលរួមក្នុងវេទិកាផ្គូផ្គងពាណិជ្ជកម្មនេះ។ ក្រុមហ៊ុនឥណ្ឌូនេស៊ី គឺមានមកពីវិស័យឱសថ សិប្បកម្ម សម្លៀកបំពាក់ សំណង់ និងគ្រឿងបន្លាស់រថយន្ត។
ទំហំពាណិជ្ជកម្មរវាងប្រទេសទាំងពីរ បានកើនឡើងដល់ជាង ៣១៨លានដុល្លារ នៅរយៈពេល ៧ខែដំបូងឆ្នាំ២០១៨នេះ កើនឡើង ៨,៣ភាគរយ ធៀបនឹងរយៈពេលដូចគ្នាកាលពីឆ្នាំមុន។ តួលេខនេះបានបង្ហាញថា ការនាំចេញរបស់កម្ពុជាទៅឥណ្ឌូនេស៊ីបានកើនឡើងដល់ជាង ១៧លានដុល្លារ កើន ១២,៤១ភាគរយធៀបនឹងឆ្នាំមុន ខណៈការនាំចូលមកពីប្រទេសឥណ្ឌូនេស៊ី មានជាង ៣០១លានដុល្លារ កើនឡើង ៨,០៧ភាគរយ។
ដកស្រង់៖ ភ្នំពេញប៉ុស្តិ៍
RAC Media | ផាញ់ សារឿន