សូមរំឭកជូនថា កាលពីថ្ងៃទី១៨ ឧសភា ឆ្នាំ២០១៨ កន្លងទៅនេះ នៅក្នុងពិធីដាំដើឈើនៅឧទ្យានរាជ​បណ្ឌិត្យ​សភាកម្ពុជា តេជោសែនឫស្សីត្រឹប សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជា​ណា​ចក្រកម្ពុជា បានជួយ​ឧបត្ថម្ភ​ទឹកប្រាក់ក្នុងការចិញ្ចឹមគោយកទឹកដោះនេះ ចំនួន ១០ ម៉ឺនដុល្លារអាម៉េរិក និងមានការ​ចូលរួម​ពីមន្ត្រី​រាជការ និង​សប្បុរសជន​នានា​ជាច្រើនទៀត ដែលសរុបទឹកប្រាក់ទាំងអស់ជាង ១៧ ម៉ឺនដុល្លារអាម៉េរិក។ ដោយមានការលើកទឹកចិត្ត​ពី​ថ្នាក់​ដឹកនាំ​រាជបណ្ឌិត្យសភាកម្ពុជា បានកំណត់គោលដៅ​យ៉ាង​ច្បាស់ថា​នឹង​បង្កើតគម្រោងការចិញ្ចឹមគោយកទឹកដោះ ហើយ​កម្ពុជា​​នឹង​មានទឹកដោះគោស្រស់ដែល សមិទ្ធផល​​​របស់​ស្ថាប័ន​រដ្ឋ​យើង​​នៅឆ្នាំក្រោយនេះ។ 

មកដល់ពេលនេះ គម្រោងសិក្សានិងចិញ្ចឹមគោយកទឹកដោះនៅ​ឧទ្យាន​ឫស្សី​ត្រឹប បាន​ឈាន​ដល់ដំណាក់កាលសំខាន់មួយ ​ហើយក៏ជាដំណាក់កាលសិក្សាចុងក្រោយ មុននឹងបន្ត​កិច្ច​សហការ​ជំហ៊ាន​បន្ទាប់​ជាមួយ​ដៃគូ​ពី​កសិដ្ឋាន​​ចិញ្ចឹមគោ​ទឹកដោះ​នៅ​ខេត្ត​ស្រះកែវ។  

ការសិក្សាចុងក្រោយអំពីបច្ចេកទេសចិញ្ចឹមគោយកទឹកដោះ ការថែទាំ និងការកែច្នៃ​ទឹកដោះ​គោ​ស្រស់​ទៅជា​ផលិតផល​​​សម្រេច ជាគោលបំណងនៃដំណើរទស្សនកិច្ចរបស់ក្រុមស្រាវជ្រាវរាជបណ្ឌិត្យសភា​កម្ពុជា​ទៅកាន់ សហគមន៍​ចិញ្ចឹម​គោយក​ទឹកដោះ វ៉ាងណាំយិន ស្ថិតក្នុង​ខេត្ត​ស្រះកែវ ប្រទេសថៃ នៅថ្ងៃសុក្រ១២រោច ខែស្រាពណ៍ ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី៧ ខែកញ្ញា ឆ្នាំ២០១៨នេះ។ ដំណើរ​ទស្សនកិច្ច​នេះ ដឹកនាំដោយ​ឯកឧត្តម​បណ្ឌិតសភាចារ្យ សុខ ទូច ប្រធាន​រាជ​បណ្ឌិត្យ​សភា​កម្ពុជា។

ឯកឧត្តមប្រធានរាជបណ្ឌិត្យសភាកម្ពុជា បានបង្ហាញនូវទស្សនៈជាវិជ្ជមានពីដំណើរទស្សនកិច្ចសិក្សាមួយ នៅ​កសិដ្ឋាន​គោ​ទឹក​ដោះ​នៅ​ខេត្តស្រះកែវ តាមទំព័រហ្វេសប៊ុគ ថា «ថ្ងៃនេះខ្ញុំបានមកដល់ខេត្តស្រះកែវក្នុងប្រទេសថៃ ដើម្បី​សិក្សាចុងក្រោយ ក្នុងការយកគោទឹកដោះទៅចិញ្ចឹមនៅប្រទេសកម្ពុជាយើង ហើយធ្វើការសរសេរជាសៀវភៅក៏ដូចជាចេញវីដេអូខ្លីៗ​សម្រាប់​ប្រជាកសិករ​អាចយក​ទៅ​ចិញ្ចឹមបន្តទៅទៀត ដើម្បីបង្កើនប្រាក់ចំណូលក្នុងគ្រួសារ​»​។ 

នេះជាការសិក្សាដំណាក់កាលចុងបញ្ចប់លើបច្ចេកទេសចិញ្ចឹមគោយកទឹកដោះ​របស់​ក្រុមការងារ​ស្រាវជ្រាវ​នៃ​រាជបណ្ឌិត្យ​សភា​កម្ពុជា ត្បិតនៅចុងឆ្នាំ២០១៨នេះ រាជបណ្ឌិត្យសភាកម្ពុជា នឹងនាំយកគោទឹកដោះចំនួន​១០០​ក្បាល​ មក​ចិញ្ចឹម​​នៅ​ឧទ្យាន​រាជបណ្ឌិត្យសភាកម្ពុជា​តេជោសែន​ឫស្សីត្រឹប ក្នុងខេត្តព្រះវិហារ។ ការចិញ្ចឹមនៅដំណាក់កាល​ដំបូង ជា​ការ​សិក្សា និងពិសោធន៍​ដោយក្រុមការងារ​ស្រាវជ្រាវ​រាជបណ្ឌិត្យសភាកម្ពុជា បន្ទាប់​មក​ក្រុមការងារ​ស្រាវជ្រាវ នឹងចងក្រង​ជា​ឯកសារ និងជាវីដេអូ ដើម្បីចែកចាយពីបច្ចេកទេស និងរបៀបថែទាំគោ របៀបបូមយកទឹកដោះគោ របៀបដាំស្មៅ ក៏ដូចជា​របៀប​រៀបចំ​អាហារ​បំប៉ន សម្រាប់​ផ្សព្វផ្សាយ​ជូនដល់​ប្រជាកសិករ​ខ្មែរ​យើង​ដែលមាន​បំណង​​បង្កើន​​ប្រាក់ចំណូល​​តាមរយៈ​ការចិញ្ចឹមគោ​យកទឹកដោះនេះ។

គួររំឭកថា ឯកឧត្តមបណ្ឌិតសភាចារ្យ សុខ ទូច ប្រធានរាជបណ្ឌិត្យសភាកម្ពុជា បានផ្តួចផ្តើមគម្រោង​ការ​ចិញ្ចឹម​​គោ​យក​ទឹកដោះ ក្នុងគោលបំណងសំខាន់បង្កើតការងារថ្មីសម្រាប់អ្នកស្រាវជ្រាវ រៀបចំចងក្រងនូវឯកសារ​​​សម្រាប់​អ្នក​ចិញ្ចឹម​គ្រប់គ្នា។ រាជបណ្ឌិត្យសភាកម្ពុជា មិនត្រឹមតែផលិតនូវឯកសារជាសៀវភៅប៉ុណ្ណោះទេ គឺ​​រៀបចំ​ផលិត​ទាំង​ឯកសារ​ជា​វីដេអូ​ខ្លី ជា​រូបភាព​ផ្សេងពាក់ព័ន្ធនឹងវិស័យកសិកម្ម សម្រាប់ធ្វើជាជំនួយដល់អ្នកសិក្សា និង​កសិករ ដែល​មាន​ចំណាប់​​អារម្មណ៍​ក្នុង​វិស័យ​កសិកម្ម។ ក្រៅពីគម្រោងការ​ចិញ្ចឹមគោ​យកទឹកដោះ​នេះ នៅ​​មាន​គម្រោង​ជាច្រើន​នឹង​អនុវត្ត​​នៅ​​ឧទ្យាន​​​រាជ​បណ្ឌិត្យ​សភា​កម្ពុជា​​​តេជោសែន​​ឫស្សីត្រឹប ដូចជា គម្រោងការ​បង្កើតសួន​សត្វសាហ្វារី គម្រោង​បង្កើត​​កសិដ្ឋាន​​ចិញ្ចឹម​ដង្កូវនាង ជាដើម ហើយគម្រោងការទាំងនេះ សុទ្ធតែមានគោលដៅបង្កើតការងារជូន​​ប្រជា​ពលរដ្ឋ​​ដែល​រស់នៅ​ជុំវិញ​​តំបន់​ឧទ្យាន​ឫស្សីត្រឹប ដែល​នឹងក្លាយជាចំណែកមួយជួយបង្កើនប្រាក់ចំណូលប្រចាំ​គ្រួសារ​ និង​ជួយ​កាត់បន្ថយ​ការ​អាស្រ័យ​លើ​អនុផល​ព្រៃឈើ ដូចជា ការកាប់ឈើ ការរានដីព្រៃ និងការ​ប្រមាញ់​សត្វ​ព្រៃ ជាដើម។ រាជបណ្ឌិត្យសភាកម្ពុជា មាន​គោលដៅ​ចូលរួមចំណែក​ស្រាវជ្រាវ​រករបកគំហើញ​ថ្មីៗ​បន្ថែម​ទៀត ដើម្បីជូនដល់រាជរដ្ឋាភិបាល និងប្រជាជនកម្ពុជា សំដៅលើកកម្ពស់​កម្រិត​ជីវភាព​របស់​កសិករ​យើង​ឱ្យស្រប​នឹង​គោលនយោបាយជាតិ​ដែល​បាន​កំណត់​ថា នៅឆ្នាំ២០៣០ កម្ពុជានឹងក្លាយជា​ប្រទេស​មានចំណូលមធ្យមកម្រិតខ្ពស់ និងក្នុងឆ្នាំ២០៥០ កម្ពុជានឹងក្លាយទៅជាប្រទេសមានចំណូលខ្ពស់៕