ក្នុងនាមឯកឧត្តមបណ្ឌិតសភាចារ្យ សុខ ទូច ប្រធានរាជបណ្ឌិត្យសភាកម្ពុជា ឯកឧត្តមបណ្ឌិត យង់ ពៅ អគ្គលេខាធិការនៃរាជបណ្ឌិត្យសភាកម្ពុជា បានអញ្ជើញជាអធិបតីក្នុងពិធីចុះអនុស្សរណៈយោគយល់រវាងវិទ្យាស្ថានខុងជឺនៃរាជ​បណ្ឌិត្យសភាកម្ពុជា ជាមួយនឹងសាកលវិទ្យាល័យតុងហ័រ នៃសាធារណរដ្ឋប្រជាមានិតចិន។ ការចុះអនុស្សរណៈ យោគយល់នោះធ្វើនៅថ្ងៃចន្ទ១១កើត ខែភទ្របទ ឆ្នាំ កុរ ឯកស័ក ព.ស. ២៥៦៣ ត្រូវនឹងថ្ងៃទី ៩ ខែ កញ្ញា ឆ្នាំ ២០១៩ នៅក្នុងបន្ទប់ប្រជុំរបស់វិទ្យាស្ថានខុងជឺនៃរាជបណ្ឌិត្យសភាកម្ពុជា។

នៅក្នុងឱកាសនៃជំនួបនោះ ឯកឧត្តមបណ្ឌិត យង់ ពៅ បានសូមឱ្យភាគីចិនជួយប្រទេសកម្ពុជាលើការអភិវឌ្ឍវិស័យបច្ចេកវិជ្ជា ព្រោះថាប្រទេសចិនក៏ជាប្រទេសមួយដែលមានបច្ចេកវិជ្ជាជឿនលឿន ហើយនៅពេលនេះប្រទេសកម្ពុជាកំពុងតែត្រូវការវិស័យបច្ចេកវិជ្ជានេះដើម្បីជួយដល់ការអភិវឌ្ឍប្រទេស។ យើងបានដឹងថានៅពេលនេះសហរដ្ឋអាម៉េរិក និងប្រទេសចិនកំពុងតែមានសង្គ្រាមពាណិជ្ជកម្មជាមួយគ្នា ដែលមូលហេតុសំខាន់នៃសង្គ្រាមពាណិជ្ជកម្មនោះ ក៏ព្រោះតែភាពជឿនលឿននៃបច្ចេកវិជ្ជារបស់ចិនផងដែរ។

ឯកឧត្តមបណ្ឌិតក៏បានបន្ថែមទៀតថា នៅពេលបច្ចុប្បន្ននេះ ប្រទេសមហាអំណាចនានាក្នុងពិភពលោក ដែលមានដូចជាសហរដ្ឋអាម៉េរិក រុស្ស៊ី ជប៉ុន កូរ៉េខាងត្បូង និងប្រទេសចិន សុទ្ធតែបានមើលឃើញពីភាពចាំបាច់និងសារៈសំខាន់របស់អាស៊ាន ហើយប្រទេសមហាអំណាចទាំងនោះ បានប្រើគ្រប់មធ្យោបាយដើម្បីបញ្ច្រាបដែនអំណាច ឬឥទ្ធិពលរបស់ពួកគេមកលើតំបន់អាស៊ាន។ ចំណុចនេះបញ្ជាក់ថា ប្រទេសចិនត្រូវតែមានគោលការណ៍ច្បាស់លាស់ក្នុងការពង្រីកមិត្តភាព ឬដៃគូជាមួយប្រទេសនៅក្នុងតំបន់អាស៊ាន ព្រោះថា បើសិនជាចិនមិនមានគោលការណ៍ច្បាស់លាស់នោះទេ ប្រទេសនៅក្នុងតំបន់អាស៊ាន និងងាកទៅរកប្រទេសណាដែលមានភាពច្បាស់លាស់ហើយ។

ប្រតិភូសាកលវិទ្យាល័យតុងហ័រ បានកោតសរសើរ និងទទួលយកយោបល់របស់ឯកឧត្តមបណ្ឌិត យង់ ពៅ អំពីសារៈសំខាន់របស់តំបន់អាស៊ាន ក៏ដូចជាសារៈសំខាន់របស់កម្ពុជា ហើយបានសន្យាថានឹងជួយឱ្យមានទំនាក់ទំនងជាមួយរាជបណ្ឌិត្យសភាកម្ពុជាឱ្យបានកាន់តែស៊ីជម្រៅបន្ថែមទៀត។ នៅក្នុងជំនួបនៃពិធីចុះអនុស្សរណៈយោគយល់នោះ ភាគីចិនក៏បានលើកឡើងអំពីការប្រើប្រាស់ថាមពលស្អាត ដែលកើតចេញពីការប្រើប្រាស់ថាមពលពន្លឺព្រះអាទិត្យ សម្រាប់ប្រើប្រាស់នៅក្នុងការអភិវឌ្ឍប្រទេស ហើយសាកលវិទ្យាល័យតុងហ័រនឹងជួយជ្រោមជ្រែងរាជ​បណ្ឌិត្យសភាកម្ពុជា តាមរយៈការអញ្ជើញមន្ត្រីរាជបណ្ឌិត្យសភាកម្ពុជាទៅចូលរួមក្នុងការបណ្តុះបណ្តាលនៅប្រទេសចិន ការជួយជាជំនួយបច្ចេកទេស និងការអនុវត្តគម្រោងជាក់ស្តែងដែលភាគីទាំងពីរបានព្រមព្រៀងគ្នាជាមុន ជាពិសេសភាគីចិនមានបំណងជួយទីជនបទនៃប្រទេសកម្ពុជាមានភ្លើងអគ្គិសនីសម្រាប់ប្រើប្រាស់គ្រប់គ្រាន់ ដើម្បីរួមចំណែកអភិវឌ្ឍប្រទេសជាមួយរាជរដ្ឋាភិបាលកម្ពុជា។

RAC Media