ភ្នំពេញ៖ នៅព្រឹកថ្ងៃចន្ទ ១១កើត ខែភទ្របទ ឆ្នាំកុរ ឯកស័ក ព.ស. ២៥៦៣ ត្រូវនឹងថ្ងៃទី៩ ខែកញ្ញា ឆ្នាំ២០១៩ នេះ ក្នុងពិធីសិតរូបបដិមាព្រះនាងឥន្ទ្រទេវីនៅរាជបណ្ឌិត្យសភាកម្ពុជា ឯកឧត្ដមបណ្ឌិតសភាចារ្យ សុខ ទូច ប្រធានរាជបណ្ឌិត្យសភាកម្ពុជា បានថ្លែងគូសបញ្ជាក់និងរំឭកអំពីគុណបំណាច់យ៉ាងធំធេងក្នុងវិស័យអប់រំខ្មែរ របស់ព្រះនាងឥន្ទ្រទេវី ជាព្រះអគ្គមហេសីព្រះបាទជ័យវរ្ម័នទី៧ ព្រះមហាក្សត្រដ៏ឆ្នើមរបស់ខ្មែរ។

ឯកឧត្ដមបណ្ឌិតសភាចារ្យ បានលើកឡើងនូវហេតុផលជាទស្សនវិជ្ជាចំនួន៥ ដែលព្រះនាងជានិមិត្តរូបនៃវិស័យអប់រំខ្មែរ គឺ៖
១. ព្រះនាងជាស្ត្រីខ្មែរទីមួយដែលបង្កើតវិស័យអប់រំ
២. ព្រះនាងជាស្ត្រីខ្មែរទីមួយដែលផ្លាស់ប្ដូរទូដាក់ចានស្រាក់ចាន ទៅជាទូសម្រាប់ដាក់សៀវភៅ ហើយព្រះនាងបានកែប្រែសាលាឆទានទៅជាបណ្ណាល័យសម្រាប់ការសិក្សា
៣. ព្រះនាងជាអ្នកផ្ដល់យោបល់និងចក្ខុវិស័យដល់ថ្នាក់ដឹកនាំជាតិ
៤. ព្រះនាងបានប្រែក្លាយទស្សនៈយល់ឃើញមួយរបស់ខ្មែរ ដែលមុនសម័យអង្គរ ខ្មែរតែងតែបានឱ្យតម្លៃនារីត្រឹមតែថា «ស្ត្រីនៅមិនឆ្ងាយពីចង្ក្រាន្ត»
៥. ព្រះនាងឥន្ទ្រទេវីបានធ្វើឱ្យមានសុខដុមនីយកម្មរវាងសាសនាព្រះពុទ្ធ និងព្រហ្មញ្ញសាសនា។

គួរបញ្ជាក់ផងដែរថា នៅព្រឹកថ្ងៃចន្ទ ទី៩ ខែកញ្ញា ឆ្នាំ២០១៩ នេះ រូបបដិមាព្រះនាងឥន្ទ្រទេវី នៅរាជបណ្ឌិត្យសភាកម្ពុជា ត្រូវបានប្រារព្ធពិធីសិត ក្រោមអធិបតីលោកជំទាវកិត្តិសង្គហបណ្ឌិត ម៉ែន សំអន ឧបនាយករដ្ឋមន្ត្រី រដ្ឋមន្ត្រីក្រសួងទំនាក់ទំនងរដ្ឋសភា-ព្រឹទ្ធសភា និងអធិការកិច្ច និងជាឧបនាយករដ្ឋមន្ត្រីជាស្ត្រីតែមួយរូបគត់ ក្នុងរាជរដ្ឋាភិបាលនៃព្រះរាជាណាចក្រកម្ពុជា៕

RAC Media | លឹម សុវណ្ណរិទ្ធ