បន្ទាប់ពីបានជួបសំណេះសំណាលជាមួយលោកជំទាវកិត្តិសង្គហបណ្ឌិត ឃួន សុដារី អនុប្រធានទី២ នៃរដ្ឋសភា កាលពីព្រឹកថ្ងៃទី២៥ ខែមិថុនា ឆ្នាំ២០១៩ កាលពីម្សិលមិញនេះ នៅរសៀលថ្ងៃដដែល ឯកឧត្តមបណ្ឌិតសភាចារ្យ សុខ ទូច ប្រធានរាជបណ្ឌិត្យសភាកម្ពុជា និងជាអនុប្រធានប្រចាំការនៃក្រុមប្រឹក្សាបណ្ឌិតសភាចារ្យ បានអញ្ជើញក្រសួងផែនការជាបន្តដើម្បីជួបសំណេះសំណាលជាមួយនឹងឯកឧត្តមរដ្ឋមន្ត្រីក្រសួងផែនការ ដែលទើបទទួលបានងារជា «កិត្តិសេដ្ឋាបណ្ឌិត»នៃរាជបណ្ឌិត្យសភាកម្ពុជា តាមព្រះរាជទានរបស់ព្រះមហាក្សត្រតាមការស្នើរបស់សម្តេចនាយករដ្ឋមន្ត្រីនៃព្រះរាជាណាចក្រកម្ពុជា។ យោងតាមព្រះរាជក្រឹត្យ នស/រកត/០៤១៩/៥១៤ ចុះថ្ងៃទី១០ ខែមេសា កន្លងទៅនេះ ឯកឧត្ដម ឆាយ ថន បានទទួលការប្រោសប្រទានគោរមងារកិត្តិយសនៃរាជបណ្ឌិត្យសភាកម្ពុជា ជា «កិត្តិសេដ្ឋាបណ្ឌិត»។

សូមបញ្ជាក់ថា គោរមងារកិត្តិយស‌ «កិត្តិសេដ្ឋាបណ្ឌិត» ជាគោរមងារមួយក្នុងចំណោមគោរមងារកិត្តិយសទាំង៧ របស់រាជបណ្ឌិត្យសភាកម្ពុជា ជាគោរមងារកិតិ្តយសដ៏ឧត្ដុង្គឧត្ដម នៃរាជបណ្ឌិត្យសភាកម្ពុជា ដែលប្រគល់ជូនវរជនខ្មែរដែលបានធ្វើការបម្រើជាតិចាប់ពី៣០ឆ្នាំឡើងទៅ ហើយមានបំណាច់ និងស្នាដៃចំពោះប្រទេសជាតិលើវិស័យសេដ្ឋកិច្ច ហិរញ្ញវត្ថុ និងការអភិវឌ្ឍនានា។

ឯកឧត្ដមកិត្តិសេដ្ឋាបណ្ឌិត ឆាយ ថន ជាឥស្សរជនជាន់ខ្ពស់របស់ជាតិទីពីរ ដែលទទួលបានគោរមងារកិត្តិយសនេះ បន្ទាប់ពីឯកឧត្ដមកិត្តិបរិរក្សបណ្ឌិត គាត ឈន់ ដែលទទួលបានគោរមងារកិត្តិយស ‌«កិត្តិសេដ្ឋាបណ្ឌិត» នៅថ្ងៃទី១៧ ខែកញ្ញា ឆ្នាំ២០១៩ ទុកជាគោរមវ័ន្តទី១ និងឯកឧត្ដមកិត្តិសេដ្ឋាបណ្ឌិត ចម ប្រសិទ្ធ ទុកជាគោរវ័ន្តទី២ដែលទទួលបានគោរមងារកិត្តិយសជា«កិត្តិសេដ្ឋាបណ្ឌិត»នេះ កាលពីថ្ងៃទី១២ ខែមេសា ឆ្នាំ២០១៨ កន្លងទៅនេះ៕

RAC Media