ព័ត៌មាន

បណ្ឌិត យង់ ពៅ៖ កម្ពុជាត្រូវបន្តធ្វើកំណែទម្រង់ផ្ទៃក្នុងឱ្យស៊ីជម្រៅលើវិស័យការងារ ដើម្បីដណ្តើមឧត្តមភាពប្រកួតប្រជែង រក្សាកំណើននៃការនាំចេញ និងទាក់ទាញការវិនិយោគបន្ថែម

2025-02-04 05:51:48 ថ្ងៃអង្គារ, 04 កុម្ភៈ 2025 ម៉ោង 12:51 PM
អ្នកមើល 5400
post_detail1

ឆ្លើយតបទៅនឹងសំណួររបស់អ្នកសារព័ត៌មាន អំពីយុទ្ធសាស្ត្រដែលកម្ពុជាគួរប្រកាន់ខ្ជាប់ដើម្បីរក្សាកំណើននៃការនាំចេញ និងទាក់ទាញការវិនិយោគ លោកបណ្ឌិត យង់ ពៅ អ្នកជំនាញវិទ្យាសាស្ត្រនយោបាយ បានគូសបញ្ជាក់ថា កម្ពុជាត្រូវបន្តធ្វើកំណែទម្រង់ផ្ទៃក្នុងឱ្យស៊ីជម្រៅលើវិស័យការងារ ដើម្បីដណ្តើមឧត្តមភាពប្រកួតប្រជែង រក្សាកំណើននៃការនាំចេញ និងទាក់ទាញការវិនិយោគបន្ថែម ដើម្បីធានាឱ្យបានថា កម្ពុជាអាចប្រឈមមុខការប្រែប្រួលផ្សេងៗដែលអាចកើតមានឡើង ទាំងនៅក្នុងសណ្ដាប់ធ្នាប់ពិភពលោកថ្មី ក៏ដូចជាការប្រែប្រួលខាងយុទ្ធសាស្ត្ររបស់មហាអំណាចតំបន់និងពិភពលោក។

លោកបណ្ឌិត យង់ ពៅ បានគូសបញ្ជាក់ថា បើទោះបីជាមានការជជែកពិភាក្សាមិនឯកភាពគ្នាទៅលើបញ្ហាប្រព័ន្ធអនុគ្រោះពន្ធ GSP ឬ EBA សម្រាប់ប្រទេសកម្ពុជាក្ដី ប៉ុន្តែតាមរយៈរបាយការណ៍នាំចេញរបស់កម្ពុជា បានបង្ហាញថា ការនាំចេញពីកម្ពុជាទៅកាន់សហរដ្ឋអាម៉េរិក និងអឺរ៉ុប ពិតជាសម្រេចបានកំណើនគួរឱ្យកត់សម្គាល់ ដែលគួរឱ្យអបអរសាទរ។ លោកបណ្ឌិតបន្តថា នេះគឺជាភាពជោគជ័យមួយរបស់រាជរដ្ឋាភិបាលកម្ពុជា នីតិកាលទី៧ នៃរដ្ឋសភា។ ទោះជាយ៉ាងណា លោកបណ្ឌិតបានបន្តថា កម្ពុជាគួរតែច្បាមយកឱកាសនៃការនាំចេញទៅក្រៅប្រទេសឱ្យកាន់តែប្រសើរឡើងបន្ថែមទៀត ដើម្បីធានាស្ថិរភាពទីផ្សារនាំចេញ តាមរយៈការដាក់ចេញនូវយុទ្ធសាស្ត្រជំរុញទីផ្សារកាន់តែទូលំទូលាយ ដោយមិនគួរពឹងផ្អែកតែទៅលើទីផ្សារណាមួយដែលអាស្រ័យនិន្នាការនៃរដ្ឋបរទេសទាំងនោះខ្លាំងពេក។

 

បើតាមលោកបណ្ឌិត យង់ ពៅ ប្រទេសកម្ពុជាគួរតែដាក់ចេញយុទ្ធសាស្ត្រឱ្យបានជាក់លាក់បន្ថែមពីលើយុទ្ធសាស្ត្រដែលកំពុងអនុវត្តនាពេលបច្ចុប្បន្ន ដោយលោកបានលើកឡើង ៥ចំណុចគឺ៖

១- ការធ្វើពិពិធកម្មការទូតនយោបាយ និងការទូតសេដ្ឋកិច្ច៖

កម្ពុជាត្រូវការធ្វើពិពិធកម្មនៅក្នុងទំនាក់ទំនងរបស់ខ្លួនជាមួយនឹងបណ្ដាប្រទេសនានា ទាំងដៃគូបច្ចុប្បន្ន និងបណ្ដាប្រទេសដទៃផ្សេងៗទៀត ដែលកម្ពុជាអាចមានលទ្ធភាពកសាងទំនាក់ទំនងល្អជាមួយ ដោយអនុលោមតាមច្បាប់ជាតិ និងច្បាប់អន្តរជាតិ។ ថ្វីដ្បិតតែរាជរដ្ឋាភិបាលនីតិកាលទី៧ នៃរដ្ឋសភា បានធ្វើពិពិធកម្មការទូតនយោបាយ និងការទូតសេដ្ឋកិច្ចបានល្អប្រសើរក្ដី ប៉ុន្តែបើតាមទស្សនៈយល់ឃើញរបស់លោកបណ្ឌិត យង់ ពៅ កម្ពុជាត្រូវជំរុញការធ្វើពិពិធកម្មការទូតនយោបាយ និងការទូតសេដ្ឋកិច្ចបន្ថែមទៀត ដោយកម្ពុជាត្រូវបង្កើនទំនាក់ទំនងល្អនិងកិច្ចសហប្រតិបត្តិការកាន់តែប្រសើរជាមួយនឹងបណ្ដាប្រទេសថ្មីៗ ទាំងទៅលើវិស័យនយោបាយ និងសេដ្ឋកិច្ច តាមរយៈការជំរុញភាពសកម្មនៃតំណាងការទូតកម្ពុជានៅឯបរទេស ដោយត្រូវបង្ហាញនូវសក្ដានុពល និងលក្ខខណ្ឌអំណោយផលរបស់ប្រទេសកម្ពុជា ចំពោះការវិនិយោគ និងការដោះដូរពាណិជ្ជកម្មជាលក្ខណៈទ្វេភាគី ឬពហុភាគី។ តាមរយៈនេះ តំណាងបេសកកម្មការទូតកម្ពុជានៅឯបរទេស គួរតែតាំងបង្ហាញនូវផលិតផលទាំងឡាយរបស់កម្ពុជា ទាំងផលិតផលកសិកម្ម ឧស្សាហកម្ម ក៏ដូចជាទេសចរណ៍ជាដើម នៅក្នុងឱកាសសមស្របណាមួយ រាប់ចាប់តាំងពីពិធីបុណ្យប្រពៃណីខ្មែរ ពិធីបុណ្យឯករាជ្យ ឬពិធីបុណ្យផ្សេងៗនៅក្នុងរដ្ឋម្ចាស់ផ្ទះ ដែលអាចអនុញ្ញាតឱ្យមហាជននៅក្នុងប្រទេសដែលខ្លួនកំពុងបំពេញបេសកកម្ម បានដឹង បានស្គាល់ និងអាចស្វែងយល់បន្ថែមកាន់តែច្រើនពីសក្ដានុពលរបស់ប្រទេសកម្ពុជាបាន។

២- ការរៀបចំបទដ្ឋានការងារកាន់តែប្រសើរឡើងបន្ថែមទៀត៖

បើទោះបីជារាជរដ្ឋាភិបាលនីតិកាលទី៧ នៃរដ្ឋសភា បានរៀបចំជំរុញភាពសុខដុមនៃការបំពេញការងារបានកម្រិតមួយល្អប្រសើរហើយក្ដី ក៏ប៉ុន្តែនៅចំពោះមុខស្ថានភាពនៃការវិវត្តជាសាកលនាពេលបច្ចុប្បន្ន កម្ពុជានៅតែមានភាពចាំបាច់នៅក្នុងការរៀបចំបទដ្ឋានការងារកាន់តែប្រសើរឡើងបន្ថែមទៀត ដើម្បីធានាបាននូវភាពសុខដុមសម្រាប់វិនិយោគិន និយោជក និងនិយោជិតទាំងឡាយ ហើយបង្កបរិយាកាសល្អប្រសើរសម្រាប់ការបំពេញការងារនៅក្នុងវិស័យនីមួយៗ។ ត្រង់ចំណុចនេះ រាជរដ្ឋាភិបាលត្រូវត្រួតពិនិត្យ និងពង្រឹងឱ្យកាន់តែប្រសើរឡើងថែមទៀត រាប់ចាប់តាំងពីបទដ្ឋានការងារ ច្បាប់ការងារ និងលក្ខខណ្ឌនៅទីកន្លែងបំពេញការងារផ្សេងៗ។

៣- ការពង្រឹងគុណភាពសេវាកម្មនិងផលិតកម្មរបស់កម្ពុជា

កម្ពុជាត្រូវតែពង្រឹងនូវគុណភាពនៃការបំពេញសេវាកម្មនិងជំរុញផលិតកម្មកាន់តែប្រសើរបន្ថែមទៀត ព្រោះទីផ្សារនាំចេញផលិតផលរបស់កម្ពុជា គឺជាទីផ្សារដែលផ្ដោតជាសំខាន់ទៅលើគុណភាពផលិតផល ដូចជាសហភាពអឺរ៉ុប និងសហរដ្ឋអាម៉េរិក ដែលកម្ពុជាបាននិងកំពុងផលិតនូវផលិតផលម៉ាកល្បីៗរបស់ពិភពលោក យ៉ាងច្រើនសន្ធឹកសន្ធាប់ ដែលទាមទារឱ្យមានការប្រកួតប្រជែងស្តង់ដារគុណភាពផលិតផលកាន់តែខ្លាំងឡើងថែមទៀត។

៤- ការធានាស្ថិរភាពនយោបាយ៖

ប្រទេសកម្ពុជា ដែលបច្ចុប្បន្នកំពុងតែមាននូវស្ថិរភាពនយោបាយនិងសង្គម នៅតែជាប្រធានបទចាំបាច់ និងមានលក្ខណៈដាច់ខាតសម្រាប់កម្ពុជាត្រូវតែសម្រេចឱ្យបាន។ ស្ថិរភាពនយោបាយ គឺជាមូលដ្ឋានដ៏សំខាន់ ដែលជាបុព្វលក្ខខណ្ឌផ្ដល់ឱកាសឱ្យអ្នកវិនិយោគបរទេសនិងក្នុងស្រុក អាចដាក់ទុនវិនិយោគ និងរកស៊ី ដោះដូរពាណិជ្ជកម្មបានដោយទំនុកចិត្ត និងគ្មានការព្រួយបារម្ភចំពោះហានិភ័យផ្សេងៗ ព្រមទាំងធានាបាននូវនិរន្តរភាពជាប្រក្រតីនៃដំណើរការអាជីវកម្មរបស់ខ្លួន។

៥- ការបន្តកំណែទម្រង់ស៊ីជម្រៅបន្ថែម៖

កម្ពុជាមានភាពចាំបាច់នៅក្នុងការធ្វើពិពិធកម្មការវិនិយោគ ហើយការធ្វើវិសោធនកម្មច្បាប់ដែលបង្កលក្ខខណ្ឌអំណោយផលដល់ការវិនិយោគពីបរទេស គឺជារឿងដ៏សំខាន់មួយដែលរាជរដ្ឋាភិបាលកម្ពុជាត្រូវគិតគូរពិចារណាផងដែរ។ ច្បាប់ថ្មី ដែលត្រូវធ្វើវិសោធនកម្មនោះគឺ ត្រូវសម្របសម្រួល និងផ្ដល់លក្ខខណ្ឌល្អប្រសើរ​ចំពោះរាល់ក្រុមហ៊ុនបរទេសទាំងឡាយ ពិសេសក្រុមហ៊ុន​ ដែលមកពីប្រទេសនាំចូលទំនិញសំខាន់ៗពីកម្ពុជា សំដៅធ្វើយ៉ាងណា លើកទឹកចិត្តវិនិយោគិនពីប្រទេសទាំងនោះ ឱ្យសម្លឹងមើលឃើញពីឱកាសចំណេញនិងភាពងាយស្រួលនៅក្នុងការវិនិយោគបង្កើតរោងចក្រសគ្រាសនៅក្នុងប្រទេសកម្ពុជា៕

RAC Media | លឹម សុវណ្ណរិទ្ធ

អត្ថបទទាក់ទង

ប្រវត្តិស្រុករតនមណ្ឌល និងរមណីយដ្ឋានទេសចរណ៍ ដោយ៖ លោក សួ ប៉ុណ្ណារ៉ាត់ ប្រធាននាយកដ្ឋានប្រវត្តិវិទ្យានិងវិទ្យាសាស្រ្តនយោបាយ

ខេត្តបាត់ដំបង ជាខេត្តចំណាស់មួយដែលស្ថិតនៅភាគពាយ័ព្យនៃប្រទេសកម្ពុជា ធ្លាប់មានប្រវត្តិរឿងរ៉ាវបែបប្រវត្តិសាស្រ្ត ស្មុគស្មាញជាមួយប្រទេសជិតខាង។ តាមសន្ឋិសញ្ញាបារាំង-សៀម ចុះថ្ងៃទី២៣ ខែមីនា ឆ្នាំ១៩០៧ តម្រូវឱ្យ...

2023-11-29 07:46:58   ថ្ងៃពុធ, 29 វិច្ឆិកា 2023 ម៉ោង 02:46 PM
ទម្លាប់ (custom) ដោយ លោក បណ្ឌិត ក្តាន់ ធុល នាយកដ្ឋានទស្សនវិជ្ជានិងសង្គមវិជ្ជា,វិទ្យាស្ថានមនុសាស្ត្រ​ និងវិទ្យាសង្គម,

មនុស្សគ្រប់ជាតិសាសន៍នៅលើ លោកនេះ សុទ្ធតែមានមាន ទម្លាប់ របស់ ខ្លួនគ្រប់ៗគ្នា។ វាអាចជា ទម្លាប់របស់ បុគ្គល, ទម្លាប់របស់គ្រួសារ, ឬអាចជា ទម្លាប់របស់ស្រុកទេស។ ទម្លាប់របស់ បុគ្គលបង្កើតឱ្យមានទម្លាប់គ្រួសារ ដែ...

2023-11-24 09:48:39   ថ្ងៃសុក្រ, 24 វិច្ឆិកា 2023 ម៉ោង 04:48 PM
សារៈសំខាន់ក្នុងការចែករំលែកចំណេះដឹង និងបទពិសោធន៍របស់ស្រ្ដី ដោយ៖ លោកស្រីបណ្ឌិត ជា វណ្ណី ប្រធាននាយកដ្ឋានធម្មសាស្រ្ត ចរិយាសាស្រ្ត និង យេនឌ័រនៃវិទ្យាស្ថានមនុស្សសាស្រ្តនិងវិទ្យាសាស្រ្តសង្គមនៃរាជបណ្ឌិត្យសភាកម្ពុជា

នាពេលបច្ចុប្បន្ននេះ ស្រ្តីបានដើរតួនាទីសំខាន់ក្នុងការជួយអភិវឌ្ឍន៍សង្គមជាតិ មិនថានៅក្នុងគ្រួសារ សហគមន៍ ឬស្ថាប័ន សហគ្រាសនោះឡើយ ហើយក៏មានមានស្រ្តីជាច្រើនរូបដែលមានភាពក្លាហាន​ក្នុងការចែករំលែក​ចំណេះ​ដឹងនិងបទព...

2023-11-23 09:03:23   ថ្ងៃព្រហស្បតិ៍, 23 វិច្ឆិកា 2023 ម៉ោង 04:03 PM
សិក្ខាសាលាអន្តរជាតិ ស្តីពី «ការផ្សព្វផ្សាយលទ្ធផលស្រាវជ្រាវរួមគ្នាសម្រាប់ឆ្នាំទី១ និងទី២ នៃគម្រោងកសាងសមត្ថភាពស្រាវជ្រាវគោលនយោបាយជាតិកម្ពុជា និងយន្តការសម្រាប់កិច្ចសហប្រតិបត្តិការរវាងរដ្ឋកូរ៉េ-កម្ពុជា»

ឯកឧត្តមបណ្ឌិតសភាចារ្យ សុខ ទូច ប្រធានរាជបណ្ឌិត្យសភាកម្ពុជា ផ្ដល់កិត្តិយសចូលរួមក្នុងសិក្ខាសាលាអន្តរជាតិដែលបានរៀបចំដោយវិទ្យាស្ថានស្រាវជ្រាវច្បាប់កូរ៉េ (KLRI) នៅព្រឹកថ្ងៃពុធ ទី២២ ខែវិច្ឆិកា ឆ្នាំ២០២៣ នៅទី...

2023-11-22 07:41:28   ថ្ងៃពុធ, 22 វិច្ឆិកា 2023 ម៉ោង 02:41 PM
ដើមអាណត្តិថ្មីនៃនយោបាយកម្ពុជា និងយុទ្ធសាស្ត្របញ្ចកោណដំណាក់កាលទី១ ​ដោយ លោក អ៊ុច លាង៖ អ្នកសិក្សាស្រាវជ្រាវ នៃនាយកដ្ឋានសិក្សាអាស៊ី អាហ្វ្រិក និងមជ្ឈិមបូព៌ា នៃវិទ្យាស្ថានទំនាក់ទំនង​​​អន្តរជាតិនៃកម្ពុជា នៃរាជបណ្ឌិត្យសភាកម្ពុជា

ការបោះឆ្នោតជ្រើសតាំងតំណាងរាស្ត្រអាណត្តិទី៧ កាលពីថ្ងៃអាទិត្យ ទី២៣ ខែកក្កដា ឆ្នាំ២០២៣ ដោយគណបក្សប្រជាជនកម្ពុជាទទួលបានសម្លេងគាំទ្រងចំនួន៨២.៣% និងទទួលបាន ១២០អាសនៈ នៃរដ្ឋសភាលើចំនួន១២៥អាសនៈ បានបង្ហាញអំពីភាពជ...

2023-11-21 10:51:37   ថ្ងៃអង្គារ, 21 វិច្ឆិកា 2023 ម៉ោង 05:51 PM
Cambodia-Vietnam Relations in the New Era

August 2023 marked a new chapter of Cambodian history of over 500 years with peaceful and smooth transition of power. Samdech Thipadei Dr. Hun Manet succeeded his father and long-serving prime ministe...

2023-11-21 08:04:59   ថ្ងៃអង្គារ, 21 វិច្ឆិកា 2023 ម៉ោង 03:04 PM

សេចក្តីប្រកាស