(រាជធានីភ្នំពេញ)៖ នៅព្រឹកថ្ងៃចន្ទ ៤ កើត ខែកត្ដិក ឆ្នាំរោង ឆស័ក ពុទ្ធសករាជ ២៥៦៨ ត្រូវនឹងថ្ងៃទី៤ ខែវិច្ឆិកា ឆ្នាំ២០២៤នេះ ឯកឧត្ដមបណ្ឌិតសភាចារ្យ សុខ ទូច ប្រធានរាជបណ្ឌិត្យសភាកម្ពុជា បានអញ្ជើញចុះអនុស្សារណៈនៃការយោគយល់គ្នា ស្ដីពី កិច្ចសហប្រតិបត្តិការស្រាវជ្រាវ និងគម្រោង ជាមួយនឹងក្រសួងអប់រំ យុវជន និងកីឡា និងសាកលវិទ្យាល័យជាតិសេអ៊ូល នៃសាធារណរដ្ឋកូរ៉េ នៅទីស្ដីការក្រសួងអប់រំ យុវជន និងកីឡា។

អនុស្សរណៈនៃការយោគយល់គ្នានាឱកាសនេះ ធ្វើឡើងដើម្បីឈានទៅសម្រេចបាននូវគោលបំណងនៃការសាងសង់ "សាលារៀនទឹកភ្លៀងចំនួន ១ ០០០កន្លែង នៅក្នុងប្រទេសកម្ពុជា" ដើម្បីឆ្លើយតបទៅនឹងការប្រែប្រួលអាកាសធាតុ ស្របតាមគោលការណ៍ណែនាំនៃរបៀបវារៈសកម្មភាពទឹករបស់អង្គការសហប្រជាជាតិ, ផ្ដល់ការអប់រំនិងបណ្ដុះបណ្ដាលបច្ចេកទេសដល់វិស្វករ សាធារណជន និងសិស្សានុសិស្ស ណែនាំការធ្វើនវានុវត្តន៍ផ្នែកបច្ចេកទេស សេដ្ឋកិច្ច និងសង្គមសម្រាប់ការបង្កើតប្រព័ន្ធទឹកភ្លៀងផ្អែកលើសហគមន៍សម្រាប់ការផឹកនៅក្នុងសហគមន៍កម្ពុជា ព្រមទាំងប្រមូលផ្ដុំនិងផ្សព្វផ្សាយចំណេះដឹងអំពីអាកាសធាតុសាកល។

ថ្លែងក្នុងឱកាសពិភាក្សានិងចុះអនុស្សរណៈយោគយល់នេះ លោកជំទាវ គឹម សេដ្ឋានី បានថ្លែងថា នេះគឺជាគម្រោងទីមួយនៅកម្ពុជា និងក៏ជាគម្រោងដ៏មានសារៈសំខាន់សម្រាប់កម្ពុជាផងដែរ ដែលមានលក្ខណៈសមស្របនឹងសភាពការណ៍នៃការប្រែប្រួលអាកាសធាតុនាពេលបច្ចុប្បន្ន។ លោកជំទាវបានគូសបញ្ជាក់ថា កាលពី៥ឆ្នាំមុន សាលារៀននៅតំបន់ខ្ពង់រាបក្នុងប្រទេសកម្ពុជា បានជួបប្រទះនឹងបញ្ហារាំងស្ងួត និងខ្វះទឹកប្រើប្រាស់។ គម្រោងនេះនឹងជាចំណែកមួយក្នុងការទ្រទ្រង់ដល់អាហារូបត្ថម្ភ ពិសេសការផ្ដល់ទឹកស្អាតស្រាប់កុមារកម្ពុជា ដែលនឹងជះឥទ្ធិពលទៅដល់សហគមន៍ប្រជាពលរដ្ឋ នៅក្នុងការពិចារណាអំពីការរក្សាទឹកទុកសម្រាប់ប្រើប្រាស់ផងដែរ។ លោកជំទាវបានមានប្រសាសន៍ថា ប្រសិនបើគម្រោងនេះអាចមានលទ្ធភាពនៅក្នុងការពង្រីកការអនុវត្តនៅគ្រប់រាជធានីខេត្ត គឺជាការប្រសើរបំផុត។

បន្ថែមពីនេះ ឯកឧត្ដមបណ្ឌិតសភាចារ្យ សុខ ទូច បានថ្លែងអំណរគុណចំពោះលោកជំទាវរដ្ឋលេខាធិការ ដែលបានលើកទឹកចិត្តនិងជំរុញឱ្យមានការផ្សព្វផ្សាយអំពីគម្រោងប្រមូលនិងរក្សាទឹកភ្លៀងទុកសម្រាប់ប្រើប្រាស់នេះ ព្រមទាំងអរគុណដល់លោកសាស្ត្រាចារ្យ Han Mooyoung  និងក្រសួងអប់រំ យុវជន និងកីឡា ដែលបានជ្រើសរើសយកសាលាបឋមសិក្សាសម្រាប់ជាគោលដៅអនុវត្តគម្រោងនេះ ព្រោះគឺជាគំនិតផ្ដួចផ្ដើមសម្រាប់ជំរុញឱ្យមនុស្សជំនាន់ក្រោយក្លាយទៅជាអ្នកដឹកនាំដែលគិតគូរទៅដល់ការថែរក្សានិងការពារបរិស្ថាន។ ឯកឧត្ដមបណ្ឌិតសភាចារ្យ បានគូសបញ្ជាក់ថា មនុស្សបានបំផ្លាញបរិស្ថានរហូតដល់ទៅ៥ចំណុចគឺ៖ ប្រទេសរីកចម្រើនជាអ្នកបំផ្លាញធម្មជាតិខ្លាំងជាងគេ ការរស់នៅបែបទំនើបក៏ជាចំណែកមួយដែលបំផ្លាញធម្មជាតិ ការទាញយកធនធានពីធម្មជាតិហួសកម្រិតដែលជាហេតុបណ្ដាលឱ្យមានការប្រែប្រួលអាកាសធាតុ ការសាកល្បងអាវុធីគីមី និងការរត់ប្រណាំងសព្វាវុធនិងការបង្កសង្គ្រាម សុទ្ធសឹងតែបានចូលរួមបំផ្លាញធ្ងន់ធ្ងរដល់ធម្មជាតិ និងបរិស្ថានពិភពលោក។ ជាមួយគ្នានេះ ​ឯកឧត្ដមបណ្ឌិតសភាចារ្យ បានមានប្រសាសន៍បន្ថែមថា កម្ពុជាក៏ត្រូវសិក្សារៀនសូត្រពីសាធារណរដ្ឋកូរ៉េ អំពីការថែរក្សានិងអភិរក្សព្រៃឈើនៅក្នុងទីក្រុងផងដែរ ព្រោះនៅពេលដែលនិយាយពីបរិស្ថាន គេត្រូវគិតដល់ជីវិត ដែលជាប់ពាក់ព័ន្ធគ្នារាប់ចាប់តាំងពីរជីវៈចម្រុះ និងរុក្ខជាតិ ហើយប្រសិនបើមនុស្សនៅតែបន្តបំផ្លាញបរិស្ថាន មនុស្សក៏មិនអាចរស់នៅលើពិភពលោកនេះបានសុខសាន្តនោះដែរ។

សម្រាប់លោកសាស្ត្រាចារ្យ Han Mooyoung បានសម្ដែងនូវសេចក្ដីសោមនស្សជាខ្លាំងចំពោះការពិភាក្សានិងពិធីចុះអនុស្សរណៈនាព្រឹកនេះ ដោយលោកបានគូសបញ្ជាក់អំពីការចូលរួមចំណែករបស់លោកនាពេលកន្លងមក នៅក្នុងការជួយជំរុញកែប្រែសហគមន៍នៅកម្ពុជា ចាប់តាំងពីឆ្នាំ២០១៨មក។ លោកបានរំឭកអំពីការចាប់ផ្ដើមគម្រោងដែលធ្វើឡើងនៅវិទ្យាល័យកំពូល និងការយកចិត្តទុកដាក់របស់វិទ្យាស្ថានមេគង្គអំពីបញ្ហានេះផងដែរ។ លោកបានគូសបញ្ជាក់បន្ថែមអំពីគម្រោងនេះថា គម្រោងនេះមានសារៈសំខាន់ចំនួន៣គឺ 

        ១. ការគ្រប់គ្រង ដែលការប្រមូលផលទឹកភ្លៀង និងការជួយកាត់បន្ថយទឹកជំនន់ ខណៈដែលទឹកភ្លៀងធម្មជាតិមានសារធាតុកខ្វក់តិចតួច។

        ២. ការអប់រំដែលផ្ដោតទៅលើការប្រែប្រួលអាកាសធាតុ ការរៀបចំកម្មវិធីសិក្សាឱ្យសិស្សយល់ដឹងអំពីការគ្រប់គ្រងទឹកភ្លៀង និងជំរុញឱ្យសិស្សចូលរួមចំណែកជាមួយសហគមន៍របស់ខ្លួន ដើម្បីឆ្លើយតបទៅនឹងវិបត្តិអាកាសធាតុនាពេលបច្ចុប្បន្ន។

        ៣. វិធីសាស្រ្តទាក់ទងនឹងវប្បធម៌៖ កម្ពុជានិងកូរ៉េ មានវប្បធម៌នៃការយកឈ្នះលើធម្មជាតិដូចគ្នា។ ដូច្នេះ គម្រោងនេះគឺជាគម្រោងដែលសមស្របសម្រាប់ការអនុវត្តនៅកម្ពុជា ពិសេសពាក់ព័ន្ធទៅនឹងការយកចិត្តទុកដាក់លើការរក្សាទឹកទុកប្រើប្រាស់ជាប្រយោជន៍ផ្សេង ស្របពេលដែលការប្រែប្រួលអាកាសធាតុកើតមានឡើងជាបន្តបន្ទាប់។

គួរបញ្ជាក់ផងដែរថា ពិធីចុះអនុស្សរណៈនៃការយោគយល់គ្នានេះ ត្រូវបានររៀបចំឡើងដោយមានការអញ្ជើញចុះហត្ថលេខាដោយ ឯកឧត្ដមបណ្ឌិតសភាចារ្យ សុខ ទូច ប្រធានរាជបណ្ឌិត្យសភាកម្ពុជា, លោកជំទាវ គឹម សេដ្ឋានី រដ្ឋលេខាធិការប្រចាំការ ក្រសួងអប់រំ យុវជន និងកីឡា និងលោកសាស្ត្រាចារ្យបណ្ឌិត HAN Mooyoung តំណាងមជ្ឍមណ្ឌលស្រាវជ្រាវទឹកភ្លៀង នៃសាកលវិទ្យាល័យជាតិសេអ៊ូល និងមានការអញ្ជើញចូលរួមពីសំណាក់ លោកជំទាវ ឯកឧត្ដមជាថ្នាក់ដឹកនាំ និងលោកលោកស្រីជាមន្ត្រីរាជការនៃរាជបណ្ឌិត្យសភាកម្ពុជា និងក្រសួងអប់រំ យុវជន និងកីឡាជាច្រើនរូបទៀត៕

RAC Media | លឹម សុវណ្ណរិទ្ធ នាយកដ្ឋានទំនាក់ទំនងសាធារណៈ និងពិធីការ