ព័ត៌មាន

អ្នកជំនាញទស្សនវិជ្ជានិងការអភិវឌ្ឍសង្គម គូសបញ្ជាក់អំពីហេតុផលដែលនាំឱ្យមានការព្រួយបារម្ភអំពីតំបន់ត្រីកោណអភិវឌ្ឍន៍ និងផ្ដល់អនុសាសន៍ដែលអាចឈានទៅបញ្ចប់មន្ទិលសង្ស័យលើករណីនេះ

2024-08-02 16:27:12 ថ្ងៃសុក្រ, 02 សីហា 2024, 04:27 PM
post_detail1

(រាជបណ្ឌិត្យសភាកម្ពុជា)៖ ថ្លែងក្នុងឱកាសចូលរួមជាវាគ្មិនក្នុងកិច្ចពិភាក្សាតុមូលមួយស្ដីពី «តំបន់ត្រីកោណអភិវឌ្ឍន៍កម្ពុជា ឡាវ វៀតណាម» ដែលរៀបចំឡើងនៅព្រឹកថ្ងៃសុក្រ ១៣ រោច ខែអាសាឍ ឆ្នាំរោង ឆស័ក ពុទ្ធសករាជ ២៥៦៧ ត្រូវនឹងថ្ងៃទី២ ខែសីហា ឆ្នាំ២០២៤នេះ លោកបណ្ឌិត ឈត ប៊ុនថង អនុប្រធានវិទ្យាស្ថានទំនាក់ទំនងអន្តរជាតិនៃកម្ពុជា និងជាអ្នកជំនាញទស្សនវិជ្ជានិងការអភិវឌ្ឍសង្គម បានគូសបញ្ជាក់អំពីហេតុផលមួយចំនួន ដែលនាំឱ្យមានការព្រួយបារម្ភអំពីតំបន់ត្រីកោណអភិវឌ្ឍន៍ និងបានផ្ដល់អនុសាសន៍ដែលអាចឈានទៅបញ្ចប់ការព្រួយបារម្ភ និងមន្ទិលសង្ស័យលើករណីនេះ។

​ដោយផ្ដោតទៅលើទិដ្ឋភាពសង្គម លោកបណ្ឌិត ឈត ប៊ុនថង បានលើកឡើងអំពីមូលហេតុចំនួន១០ ដែលនាំទៅដល់ការព្រួយបារម្ភអំពីតំបន់ត្រីកោណអភិវឌ្ឍន៍គឺ៖

​១. បទពិសោធន៍ប្រវត្តិសាស្ត្រ

២. កម្ពុជាជាប្រទេសតូចនិងធ្លាប់ចាញ់កលប្រទេសជាតិខាង

៣. កង្វះការចែករំលែកព័ត៌មានអំពីគម្រោងអភិវឌ្ឍន៍

៤. ការធ្លាក់ចុះនូវជំនឿទុកចិត្តរវាងពលរដ្ឋនិងអាជ្ញាធរ

៥. ការឆ្កឹះពីអ្នកនយោបាយ

៦. មានការជំរុញពីអ្នកនយោបាយប្រឆាំង

៧. អាចជាការឆ្លើយតបទៅនឹងការចោទប្រកាន់លោក សម រង្ស៊ី ថាបានចុះហត្ថលេខាប្រគល់ខេត្តទាំង៤ឱ្យទៅលោក កុក ស

៨. ចលនាប្រឆាំងនឹងគម្រោងព្រែកជីកហ្វូណនតេជោ

៩. កង្វះភាពជិតស្និទ្ធរវាងប្រជាជននិងអាជ្ញាធរ និង

១០. ការមិនជឿទុកចិត្តជាមួយប្រទេសជិតខាង។

ជាមួយនឹងការចែករំលែកអំពីទស្សនៈយល់ឃើញអំពីហេតុផលដែលនាំទៅដល់ការព្រួយបារម្ភចំពោះតំបន់ត្រីកោណអភិវឌ្ឍន៍ខាងលើនេះ លោកបណ្ឌិត ឈត ប៊ុន ថង ក៏បានផ្ដល់អនុសាសន៍ចំនួន ៥ចំណុចដែលអាចឈានទៅបញ្ចប់មន្ទិលសង្ស័យលើករណីនេះផងដែរគឺ៖

១. ការបង្កើនជំនឿទុកចិត្តរវាងអាជ្ញាធរជាមួយពលរដ្ឋ

២. បង្កើនការផ្សព្វផ្សាយទាក់ទងនឹងតំបន់ត្រីកោណអភិវឌ្ឍន៍ កម្ពុជា ឡាវ វៀតណាម ឱ្យបានទូលំទូលាយជាងមុននិងមានតម្លាភាព

៣. បង្កលក្ខខណ្ឌឱ្យប្រជាជនមានឱកាសស្វែងយល់ពីរឿងរសើប

៤. បើកទូលាយនូវព័ត៌មានផ្ដល់ដីសម្បទានសេដ្ឋកិច្ចក្នុងតំបន់ត្រីកោណអភិវឌ្ឍន៍

៥. គ្រប់គ្រងក្រុមហ៊ុនដែលទទួលបានដីសម្បទាននៅក្នុងតំបន់នោះឱ្យបានហ្មត់ចត់និងត្រឹមត្រូវតាមច្បាប់។

លោកបណ្ឌិតបានគូសបញ្ជាក់ថា ការកាត់បន្ថយគម្លាតទំនុកចិត្តរបស់ប្រជាពលរដ្ឋនិងអាជ្ញាធរ គឺជាចំណុចសំខាន់មួយដែលត្រូវយកចិត្តទុកដាក់ ហើយរដ្ឋត្រូវខិតខំបង្កើនជំនឿទុកចិត្តនេះជាបន្តបន្ទាប់ ដើម្បីអនុញ្ញាតឱ្យប្រជាពលរដ្ឋទទួលយកនិងស្ដាប់នូវការបកស្រាយពីក្រសួងស្ថាប័នជំនាញរបស់រាជរដ្ឋាភិបាល។ ចំណែកឯបង្កើនការផ្សព្វផ្សាយទាក់ទងនឹងតំបន់ត្រីកោណអភិវឌ្ឍន៍ កម្ពុជា ឡាវ វៀតណាម លោកបណ្ឌិត បានជំរុញឱ្យក្រសួងស្ថាប័នពាក់ព័ន្ធ ធ្វើការផ្សព្វផ្សាយឱ្យបានកាន់តែទូលំទូលាយជាងមុនបន្ថែមទៀត ប្រកបដោយតម្លាភាព ដើម្បីឱ្យប្រជាពលរដ្ឋអាចស្វែងយល់ដឹង និងពិចារណាបានស៊ីជម្រៅ ដោយផ្អែកលើមូលដ្ឋានព័ត៌មានដែលទទួលបានពីក្រសួងស្ថាប័នជំនាញ។

បន្ថែមពីនេះ បើតាមលោកបណ្ឌិត ឈត ប៊ុនថង រាជរដ្ឋាភិបាលនិងអាជ្ញាធរ គួរតែបង្កលក្ខខណ្ឌងាយស្រួលនិងល្អប្រសើរសម្រាប់ប្រជាពលរដ្ឋ ឱ្យមានឱកាសនៅក្នុងការស្វែងយល់ពីរឿងរសើបផ្សេងៗនៅក្នុងសង្គម ដែលជាប្រធានបទទាក់ទាញចំណាប់អារម្មណ៍របស់មហាជន ព្រោះការព្យាយាមបិទបាំង ឬព្រងើយកន្តើយនឹងកង្វល់មហាជន អាចក្លាយទៅជាហេតុជំរុញមួយទៀតដែលនាំការគិតរបស់ពលរដ្ឋឱ្យយល់ថា រឿងដែលខ្លួនសង្ស័យអាចជាការពិត ទើបមិនមានការបកស្រាយ ឬបើកទូលាយឱ្យប្រជាពលរដ្ឋស្វែងយល់ និងជ្រួតជ្រាបបន្ថែមទៀត។ ក្នុងន័យដូចគ្នានេះ លោកបណ្ឌិតក៏បានលើកឡើងផងដែរថា រាជរដ្ឋាភិបាល គួរតែបើកទូលាយនូវការផ្សព្វផ្សាយអំពីព័ត៌មាននៃការផ្ដល់ដីសម្បទានសេដ្ឋកិច្ចក្នុងតំបន់ត្រីកោណអភិវឌ្ឍន៍ ឱ្យសាធារណជនបានដឹងឭ និងអាចស្វែងយល់បន្ថែមទៀត ជៀសវាងបង្កើនឬបន្តឱ្យប្រជាពលរដ្ឋមានមន្ទិលសង្ស័យទៅលើករណីដែលត្រូវបានគេបំប៉ោងឬបំភ្លៃខុសពីការពិតជាក់ស្ដែង។

ជាអនុសាសន៍ចុងក្រោយគឺ លោកបណ្ឌិតបានជំរុញឱ្យអាជ្ញាធរនិងក្រសួងស្ថាប័នមានសមត្ថកិច្ច គប្បីពង្រឹងការគ្រប់គ្រងនិងត្រួតពិនិត្យទៅលើក្រុមហ៊ុន ដែលទទួលបានដីសម្បទាននៅក្នុងតំបន់ត្រីកោណអភិវឌ្ឍន៍ ឱ្យបានត្រឹមត្រូវ ហ្មត់ចត់ និងស្របតាមច្បាប់ដែលមានជាធរមាន ដើម្បីបង្កើនទំនុកចិត្ត និងបញ្ចប់នូវពាក្យចចាមអារ៉ាមពាក់ព័ន្ធនឹងលំហូរជនអន្តោប្រវេសន៍ និងការផ្ដល់ដីសម្បទានដែលអាចបង្កផលប៉ះពាល់នានា ដូចអ្វីដែលជាការព្រួយបារម្ភរបស់ប្រជាពលរដ្ឋ៕

RAC Media | លឹម សុវណ្ណរិទ្ធ នាយកដ្ឋានទំនាក់ទំនងសាធារណៈ និងពិធីការ

អត្ថបទទាក់ទង

កិច្ចសហប្រតិបត្តិការថ្មីមួយជាមួយមជ្ឈមណ្ឌលអភិវឌ្ឍពាណិជ្ជកម្មអេឡិចត្រូនិកខេត្តយូណាន

ឯកឧត្តមបណ្ឌិតសភាចារ្យ សុខ ទូច ប្រធានរាជបណ្ឌិត្យសភាកម្ពុជា បានទទួលជួបជាមួយមជ្ឈមណ្ឌលអភិវឌ្ឍពាណិជ្ជកម្មអេឡិចត្រូនិកខេត្តយូណាន់ ទីក្រុងគុនមីង នៃសាធារណៈរដ្ឋប្រជាមានិតចិន ដើម្បីពិភាក្សាអំពីលទ្ធភាពនៃការនាំផល...

2018-08-26 11:23:36   Sun, 26,08,2018, 11:23 AM
សមិទ្ធផលធំមួយទៀត៖ «ពិធីសែនក្រុងពាលី អគារឥន្ទ្រទេវី» ចាប់ផ្តើមជាផ្លូវការ!

កាលពីឆ្នាំកន្លង រាជបណ្ឌិត្យសភាកម្ពុជា បានរៀបធ្វើពិធីក្រុងពាលីសាងសង់«អគារខេមរវិទូ»កំពស់៤ជាន់មួយ នៅក្នុងបរិវេណរាជបណ្ឌិត្យសភាកម្ពុជា ចំណែកនៅឆ្នាំនេះ រាជបណ្ឌិត្យសភាកម្ពុជា  បានរៀបចំពិធី «សែនក្រុងពាលីបុកគ្...

2018-08-26 10:53:57   Sun, 26,08,2018, 10:53 AM
«រាជបណ្ឌិត្យសភាកម្ពុជា កំពុងរួមចំណែករៀបចំសេចក្តីព្រាងកិច្ចព្រមព្រៀងសាងសង់មជ្ឈមណ្ឌលស្រាវជ្រាវវិទ្យាសាស្រ្តនិងបច្ចេកទេសនុយក្លេអ៊ែរនៅកម្ពុជា»

រហូតមកទល់ពេលនេះ កិច្ចពិភាក្សា និងពិនិត្យលើសេចក្តីព្រាងនៃកិច្ចកិច្ចព្រមព្រៀងរវាង​រាជរដ្ឋាភិបាល​កម្ពុជា និងរដ្ឋាភិបាល​សហព័ន្ធរុស្សី ស្តីពីកិច្ចសហប្រតិបត្តិការក្នុងការសាងសង់មជ្ឈមណ្ឌលស្រាវជ្រាវវិទ្យាសាស្រ...

2018-08-24 10:07:33   Fri, 24,08,2018, 10:07 AM
«ប្រសាសន៍សំខាន់ៗរបស់ឯកឧត្តមបណ្ឌិតសភាចារ្យ ប្រធានរាជបណ្ឌិត្យសភាកម្ពុជា» ក្នុងកម្មវិធីបាឋកថាស្ដីពី «គោលនយោបាយការបរទេសសហរដ្ឋអាម៉េរិកក្រោមរដ្ឋបាលរបស់លោក Donald Trump និងអត្ថន័យចំពោះអាស៊ី» នាព្រឹកថ្ងៃ២៣ ខែសីហា ឆ្នាំ២០១៨

នៅក្នុងបទបាឋកថារបស់លោកសាស្ត្រចារ្យបណ្ឌិត​ ដាវីដ ឡែមតុន (David M. Lampton) រៀបចំឡើង​នៅ​រាជ​បណ្ឌិត្យ​សភា​កម្ពុជា កាល​ពី​ព្រឹកម៉ិញនេះ ឯកឧត្តមបណ្ឌិតសភាចារ្យ សុខ ទូច ប្រធានរាជបណ្ឌិត្យសភា​កម្ពុជា បានបង្ហាញ​...

2018-08-23 05:43:11   Thu, 23,08,2018, 05:43 AM
«ជំនួបរវាងថ្នាក់ដឹកនាំនៃរាជបណ្ឌិត្យសភាកម្ពុជានិងគណៈប្រតិភូសាកលវិទ្យាល័យត្រាវិញ»

រាជបណ្ឌិត្យសភាកម្ពុជា ជាស្ថាប័ន ស្រាវជ្រាវជាន់ខ្ពស់ និងប្រមូលផ្តុំដោយអ្នកសិក្សាស្រាវជ្រាវ លើជំនាញវិស័យ ផ្សេងៗពីគ្នា ហើយក៏កំពុងព្យាយាមក្នុងការពង្រីកវិសាលភាពរបស់ខ្លួន ក្នុងឆាកអន្តរជាតិតាមរយៈការភ្ជាប់កិច...

2018-08-21 09:41:03   Tue, 21,08,2018, 09:41 AM
«សកម្មភាពសាងសង់ពេលព្រឹកនេះ...»

ដោយអនុវត្តតាមការណែនាំរបស់ឯកឧត្តមបណ្ឌិតសភាចារ្យ សុខ ទូច ប្រធានរាជបណ្ឌិត្យសភាកម្ពុជា នៅថ្ងៃសុក្រ៦កើត ខែស្រាពណ៍ ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី១៧ ខែសីហា ឆ្នាំ២០១៨នេះ អគ្គលេខាធិការដ្ឋាននៃរាជបណ្...

2018-08-17 07:02:37   Fri, 17,08,2018, 07:02 AM

សេចក្តីប្រកាស