ព័ត៌មាន

ការបង្កើតបញ្ហាក្នុងប្រធានបទសិក្សាស្រាវជ្រាវចេញពីភាពខ្វះចន្លោះនៅក្នុងទ្រឹស្តី ដោយបណ្ឌិត វង់ សំអូន ជំនួយការខុទ្ទកាល័យរាជបណ្ឌិត្យសភាកម្ពុជា

2024-03-04 08:29:53 ថ្ងៃច័ន្ទ, 04 មីនា 2024, 08:29 AM
post_detail

បញ្ហាកើតចេញពីភាពមិនស៊ីគ្នា ឬភាពខ្វះចន្លោះនៅក្នុងទ្រឹស្តី គឺជាបញ្ហារវាងការប្រើប្រាស់ទ្រឹស្តី និងចំណោទបញ្ហាក្នុងប្រធានបទសិក្សាស្រាវជ្រាវ ហើយតាមរយៈបញ្ហានេះគេអាចទាញយកមកធ្វើ ឬបង្កើតប្រធានបទថ្មីសម្រាប់ធ្វើការសិក្សាស្រាវជ្រាវ។ បញ្ហានេះបានកើតមានឡើងនៅក្នុងរូបភាពផ្សេងៗគ្នាដូចជា៖

- ហេតុការណ៍ ឬព្រឹត្តិការណ៍ដូចគ្នាប៉ុន្តែអ្នកសិក្សាស្រាវជ្រាវបានប្រើប្រាស់ទ្រឹស្តីផ្សេងៗគ្នានៅក្នុងការបកស្រាយ និងពន្យល់ពីហេតុការណ៍ ឬព្រឹត្តិការណ៍នោះ៖ ចំណុចសំខាន់នៅត្រង់នេះគឺថា ហេតុអ្វីបានជាអ្នកសិក្សាស្រាវជ្រាវមុនៗបានប្រើប្រាស់ទ្រឹស្តីផ្សេងៗគ្នាដើម្បីពន្យល់លើហេតុការណ៍ ឬបាតុភូតដូចគ្នា? តើទ្រឹស្តីមួយណាពិតជាស៊ីគ្នាជាមួយនឹងបញ្ហាដែលបានស្រាវជ្រាវនោះ? ឬតើទ្រឹស្តីទាំងអស់នោះពិតជាស៊ីគ្នាជាមួយនឹងបញ្ហាដែលបានសិក្សានោះមែនដែរឬទេ? ក្នុងករណីនេះ វាបានបង្ហាញពីភាពខ្វះចន្លោះនៅក្នុងទ្រឹស្តីដែលអ្នកសិក្សាស្រាវជ្រាវបានប្រើប្រាស់ ដើម្បីដោះស្រាយបញ្ហា (ហេតុអ្វីបានជាអ្នកសិក្សាស្រាវជ្រាវពីមុនៗប្រើប្រាស់ទ្រឹស្តីផ្សេងៗគ្នា ដើម្បីដោះស្រាយបញ្ហាដូចគ្នានេះ)។ នេះមានន័យថា អ្នកសិក្សាស្រាវជ្រាវអាចប្រើប្រាស់ទ្រឹស្តីដែលមិនស៊ីគ្នា មិនសូវស៊ីគ្នា ឬសំឡឹងមើលទិដ្ឋភាពផ្សេងៗគ្នាជាមួយនឹងបញ្ហាដែលបានសិក្សានោះ។ ដូច្នេះ អ្នកសិក្សាស្រាវជ្រាវផ្សេងៗទៀតអាចទាញយក ឬលើកយកចំណុចនេះ ដើម្បីបង្កើតជាចំណោទបញ្ហានៅក្នុងប្រធានបទសិក្សាស្រាវជ្រាវបន្ត។

ឧទាហរណ៍ អ្នកសិក្សាស្រាវជ្រាវបានអានស្នាដៃការសិក្សាស្រាវជ្រាវមុនៗ ឬសៀវភៅផ្សេងៗដែលសរសេរទាក់ទងជាមួយនឹងប្រធានបទ “កត្តាជះឥទ្ធិពលដល់ការរៀនភាសាអង់គ្លេសរបស់សិស្សវិទ្យាល័យយ”។ បន្ទាប់ពីបាន​អានឯកសារទាំងអស់នោះរួចមក គេសង្កេតឃើញថា អ្នកសិក្សាស្រាវជ្រាវភាគច្រើនបានប្រើប្រាស់ទ្រឹស្តីផ្សេងៗគ្នានៅក្នុងការពន្យល់ និងដោះស្រាយបញ្ហានេះ ដូចជា៖ ទ្រឹស្តីនិយាយពីការរៀនដោយខ្លួនឯងរបស់ជឺរូមប្រូន័រ (Discovery Learning by Jerome Bruner) ទ្រឹស្តីការរៀនតាមរយៈការចោទសួររបស់លោកស្រីខាត់ មឺដក (Inquiry Cycle by Kath Murdoch) ទ្រឹស្តីការរៀនរបស់សិស្សវ័យជំទង់របស់ម៉ាលខុម ណូលេស (Adult Learning by Malcolm Knowles) ឬទ្រឹស្តីស្តីបុគ្គលិកលក្ខណៈរបស់មនុស្សរបស់លោកខាល រ៉ូជឺ (Theory of Personality by Carl Roger)ជាដើម។ល។

ក្នុងករណីនេះ អ្នកសិក្សាស្រាវជ្រាវបន្តអាចលើកយកចំណុចនេះជាបញ្ហា ដើម្បីធ្វើការសិក្សាស្រាវជ្រាវផ្ទៀងផ្ទាត់ឡើងវិញតាមរយៈការសិក្សាឱ្យបានស៊ីជម្រូវលើទ្រឹស្តីទាំងអស់ខាងលើ រួចហើយកំណត់យកទ្រឹស្តីណាមួយដែលពិតជាស៊ីគ្នាជាមួយនឹងបញ្ហាដែលបានកើតមានឡើងនោះ ដើម្បីបង្កើតជាចំណោទបញ្ហានៅក្នុងប្រធានបទការសិក្សាស្រាវជ្រាវ “ការប្រើប្រាស់ទ្រឹស្តីការរៀនរបស់សិស្សវ័យជំទង់ដើម្បីជំរុញដល់ការរៀនភាសាអង់គ្លេសរបស់សិស្សថ្នាក់ទី១២”។  

- ភាពខ្វះចន្លោះនៅក្នុងការប្រើប្រាស់ទ្រឹស្តីពាក់ព័ន្ធដើម្បីបកស្រាយ ឬពន្យល់លើបញ្ហាដែលបានកើតឡើង៖ ភាពខ្វះចន្លោះនេះបានកើតមានឡើង នៅក្នុងស្នាដៃសិក្សាស្រាវជ្រាវពីមុនៗដែលអ្នកសិក្សាស្រាវជ្រាវបានប្រើប្រាស់ទ្រឹស្តីប្រហាក់ប្រហែលគ្នាដើម្បីដោះស្រាយ ឬពន្យល់ហេតុការណ៍ដែលបានកើតមានឡើងប៉ុន្តែមិនបានរំលេច ប្រើប្រាស់ទ្រឹស្តីផ្សេងៗទៀតក្រៅពីនោះមកពន្យល់ ដោះស្រាយបញ្ហាដែលបានកើតមានឡើងនោះទេ ឬទ្រឹស្តីទាំងនោះត្រូវបានបង្កើតឡើងនៅពេលវេលាណាមួយដែលជួនកាលវាអាចមានភាពខ្វះចន្លោះ ហួសសម័យ ឬមិនអាចប្រើប្រាស់ដើម្បីវាស់វែងបញ្ហាដែលបានកើតឡើងបានឡើយ។ នៅក្នុងករណីនេះ វាបានបង្ហាញពីភាពខ្វះចន្លោះនៅក្នុងការប្រើប្រាស់ទ្រឹស្តីពាក់ព័ន្ធផ្សេងទៀតដើម្បីយកមកបកស្រាយ ឬពន្យល់ពីបញ្ហាដែលបានកើតមានឡើងនោះ។

ឧទាហរណ៍ នៅក្នុងស្នាដៃសិក្សាស្រាវជ្រាវទាក់ទងជាមួយនឹង”ការវាយតម្លៃពីការពេញចិត្តលើគុណភាពក្នុងការផ្តល់សេវាកម្មដល់អតិថិជននៅធនាគារឯកជន” គេសង្កេតឃើញថា នៅក្នុងស្នាដៃទាំងនោះ អ្នកសិក្សាស្រាវជ្រាវភាគច្រើនបានប្រើប្រាស់ទ្រឹស្តី SERVQUAL Model (ប្រើប្រាស់សម្ភារៈទំនើប ផ្តល់ភាពទំនុកទុកចិត្តខ្ពស់ គោរពតាមគោលការណ៍ ម៉ោងប្រតិបត្តិការងារឆ្លើយតបនឹងតម្រូវការរបស់អតិថិជន ឱ្យតម្លៃខ្ពស់ដល់អតិថិជន) ដែលត្រូវបានបង្កើតឡើងក្រុមអ្នកស្រាវជ្រាវមួយក្រុមនៅក្នុងឆ្នាំ១៩៨៥។ នៅក្នុងករណីនេះ អ្នកសិក្សាស្រាវជ្រាវអាចបង្កើតចំណោទបញ្ហាថ្មីក្នុងប្រធានបទស្រាវជ្រាវដោយប្រើប្រាស់ទ្រឹស្តីផ្សេងទៀតដូចជាទ្រឹស្តីគុណភាពសេវាកម្ម (ការរំពឹងទុករបស់អតិថិជន និងការទទួលបានពីការផ្តល់សេវាកម្ម) របស់លោក អូលីវ័រ (Oliver) ឬការប្រើប្រាស់បច្ចេកវិទ្យាក្នុងការពង្រឹងសេវាកម្មជាដើម ”ការប្រើប្រាស់ទ្រឹស្តីការរំពឹងទុក និងការទទួលបានពីការផ្តល់សេវាកម្មក្នុងការពង្រឹងគុណភាពការផ្តល់សេវាកម្មរបស់ធនាគារឯកជន” ឬ”ការប្រើប្រាស់បច្ចេកវិទ្យាក្នុងការពង្រឹងគុណភាពសេវាកម្មរបស់ធនាគារឯកជន”។

- ភាពខ្វះចន្លោះក្នុងការទាញយកអថេរ ឬបញ្ញាត្តិចេញពីទ្រឹស្តីទាំងឡាយណាដែលអ្នកសិក្សាស្រាវជ្រាវបានប្រើប្រាស់ដើម្បីបកស្រាយ ពន្យល់ ឬដោះស្រាយបញ្ហាក្នុងប្រធានបទស្រាវជ្រាវនោះ៖ ភាពខ្វះចន្លោះនេះបានកើតមានឡើង នៅក្នុងទ្រឹស្តីដែលអ្នកសិក្សាស្រាវជ្រាវពីមុនៗបានប្រើប្រាស់ដោយពួកគេមិនបានសិក្សាឱ្យបានល្អិតល្អន់ ឬសិក្សាឱ្យបានស៊ីជម្រូវលើអថេរ ឬបញ្ញាត្តិនៅក្នុងទ្រឹស្តីណាមួយដែលពួកគេបានប្រើប្រាស់ដើម្បីដោះស្រាយបញ្ហានៅក្នុងការសិក្សាស្រាវជ្រាវនោះ។ ដូច្នេះ វាធ្វើឱ្យអថេរ ឬបញ្ញាត្តិដែលត្រូវបានគេទាញចេញពីទ្រឹស្តីនោះមិនមានលក្ខណៈគ្រប់គ្រាន់ ឬពេញលេញដើម្បីធ្វើការបកស្រាយ ពន្យល់ ឬដោះស្រាយបញ្ហាដែលបានសិក្សាស្រាវជ្រាវនោះ។

ឧទាហរណ៍នៅក្នុងប្រធានបទស្រាវជ្រាវស្តី ”ការសិក្សាពីយន្តការនៃការពង្រឹងប្រសិទ្ធភាការងាររបស់ក្រុមហ៊ុនឯកជន ”អ្នកសិក្សាស្រាវជ្រាវខ្លះបានប្រើប្រាស់ទ្រឹស្តីអេសទាំងប្រាំពីរ (7s Model-structure, systems, strategy, skills, style, staff & shared vision by Mckinsey) ចំណែកឯអ្នកសិក្សាស្រាវជ្រាវខ្លះទៀតបានប្រើប្រាស់ទ្រឹស្តី វិន័យទាំង៥ (5th Discipline-personal mastery, mental models, building shared vision, team learning, & systems thinking by Peter Senge)។ បញ្ហានៅត្រង់នេះគឺថា អថេរ (ប្រើប្រាស់ក្នុងការសិក្សាស្រាវជ្រាវបែបបរិមាណវិស័យ) ឬបញ្ញាត្តិ (ប្រើប្រាស់នៅក្នុងការសិក្សាស្រាវជ្រាវបែបគុណវិស័យ) មិនត្រូវបានអ្នកសិក្សាស្រាវជ្រាវទាញយកមកពន្យល់ឱ្យបានគ្រប់ធាតុ (យកតែធាតុខ្លះៗ ឬខ្លឹមសារពន្យល់មិនច្បាស់លាស់ក្នុធាតុនីមួយៗ) ដែលជាហេតុធ្វើឱ្យមានភាពខ្វះចន្លោះកើតចេញពីការប្រើប្រាស់ទ្រឹស្តីទាំងនោះ។ ក្នុងករណីនេះ អ្នកសិក្សាស្រាវជ្រាវអាចទាញយកចំណុចនេះ ដើម្បីបង្កើតជាចំណោទបញ្ហានៅក្នុងប្រធានបទការសិក្សាស្រាវជ្រាវ “ការពង្រឹងប្រសិទ្ធភាពការងារនៅក្នុងក្រុមហ៊ុនឯកជនតាមរយៈការបង្កើតចក្ខុវិស័យរួមគ្នា” (ដោយសារនៅក្នុងស្នាដៃសិក្សាស្រាវជ្រាវមុនៗបានប្រើប្រាស់តែអថេរចំនួនបួនក្នុងចំណោមអថេរទាំងប្រាំនៃទ្រឹស្តីវិន័យទាំងប្រាំរបស់សេងហ្គេ)។

ជារួម អ្នកសិក្សាស្រាវជ្រាវអាចប្រើប្រាស់វិធីសាស្រ្តផ្សេងៗ ក្នុងការកំណត់បញ្ហាដើម្បីបង្កើតប្រធានបទស្រាវជ្រាវ។ វីធីសាស្ត្រមួយនៅក្នុងចំណោមវិធីសាស្ត្រទាំងអស់នោះគឺ ការទាញយកបញ្ហាដើម្បីបង្កើតប្រធានបទសិក្សាស្រាវជ្រាវ ចេញពីភាពខ្វះចន្លោះនៅក្នុងទ្រឹស្តីតាមរយៈការអានអត្ថបទស្រាវជ្រាវ ឬអានសៀវភៅផ្សេងៗ “អានស្នាដៃសិក្សាស្រាវជ្រាវ ឬសៀវភៅផ្សេងៗដើម្បីកំណត់បាននូវភាពខ្វះចន្លោះដែលកើតចេញពីទ្រឹស្តីណាមួយនៅក្នុងស្នាដៃនោះដើម្បីបង្កើតប្រធានសិក្សាស្រាវជ្រាវ មិនមែនអង្គុយអុជធូបបន់ស្រន់ ឬអង្គុយរកនឹកនោះទេ”។

-----

RAC Media

ប្រភព ខុទ្ទកាល័យរាជបណ្ឌិត្យសភាកម្ពុជា

  


អត្ថបទទាក់ទង

កម្ពុជា-ឡាវ រួមគ្នាទាក់ទាញភ្ញៀវទេសចរ ក្នុងឱកាស ស៊ីហ្គេមនិងប៉ារ៉ាហ្គេម ២០២៣ នៅកម្ពុជា ដោយ៖ លោក អ៊ុច លាង អ្នកសិក្សាស្រាវជ្រាវនៃនាយកដ្ឋានសិក្សាអាស៊ី អាហ្វ្រិក និងមជ្ឈិមបូព៌ា នៃវិទ្យាស្ថានទំនាក់ទំនងអន្តរជាតិនៃកម្ពុជា នៃរាជបណ្ឌិត្យសភាកម្ពុជា

ឯកឧត្តម ថងលុន ស៊ីសូលីត ប្រធានាធិបតី នៃសាធារណរដ្ឋប្រជាធិបតេយ្យប្រជាមានិតឡាវ នឹង អញ្ជើញចូលរួមក្នុងពិធីបើកការប្រកួតកីឡាស៊ីហ្គេមលើកទី២៣ និងអាស៊ានប៉ារ៉ាហ្គេមលើកទី១២ នៅ ប្រទេសកម្ពុជា អមជាមួយនឹងការ អញ្ជើញមកប...

2023-04-24 09:43:31   Mon, 24,04,2023, 09:43 AM
កត្ដាចម្បងនៃការបោះបង់ការសិក្សារបស់ជនជាតិដើមភាគតិចថ្មូន ក្នុងខេត្តមណ្ឌលគិរី Main Factors of Dropout of Thmoun Ethnic Minority Students in Mondulkiri Province ដោយ៖ ប៉ាន់ សំណាង មន្ដ្រីនាយកដ្ឋានវិទ្យាសាស្ដ្រអប់រំវិទ្យាស្ថានមនុស្សសាស្ដ្រនិងវិទ្យាសាស្ដ្រសង្គម

ការបោះបង់ការសិក្សា តែងតែកើតមានឡើងនៅគ្រប់បណ្តាប្រទេសទាំងអស់នៅលើសាកលលោក មិនថានៅក្នុងប្រទេសអភិវឌ្ឍ ឬប្រទេសកំពុងអភិវឌ្ឍនោះឡើយ។ រដ្ឋាភិបាល របស់ប្រទេសនីមួយៗ បានយកចិត្តទុកដាក់លើបញ្ហានេះ ដោយបានដាក់ចេញជាគោលនយោ...

2023-04-24 09:00:35   Mon, 24,04,2023, 09:00 AM
ពិធីសូត្រមន្តចម្រើនព្រះបរិត្ត ប្រសិទ្ធពរជ័យ សិរីមង្គលជូនដល់ថ្នាំដឹកនាំនិងមន្ត្រីរាជការនៃរាជបណ្ឌិត្យសភាកម្ពុជា

ដើម្បីអបអរទទួលអំណរឆ្នាំថ្មី ឆ្នាំថោះ បញ្ចស័ក ព.ស.២៥៦៧ ក្នុងស្មារតីសាមគ្គី គ្រួសាររាជបណ្ឌិត្យសភាកម្ពុជា នារសៀលថ្ងៃចន្ទ ១០រោច ខែចេត្រ ឆ្នាំខាល ចត្វាស័ក ព.ស ២៥៦៦ ត្រូវនឹងថ្ងៃទី១០ ខែមេសា ឆ្នាំ២០២៣ ឯកឧត្តម...

2023-04-11 06:20:40   Tue, 11,04,2023, 06:20 AM
សហគមន៍ជនជាតិវៀតណាមនៅក្រៅប្រទេស ជាស្ពានភ្ជាប់ទំនាក់ទំនងមិត្តភាព

ដោយ៖ លោក អ៊ុច លាង អ្នកសិក្សាស្រាវជ្រាវនៃនាយកដ្ឋានសិក្សាអាស៊ី អាហ្វ្រិក និងមជ្ឈិមបូព៌ា នៃវិទ្យាស្ថានទំនាក់ទំនងអន្តរជាតិនៃកម្ពុជា នៃរាជបណ្ឌិត្យសភាកម្ពុជារយៈពេល៣៧ឆ្នាំ ក្រោយការអនុវត្តគោលនយោបាយកំណែទម្រង់...

2023-04-03 10:28:40   Mon, 03,04,2023, 10:28 AM
ស្រ្តីក្នុងភាពជាអ្នកដឹកនាំ ដោយ៖ លោកបណ្ឌិត ទុយ យូឃីម អនុប្រធាននាយកដ្ឋានប្រវត្តិវិទ្យានិងវិទ្យាសាស្រ្តនយោបាយ, លោកស្រីបណ្ឌិត ជា វណ្ណី ប្រធាននាយកដ្ឋានធម្មសាស្រ្ត ចរិយាសាស្រ្ត និង យេនឌ័រ នៃវិទ្យាស្ថានមនុស្សសាស្រ្តនិងវិទ្យាសាស្រ្តសង្គមនៃរាជបណ្ឌិត្យសភាកម្ពុជា

បើកាលណាយើងនិយាយអំពី ស្រ្តីក្នុងភាពជាអ្នកដឹកកនាំ យើងមិនអាចបំភ្លេចបានទេនូវព្រះរាជនីយ៍ខ្មែរយើងកាលពីអតីតកាល មានដូចជា ព្រះនាងលីវយី (សោមម៉ា ឬនាងនាគ) ព្រះនាងជ័យទេវី (សម័យចេនឡា) ព្រះមហាក្សត្រិយានី អង្គម៉ី (សម...

2023-04-01 05:04:22   Sat, 01,04,2023, 05:04 AM
ប្រវត្តិឧត្តមសិក្សាកម្ពុជាពីឆ្នាំ១៩៤៦ ដល់ឆ្នាំ១៩៦៧-(History of Cambodian Higher Education From 1946 to 1967) ដោយ ៖ បណ្ឌិត សុង ស៊ីណា មន្ត្រីស្រាវជ្រាវនៃវិទ្យាស្ថានមនុស្សសាស្ត្រនិងវិទ្យាសាស្ត្រសង្គម

ការអប់រំតាមបែបប្រពៃណីត្រូវបានធ្វើឡើងនៅតាមទីវត្តអារាម ដោយមានព្រះសង្ឃជាអ្នកបង្រៀន។ ការអប់រំនាសម័យកាលនោះ ការសិក្សាបានផ្តោតលើការសរសេរ ឬអធិប្បាយទាក់ទងទៅនឹងអត្ថបទសាសនាជាដើម។ តាមរយៈការសិក្សាបែបប្រពៃណីនេះអាចធ...

2023-03-31 15:10:13   Fri, 31,03,2023, 03:10 PM

សេចក្តីប្រកាស