ព័ត៌មាន

សិក្ខាសាលាអន្តរជាតិ ស្តីពី «ការផ្សព្វផ្សាយលទ្ធផលស្រាវជ្រាវរួមគ្នាសម្រាប់ឆ្នាំទី១ និងទី២ នៃគម្រោងកសាងសមត្ថភាពស្រាវជ្រាវគោលនយោបាយជាតិកម្ពុជា និងយន្តការសម្រាប់កិច្ចសហប្រតិបត្តិការរវាងរដ្ឋកូរ៉េ-កម្ពុជា»

ថ្ងៃពុធ, 22 វិច្ឆិកា 2023 ម៉ោង 02:41 PM

អ្នកមើល 5678

ឯកឧត្តមបណ្ឌិតសភាចារ្យ សុខ ទូច ប្រធានរាជបណ្ឌិត្យសភាកម្ពុជា ផ្ដល់កិត្តិយសចូលរួមក្នុងសិក្ខាសាលាអន្តរជាតិដែលបានរៀបចំដោយវិទ្យាស្ថានស្រាវជ្រាវច្បាប់កូរ៉េ (KLRI) នៅព្រឹកថ្ងៃពុធ ទី២២ ខែវិច្ឆិកា ឆ្នាំ២០២៣ នៅទីក្រុងសេអ៊ូល ប្រទេសកូរ៉េ។ សិក្ខាសាលានេះមានការចូលរួមពីឯកឧត្តមសាស្ត្រាចារ្យបណ្ឌិត ចឹង ហ៊េគូ (Jung, Hae-Gu) ប្រធានក្រុមប្រឹក្សា ជាតិស្រាវជ្រាវសេដ្ឋកិច្ច មនុស្សសាស្ត្រ និងវិទ្យាសាស្ត្រសង្គម នៃសាធារណ រដ្ឋកូរ៉េ (NRC) ឯកឧត្តម ហាន យ៉ុងស៊ូ (Han, Yeong-Soo) ប្រធានវិទ្យាស្ថានស្រាវជ្រាវច្បាប់កូរ៉េ (KLRI) និងឯកឧត្តម លោកជំទាវ លោកសាស្រ្តាចារ្យបណ្ឌិត និងអ្នកស្រាវជ្រាវពីស្ថាប័នស្រាវជ្រាវទាំងពីរប្រទេស ជាច្រើនរូប។

ថ្លែងក្នុងសិក្ខាសាលានាព្រឹកនេះ ឯកឧត្តមបណ្ឌិតសភាចារ្យ បានថ្លែងអំណរគុណដល់ឯកឧត្តម ហាន យ៉ុងស៊ូ (Han, Yeong-Soo) ប្រធានវិទ្យាស្ថានស្រាវជ្រាវច្បាប់កូរ៉េ (KLRI) ដែលបានដាក់បញ្ចូលរាជបណ្ឌិត្យសភាកម្ពុជា ចូលជាសមាជិកនៃបណ្តាញព័ត៌មានច្បាប់អាស៊ី ដែលហៅកាត់ថា អាលីន (ALIN) កាលពីដើមខែកញ្ញាកន្លងទៅថ្មីៗនេះ នៅទីក្រុងតៃប៉ិ កោះតៃវ៉ាន់។ គំនិតផ្ដួចផ្ដើមក្នុងការរៀបចំវេទិកាដ៏មានសារៈសំខាន់នេះឡើងគឺពិតជាបានរួមចំណែកយ៉ាងសំខាន់ក្នុងការកសាងសមត្ថភាពស្រាវជ្រាវ ដើម្បីឱ្យកិច្ចការស្រាវជ្រាវកាន់តែមានលទ្ធផលល្អប្រសើរនិងមានប្រសិទ្ធភាពខ្ពស់។

សូមបញ្ជាក់ដែរថា លទ្ធផលដ៏ត្រចះត្រចង់នៃគម្រោងស្រាវជ្រាវទី១ បានក្រាលផ្លូវឱ្យស្ថាប័នស្រាវជ្រាវនៃប្រទេសទាំងពីរ បន្តសហការគ្នាលើគម្រោងស្រាវជ្រាវពីរបន្ថែមទៀត រួមមាន គម្រោងស្រាវជ្រាវ ស្តីពីច្បាប់វិនិយោគទុននៅកម្ពុជា និងគម្រោងស្រាវជ្រាវទី២ ស្តីពីការរៀបចំគោលនយោបាយស្រាវជ្រាវនៅកម្ពុជា។ ការស្រាវជ្រាវរួមគ្នារបស់ស្ថាប័នទាំងពីរនេះ ជានឹងរួមចំណែកជាធាតុចូលដ៏មានសារៈសំខាន់សម្រាប់រាជរដ្ឋាភិបាលកម្ពុជា។

ជាមួយគ្នានេះ ឯកឧត្តមបណ្ឌិតសភាចារ្យ សុខ ទូច បានស្នើសុំឱ្យមានការសិក្សាស្រាវជ្រាវរួមគ្នាខាងរាជបណ្ឌិត្យសភាកម្ពុជានិងវិទ្យាស្ថាន KLRI បន្តសិក្សាលទ្ធភាពធ្វើការជាមួយគ្នានៅឆ្នាំបន្តបន្ទាប់ទៀត ដែលឯកឧត្តមបណ្ឌិតសភាចារ្យបានលើកជាពាក្យស្លោកថា «អង្គុយធ្វើការរួមគ្នា, រីកចម្រើនទាំងអស់គ្នា»។

គួរបញ្ជាក់ផងដែរថា ចាប់តាំងពីរាជបណ្ឌិត្យសភាកម្ពុជា និង NRC បានចុះអនុស្សរណៈនៃការយោគយល់គ្នាជាមួយគ្នា កាលពីឆ្នាំ២០១៩មក ស្ថាប័នស្រាវជ្រាវនៃប្រទេសទាំងពីរ បានខិតជិតគ្នាកាន់តែខ្លាំង។ ជាក់ស្តែង ក្រោមក្របខណ្ឌស្រាវជ្រាវរួមគ្នារាជបណ្ឌិត្យសភាកម្ពុជា និង NRC ការរួមសហការជាមួយវិទ្យាស្ថានស្រាវជ្រាវច្បាប់កូរ៉េ (KLRI) ជាមួយរាជបណ្ឌិត្យសភាកម្ពុជា បានឈានដល់ការចុះអនុស្សរណៈនៃការយោគយល់គ្នា កាលពីថ្ងៃទី៩ ខែកុម្ភៈ ឆ្នាំ២០២៣ កន្លងទៅ។ ស្ថាប័នស្រាវជ្រាវនេះបានផ្ដើមការសិក្សាលើការវិភាគស្ថានភាពស្រាវជ្រាវគោលនយោបាយនៃរាជបណ្ឌិត្យសភាកម្ពុជា។ របកគំហើញ នៃការស្រាវជ្រាវខាងលើ ពិតជាបានផ្តល់ជាធាតុចូលមួយយ៉ាងសំខាន់ដល់រាជបណ្ឌិត្យសភាកម្ពុជា។ ពិសេសជាងនេះទៀត ពេលថ្មីៗនេះរាជបណ្ឌិត្យសភាកម្ពុជា ទើបសម្រេចបាននូវការចុះអនុស្សរណនៃការយោគយល់គ្នាជាមួយសាលាគោលនយោបាយសាធារណៈនិងគ្រប់គ្រងកូរ៉េ (KDI School) និងជាមួយវិទ្យាស្ថានកូរ៉េសម្រាប់គោលនយោបាយ សេដ្ឋកិច្ច អន្តរជាតិ (KIEP) ផងដែរ។

អត្ថបទទាក់ទង

ប្រធានរាជបណ្ឌិត្យសភាកម្ពុជានឹងចូលរួមជាអធិបតីបើកសន្និសីទអន្តរជាតិតាមប្រព័ន្ធអនឡាញលើកទី១ ស្តីពី:ការអប់រំ ប្រឹក្សាគរុកោសល្យ

...រាជបណ្ឌិត្យសភាកម្ពុជា មានកិត្តិយសសូមគោរពជម្រាបជូនសាធារណជន និងប្រព័ន្ធផ្សព្វផ្សាយនានាឱ្យបានជ្រាបថា នៅថ្ងៃចន្ទ ៧កើត ខែបុស្ស ឆ្នាំជូត ទោស័ក ព.ស.២៥៦៤ ត្រូវនឹងថ្ងៃទី២១ ខែធ្នូ ឆ្នាំ២០២០ វេលាម៉ោង ៧:០០នាទ...

ថ្ងៃសៅរ៍, 19 ធ្នូ 2020 ម៉ោង 05:08 PM

រាជបណ្ឌិត្យសភាកម្ពុជារៀបចំវេទិកាពិភាក្សា ស្ដីពី «ប្រវត្តិសាស្ត្រប្រទេសកម្ពុជា»

(រាជបណ្ឌិត្យសភាកម្ពុជា)៖ នាព្រឹកថ្ងៃសុក្រ ៤កើត ខែបុស្ស ឆ្នាំជូត ទោស័ក ព.ស. ២៥៦៤ ត្រូវនឹងថ្ងៃទី១៨ ខែធ្នូ ឆ្នាំ២០២០ នេះ រាជបណ្ឌិត្យសភាកម្ពុជាបានរៀបចំវេទិកាពិភាក្សា ស្ដីពី «ដំណើរការសរសេរប្រវត្តិសាស្ត្រប្...

ថ្ងៃសុក្រ, 18 ធ្នូ 2020 ម៉ោង 12:18 PM

កិច្ចប្រជុំក្រុមប្រឹក្សាភិបាលវិទ្យាស្ថានខុងជឺនៃរាជបណ្ឌិត្យសភាកម្ពុជាប្រចាំឆ្នាំ២០២០

នាព្រឹកថ្ងៃពុធ ២កើត ខែបុស្ស ឆ្នាំជូត ទោស័ក ព.ស.២៥៦៤ ត្រូវនឹងថ្ងៃទី១៦ ខែធ្នូ ឆ្នាំ២០២០ វិទ្យាស្ថានខុងជឺនៃរាជបណ្ឌិត្យសភាកម្ពុជា បានរៀបចំកិច្ចប្រជុំក្រុមប្រឹក្សាភិបាលវិទ្យាស្ថានខុងជឺនៃរាជបណ្ឌិត្យសភាកម្ពុ...