ព័ត៌មាន

រាជបណ្ឌិត្យសភាកម្ពុជា និងស្ថានទូតអូស្ត្រាលីប្រចាំព្រះរាជាណាចក្រកម្ពុជាសហការរៀបចំបាឋកថា ស្ដីពី «អាស៊ាន-អូស្ត្រាលី៖ ភាពជាដៃគូយុទ្ធសាស្ត្រគ្រប់ជ្រុងជ្រោយ»

ថ្ងៃសុក្រ, 14 មករា 2022 ម៉ោង 04:33 PM

អ្នកមើល 4009

(រាជបណ្ឌិត្យសភាកម្ពុជា)៖ នៅព្រឹកថ្ងៃសុក្រ ១២កើត ខែបុស្ស ឆ្នាំឆ្លូវ ត្រីស័ក ពុទ្ធសករាជ ២៥៦៥ទី១៤ ខែមករា ឆ្នាំ២០២២នេះ វិទ្យាស្ថានទំនាក់ទំនងអន្តរជាតិកម្ពុជានៃរាជបណ្ឌិត្យសភាកម្ពុជា សហការជាមួយស្ថានទូតអូស្ត្រាលីប្រចាំព្រះរាជាណាចក្រកម្ពុជា រៀបចំបាឋកថា ស្ដីពី «បាឋកថា ស្ដីពី អាស៊ាន-អូស្ត្រាលី៖ ដៃគូយុទ្ធសាស្ត្រគ្រប់ជ្រុងជ្រោយ» ដែលឧទ្ទេសនាមដោយឯកឧត្ដម WILL NAKERVIS ឯកអគ្គរាជទូតអូស្ត្រាលីប្រចាំអាស៊ាន និងប្រព្រឹត្តទៅក្រោមអធិបតីភាពឯកឧត្ដមបណ្ឌិត យង់ ពៅ អគ្គលេខាធិការរាជបណ្ឌិត្យសភាកម្ពុជា និងជាតំណាងដ៏ខ្ពង់ខ្ពស់ឯកឧត្ដមបណ្ឌិត សភាចារ្យ សុខ ទូច ប្រធានរាជបណ្ឌិត្យសភាកម្ពុជា។

ក្នុងកម្មវិធីបាឋកថានាព្រឹកនេះ ក៏មានការអញ្ជើញចូលរួមជាកិត្តិយសពីសំណាក់ឯកឧត្ដម Pablo Kang ឯកអគ្គរាជ ទូតអូស្ត្រាលីប្រចាំព្រះរាជាណាចក្រកម្ពុជា ព្រមទាំងមានការនិមន្តនិងអញ្ជើញចូលរួមពីសំណាក់ព្រះសង្ឃ មន្ត្រីរាជការ អ្នកសិក្សាស្រាវជ្រាវ និងនិស្សិតសរុបចំនួន ១៣៧ អង្គ/នាក់ មកពីមជ្ឈដ្ឋានផ្សេងៗគ្នា បានចូលរួមស្ដាប់ ស្វែងយល់ និងចោទសួរយ៉ាងផុសផុលក្នុងកម្មវិធីបាឋកថានាព្រឹកនេះ។

ថ្លែងនៅក្នុងកម្មវិធីបាឋកថានាព្រឹកនេះ ឯកឧត្ដម WILL NAKERVIS ឯកអគ្គរាជទូតអូស្ត្រាលីប្រចាំអាស៊ាន បានថ្លែងរំលេចអំពីសារៈសំខាន់នៃទំនាក់ទំនងរវាងអូស្ត្រាលី និងអាស៊ាន និងបានគូសបញ្ជាក់អំពីទស្សនៈរបស់អូស្ត្រាលីចំពោះតួនាទីរបស់អាស៊ានក្នុងការរៀបចំសណ្តាប់ធ្នាប់ក្នុងតំបន់ ព្រមទាំងដំណើរឈានទៅកាន់ភាពជាដៃគូយុទ្ធសាស្ត្រគ្រប់ជ្រុងជ្រោយរវាងអូស្ត្រាលី និងអាស៊ាន។ ជាមួយគ្នានេះ ឯកឧត្ដមក៏បានថ្លែងសង្កត់ធ្ងន់អំពីតួនាទីស្នូលដ៏សំខាន់របស់អាស៊ាននៅក្នុងវេទិកាតំបន់/អន្តរជាតិ ក៏ដូចជាកិច្ចសហប្រតិបត្តិការពហុភាគីដទៃដែលមានក្នុងតំបន់ប៉ាស៊ីហ្វិក។

លើសពីនេះ ឯកឧត្ដមឯកអគ្គរាជទូតអូស្ត្រាលីប្រចាំអាស៊ាន បានបង្ហាញក្ដីរំពឹងប្រកបដោយសុទិដ្ឋិនិយមចំពោះតួនាទីរបស់កម្ពុជាក្នុងនាមប្រធានអាស៊ាននៅឆ្នាំ២០២២ ក្នុងការចូលរួមចំណែកដោះស្រាយបញ្ហានានាដែលមាននៅក្នុងតំបន់ ដូចជាករណីវិបត្តិនៅមីយ៉ាន់ម៉ាជាដើម ដោយអូស្ត្រាលីបានសម្ដែងការសាទរចំពោះការសម្របសម្រួលរបស់កម្ពុជា ដែលវានឹងក្លាយទៅជាជោគជ័យថ្មីមួយសម្រាប់អាស៊ាននៅក្នុងការសម្របសម្រួល និងស្វែងរកដំណោះស្រាយ ចំពោះ បញ្ហាកើតមានឡើងនៅក្នុងតំបន់។

នៅចុងបញ្ចប់នៃបាឋកថា ឯកឧត្ដម WILL NAKERVIS បានគូសបញ្ជាក់អំពីការគាំទ្រពេញទំហឹងរបស់អូស្ត្រាលីចំពោះតួនាទីរបស់កម្ពុជាក្នុងនាមប្រធានអាស៊ាន និងបានបង្ហាញនូវជំហរប្រកបដោយសោមនស្សក្នុងការបំពេញការងារជាមួយនឹងកម្ពុជា ក្នុងការពិភាក្សា ក៏ដូចជាពង្រឹង និងពិនិត្យមើលបន្ថែមនូវកិច្ចសហប្រតិបត្តិការនានាជាមួយអាស៊ាន ពិសេសជាមួយនឹងប្រទេសកម្ពុជា៕

RAC Media | លឹម សុវណ្ណរិទ្ធ

អត្ថបទទាក់ទង

ប្រធានរាជបណ្ឌិត្យសភាកម្ពុជានឹងចូលរួមជាអធិបតីបើកសន្និសីទអន្តរជាតិតាមប្រព័ន្ធអនឡាញលើកទី១ ស្តីពី:ការអប់រំ ប្រឹក្សាគរុកោសល្យ

...រាជបណ្ឌិត្យសភាកម្ពុជា មានកិត្តិយសសូមគោរពជម្រាបជូនសាធារណជន និងប្រព័ន្ធផ្សព្វផ្សាយនានាឱ្យបានជ្រាបថា នៅថ្ងៃចន្ទ ៧កើត ខែបុស្ស ឆ្នាំជូត ទោស័ក ព.ស.២៥៦៤ ត្រូវនឹងថ្ងៃទី២១ ខែធ្នូ ឆ្នាំ២០២០ វេលាម៉ោង ៧:០០នាទ...

ថ្ងៃសៅរ៍, 19 ធ្នូ 2020 ម៉ោង 05:08 PM

រាជបណ្ឌិត្យសភាកម្ពុជារៀបចំវេទិកាពិភាក្សា ស្ដីពី «ប្រវត្តិសាស្ត្រប្រទេសកម្ពុជា»

(រាជបណ្ឌិត្យសភាកម្ពុជា)៖ នាព្រឹកថ្ងៃសុក្រ ៤កើត ខែបុស្ស ឆ្នាំជូត ទោស័ក ព.ស. ២៥៦៤ ត្រូវនឹងថ្ងៃទី១៨ ខែធ្នូ ឆ្នាំ២០២០ នេះ រាជបណ្ឌិត្យសភាកម្ពុជាបានរៀបចំវេទិកាពិភាក្សា ស្ដីពី «ដំណើរការសរសេរប្រវត្តិសាស្ត្រប្...

ថ្ងៃសុក្រ, 18 ធ្នូ 2020 ម៉ោង 12:18 PM

កិច្ចប្រជុំក្រុមប្រឹក្សាភិបាលវិទ្យាស្ថានខុងជឺនៃរាជបណ្ឌិត្យសភាកម្ពុជាប្រចាំឆ្នាំ២០២០

នាព្រឹកថ្ងៃពុធ ២កើត ខែបុស្ស ឆ្នាំជូត ទោស័ក ព.ស.២៥៦៤ ត្រូវនឹងថ្ងៃទី១៦ ខែធ្នូ ឆ្នាំ២០២០ វិទ្យាស្ថានខុងជឺនៃរាជបណ្ឌិត្យសភាកម្ពុជា បានរៀបចំកិច្ចប្រជុំក្រុមប្រឹក្សាភិបាលវិទ្យាស្ថានខុងជឺនៃរាជបណ្ឌិត្យសភាកម្ពុ...