រាជបណ្ឌិត្យសភាកម្ពុជា

ជំនួបរវាងរាជបណ្ឌិត្យសភាកម្ពុជាជាមួយសាកលវិទ្យាល័យជីវជាំង

រាជបណ្ឌិត្យសភាកម្ពុជា៖ នៅព្រឹកថ្ងៃទី ២៨ មេសាឆ្នាំ ២០១៨ ឯកឧត្តមបណ្ឌិត យង់ ពៅ អគ្គលេខាធិការ ​រាជបណ្ឌិត្យសភាកម្ពុជា តំណាងឱ្យឯកឧត្តមបណ្ឌិតសភាចារ្យ សុខ ទូច ប្រធានរាជបណ្ឌិត្យសភាកម្ពុជា បានទទួលជួបជាមួយប្រតិភូដែលអញ្ជើញមកពីសាកលវិទ្យាល័យជីវជាំង នៃសាធារណរដ្ឋប្រជាមានិតចិន។

នៅក្នុងឱកាសនៃជួបនោះ រាជបណ្ឌិត្យសភាកម្ពុជា និងសាកលវិទ្យាល័យជីវជាំង បានពិភាក្សា លើបញ្ហាមួយ ចំនួន ដែលមានដូចជា ឱកាសនៃការធ្វើកិច្ចសហប្រតិបត្តិការជាមួយគ្នា ការបណ្តុះបណ្តាលលើជំនាញវេជ្ជសាស្ត្រ ការផ្លាស់ប្តូរអ្នកជំនាញរបស់ស្ថាប័នទាំងពីរ និងការធ្វើសន្និសីទរួមគ្នា។ភាគីទាំងពីរបានចុះហត្ថលេខាយល់ព្រម លើចំណុចដូចខាងក្រោម៖

         ១. ការសិក្សាស្រាវជ្រាវលើបញ្ហាវេជ្ជសាស្ត្រ និងប្រតិបត្តិការឱសថបុរាណចិននៅក្នុង ព្រះរាជណាចក្រកម្ពុជា  

             ដោតផ្តោលើបញ្ហាប្រឈម និងដំណោះស្រាយ

         ២.ការសិក្សាស្រាវជ្រាវលើអត្រានៃជំងឺដែលប៉ះពាល់សុខភាពប្រជាជនកម្ពុជា ដែលមានដូចជាជំងឺថ្លើម

            និងជំងឺក្រពះ ជាដើម។

        ៣.ការផ្លាស់ប្តូរទស្សនកិច្ចសិក្សាទៅប្រទេសចិន ដើម្បីសិក្សាយុទ្ធសាស្ត្រ ក្នុងការលើកកម្ពស់តំលៃ

            វេជ្ជសាស្ត្រក្នុងប្រទេសកម្ពុជា។ ៤. កិច្ចសហប្រតិបត្តិការស្រាវជ្រាវ ដើមឈើរបស់ព្រះរាជាណាចក្រកម្ពុជា

​​            នៅក្នុងទីតាំងឧទ្យានតេជោសែនឬស្សីត្រឹបនៃរាជបណ្ឌិត្យសភាកម្ពុជា។

នៅចុងបញ្ចប់នៃកិច្ចប្រជុំនោះ ភាគីទាំងពីរបានចុះហត្ថលេខាយល់ព្រមនូវចំណុចខាងលើ ដោយភាគីរាជ បណ្ឌិត្យសភាកម្ពុជា ដំណាងដោយឯកឧត្តមបណ្ឌិត យង់ ពៅ ហើយភាគីចិនដំណាងដោយបណ្ឌិត Xu Lishen ប្រធានផ្នែកវេជ្ជសាស្ត្រនៃសាកលវិទ្យាល័យជីវជាំង។

  ថ្ងៃសៅរ៍, 05 ឧសភា 2018 ម៉ោង 05:21 PM

ជំនួបជាមួយដៃគូសហប្រតិបត្តិការពីក្រុងសៀងហៃ

ឯកឧត្តមបណ្ឌិតយង់ ពៅ អគ្គលេខាធិការរាជបណ្ឌិត្យសភាកម្ពុជា តំណាងដ៏ខ្អង់ខ្ពស់របស់ឯកឧត្តមបណ្ឌិតសភាចារ្យ សុខ ទូច ប្រធានរាជបណ្ឌិត្យសភាកម្ពុជា បានអនុញ្ញាតឱ្យគណៈប្រតិភូចិន មកពីសាកលវិទ្យាល័យគរុកោសល្យចិនខាងកើតដឹកនាំដោយលោកស្រី ឆាង ជីវម៉ី ជួបសំដែងការគួរសម និងពិភាក្សាការងារនៅសាលស្លឹករឹត ព្រឹកថ្ងៃចន្ទ ២រោច ខែចេត្រ ឆ្នាំរកា នព្វស័ក ព.ស. ២៥៦១ ត្រូវនឹងថ្ងៃទី២ ខែមេសា ឆ្នាំ២០១៨។

គោលបំណងនៃជំនួបនេះគឺផ្តោតជាសំខាន់ក្នុងការផ្លាស់ប្តូរនិស្សិតថ្នាក់ក្រោយឧត្តមសិក្សា ការផ្តល់អាហារូបករណ៍ជូនដល់និស្សិតកម្ពុជា និងការពិនិត្យលទ្ធភាពក្នុងបង្កើតកិច្ចសហប្រតិបត្តិការរវាងស្ថាប័ននៃប្រទេសទាំងពីរ។ លោកស្រី ឆាង ជីវម៉ី បានកោតសរសើរនិងវាយតម្លៃខ្ពស់ចំពោះភាពរីកចម្រើន និងប្រសិទ្ធភាពការងាររបស់រាជបណ្ឌិត្យសភាកម្ពុជានាដំណាក់កាលថ្មីៗនេះ លោកស្រីមានជំនឿយ៉ាងមុតមាំថា ស្ថាប័នយើងទាំងពីរនឹងអាចធ្វើកិច្ចសហប្រតិបត្តិការរួមគ្នាលើវិស័យសិក្សានិងស្រាវជ្រាវ ជាពិសេសលើការសិក្សាភាសាចិនសម្រាប់ថ្នាក់បរិញ្ញាបត្រ ក៏ដូចជាថ្នាក់ក្រោយឧត្តមសិក្សា។ 

យ៉ាងណាម៉ិញ វិទ្យាស្ថានខុងជឺនៃរាជបណ្ឌិត្យសភាកម្ពុជា បានដើរតួយ៉ាងសំខាន់ណាស់ក្នុងការបណ្តុះបណ្តាលភាសាចិនដល់សិស្សានុសិស្សកម្ពុជា ក៏ដូចជាការផ្សព្វផ្សាយនូវវប្បធម៌ចិនដល់សិស្សានុសិស្សកម្ពុជា។ជាការឆ្លើយតប ឯកឧត្តមអគ្គលេខាធិការ បានថ្លែងអំណរគុណចំពោះគណៈប្រតិភូនិងបានកោតសរសើរចំពោះថ្នាក់ដឹកគណៈប្រតិភូ ដែលបានមកបំពេញទស្សនកិច្ចនៅរាជបណ្ឌិត្យសភាកម្ពុជានាពេលនេះ។ ឯកឧត្តមបណ្ឌិតបានបន្តថា « រដ្ឋាភិបាលប្រទេសយើងទាំងពីរ មានទំនាក់ទំនងគ្នាយ៉ាងល្អ ជាទំនាក់ទំនងគ្រប់ជ្រុងជ្រោយ ក្នុងនាមជាដៃគូសហប្រតិបត្តិការល្អរវាងប្រទេសទាំងពីរ។ 

បន្ថែមពីលើនេះទៀត ការជួបគ្នារវាងស្ថាប័នអប់រំសិក្សាស្រាវជ្រាវកំពូលៗរបស់ជាតិយើងទាំងពីរ ក៏ទាមទារឱ្យមានកិច្ចសហការគ្នាល្អផងដែរ។ ក្នុងន័យនេះយើងគួរមានកិច្ចសហការក៏ដូចជាកិច្ចការស្រាវជ្រាវរួមគ្នា ដើម្បីបង្កើននូវការរឹតចំណងមិត្តភាព ជាពិសេសលើការអប់រំនិងបណ្តុះបណ្តាលភាសាចិន»។ លោកស្រីឆាង ជីវម៉ី បានទទួលយកសំណើខាងរាជបណ្ឌិត្យសភាកម្ពុជានិងពិនិត្យលទ្ធភាពក្នុងការផ្តល់អាហារូបករណ៍ជូនដល់សិស្សានុសិស្សកម្ពុជាតាមរយៈវិទ្យាស្ថានខុងជឺនៃរាជបណ្ឌិត្យសភាកម្ពុជា។

 ដោយ ខែក វីរៈ | RAC Media

  ថ្ងៃអាទិត្យ, 08 មេសា 2018 ម៉ោង 07:16 PM

ឥណ្ឌូប៉ាស៊ីហ្វិក ជាតំបន់ភូមិសាស្ត្រនយោបាយថ្មីមួយរបស់អាម៉េរិក

យុទ្ធសាស្ត្រថ្មីរបស់លោកដូណាល់ត្រាំ គឺធានាឱ្យអាម៉េរិកមានភាពលេចធ្លោមុខមាត់នៅក្នុងតំបន់នានាដូចជា ឥណ្ឌូប៉ាស៊ីហ្វិក និង អឺរ៉ុប។ ឥណ្ឌូប៉ាស៊ីហ្វិក ដែលប្រើនៅពេលនេះគឺសម្តៅពីសមុទ្រឥណ្ឌាខាងលិចដល់ប៉ាស៊ីហ្វិកខាងកើត។ អ្វីដែលសហរដ្ឋអាម៉េរិកចង់ឆ្លុះបញ្ចាំងនៅពេលនេះគឺតួនាទីដែលរីកធំជាងមុនរបស់ឥណ្ឌា ទាំងសេដ្ឋកិច្ចនិងសន្តិសុខ។ ទី២ គឺអាម៉េរិកចង់ពង្រីកនូវតួនាទីរបស់តំបន់ឥណ្ឌូប៉ាស៊ីហ្វិក ហើយបើយើងក្រឡេកមើលទីតាំង គឺកម្ពុជា ស្ថិតនៅចំកណ្តាលតំបន់នេះ ។

 អាម៉េរិកចង់ឃើញប្រទេសឯករាជ្យដែលមានស្ថានភាពនិងគោលដៅដូចគ្នា នឹងអាចរីកចម្រើនទាំងអស់គ្នា។ យុទ្ធសាស្ត្រឥណ្ឌូប៉ាស៊ីហ្វិក គឺធានាបាននូវសេរីភាពនិងសន្តិភាព ប៉ុន្តែយើងបានជំរុញឱ្យរដ្ឋាភិបាលផ្តល់សិទ្ធិសេរីភាពនិងអំណាចដល់ពលរដ្ឋ ហើយអំណាចរដ្ឋត្រូវតែមានធម្មានុរូប។ ចក្ខុវិស័យរបស់អាម៉េរិកក្នុងតំបន់ឥណ្ឌូប៉ាស៊ីហ្វិក មិនទាត់ចោលប្រទេសណាមួយចោលនោះទេ ហើយអាម៉េរិកបានបើកចំហរចំពោះការធ្វើដំណើរទៅមុខរបស់ប្រទេសនានា។ 

សហរដ្ឋអាម៉េរិកមានមូលដ្ឋានបុគ្គលិកការទូតច្រើននៅតំបន់ឥណ្ឌូប៉ាស៊ីហ្វិក ហើយដៃគូនិងសម្ព័ន្ធមិត្តអាម៉េរិកនៅទីនោះ គ្មាននរណាអាចប្រៀបធៀបបាននោះឡើយ ក្នុងនោះមានអាស៊ាន និងអេប៉ិច ដែលជាវេទិកាតំបន់ដោយមានការបើកចំហរ និងសេរី។ សហរដ្ឋអាម៉េរិក បានវិនិយោគច្រើនទៅក្នុងស្ថាប័នតំបន់ទាំង២ដើម្បីធានាបាននូវភាពរីកចម្រើននិងសន្តិសុខក្នុងតំបន់ ហើយអាម៉េរិកនឹងធ្វើការដោះស្រាយបញ្ហាវិវាទដោយច្បាប់អន្តរជាតិនិងតំបន់។  នេះអ្វីដែលបានលើកឡើងក្នុងបាឋកថា ស្ដីពី «គោលនយោបាយរដ្ឋបាលដូណាល់ត្រាំ ស្ដីពីសន្តិសុខ និងពាណិជ្ជកម្មក្នុងតំបន់» ដោយធ្វើបទបង្ហាញដោយ លោក ម៉ៃឃើល ញូបៀល អនុប្រធានបេសកកម្មកិច្ចការបរទេសរបស់ស្ថានទូតអាម៉េរិកប្រចាំព្រះរាជាណាចក្រកម្ពុជានៅសាលរំដួលអគារ A នៃរាជបណ្ឌិត្យសភាកម្ពុជា នាព្រឹកថ្ងៃទី៣ ខែមេសា ឆ្នាំ២០១៨ នេះ ។

ដោយ ខែក វីរៈ / RAC Media

  ថ្ងៃអាទិត្យ, 08 មេសា 2018 ម៉ោង 06:52 PM

ការបណ្តុះបណ្តាលនៅរាជបណ្ឌិត្យសភាកម្ពុជា

វេលាម៉ោង៧:៣០ ព្រឹក ថ្ងៃសៅរ៍ ៧រោច ខែចេត្រ ឆ្នាំរកា នព្វស័ក ព.ស ២៥៦១ ត្រូវនឹងថ្ងៃទី៧ ខែមេសា ឆ្នាំ២០១៨ ផ្នែកបណ្តុះបណ្តាល និងស្រាវជ្រាវ នៃរាជបណ្ឌិត្យសភាកម្ពុជា បានរៀបចំប្រឡងបញ្ចប់មុខវិជ្ជា (Final Exam) ថ្នាក់បរិញ្ញាបត្រជាន់ខ្ពស់ជំនាន់ទី៥ វគ្គ២ និងថ្នាក់បណ្ឌិតជំនាន់២ វគ្គ២ សម្រាប់ឆ្នាំសិក្សា២០១៧-២០១៨ ដែលមានបេក្ខជនប្រលងសរុប១០៨ នាក់ ក្នុងនោះថ្នាក់បរិញ្ញាបត្រជាន់ខ្ពស់មានចំនួន៤៤ និងថ្នាក់បណ្ឌិតមានចំនួន៦៤នាក់។រាជបណ្ឌិត្យសភាកម្ពុជាមានបណ្តុះបណ្តាល ថ្នាក់បរិញ្ញាបត្រជាន់ខ្ពស់ និងថ្នាក់បណ្ឌិតនូវមុខវិជ្ជាឯកទេសមួយចំនួនដូចខាងក្រោម៖

ក/.ថ្នាក់បរិញ្ញាបត្រជាន់ខ្ពស់

• រដ្ឋបាលសាធារណៈ
• នីតិសាស្រ្ត
• វិទ្យាសាស្ត្រនយោបាយ
• វិទ្យាសាស្ត្រអប់រំ
• គណិតវិទ្យា
• អក្សរសិល្ប៍   

ខ/ ថ្នាក់បណ្ឌិត

• រដ្ឋបាលសាធារណៈ
• នីតិសាស្រ្ត
• វិទ្យាសាស្ត្រនយោបាយ
• វិទ្យាសាស្ត្រសេដ្ឋកិច្ច
• ទស្សនវិជ្ជា
• វិទ្យាសាស្ត្រសុខាភិបាល
• បុរាណវិទ្យា

ថ្នាក់បរិញ្ញាបត្រជាន់ខ្ពស់ សិក្សាចំនួន៥៧ ក្រេឌីត រីឯថ្នាក់បណ្ឌិត សិក្សា ៦១ ក្រេឌីត។ 

ដោយ ខែក វីរៈ / RAC Media

  ថ្ងៃអាទិត្យ, 08 មេសា 2018 ម៉ោង 06:39 PM

សតវត្សនៃការជម្លៀសជនជាតិចាមដោយបង្ខំ ៖ ករណីសិក្សាជនជាតិចាមនៅម៉ឡេស៊ី

សតវត្សនៃការជម្លៀសជនជាតិចាមដោយបង្ខំ ៖ ករណីសិក្សាជនជាតិចាមនៅម៉ឡេស៊ី «ខ្ញុំចង់សង្កត់ធ្ងន់ចំពោះគុណបំណាច់របស់សម្តេច ហេង សំរិន ដែលបានសង្គ្រោះជនជាតិចាមឱ្យរស់រានមានជីវិត និង សម្តេចហ៊ុន សែន ដែលបានអភិវឌ្ឍជនជាតិចាមប្រកបដោយសុខដុមរមនាក្នុងសង្គមខ្មែរឱ្យមានសេរីភាព។ 

បើទោះជាមានការជន្លៀសទោកាន់ប្រទេសម៉ាឡេតែក៏មានជនជាតិចាម និងសហគមន៍ចាមរស់នៅដោយសុខដុមរមនាក្នុងប្រទេសខ្មែរ» នេះជាការលើកឡើងរបស់ឯកឧត្តមបណ្ឌិតសភាចារ្យ ស៊ុ ឈុំប៊ុន អនុប្រធានរាជបណ្ឌិត្យសភាកម្ពុជា ថ្លែងក្នុង¬ឳកាសបើកបាឋកថាស្តីអំពី សតវត្សនៃការជម្លៀសជនជាតិចាមដោយបង្ខំ ៖ ករណីសិក្សាជនជាតិចាមនៅម៉ឡេស៊ី ដែលប្រព្រឹទ្ធទៅនៅវេលាព្រឹកថ្ងៃសុក្រ ១រោច ខែផល្គុន ឆ្នាំរកា នព្វស័ក ព.ស ២៥៦១ ត្រូវនឹងថ្ងៃទី២ ខែមីនា ឆ្នាំ២០១៨ នៅសាលរំដួល នៃរាជបណ្ឌិត្យសភាកម្ពុជា។

 ឯកឧត្តមបានបន្តទៀតថា៖ ក្រោយរំដោះឆ្នាំដ១៩៧៩ មកដល់ឥឡូវ៣៩ឆ្នាំហើយ ដែលសហគមន៍ជនជាតិចាមមានការអភវិឌ្ឍន៍ មានការចេះដឹង រីកចម្រើន និង មានសិទ្ធិសេរីភាព និងបានទៅកាន់អារ៉ាប់និងម៉ាឡេស៊ីជាដើម។ ទាំងនេះក៏ដោយសារតែនយោបាយដ៏ល្អប្រពៃ ដែលមានការបន្តវេនពីសម្តេចហេង សំរិន និង សម្តេចហ៊ុន សែនដែលបានរៀបចំឱ្យមានការរស់នៅប្រកបដោយសិទ្ធិសេរីភាព និងការគោរពតាមច្បាប់របស់កម្ពុជាដែលកម្ពុជាយើងឃើញថាជនជាតិចាមរស់នៅកម្ពុជាប្រកបដោយសុខដុមនិងរីករចម្រើន។ 

វាគ្មិនដោយបណ្ឌិត៖ Rie Nakamura សាស្ត្រាចារ្យសាកលវិទ្យាល័យកេបាសាអាងប្រទេសម៉ាឡេស៊ី លោកបានបលើកឡើងថា៖ ជនជាតិចាមមានប្រវត្តិយូរអង្វែងមកហើយ ដែលបានធ្វើចំណាកស្រុកមករស់នៅក្នុងប្រទេសកម្ពុជាដែលយើងហៅថា ខ្មែរ-ឥស្លាម រហូតដល់របបប៉ុលពតដែលបានធ្វើបាបជនជាតិចាមដែលនាំឱ្យមានការជន្លៀសទៅកាន់ប្រទេសម៉ាឡេ។ សូមបញ្ជាក់ជូនថា បាឋកថានេះត្រូវបានរៀបចំឡើងដោយ រាជបណ្ឌិត្យសភាកម្ពុជាសហការជាមួយសាកលវិទ្យាល័យកេសបាងសាអាប្រទេសម៉ាឡេស៊ី។

 RAC Media



  ថ្ងៃពុធ, 14 មីនា 2018 ម៉ោង 01:47 PM

ជំនួបពិភាក្សាការងារ

នៅរសៀលថ្ងៃចន្ទ ១២កើត ខែផល្គុន ឆ្នាំរកា នព្វស័ក ព.ស២៥៦១ ត្រូវនឹងថ្ងៃទី២៦ខែកុម្ភៈ ឆ្នាំ២០១៨ ឯកឧត្តមបណ្ឌិតសភាចារ្យសុខ ទូចប្រធានរាជបណ្ឌិត្យសភាកម្ពុជា បានអនុញ្ញាតឱ្យលោក ZENG YU FENG សាស្ត្រាចារ្យសាកលវិទ្យាល័យ ជីង ហ៊ួ ខេត្តជៀលជាំងនៃសាធារណរដ្ឋប្រជាមានិតចិន ដើម្បីជួបសំដែងការគួរសមនិងពិភាក្សាការងារ នៅបន្ទប់ប្រជុំស្លឹករឹតនៃរាជបណ្ឌិត្យសភាកម្ពុជា។

ខុទ្ទកាល័យ របសក

  ថ្ងៃពុធ, 14 មីនា 2018 ម៉ោង 01:36 PM

ចនានុក្រមអក្ខរាវិរុទ្ធ

កាលពីព្រឹកថ្ងៃទី ២០កុម្ភៈ ឆ្នាំ ២០១៨ វិទ្យាស្ថានភាសាជាតិនៃរាជបណ្ឌិត្យសភាកម្ពុជា បានធ្វើពិធីប្រកាសផ្សាយ « វចនានុក្រមអក្ខរាវិរុទ្ធ» ដែលជាការបោះពុម្ពលើកទីពីរ ដែលមានចំនួនជាង ៤ម៉ឺនពាក្យ រួមទាំងមេពាក្យ និងកូនពាក្យ ដើម្បីបានជាប្រយោជន៍សម្រាប់ប្រជាជនកម្ពុជា ក្នុងការអាន និងសរសេរភាសាជាតិឱ្យបានកាន់តែត្រឹមត្រូវ និងដើម្បីជាការរួមចំណែកអភិវឌ្ឍប្រទេសជាតិជាមួយរាជរដ្ឋាភិបាលកម្ពុជា។

 មុនពេលចាប់ផ្តើមកម្មវិធី ឯកឧត្តមបណ្ឌិត ជួរ គារី បានអានប្រវត្តិនៃការកើតមាន វចនានុក្រមអក្ខរាវិរុទ្ធ ព្រមទាំងការប្រឹងប្រែងរបស់គណៈកម្មការនិពន្ធ ថា្នក់ដឹកនាំវិទ្យាស្ថានភាសាជាតិ និងថា្នក់ដឹកនាំរាជបណ្ឌិត្យសភាកម្ពុជា ដែលបានជួយជ្រោមជ្រែង និងលើកទឹកចិត្តចំពោះការបោះពុម្ភផ្សាយនេះ។ នៅក្នុងពិធីនៃការប្រកាសផ្សព្វផ្សាយនោះ ត្រូវបានអញ្ជើញចូលរួមជាអធិបតីដោយឯកឧត្តមបណ្ឌិតសភាចារ្យ ស៊ុ ឈុំប៊ុន អនុប្រធានរាជបណ្ឌិត្យសភាកម្ពុជា និងមានការចូលរួមពីសំណាក់ប្រធានវិទ្យាស្ថានទាំងអស់នៃរាជបណ្ឌិត្យសភាកម្ពុជា។ 

នៅក្នុងសុន្ទរកថាបើកកម្មវិធីនោះ ឯកឧត្តមបណ្ឌិតសភាចារ្យ ស៊ុ ឈុំប៊ុន បានមានប្រសាសន៍ថា “នៅក្នុងប្រទេសកម្ពុជាយើង បានសម្រេចយកវចនានុក្រមរបស់សម្តេចព្រះសង្ឃរាជ ជួន ណាត ធ្វើជាគោលសម្រាប់ការអាន និងការសរសេរភាសាជាតិ ហើយយើងគោរពទៅតាមអ្វីដែលមាននៅក្នុងវចនានុក្រមនោះ តែដោយសារមានពាក្យថ្មីៗ និងមានភាពមិនស្របគ្នាក្នុងការអានពាក្យមួយចំនួន អីចឹងហើយបានជាកើតមានវចនានុរក្រមអក្ខរាវិរុទ្ធភាសាខ្មែរនេះ ”។ 

កម្មវិធីនៃការប្រកាសផ្សព្វផ្សាយនោះ បានបញ្ចប់នៅវេលាម៉ោង ១០ព្រឹក ដោយការសារទរ និងក្តីសង្ឃឹមសម្រាប់ការអភិវឌ្ឍជាតិ។ 

ភ្នំពេញ ថ្ងៃអង្គារ៍ ៦កើតខែផល្គុន ឆ្នាំ រកា នព្វស័ក ព.ស. ២៥៦១ត្រូវនឹងថ្ងៃទី ២០កុម្ភៈ ឆ្នាំ ២០១៨ RAC Media

  ថ្ងៃពុធ, 14 មីនា 2018 ម៉ោង 01:32 PM

ជំនួបរវាងឯកឧត្តមបណ្ឌិតសភាចារ្យ សុខ ទូច ប្រធានរាជបណ្ឌិត្យសភាកម្ពុជាបានទទួលជួបមន្ត្រីផ្នែកទំនាក់ទំនងកិច្ចការសាធារណៈស្ថានទូតអាមេរិក

សេចក្តីជូនព័ត៌មាន!រសៀលថ្ងៃអង្គារ ៦រោច ខែមាឃ ឆ្នាំរកា នព្វស័ក ព.ស ២៥៦១ ត្រូវនឹងថ្ងៃទី៦ ខែកុម្ភៈ ឆ្នាំ២០១៨ ឯកឧត្តមបណ្ឌិតសភាចារ្យ សុខ ទូច ប្រធានរាជបណ្ឌិត្យសភាកម្ពុជាបានទទួលជួបមន្ត្រីផ្នែកទំនាក់ទំនងកិច្ចការសាធារណៈស្ថានទូតអាមេរិក ប្រចាំព្រះរាជាណាចក្រកម្ពុជា នាបន្ទប់ប្រជុំស្លឹករឹត។ ក្នុងជំនួបនេះភាគីទាំងពីរបានឯកភាពគ្រោងនឹងសហការរួមគ្នា៣ចំណុច៖

1. លើផ្នែកបណ្តុះបណ្តាល
2. ​ការសិក្សាស្រាវជ្រាវ
3. វិទ្យាសាស្រ្តបច្ចេកវិជ្ជាវិស្វកម្មនិងគណិតវិទ្យា(STEM)
   

ខុទ្ទកាល័យ របសក

  ថ្ងៃពុធ, 14 មីនា 2018 ម៉ោង 01:26 PM

សន្និបាតបូកសរុបការងារប្រចាំឆ្នាំ២០១៧និងទិសដៅឆ្នាំ២០១៨

សន្និបាតនេះ ប្រារព្ធធ្វើឡើងក្នុងគោលបំណងពិនិត្យ និងវាយតម្លៃលទ្ធផលការងាររបស់រាជបណ្ឌិត្យសភាកម្ពុជា ក្នុងរយៈពេលពេញមួយឆ្នាំ២០១៧មកនេះ និងលើកទិសដៅឆ្នាំ២០១៨។ ជាការណ៍ពិតណាស់, មួយឆ្នាំកន្លងទៅនេះ មានការងារជាច្រើនដែលយើងសម្រេចបានប្រកបដោយភាពវិជ្ជមាន ទន្ទឹមនឹងនេះក៏នៅមានសេសសល់ការងារជាច្រើនទៀតដែលទាមទារឱ្យយើងត្រូវរួមគ្នាគិតនិងរួមគ្នាធ្វើបន្តទៅទៀត ដើម្បីបង្កើនប្រសិទ្ធភាពការងារឱ្យកាន់តែមានការរីកចម្រើនទៅមុខថែមមួយកម្រិតទៀត ស័ក្តសមជាស្ថាប័នស្រាវជ្រាវជាន់ខ្ពស់របស់ជាតិ ដើម្បីស្វែងរកធាតុចូលថ្មីៗជូនរដ្ឋាភិបាល និងប្រជាជនកម្ពុជា។  

នេះជាការលើកឡើងរបស់ឯកឧត្តមបណ្ឌិតសភាចារ្យ សុខ ទូច ប្រធានរាជបណ្ឌិត្យសភាកម្ពុជា ក្នុងសន្និបាតបូកសរុបការងារប្រចាំឆ្នាំ២០១៧ និងទិសដៅឆ្នាំ២០១៨។ នៅចំពោះមុខថ្នាក់ដឹកនាំ និងមន្ត្រីរាជការរាជបណ្ឌិត្យសភាកម្ពុជាជាង២៤៦នាក់ ឯកឧត្តមបណ្ឌិតសភាចារ្យបានសង្កត់ធ្ងន់ថា « យើងត្រូវជម្រុះចោលឱ្យអស់នូវមន្ត្រីអសកម្មការងារ រាជបណ្ឌិត្យសភាកម្ពុជាត្រូវការអ្នកដែលមកធ្វើការ បើគ្រាន់តែចុះហត្ថលេខាក៏ពឹងឱ្យគេចុះហត្ថលេខាជំនួសដែរ សូមដាក់ពាក្យព្យួរការងារទៅ យើងត្រូវការមនុស្សដែលមកធ្វើការ មិនត្រូវការអ្នកយកមុខនោះទេ។ នៅខែមេសាខាងមុខនេះ យើងនឹងត្រូវការរើសមន្ត្រីថ្មីដើម្បីធ្វើការ...»សូមជម្រាបជូនថា នៅវេលាព្រឹកថ្ងៃពុធ ៧រោច ខែមាឃ ឆ្នាំរកា នព្វស័ក ព.ស.២៥៦១ ត្រូវនឹងថ្ងៃទី០៧ ខែកុម្ភៈ ឆ្នាំ២០១៨ រាជបណ្ឌិត្យសភាកម្ពុជាកំពុងរៀបចំកម្មវិធី បើកសន្និបាតបូកសរុបការងារប្រចាំឆ្នាំ២០១៧និងទិសដៅឆ្នាំ២០១៨។ កម្មវិធីសន្និបាតនេះប្រព្រឹត្តិទៅរយៈពេលបីថ្ងៃ គឺចាប់ពីថ្ងៃទី០៧-០៨-០៩ ខែកុម្ភៈ ឆ្នាំ២០១៨ នៅ សាលរំដួល រាជបណ្ឌិត្យសភាកម្ពុជា ក្រោមអធិបតីដ៏ខ្ពង់ខ្ពស់របស់ឯកឧត្តមបណ្ឌិតសភាចារ្យ សុខ ទូច ប្រធានរាជបណ្ឌិត្យសភាកម្ពុជា និងថ្នាក់ដឹកនាំព្រមទាំងមន្ត្រីរាជការទាំងអស់របស់រាជបណ្ឌិត្យភាកម្ពុជា។

  ថ្ងៃពុធ, 14 មីនា 2018 ម៉ោង 01:22 PM