រាជបណ្ឌិត្យសភាកម្ពុជា

«ជប៉ុនផ្តល់ជំនួយឥតសំណងជាង ៦៨ ម៉ឺនដុល្លារអាមេរិក សម្រាប់អភិវឌ្ឍន៍វិស័យ សុខាភិបាល អប់រំ និង ហេដ្ឋារចនាសម្ព័ន្ធនៅកម្ពុជា»

ចុះផ្សាយថ្ងៃទី០៨ ខែវិច្ឆិកា ឆ្នាំ២០១៨ ម៉ោង៖ ៣ : ២០ នាទីរសៀល

ភ្នំពេញ៖ កាលពីថ្ងៃអង្គារ៍ ទី០៦ ខែវិច្ឆិកា ឆ្នាំ២០១៨ ម្សិលមិញ រាជរដ្ឋាភិបាលជប៉ុន បានឯកភាពផ្តល់ថវិកាសរុបចំនួន ៦៨៣,២៥៤ ដុល្លារអាមេរិក ដល់កម្ពុជាដើម្បីធ្វើការអភិវឌ្ឍទៅលើវិស័យសុខាភិបាល អប់រំ និងហេដ្ឋារចនាសម្ព័ន្ធ។

នេះបើតាមការប្រកាសឱ្យដឹងនៅលើទំព័រ Facebook ផ្លូវការរបស់ស្ថានទូតជប៉ុនប្រចាំកម្ពុជា។បើតាមការប្រកាសរបស់ស្ថានទូតជប៉ុនប្រចាំកម្ពុជា ថវិកាទាំងនោះ នឹងត្រូវផ្ដល់ទៅឱ្យ មន្ទីរខេត្តចំនួន៥ និងអង្គការក្រៅរដ្ឋាភិបាលចំនួន២ ក្រោមគ្រោងការណ៍ជំនួយឧបត្ថម្ភឥតសំណងសម្រាប់គម្រោងទ្រង់ទ្រាយតូចសន្តិសុខមនុស្សជាតិ ដែលក្នុងនោះមានដូចជា៖

១. ផ្តល់ជូន ១៧៥,២៥០ ដុល្លារអាមេរិកដល់មន្ទីរសុខាភិបាលខេត្តព្រះវិហារ។

២. ផ្តល់ជូន ៧៩,០៨៤ ដុល្លារអាមេរិកដល់អង្គការសុខភាពត្រជៀកកម្ពុជា។

៣. ផ្តល់ជូន ៨៨,៦៣៤ ដុល្លារអាមេរិកដល់មន្ទីរអប់រំយុវជននិងកីឡាខេត្តរតនគីរី។

៤. ផ្តល់ជូន ៨៥,៣០០ ដុល្លារអាមេរិកដល់មន្ទីរអប់រំយុវជននិងកីឡាខេត្តក្រចេះ។

៥. ផ្តល់ជូន ៧៧,១៦៦ ដុល្លារអាមេរិកដល់អង្គការមូនិធិខ្មែរជំនួយការសិក្សា។

៧. ផ្តល់ជូន ៨៩,២៨៥ ដុល្លារអាមេរិកដល់មន្ទីរសាធារណការនិងដឹកជញ្ជូនខេត្តប៉ៃលិន។

៨. ផ្តល់ជូន ៨៨,៥៣៥ ដុល្លារអាមេរិកដល់មន្ទីរសាធារណការនិងដឹកជញ្ជូនខេត្តបន្ទាយមានជ័យ។

គួរបញ្ជាក់ផងដែរថា ជប៉ុនធ្លាប់ជាម្ចាស់ជំនួយធំជាងគេបំផុតរបស់កម្ពុជា ហើយត្រឹមតែក្នុងរយៈពេល ១០ឆ្នាំ ថវិកា ៧២០ លានដុល្លារអាមេរិក ត្រូវបានផ្តល់ដើម្បីគាំទ្រដល់ការអភិវឌ្ឍរបស់ប្រទេសកម្ពុជា ព្រមទាំងការរីកចម្រើន និងការចូលរួមនៅក្នុងអាស៊ានតាមរយៈក្របខណ្ឌដែលបានដាក់ចេញដោយគណៈកម្មាធិការជំនួយអភិវឌ្ឍ។

បន្ថែមពីលើនេះទៅទៀត កាលពីថ្ងៃទី០៨ ខែមេសា ឆ្នាំ២០១៨ ក្នុងដំណើរទស្សនកិច្ចរយៈពេល ១ថ្ងៃ របស់រដ្ឋមន្ត្រីការបរទេសជប៉ុន លោក តារ៉ូ កូណូ (Taro Kono) មកកាន់កម្ពុជា ជប៉ុនបានចុះហត្ថលេខាសម្រេចផ្ដល់ហិរញ្ញប្បទាន សរុបជាទឹកប្រាក់ជាង ៩០លានដុល្លារអាមេរិក ដល់របបលោក ហ៊ុន សែន ក្នុងនោះរួមមាន ទឹកប្រាក់ជាង ៤.៦លានដុល្លារជាជំនួយឥតសំណង សម្រាប់អនុវត្តន៍គម្រោងកម្មវិធីអភិវឌ្ឍន៍សេដ្ឋកិច្ច និងសង្គមនៅកម្ពុជា និងទឹកប្រាក់ជិត ៨៦លានដុល្លារ ជាទឹកប្រាក់កម្ចី ឥណទានសម្បទាន សម្រាប់អនុវត្តគម្រោងពង្រីកប្រព័ន្ធខ្សែបញ្ជូន និងចែកចាយអគ្គិសនីនៅរាជធានីភ្នំពេញ ជំហានទី២។

ក្នុងជំនួបជាមួយសម្ដេចតេជោនាយករដ្ឋមន្ត្រី រដ្ឋមន្ត្រីការបរទេសជប៉ុនបានជម្រាបសម្ដេចតេជោថា គោលបំណងរបស់ជប៉ុន គឺធ្វើយ៉ាងណាដើម្បីជួយដល់កម្ពុជាឱ្យក្លាយទៅជាប្រទេសដែលមានប្រាក់ចំណូលមធ្យមកម្រិតខ្ពស់នៅឆ្នាំ២០៣០។ ហើយលើសពីនេះទៅទៀត រដ្ឋមន្ត្រីជប៉ុនរូបនេះ ក៏បានសម្ដែងចំណាប់អារម្មណ៍ ក្នុងការជួយដល់ប្រទេសកម្ពុជា លើវិស័យមួយចំនួនដូចជា វិស័យដឹកជញ្ជូន ឡូជីស្ទីក រួមមានការគ្រប់គ្រងកំពង់ផែ តំបន់សេដ្ឋកិច្ចពិសេស និងការអភិវឌ្ឍធនធានមនុស្សជាដើម៕

RAC Media | លឹម សុវណ្ណរិទ្ធ

  ថ្ងៃព្រហស្បតិ៍, 08 វិច្ឆិកា 2018 ម៉ោង 03:24 PM

«សិក្ខាសាលាពាណិជ្ជកម្មសេរីរវាងអាស៊ាន-ចិន និងការចុះអនុស្សរណយោគយល់ជាមួយសាកលវិទ្យាល័យយូណាន់នៃសាធារណរដ្ឋប្រជាមានិតចិន»

ឯកឧត្តមបណ្ឌិត យង់ ពៅ អគ្គលេខាធិការរាជបណ្ឌិត្យសភាកម្ពុជា តំណាងឱ្យ ឯកឧត្តមបណ្ឌិតសភាចារ្យ​  សុខ ទូច ប្រធានរាជបណ្ឌិត្យសភាកម្ពុជា បានអញ្ជើញជាគណៈប្រតិភូ ទៅចូលរួមក្នុងសិក្ខាសាលាស្តីពី «ពាណិជ្ជកម្មសេរីរវាងអាស៊ាន-ចិន» និងអញ្ជើញទៅចុះអនុស្សរណយោគយល់រវាងរាជបណ្ឌិត្យសភាកម្ពុជាជាមួយនឹងសាកលវិទ្យាល័យ យូណាន់នៃសាធារណរដ្ឋប្រជាមានិតចិន។

សូមបញ្ជាក់ជូនថា កាលពីថ្ងៃទី ២៥ សីហា ឆ្នាំ ២០១៨   រាជបណ្ឌិត្យសភាកម្ពុជា បានចុះអនុស្សរណ​យោគយល់ជាមួយនឹងមជ្ឈមណ្ឌលអភិវឌ្ឍន៍ពាណិជ្ជកម្មខេត្តយូណាន ហើយនៅពេលនោះភាគីទាំងពីរបានព្រមព្រាងនូវខ្លឹមសារមួយចំនួនដូចខាងក្រោម៖ ១-បង្កើតទិន្នន័យផលិតផលកសិកម្មដែលមានអាជ្ញាប័ណ្ណក្នុងប្រទេសកម្ពុជា ២-បង្កើត វែបសាយពាណិជ្ជកម្មអេឡិចត្រូនិចជាភាសាខ្មែរសម្រាប់បង្ហាញផលិតផលកសិកម្មកម្ពុជា ៣- បង្កើតវែបសាយពាណិជ្ជកម្មអេឡិចត្រូនិចជាភាសាចិនសម្រាប់បង្ហាញផលិតផលកសិកម្មកម្ពុជាដែលគាំទ្រដល់ការធ្វើពាណិជ្ជកម្មអេឡិចត្រឡិចឆ្លងដែន និងការទិញដោយផ្ទាល់តាមអនឡាញ ៤- បង្កើតប្រព័ន្ធផ្ទុកទិន្នន័យលើអាកាស ( cloud Storage System)សម្រាប់ផលិតផលកសិកម្មកម្ពុជា តាមរយៈកិច្ចសហប្រតិបត្តិការ ដែលរួមទាំងឃ្លាំងឥវ៉ាន់សម្រាប់ការនាំចេញផលិតផលកសិកម្មមួយនៅក្នុងផែក្រុងព្រះសីហនុ និងឃ្លាំងទីស្នាក់ការកណ្តាលប្រាំ(៥)ទៀត ដែលមានទីតាំងនៅក្នុងទីតាំងផលិត ៥- បង្កើតប្រព័ន្ធតាមដានមួយ សម្រាប់ផលិតផលកសិកម្មកម្ពុជា ដើម្បីធ្វើឱ្យសម្រេចនូវការតាមដាន និងធានាគុណភាពសម្រាប់ផលិតផលសំខាន់ៗរបស់កម្ពុជា ៦- បង្កើតទីតាំងបណ្តុះបណ្តាលពាណិជ្ជកម្មអេឡិចត្រូនិចចំនួនដប់កន្លែង (១០)សម្រាប់ផលិតផលកសិកម្មកម្ពុជា ៧- ការផ្លាស់ប្តូរទស្សនកិច្ចបញ្ញវន័្ត  អ្នកស្រាវជ្រាវ ធ្វើបាឋកថា និងការស្រាវជ្រាវ ការបោះពុម្ពស្នាដៃវិទ្យាសាស្ត្រ សម្ភារៈស្រាវជ្រាវ សិក្ខាកាម និងនិស្សិត ថា្នក់បណ្ឌិត ៨- សិក្ខាសាលា គម្រោងស្រាវជ្រាវ និងសន្និសីទរួមគ្នា លើប្រធានបទដែលបានព្រមព្រៀងគ្នា។

ការអញ្ជើញទៅចូលរួមក្នុងសិក្ខាសាលានៅពេលនេះ ក៏ដើម្បីពិភាក្សាបន្ថែមលើអនុស្សរណៈដែលភាគីទាំងពីរបានព្រមព្រៀងគ្នារួចហើយ ដើម្បីជម្រុញកិច្ចការនេះឱ្យបានជាការអនុវត្តជាក់ស្តែង សម្រាប់ជាប្រយោជន៍ដែលរួមចំណែកជាការអភិវឌ្ឍប្រទេសជាមួយនឹងរាជរដ្ឋាភិបាលកម្ពុជាផងដែរ។

ក្រៅអំពីការអញ្ជើញទៅចូលរួមក្នុងសិក្ខាសាលា គណៈប្រតិភូរាជបណ្ឌិត្យសភាកម្ពុជា ក៏នឹងអញ្ជើញទៅចុះអនុស្សរណ យោគយល់ជាមួយនឹងសាកលវិទ្យាល័យយូណាន់ ដែលស្ថិតនៅក្នុងទីក្រុងគុនមីង នៃសាធារណរដ្ឋប្រជាមានិតចិនផងដែរ។

នៅក្នុងអនុស្សរណនៃការយោគយល់គ្នានោះ រាជបណ្ឌិត្យសភាកម្ពុជា និងសាកលវិទ្យាល័យយូណាន់ នឹងព្រមព្រៀងគ្នាលើចំណុចដូចជា៖ (១) ការផ្លាស់ប្តូរសាស្ត្រាចារ្យ និងអ្នកស្រាវជ្រាវ(២) ការផ្លាស់ប្តូរនិស្សិត និងការបើកកម្មវិធីបណ្តុះបណ្តាលរួមគ្នា(៣) រៀបចំគម្រោងស្រាវជ្រាវ សន្និសីទ និងកិច្ចប្រជុំរួមគ្នា(៤) ការផ្លាស់ប្តូរព័ត៌មាន និងការបោះពុម្ពផ្សាយ(៥) រួមគ្នាបង្កើតមជ្ឈមណ្ឌលស្រាវជ្រាវវប្បធម៌ចិន និងកម្ពុជា(៦) សកម្មភាពផ្សេងៗដែលបានព្រមព្រៀងគ្នាដោយស្ថាប័នទាំងពីរ។

រាជបណ្ឌិត្យសភាកម្ពុជា នឹងបន្តកិច្ចការរបស់ខ្លួន ដើម្បីពង្រីកឱកាសនៃការសិក្សាស្រាវជ្រាវ ពង្រីកចំណេះដឹង ទំនាក់ទំនងថា្នក់ជាតិ និងអន្តរជាតិ ដើម្បីបណ្តុះបណ្តាលធនធានមនុស្ស ហើយជាពិសេស រាជបណ្ឌិត្យសភាកម្ពុជានឹងបន្តពង្រីកសកម្មភាពរបស់ខ្លួនដើម្បីរួមចំណែកអភិវឌ្ឍន៍ប្រទេសជាមួយរាជរដ្ឋាភិបាលផងដែរ។

(គណៈប្រតិភូរាជបណ្ឌិត្យសភាកម្ពុជាបានអញ្ជើញសាធារណរដ្ឋប្រជាមានិតចិននៅថ្ងៃទី ១ កើត ខែ កក្តិក ឆ្នាំ ច សំរឹទ្ធិស័ក ព.ស ២៥៦១ ត្រូវនឹងថ្ងៃទី ៨ វិច្ឆិកា ឆ្នាំ ២០១៨)។

RAC Media

  ថ្ងៃព្រហស្បតិ៍, 08 វិច្ឆិកា 2018 ម៉ោង 01:43 PM

«កិច្ចប្រជុំសម្រេចរចនាសម្ពន្ធ័​ តួនាទី​ ភារកិច្ច​ រូបសញ្ញា​សៀវភៅផ្នត់​ បូកសរុបសមិទ្ធផលការងារឆ្នាំ២០១៨​ និងទិសដៅការងារអនុវត្តឆ្នាំ២០១៩»

ព្រឹកថ្ងៃពុធ ១៤រោច ខែអស្សុជ ឆ្នាំច សំរឹទ្ធិស័ក ពុទ្ធសករាជ ២៥៦២ត្រូវនឹងថ្ងៃទី៧ ខែវិច្ឆិកា ឆ្នាំ២០១៨ លោកបណ្ឌិត ឆេង​ វណ្ណរិទ្ធ​ប្រធានស្តីទីវិទ្យាស្ថានមនុស្សសាស្រ្តនិងវិទ្យាសាស្រ្តសង្គម​ បានដឹកនាំអង្គប្រជុំដើម្បីរៀបចំរចនាសម្ពន្ធ័​ តួនាទី​ភារកិច្ច​ រូបសញ្ញា​សៀវភៅផ្នត់​ បូកសរុបសមិទ្ធផលការងារឆ្នាំ២០១៨​ និងលើកទិសដៅការងារអនុវត្តសំរាប់ឆ្នាំ២០១៩។

ពិធីនេះមានការចូលរួមពី​ទីប្រឹក្សា​វិទ្យាស្ថាន ប្រធានផ្នែក​ និងអ្នកតំណាង​ផ្នែក​ បានពិភាក្សាសម្រេចជាគោលការណ៍នូវតួនាទីភារកិច្ចសំរាប់ផ្នែកទាំង៨បានដោយជោគជ័យ​ និងប្រគល់ភារកិច្ចជូនលោកបណ្ឌិតហាក់​ វ៉ាន់ដារា​ ប្រធានផ្នែក នរវិទ្យានិងពន្ទុវិទ្យារៀបចំសៀវភៅផ្នត់​ជាភាសា​ខ្មែរ និងអង់គ្លេស​ ប្រគល់ភារកិច្ចជូនលោកឃិន​ យ៉ង់​ លេខាអចិន្ត្រៃ​ រៀបចំនិមិត្តសញ្ញាតំណាងវិទ្យាស្ថាន​។

នាឱកាសនោះអង្គប្រជុំបានសម្រេចអោយផ្នែកទាំង៨ត្រូវប្រគល់របាយការណ៍សមិទ្ធផលការងារ​ឆ្នាំ២០១៨​និងទិសដៅអនុវត្តការងារឆ្នាំ២០១៩​ អោយបានមុនថ្ងៃទី១០វិច្ឆិកា​ឆ្នាំ២០១៨ជូនទៅខាងលេខាអចិន្ត្រៃ។

ពិធីបានបញ្ចប់នៅម៉ោង​ ១២ថ្ងៃត្រង់​ដោយបរិយាកាសរីករាយនិងស្នាមញញឹម។

RAC Media | ហេង​ សុភី​

  ថ្ងៃពុធ, 07 វិច្ឆិកា 2018 ម៉ោង 09:25 PM

«ក្រុមប្រឹក្សាជាតិភាសាខ្មែរអនុម័តបច្ចេកសព្ទគណៈកម្មការគីមីវិទ្យានិងរូបវិទ្យាបានចំនួន១៣ ពាក្យ»

ថ្ងៃពុធ ១៤រោច ខែអស្សុជ ឆ្នាំច សំរឹទ្ធិស័ក ព.ស.២៥៦២ ក្រុមប្រឹក្សាជាតិភាសាខ្មែរ ក្រោមអធិបតីភាពឯកឧត្តមបណ្ឌិត ហ៊ាន សុខុម បានបន្តប្រជុំពិនិត្យ ពិភាក្សា និងអនុម័តបច្ចេកសព្ទគណៈកម្មការគីមីវិទ្យានិងរូបវិទ្យា បានចំនួន១៣ពាក្យ ដូចខាងក្រោម៖

​

  ថ្ងៃពុធ, 07 វិច្ឆិកា 2018 ម៉ោង 09:02 PM

«៩ វិច្ឆិកា ២០១៨៖ ខួប៦៥ឆ្នាំ នៃឯករាជ្យជាតិកម្ពុជា និងជាថ្ងៃកំណើតនៃកងយោធពលខេមរភូមិន្ទ»

ចុះផ្សាយថ្ងៃទី៧  ខែវិច្ឆិកា ឆ្នាំ២០១៨ - ម៉ោង៖ ៤ :៣០ នាទីរសៀល

ភ្នំពេញ៖ ក្រោយពីទទួលបានឯករាជ្យបរិបូណ៌ពីសាធារណរដ្ឋបារាំង មកដល់ពេលនេះ មានរយៈពេល៦៥ឆ្នាំមកហើយ។

ថ្ងៃសុក្រ ទី០៩ ខែវិច្ឆិកា ឆ្នាំ២០១៨ នេះ ប្រទេសនិងប្រជាជនកម្ពុជានឹងប្រារព្ធទិវាបុណ្យឯករាជ្យរបស់ខ្លួនដែលបានទទួលតាំងពីឆ្នាំ១៩៥៣រៀងមក ហើយបើតាមការប្រកាសរបស់រាជរដ្ឋាភិបាល នៅឆ្នាំនេះទិវាបុណ្យឯករាជ្យជាតិ នឹងត្រូវបានធ្វើយ៉ាងអធិកអធមជាងឆ្នាំមុនៗ។

នៅពេលដែលនិយាយពីទិវាបុណ្យឯករាជ្យជាតិ ប្រជាពលរដ្ឋខ្មែរគ្រប់រូបប្រាកដជានឹកឃើញដល់អតីតព្រះមហាក្សត្រកម្ពុជា សម្តេចព្រះនរោត្តម សីហនុ ដែលបានខិតខំប្រឹងប្រែងបំពេញព្រះរាជបូនីយកិច្ច ក្នុងបុព្វហេតុឯករាជ្យភាពនៃប្រទេសជាតិមាតុភូមិ និងបានទទួលព្រះគោរម្យងារជា ព្រះបិតាឯករាជ្យជាតិ នៃព្រះរាជាណាចក្រកម្ពុជា។ការតស៊ូទាមទារឯករាជ្យរបស់កម្ពុជាបានចាប់ផ្ដើមទទួលផ្លែផ្កានៅឆ្នាំ១៩៤៩ ដែលកាលណោះ តាមសន្ធិសញ្ញាដែលចុះថ្ងៃទី៨ ខែវិច្ឆិកា ឆ្នាំ ១៩៤៩ បារាំងបានទទួលស្គាល់តាមផ្លូវច្បាប់នូវ ឯករាជ្យរបស់ព្រះរាជាណាចក្រកម្ពុជា ក៏ប៉ុន្តែទោះជាយ៉ាងនេះក្ដី ឯករាជ្យដែលបារាំងបានអះអាងថាបានទទួលស្គាល់នេះ គឺមានតែឈ្មោះនិងរូបរាងតែប៉ុណ្ណោះ ដោយនៅក្នុងឯករាជ្យនេះ វិស័យសំខាន់ៗជាច្រើន ដែលបារាំងនៅតែបន្តកាន់កាប់ ពុំទាន់ផ្ដល់ជូនកម្ពុជា មានដូចជា អធិបតេយ្យខាងយុត្ដិធម៌ នគរបាល បញ្ជាការយោធា ការទូត ការប្ដូរនិងការឱ្យចាយធនប័ត្រជាដើម។

ក្រោយមកទៀត ព្រះករុណាព្រះបាទសម្តេចព្រះនរោត្តម សីហនុ បានយាងទៅគង់នៅតំបន់ស្វយ័តមួយដែល រួមមានខេត្តសៀមរាប បាត់ដំបងនិងកំពង់ធំដើម្បីបន្តការទាមទារឯករាជ្យពេញលេញជូនជាតិមាតុភូមិ ហើយទ្រង់បានប្រ កាសថា ព្រះអង្គនឹងយាង ចូលរាជធានីវិញ នៅពេលណាដែលបារាំង ព្រមផ្ទេរមកឱ្យប្រទេសកម្ពុជាវិញនូវកេតន ភ័ណ្ឌចុង ក្រោយនៃឯករាជ្យរបស់ខ្លួន។ គួរបញ្ជាក់ផងដែរថា ស្វយ័តភាពផ្នែកយោធានៃខេត្ដទាំងនេះ ត្រូវបានប្រគល់ ឱ្យប្រទេសកម្ពុជា ដោយមានការទាមទារមួយរបស់ព្រះមហាក្សត្រកម្ពុជា ដែលបានធ្វើឡើងនៅឆ្នាំ១៩៤៩ សម្រាប់ខេត្តសៀមរាបនិងខេត្ដកំពង់ធំ និងនៅឆ្នាំ១៩៥២ សម្រាប់ខេត្ដបាត់ដំបង។ដើម្បីគាំទ្រដល់ព្រះរាជបូជនីយកិច្ចទាមទារឯករាជ្យពេញលេញនេះ ព្រះករុណាព្រះបាទ សម្ដេចព្រះនរោត្ដម សីហនុ បានបង្កើតកងកម្លាំងជីវពលនារីក្លាហានមួយដែលក្រោយមកមានតួនាទីយ៉ាងធំធេងក្នុងបុព្វហេតុទាមទារឯករាជ្យភាព។

ជាលទ្ធផល នៅថ្ងៃទី២៩ ខែសីហា ឆ្នាំ១៩៥៣ ការចុះហត្ថលេខារវាងបារាំងនិងកម្ពុជា លើកិច្ចព្រមព្រៀងផ្ទេរអំណាចតុលាការត្រូវបានធ្វើឡើង។ ហើយនៅថ្ងៃទី២៩ ខែសីហា ឆ្នាំ ១៩៥៣ មានការចុះហត្ថលេខាលើកិច្ចព្រមព្រៀងផ្ទេរសមត្ថកិច្ចរបស់កងនគររបាល និងបន្ថែមពីលើនេះគឺការចុះហត្ថលេខាទៅលើកិច្ចព្រមព្រៀងស្ដីពីអធិបតេយ្យខាងយោធារបស់ព្រះរាជាណាចក្រកម្ពុជា នៅថ្ងៃទី១៧ ខែតុលា ឆ្នាំ១៩៥៣។

ជាចុងក្រោយ អធិបតេយ្យពេញលេញនៅលើវិស័យការទូតត្រូវបានធ្វើឡើងតាមរយៈការប្ដូរលិខិតរវាងរដ្ឋាភិបាលបារាំងនិងរាជរដ្ឋាភិបាលកម្ពុជា (ជាចម្លើយរបស់រដ្ឋាភិបាលនៃសាធារណរដ្ឋបារាំង ចំពោះកំណត់មួយរបស់រាជរដ្ឋា ភិបាលនៃព្រះរាជាណាចក្រកម្ពុជានៅថ្ងៃទី១២ ខែកក្កដា ឆ្នាំ១៩៥៣ ដែលប្រគល់ដោយអគ្គស្នងការរបស់សាធារណ រដ្ឋបារាំង លេខ៣៩៣អ៊ែ ចុះថ្ងៃ ទី២៤ ខែកក្កដា ឆ្នាំ ១៩៥៣)។

នៅថ្ងៃទី៨ ខែវិច្ឆិកា ឆ្នាំ១៩៥៣ ព្រះករុណាព្រះបាទសម្ដេចព្រះនរោត្ដម សីហនុ ស្ដេចបានយាងចូលមកក្នុងរាជធានីភ្នំពេញវិញ នៅលើចម្ងាយផ្លូវប្រមាណជា ៣០០គីឡូម៉ែត្រដែលព្រះអង្គបានយាងដំណើរ ប្រជារាស្ដ្រខ្មែរក្នុងទឹកមុខរំភើប រីករាយ និងរំជួលចិត្តជាខ្លាំង ចំពោះឯករាជ្យភាពពេញលេញដែលព្រះអង្គបានទទួលជោគជ័យជាប្រវត្តិសាស្ត្រសម្រាប់មាតុភូមិកម្ពុជា។

នៅថ្ងៃទី៩ ខែវិច្ឆិកា ឆ្នាំ១៩៥៣ លោកឧត្ដមសេនីយ៍ឡង់ក្លាត បានប្រគល់យ៉ាងមហោឡារិកនូវអំណាចបញ្ជាការរបស់ខ្លួនថ្វាយព្រះករុណាព្រះបាទសម្ដេចព្រះនរោត្ដម សីហនុ ហើយកងទ័ពនិងអគ្គសេនាធិការរបស់បារាំង បានដកថយពីព្រះរាជាណាចក្រកម្ពុជា គឺនៅពេលនោះហើយដែលឯករាជ្យរបស់កម្ពុជាបានក្លាយទៅជាឯករាជ្យដ៏ពេញលេញបរិបូរណ៌។ ហើយនោះក៏ជាថ្ងៃដែលកងយោធពលខេមរភូមិន្ទនៃព្រះរាជាណាចក្រកម្ពុជា ចាប់បដិសន្ធិជាផ្លូវការផងដែរ ដោយបានបង្កើតអគ្គសេនាធិការនៃកងយោធពលខេមរភូមិន្ទ បញ្ជាការដ្ឋានកងទ័ពជើងអាកាសភូមិន្ទ បញ្ជាការដ្ឋានកងទ័ពជើងទឹកភូមិន្ទ។

គួរបញ្ជាក់ផងដែរថា នៅថ្ងៃអាទិត្យទី០៤ ខែវិច្ឆិកានេះ កងកម្លាំងប្រដាប់អាវុធមកពី៣ស្ថាប័នគឺ កងរាជអាវុធហត្ថ លើផ្ទៃប្រទេស កងកម្លាំងទាហាន និងកងកម្លាំងនគរបាលជាតិ ចំនួនប្រមាណជាជិត ៦ពាន់នាក់ ដែលចែកចេញជា ៥៤ផែន បានចូលរួមហ្វឹកហាត់រួមគ្នានៅមុខព្រះបរមរាជវាំង។ ហើយការហ្វឹកហាត់លើកទី២ នឹងធ្វើឡើងនៅថ្ងៃទី០៧ ខែវិច្ឆិកា ឆ្នាំ២០១៨ខាងមុខនេះ៕

RAC Media | លឹម សុវណ្ណរិទ្ធ

                                              ​

  ថ្ងៃពុធ, 07 វិច្ឆិកា 2018 ម៉ោង 04:36 PM

«បរិស្ថាននិងវិស័យពាក់ព័ន្ធក្នុងកម្មវិធីសិក្សាគោលនយោបាយបរិស្ថានតាមប្រព័ន្ធអនឡាញ E-Learning នៅកម្ពុជា...»

E-learning! ឱកាសសិក្សាដ៏ល្អ សម្រាប់សិស្ស និស្សិត អ្នកសិក្សាស្រាវជ្រាវ អ្នកកំពុងបំពេញការងារក្នុងវិស័យបរិស្ថាននិងវិស័យពាក់ព័ន្ធ ក្នុងកម្មវិធីសិក្សាគោលនយោបាយបរិស្ថានតាមប្រព័ន្ធអនឡាញ E-Learning នៅកម្ពុជា ឆ្នាំ២០១៨នេះ។

ចុះឈ្មោះ ចាប់ពីថ្ងៃទី១៤ ខែវិច្ឆិកា នេះតទៅ។

(សូមចូលអាន និងទាញយកខិតបណ្ណដែលមានជូនភ្ជាប់សម្រាប់ព័ត៌មានបន្ថែមខាងក្រោមឬចូលទៅកាន់វេបសាយ edu.kei.re.kr ដើម្បីទទួលបានព័ត៌មានបន្ថែម)ឬទំនាក់ទំនងផ្ទាល់តាមរយៈលេខទូរស័ព្ទ 093 785 609

  ថ្ងៃពុធ, 07 វិច្ឆិកា 2018 ម៉ោង 03:38 PM

«និស្សិតអាហាររូបករណ៍ចំនួន២០០នាក់ នឹងទទួលបានការបណ្តុះបណ្តាលភាសាចិននៅរាជបណ្ឌិត្យសភាកម្ពុជា...»

ជំនួបពិភាក្សាទ្វេភាគីមួយ រវាងឯកឧត្តមបណ្ឌិតសភាចារ្យ សុខ ទូច ប្រធានរាជបណ្ឌិត្យសភាកម្ពុជា និងលោក ស្រី ឧកញ៉ា កែវ មុំ តំណាងសមាគមអភិវឌ្ឍសុខមាលភាពអាស៊ីអាគ្នេយ៍ប្រជាជនចិន ស្តីពី«ការបណ្តុះបណ្តាលភាសាចិនដល់និស្សិតអាហាររូបករណ៍ដែលត្រូវនឹងបន្តការសិក្សានៅប្រទេសចិន»ត្រូវបានរៀបចំឡើងនៅព្រឹកថ្ងៃពុធ ១៤រោច ខែអស្សុជ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី៧ ខែវិច្ឆិកា ឆ្នាំ២០១៨ នៅសាលស្លឹករឹតនៃរាជបណ្ឌិត្យសភាកម្ពុជា។

ថ្លែងនៅជំនួបនៃកិច្ចពិភាក្សាទ្វេភាគីនោះ ខ្លឹមសារសំខាន់ដែលបានលើកយកជជែក និងពិភាក្សានោះគឺ ទាក់ទងនឹងការបណ្តុះបណ្តាលផ្នែកភាសាចិនដល់និស្សិតអាហាររូបករណ៍កម្ពុជានឹងត្រូវបន្តការសិក្សារបស់ខ្លួននៅប្រទេសចិន ដែលនិស្សិតអស់ត្រូវបណ្តុះបណ្តាលភាសាចិនជាមុនសិនក្នុងរយៈពេល៣ខែ នៅវិទ្យាស្ថានខុង ជឺនៃរាជបណ្ឌិត្យសភាកម្ពុជា។

សូមបញ្ជាក់ថា៖ និស្សិតអាហាររូបករណ៍​ទាំងអស់មានចំនួន២០០នាក់ត្រូវបណ្តុះបណ្តាលលើមុខជំនាញចំនួន៣ ក្នុងនោះមាន៖

១- ផ្នែកអគ្គីសនី

 ២- ផ្នែកអេឡិចត្រូនិច និង

៣-ផ្នែកគ្រូមតេយ្យក្នុងការថែរទាំក្មេង។

RAC Media

  ថ្ងៃពុធ, 07 វិច្ឆិកា 2018 ម៉ោង 03:17 PM

«ប្រជុំពិភាក្សា និងវាយតម្លៃលទ្ធផលនៃការរៀបចំសន្និសីទអន្តរជាតិ ស្តីពី «៤០ឆ្នាំនៃកិច្ចសហប្រតិបត្តិការ អាស៊ាន-សហភាពអឺរ៉ុប ៖ សមិទ្ធិផលនិងមាគ៌ាឆ្ពោះទៅមុខ»

ព្រឹកថ្ងៃពុធ ១៤រោច ខែអស្សុជ ឆ្នាំច សំរឹទ្ធិស័ក ពុទ្ធសករាជ ២៥៦២ត្រូវនឹងថ្ងៃទី៧ ខែវិច្ឆិកា ឆ្នាំ២០១៨ ឯកឧត្តមបណ្ឌិត គិន ភា ប្រធានវិទ្យាស្ថានទំនាក់ទំនងអន្តរជាតិកម្ពុជា ដឹកនាំការប្រជុំពិភាក្សា និងវាយតម្លៃលទ្ធផលនៃការរៀប ចំសន្និសីទអន្តរជាតិ ស្តីពី «៤០ឆ្នាំនៃកិច្ចសហប្រតិបត្តិការ អាស៊ាន-សហភាពអឺរ៉ុប ៖ សមិទ្ធិផលនិងមាគ៌ាឆ្ពោះទៅ មុខ» ដែលបានប្រារពធ្វើឡើងកាលពីថ្ងៃពុធ ៧រោច ខែអស្សុជ ឆ្នាំច សំរឹទ្ធិស័ក ពុទ្ធសករាជ២៥៦២ ត្រូវនឹងថ្ងៃទី ៣១ ខែតុលា ឆ្នាំ២០១៨ នៅសណ្ឋាគារ សុខាភ្នំពេញរយៈពេលពេញមួយថ្ងៃ ក្រោមកិច្ចសហប្រតិបត្តិការនិងឧបត្ថម្ភ  ពីមូលនិធិ ខុនរ៉ាដ អាដិនណៅអ៊ែរប្រចាំនៅព្រះរាជាណាចក្រកម្ពុជា និងវិទ្យាស្ថានទំនាក់ទំនងអន្តរជាតិកម្ពុជា នៃរាជបណ្ឌិត្យ សភាកម្ពុជា ហើយទទួលបានលទ្ធផលជាផ្លែផ្កាគួរឱ្យកត់សម្គាល់ជាច្រើន និងដើម្បីត្រៀមរៀបចំសន្និ សីទអន្តរជាតិស្តីពី «កម្ពុជាក្នុងតំបន់នីយកម្មអាស៊ាន ក្នុងបរិបទឥណ្ឌូប៉ាស៊ីហ្វិក» នាឆ្នាំ២០១៩ខាងមុខ។

ក្រោយកិច្ចប្រជុំពិភាក្សាយើងទទួលបាន៖

លទ្ធផលទទួលបានជោគជ័យក្នុងសន្និសីទអន្តរជាតិ៖

-សហការីបានទទួលខុសត្រូវតាមភារៈកិច្ចរាងៗខ្លួន និងប្រកបដោយភាពជោគជ័យ

-មានការបដិសណ្ឋារកិច្ចយ៉ាងរាក់ទាក់

-រយៈពេលរៀបចំមាន រយៈពេលខ្លី តែយើងបានរៀបចំ និងប្រមូលឯកសារបានទាំងស្រុង និងបាន ចែកជូនដល់អ្នកចូលរួមបានគ្រប់ៗគ្នា

-មានការចូលរួមយ៉ាងច្រើនពី ឯកអគ្គរាជទូត និងឯកអគ្គរដ្ឋទូតបរទេសប្រចាំកម្ពុជារហូត ១១ប្រទេស

-ទទួលបានការកោតសរសើរពីសំណាក់វាគ្មិនទាំងអស់ក្រោយពេលនិវត្តន៍ទៅប្រទេសដើមវិញ។

បញ្ហាដែលជាកង្វះខាត៖

-បន្ទប់សម្រាប់អ្នកបកប្រែបណ្តាលឱ្យរំខានដល់អ្នកចូលរួម

-ការកត់ត្រាមិនបានល្អិតល្អន់ និងគ្រប់ជ្រុងជ្រោយ ពិសេសពេលមានសំណួរពីអ្នកចូលរួម និងការឆ្លើយតបពីវាគ្មិន ដោយត្រូវរងចាំស្តាប់សម្លេងដែលបានថតទុកជាឯកសារ។

សំណូមពរ៖

-បើធ្វើលើកក្រោយសុំធ្វើនៅកណ្តាលក្រុងវិញដោយសារឆ្ងាយពិបាកធ្វើដំណើរ (សំណូមពរពីវាគ្មិន)។

ប្រភព៖ អ៊ុច លាង មន្ត្រីវិទ្យាស្ថានទំនាក់ទំនងអន្តរជាតិកម្ពុជានៃរាជបណ្ឌិត្យសភាកម្ពុជា។

  ថ្ងៃពុធ, 07 វិច្ឆិកា 2018 ម៉ោង 11:31 AM

«ក្រុមប្រឹក្សាជាតិភាសាខ្មែរបាន ប្រជុំ អនុម័តបច្ចេកសព្ទគណៈកម្មការអក្សរសិល្ប៍...»

ថ្ងៃអង្គារ ១៣រោច ខែអស្សុជ ឆ្នាំច សំរឹទ្ធិស័ក ព.ស.២៥៦២ ក្រុមប្រឹក្សាជាតិភាសាខ្មែរ ក្រោមអធិបតីភាពឯកឧត្តមបណ្ឌិត ជួរ គារី បានបន្តប្រជុំពិនិត្យ ពិភាក្សា និងអនុម័តបច្ចេកសព្ទគណៈកម្មការអក្សរសិល្ប៍បានចំនួន០៣ពាក្យ ដូចខាងក្រោម៖



​

  ថ្ងៃពុធ, 07 វិច្ឆិកា 2018 ម៉ោង 11:08 AM

«គម្រោងស្រាវជ្រាវចំនួនពីររបស់រាជបណ្ឌិត្យសភាកម្ពុជានឹងបង្កើតនូវរបត់ថ្មីសន្លាងមួយសម្រាប់កម្ពុជា ក្នុងនោះសាធារណជនទូទៅនឹងអាចអានអក្សរខ្មែរបុរាណដោយខ្លួនឯងបាន»

ភ្នំពេញ៖ នៅព្រឹកថ្ងៃទី០៦ ខែវិច្ឆិកា ឆ្នាំ២០១៨ នេះ រាជបណ្ឌិត្យសភាកម្ពុជាបានរៀបចំនូវសិក្ខាសាលាមួយស្ដីពី «កម្មវិធីអូស៊ីអខ្មែរ និងអក្សរខ្មែរបុរាណក្នុងបច្ចេកវិទ្យាព័ត៌មាន» ដោយវាគ្មិន៣រូបគឺ បណ្ឌិត ឈិត វណ្ណាឫទ្ធ បណ្ឌិត លឹម សេងឌី និងបណ្ឌិត មាឃ បូរ៉ា។

នៅក្នុងឱកាសបើកសិក្ខាសាលានេះ ឯកឧត្ដមបណ្ឌិតសភាចារ្យ សុខ ទូច ប្រធានរាជបណ្ឌិត្យសភាកម្ពុជាបានគូសបញ្ជាក់ ថា ការរៀបចំសិក្ខាសាលាខាងលើនេះ គឺជាការរៀបចំដោយលើកយកប្រធានបទនៃគម្រោងស្រាវជ្រាវ២ ផ្សេងគ្នាដើម្បីជាការបង្ហាញដល់សាធារណជន ហើយនៅបន្ទាប់ពីគម្រោងទាំងពីរនេះត្រូវបានបញ្ចប់ វានឹងក្លាយទៅជាជោគ ជ័យថ្មីមួយសម្រាប់ប្រទេសកម្ពុជាទាំងមូល។

ជាការបន្ថែម ឯកឧត្ដមបណ្ឌិតសភាចារ្យ បានបង្ហាញនូវជំនឿចិត្តថា នៅពេលដែលគម្រោងស្រាវជ្រាវទាំងពីរនេះទទួលបានជោគជ័យ វានឹងក្លាយទៅជាស្នាដៃជាប្រវត្តិសាស្ត្រសម្រាប់ប្រទេសកម្ពុជា ដែលក្នុងនោះទីមួយគឺគេអាចថតចម្លងអត្ថបទដែលសរសេរជាអក្សរខ្មែរចូលទៅក្នុងប្រព័ន្ធកុំព្យូទ័រដោយមិនចាំបាច់វាយឡើងវិញ ចំណែកគម្រោងស្រាវជ្រាវមួយផ្សេងទៀត នឹងជួយឱ្យសាធារណជនទូទៅ ពិសេសអ្នកសិក្សាស្រាវជ្រាវទាំងអស់អាចអានអក្សរខ្មែរសម័យបុរាណដោយមិនចាំបាច់ត្រូវការអ្នកជំនាញចាំជួយបកប្រែដូចមុននោះឡើយ។

ឯកឧត្ដមបណ្ឌិត្យសភាចារ្យបានបន្តថា ការងាររបស់បញ្ញវ័ន្តគឺជាការងារដើម្បីការរីកចម្រើននៃសង្គមជាតិ និងការសិក្សាស្រាវជ្រាវសម្រាប់បញ្ញវ័ន្តដទៃទៀត ហើយអត្ថប្រយោជន៍ដែលទទួលបានមានច្រើន គឺទាំងថវិកាដែលបានពី គម្រោងស្រាវជ្រាវ កិត្តិយស និងកេរ្តិ៍ឈ្មោះសម្រាប់ទុកដល់អ្នកជំនាន់ក្រោយ។ ហើយបន្ទាប់ពីគម្រោងនេះទទួលបានជោគជ័យ បណ្ឌិត្យសភាចារ្យប្រធានរាជបណ្ឌិត្យសភាកម្ពុជា នឹងស្នើសុំមេដាយថ្នាក់ជាតិដើម្បីជាសក្ខីភាពក្នុងការផ្ដល់កិត្តិយសជូនអ្នកស្រាវជ្រាវដែលបានបង្កើតស្នាដៃថ្មី។លើសពីនេះទៅទៀត ឯកឧត្ដមប្រធានរាជបណ្ឌិត្យសភាកម្ពុជា បានសង្កត់ធ្ងន់ថា សម្រាប់បញ្ញវ័ន្តឬអ្នកស្រាវជ្រាវទាំងឡាយរបស់កម្ពុជា ដែលអាចស្វែងរកនូវរបកគំហើញ ឬក៏ស្នាដៃស្រាវជ្រាវថ្មី ដែលផ្ដល់នូវឧត្ដមប្រយោជន៍សម្រាប់ប្រទេសកម្ពុជា ឯកឧត្ដមក៏នឹងស្នើសុំគោរមងារជាបណ្ឌិត សភាចារ្យជូនបញ្ញវ័ន្តឬអ្នកស្រាវជ្រាវរូបនោះផងដែរ ដើម្បីជាការតបស្នងនូវការខិតខំប្រឹងប្រែងរបស់ពួកគេសម្រាប់ប្រទេសជាតិ។

គួរបញ្ជាក់ផងដែរថា បើតាមប្រសាសន៍របស់ឯកឧត្ដមបណ្ឌិតសភាចារ្យ សុខ ទូច គម្រោងអក្សរខ្មែរបុរាណគឺផ្ដើមគំនិតតាំងពីលោកបណ្ឌិត ឡុង សៀម មកម្ល៉េះ ប៉ុន្តែមិនទាន់បានដំណើរការនៅឡើយ ហើយក្រោយពីឯកឧត្ដមបណ្ឌិត សភាចារ្យឡើងជាប្រធានរាជបណ្ឌិត្យសភាកម្ពុជា ឯកឧត្ដមបានជំរុញឱ្យគម្រោងនេះដំណើរការចេញជារូបរាងពិតប្រាកដ។

ចំណែកឯគម្រោងកម្មវិធីអូស៊ីអខ្មែរវិញ បើតាមលោកបណ្ឌិត លឹម សេងឌី មកដល់បច្ចុប្បន្ននេះគម្រោងស្រាវជ្រាវបានសម្រេចជាលទ្ធផល ៧៥% ហើយ ហើយលោកបណ្ឌិតនឹងខិតខំដើម្បីឱ្យគម្រោងនេះចប់សព្វគ្រប់នាពេលឆាប់ៗខាងមុខនេះ៕

RAC Media | លឹម សុវណ្ណរិទ្ធ

​

  ថ្ងៃអង្គារ, 06 វិច្ឆិកា 2018 ម៉ោង 04:13 PM