រាជបណ្ឌិត្យសភាកម្ពុជា

«ការផ្ញើសារផ្តល់កម្ចីឥណទានតាមប្រព័ន្ធទូរស័ព្ទ»

ក្នុងរយៈពេលប៉ុន្មានខែចុងក្រោយនេះយើងបានសង្កេតឃើញថា មានការជជែកគ្នាស្តីអំពីការទទួលសេវាប្រាក់កម្ចីតាមរយៈការទទួលបានសារចូលនៅក្នុងទូរស័ព្ទដៃ។​ ការផ្តល់ប្រាក់កម្ចីនេះ មិនមានតម្រូវការនៅក្នុងការរបស់បញ្ចាំមានលក្ខណៈស្មុគស្មាញច្រើនដែលធ្វើឱ្យអ្នកទទួលសារជាច្រើនយល់ថាងាយស្រួល ប៉ុន្តែបើគិតឱ្យបានច្បាស់លាស់ ទៅមិនមានភាពងាយស្រួលដូចការគិត លើកលែងតែអ្នកដែលមានតម្រូវការថវិកាបន្ទាន់ទំនងជាអាចប្រថុយនឹងសេវកម្មនេះ។

កន្លងមកក៏មានជនរងគ្រោះបានផ្សព្វផ្សាយតាមបណ្តាញហ្វេសប៊ុករបស់ខ្លួនពីបញ្ហាដែលលង់ខ្លួននឹងសេវាប្រាក់កម្ចីបានបង្ហោះតាមទូរស័ព្ទបែបនេះ។​ ដោយមើលឃើញពីហេតុការណ៍ដែលអាចធ្វើឱ្យប្រជាពលរដ្ឋត្រូវរងគ្រោះដោយ សារសេវាកម្ចីឥណទានដែលធនាគារជាតិនៃកម្ពុជាបានចាត់ទុកជាសេវាកម្មខុសច្បាប់ ទើបសេចក្តីប្រកាសជា​ធារណៈមួយរបស់ធនាគារជាតិនៃកម្ពុជា បានចេញផ្សាយជូនដល់ដំណឹងដល់សាធារណជនទូទៅ កាលពីថ្ងៃទី២ ខែតុលា ឆ្នាំ ២០១៨ ពាក់ព័ន្ធនឹងបញ្ហាផ្ញើសារតាមបណ្តាប្រព័ន្ធទូរស័ព្ទនានា ដើម្បីផ្តល់ប្រាក់កម្ចីជាលក្ខណៈបុគ្គល។

***អាស្រ័យហេតុនេះហើយសូមប្រជាពលរដ្ឋគ្រប់រូបដែលមានតម្រូវការចាំបាច់ក្នុងការទទួលយកសេវាប្រាក់កម្ចី រហ័ស ទាន់ចិត្ត និងមានអា្រតាការប្រាក់ខ្ពស់ សូមមេត្តាត្រិះរិះពិចារណាជាមុនសិន មុននឹងសម្រេចចិត្តជៀសវាងការបោកប្រាស់ ! 

សូមអានលំអិតពីសេចក្តីប្រកាសរបស់ធនាគារជាតិនៃកម្ពុជា ដូចខាងក្រោម៖

  ថ្ងៃពុធ, 03 តុលា 2018 ម៉ោង 03:29 PM

«IMF ៖ សេដ្ឋកិច្ចកម្ពុជានឹងកើនឡើង៧,២៥ ភាគរយនៅឆ្នាំនេះ»

ថ្ងៃពុធ ទី៣ ខែតុលា ឆ្នាំ២០១៨

យោងតាមប្រភពព័ត៌មាន ពីកាសែត រ៉យទ័រ ចុះផ្សាយនៅថ្ងៃទី០២ ខែតុលា ឆ្នាំ២០១៨ បានឱ្យដឹងថាមូលនិធិរូបិយវត្ថុអន្តរជាតិ (IMF)កំណើនសេដ្ឋកិច្ចកម្ពុជានឹងស្ថិតនៅ ៧,២៥% នៅឆ្នាំ២០១៨នេះ និង ៧% នៅឆ្នាំក្រោយ។បើតាមការដកស្រង់ការផ្សាយចេញពីភ្នំពេញដេលី នៅថ្ងៃទី០៣ ខែតុលា ឆ្នាំ២០១៨ ថា ប្រធានគណៈប្រតិភូដឹកនាំក្រុមការងារIMF លោកJarkko Turunene ដែលធ្វើទស្សនកិច្ចនៅកម្ពុជា បានបញ្ជាក់ក្នុងសន្និសីទសារព័ត៌មានថា ឥណ្ឌទានធនាគារ ដែលផ្ដល់កម្ចីទៅឱ្យវិស័យអចលនទ្រព្យ ត្រូវរំពឹងថា នឹងកើនឡើងក្នុងរង្វង់ ២០% នៅឆ្នាំ២០១៨នេះ ហើយជាមួយនឹងគុណភាពឥណ្ឌទាន និងកម្ចីក្រៅផ្លូវការដោយអ្នកអភិវឌ្ឍន៍អចលទ្រព្យ បន្ដបង្កើតជាហានិភ័យដល់ស្ថិរភាពហិរញ្ញវត្ថុ និងម៉ាក្រូសេដ្ឋកិច្ច។

បើតាមប្រភពព័ត៌ដដែរ លោកបន្ដថា ធនាគារជាតិនៃកម្ពុជាបានដាក់ចេញយន្តការគោលនយោបាយជាច្រើនដើម្បីលុបបំបាត់ហានិភ័យ រួមទាំងបានដាក់ឱ្យអនុវត្តការការពារអភិរក្សមូលធន និងការគ្រប់គ្រងសាច់ប្រាក់។ទន្ទឹមនោះIMF បានជំរុញឲ្យរដ្ឋាភិបាលពន្លឿនកំណែទម្រង់វិស័យសុខាភិបាល និងអប់រំ ដើម្បីសម្រេចគោលដៅកំណើនសេដ្ឋកិច្ច ៧% ក្នុងរយៈពេលមធ្យម និងលើកកម្ពស់បរិយាកាសពាណិជ្ជកម្ម ដោយទម្លាក់តម្លៃថាមពល អភិវឌ្ឍធនធានមនុស្ស និងហេដ្ឋារចនាសម្ព័ន្ធ៕

ដកស្រង់ពី៖ Reuters និង ភ្នំពេញដេលី

RAC Media | ផាញ់ សារឿន

ប្រភព៖ រូបថត SPM Page

ប្រភព៖ រូបថត គេហទំព័រអចលនទ្រព្យ realestate.com.kh 

  ថ្ងៃពុធ, 03 តុលា 2018 ម៉ោង 10:31 AM

«កម្ពុជាប្រកាសផ្តល់ជំនួយមនុស្សធម៌២០ម៉ឺនដុល្លារដល់រដ្ឋាភិបាលឥណ្ឌូនេស៊ី សម្រាប់ជួយជនរងគ្រោះក្នុងគ្រោះរញ្ជូយដី និងរលកស៊ូណាមិ»

ថ្ងៃអង្គារ​ ទី២ ខែតុលា ឆ្នាំ២០១៨

(ភ្នំពេញ)៖ដើម្បីបង្ហាញនូវសាមគ្គីភាពជាមួយរាជរដ្ឋាភិបាល និងប្រជាជនឥណ្ឌូនេស៊ី ក្នុងគ្រាលំបាកនេះ រាជដ្ឋា ភិបាលកម្ពុជាដែលមានសម្តេចតេជោ ហ៊ុន សែន ជានាយករដ្ឋមន្ត្រី បានសម្រេចចូលរួមចំណែកនូវទឹកប្រាក់ចំនួន ២០០,០០០ដុល្លារអាម៉េរិក ជាជំនួនមនុស្សធម៌ សម្រាប់រំលែកទុក្ខ និងជួយដល់ជនរងគ្រោះដោយសារមហន្តរាយពីគ្រោះធម្មជាតិរញ្ជូយដី និងរលកស៊ូណាមិ ដ៏សោកនាដកម្មនេះ។នេះបើយោងតាមសេចក្តីប្រកាសព័ត៌មានរបស់ក្រសួងការបរទេស និងកិច្ចសហការអន្តរជាតិកម្ពុជា ដែលក្រុមព័ត៌មាន​របស់រាជបណ្ឌិត្យសភាកម្ពុជា( RAC Media) ទទួលបាននៅថ្ងៃទី០២ ខែតុលា ឆ្នាំ២០១៨នេះ។

សូមជម្រាបថា កាលពីថ្ងៃទីសុក្រ ទី២៨ ខែកញ្ញា កន្លងទៅ មានគ្រោះធម្មជាតិរញ្ជួយដី និងរលកស៊ូណាមិ នៅទីក្រុង ប៉ាលូ និងដុងខាឡា ភាគកណ្តាលនៃខេត្តស៊ូឡាវ៉េស៊ីប្រទេសឥណ្ឌូនេស៊ីបណ្តាលឱ្យមនុស្សស្លាប់ប្រមាណ៨៣២នាក់ និងរបួស៥៤០នាក់។

បច្ចុប្បន្នចំនួនអ្នកស្លាប់ និងអ្នករបួសនៅតែបន្តកើនឡើងហើយព្រលានយន្តហោះទីក្រុងប៉ាលូពុំទាន់ដំណើរការបាននៅឡើយទេ រីឯហេដ្ឋារចនាសម្ព័ន្ធត្រូវបានខូចខាតយ៉ាងខ្លាំង៕

ប្រភព៖ នាយកដ្ឋានព័ត៌មាននៃក្រសួងការបរទេសនិងសហប្រតិបត្តិការអន្តរជាតិ

RAC Media | ហេង​ សុភី



  ថ្ងៃអង្គារ, 02 តុលា 2018 ម៉ោង 08:40 PM

«ការផ្តល់កិត្តិយសនិងផ្តល់តម្លៃដល់កម្ពុជាក្នុងនាមជាបងប្អូនល្អ»

ថ្ងៃអង្គារ ទី២ ខែតុលា ឆ្នាំ២០១៨

នៅថ្ងៃទី៣០ ខែកញ្ញា មេដឹកនាំបក្សនិងរដ្ឋរបស់ចិន បានប្រារព្ធពិធីខួបទី៦៩ឆ្នាំ ដែលមានភ្ញៀវចូលរួមប្រជុំ ១២០០នាក់ ក្នុងនោះមាន ព្រះបាទនរោត្តម សីហនុ បានយាងចូលរួមដែរ។

ចិនបានប្រកាសថា ចិននឹងបើកចំហរជាប្រទេសពហុភាគីនិយម និងសេដ្ឋកិច្ចបើកចំហរកម្រិតខ្ពស់។នេះជាយុទ្ធសាស្រ្តរបស់ចិនថ្មី ឆ្លើយតបនឹងការដាក់គំនៀបសេដ្ឋកិច្ច ដែលត្រូវបានចិនហៅថា«ឯកតោភាគីនិយម»។ការផ្លាស់ប្តូររបត់ថ្មីនេះ កើតចេញពីលោក ស៊ី ជិនភីង បានជួបជាមួយ លោក ពូទីន នៅថ្ងៃទី១១ ខែកញ្ញា ឆ្នាំ២០១៨ ដែលស្របពេលនឹងទិវាសន្តិភាពពិភពលោក។នេះជាការរិតចំណងទំនាក់ទំនងជាមួយបណ្តាប្រទេសទាំង ៦៨ នៃ បណ្តាញ គំនិតផ្តួចផ្តើមខ្សែក្រវ៉ាត់ និង វិថី ដែលចិនឈានទៅចាប់យកប្រទេសជាច្រើននៅអឺរ៉ុប។

ក្នុងពិធីរំលឹកខួននេះដែរ ចិនបានលើកអំពីការចែករំលែកនៃឱកាសនៃការអភិវឌ្ឍ និង កំណើន សេដ្ឋកិច្ចនៃបណ្តាប្រទេសជាដៃគូនានា។ចិនលើកទឹកចិត្តឱ្យមានគំនិតបង្កើតថ្មីរវាងសហគ្រិន និង វិទ្យសាស្រ្ត ព្រមទាំងការជំរុញកិច្ច សហប្រតិបត្តិការក្រោមគំនិតផ្តួចផ្តើមខ្សែក្រវ៉ាត់ និង វិថី។

ចិនយល់ស្របក្នុងការធ្វើឱ្យមានសុខដុមរមនាក្នុងប្រទេស និងនៅក្រៅប្រទេសដើម្បីជំរុញការអភិវឌ្ឍសេដ្ឋកិច្ចប្រកបដោយថាមវន្ត និង ការកាត់បន្ថយហានិភ័យនៃការអភិវឌ្ឍ។ ចិនតម្រង់ទិសទៅរកការអភិវឌ្ឍប្រកបដោយសន្តិភាព និង ធ្វើការងារជាមួយសហគមន៍អន្តរជាតិ ព្រមទាំងការប្រសើរឡើងនៃអភិបាលកិច្ច សកលលោក។ នេះ ការត្រៀមខ្លួនរបស់ចិន ដើម្បីទប់នឹងការត្រួតត្រាពិភពលោករបស់សហរដ្ឋអាម៉េរិក តាមរយៈការប្រមូលផ្តុំកម្លាំងសាកលលោកនិងក្រុមប្រទេស Belt and Road ជាពិសេសការលើកទឹកចិត្តមេដឹកនៃបណ្តាប្រទេសជាង៥០ដែលបានចូលរួមកម្មវិធីរំលឹកខួបទិវាសន្តិភាពពភពលោកកាលពីថ្ងៃទី១៩ កញ្ញា ឆ្នាំ២០១៨។

វត្តមាននៃអង្គព្រះមហាក្សត្រកម្ពុជានៅក្នុងពិធីរំលឹកខួបទី ៦៩ឆ្នាំ នៃការបង្កើតសាធារណៈរដ្ឋប្រជាមានិតចិន គឺជាការឆ្លុះបញ្ចាំងឱ្យឃើញអំពីការផ្តល់កិត្តិយសនិងផ្តល់តម្លៃដល់កម្ពុជាដែលជាប្រទេសតូច និង ជាបងប្អូនល្អក្នុងការជួយគ្នាក្នុងគ្រាអាសន្ន ដូចជាក្នុងការដោះស្រាយបញ្ហាសមុទ្រចិនខាងត្បូងជាដើម។ការយាងព្រះមហាក្សត្រកម្ពុជា នេះ ក៏ជាការរឹតចំណងកិច្ចសហប្រតិ បត្តិការពាណិជ្ជកម្មរវាងកម្ពុជា និងចិន កាន់តែរឹងមាំជាងនេះទៅទៀត ជាពិសេសលើការនាំចេញអង្ករទៅកាន់ប្រទេសចិននិងការបង្កើតម៉ូដែលពាណិជ្ជកម្មអនឡាញ ដែលរាជបណ្ឌិត្យសភាកម្ពុជាកំពុងតែសិក្សាលម្អិតនឹងលើកគម្រោងនេះឡើងសម្រាប់ជួយដល់កសិករក្នុងការកាត់បន្ថយឈ្នួញកណ្តាលនិងបង្កើនតម្លៃបន្ថែមដល់កសិករ។

អត្ថបទនិងបទវិភាគ៖ បណ្ឌិត គី សេរីវឌ្ឍន៍ ប្រធានមជ្ឈមណ្ឌលសិក្សាចិននៃរាជបណ្ឌិត្យសភាកម្ពុជា

RAC Media | សឺន សំ

​

                     រូបថតដកស្រង់៖ ទំព័រហ្វេសបុក ព្រះករុណា ព្រះបាទសម្ដេចព្រះបរមនាថ នរោត្ដម សីហមុនី 

  ថ្ងៃអង្គារ, 02 តុលា 2018 ម៉ោង 04:55 PM

«ពិធីយាងរូបសំណាកព្រះបាទជ័យវរ្ម័នទី៧គង់នៅលើអសនៈក្នុងបរិវេណនៃរាជបណ្ឌិត្យសភាកម្ពុជា...»

ថ្ងៃអង្គារ ទី២ តុលា ឆ្នាំ២០១៨

រូបសំណាកព្រះបាទជ័យវរ្ម័នទី៧ដែលបានឆ្លាក់ពីថ្មភក់កំពស់១,២ម៉ែត្រនិងទទឹង១,២ម៉ែត្រ ត្រូវបានថ្នាក់ដឹកនាំនៃរាជបណ្ឌិត្យសភាកម្ពុជារៀបចំជាអសនៈមួយកន្លែងនៅក្នុងបរិវេណរាជបណ្ឌិត្យសភាកម្ពុជាដើម្បីជាទីសក្ការៈនាសៀលថ្ងៃអង្គារ៨រោច ខែភទ្របទ ឆ្នាំច សំរឹទ្ធិស័ក ព.ស. ២៥៦២ត្រូវនឹងថ្ងៃទី២ខែតុលាឆ្នាំ២០១៨ក្រោមគំនិតផ្តួចផ្តើមរបស់ឯកឧត្តមបណ្ឌិត្យសភាចារ្យ សុខ ទូច ប្រធានរាជបណ្ឌិត្យសភាកម្ពុជា។

នៅក្នុងពិធីនៃការយាងរូបសំណាកព្រះបាទជ័យវរ្ម័នទី៧គង់នៅលើអសនៈដែលមានថ្នាក់ដឹកនាំរបស់អគ្គលេខាធិការដ្ឋាន ថ្នាក់ដឹកនាំរបស់វិទ្យាស្ថាននានាក្រោមឧបសម្ព័ន្ធរបស់រាជបណ្ឌិត្យសភាកម្ពុជា រួមទាំងមន្ត្រីរាជការនៃរាជ បណ្ឌិត្យសភាកម្ពុជានោះ ឯកឧត្តមបណ្ឌិត្យសភាចារ្យ សុខ ទូច ប្រធានរាជបណ្ឌិត្យសភាកម្ពុជាបានថ្លែងថា គោលបំណងនៃការរៀបចំទីសក្ការៈបូជានេះគឺ៖

១-រលឹកដល់ស្នាដៃដឹកនាំប្រទេសរបស់ព្រះបាទជ័យវរ្ម័នទី៧ ដែលទ្រង់បានដឹកនាំប្រទេសកម្ពុជា​ឱ្យមានភាពសម្បូរបែប មានការរីកចម្រើនលើគ្រប់វិស័យ ជាប្រទេសអច្ឆរិយ និងជាអាណាចក្រពិតប្រាកដនាសម័យអង្គរ។

២-បានបង្ហាញនូវស្នាដៃចម្លាក់របស់ខ្មែរដែលបង្កប់ស្នាដៃដឹកនាំដ៏ជ្រាលជ្រៅនិងមានអត្ថន័យខាងទស្សនៈវិជ្ជានៃការគ្រប់គ្រងដឹកនាំរបស់ទ្រង់ ហើយចម្លាក់ដែលគ្មានព្រះហស្ថ គឺវាបានបង្ហាញពីការដឹកនាំសង្គមនាដំណាកកាលក្រោយៗ គឺនៅពេលដែលគ្មានទ្រង់ គឺគ្មានមន្ត្រីណាមួយមានសមត្ថភាពដឹកនាំប្រទេសបានរីកចម្រើន លូតាលស់ គឺប្រទេសគ្មានសុខសន្តិភាពនិងរីកលូតលាស់ និងបានធ្វើឱ្យប្រទេសកាន់តែរួញតូចទៅៗ។

RAC Media | ស៊ាង រ៉ូហ្សាត

​

  ថ្ងៃអង្គារ, 02 តុលា 2018 ម៉ោង 03:50 PM

«ព្រះ​មហាក្សត្រនៃព្រះរាជាណាកច្រកម្ពុជា ព្រះអង្គសព្វព្រះរាជហឫទ័យស្ដេច​យាង​ចូល​រួម​ពិធី​លៀង​សាយភោជ​ នា​វិមាន​សភា​ប្រជាជន​ចិន​ តបតាមសេចក្តីក្រាប​បង្គំ​ទូល​ថ្វាយ​សូមយាង​របស់​ ឯកឧត្តម​ សុី​ ជីន​ភីង​ ប្រធានាធិបតី​ នៃ​សាធារណរដ្ឋ​ប្រជាមានិត​ចិន...»

កាលពីវេលាថ្ងៃទី៣០ ខែកញ្ញា ឆ្នាំ២០១៨ ព្រះ​ករុណា​ជាអម្ចាស់ជីវិតលើត្បូង ព្រះ​បាទ​សម្ដេច​ព្រះ​បរមនាថ​ នរោត្តម ​សីហមុនី​ ព្រះ​មហាក្សត្រ​ នៃ​ព្រះ​រាជា​ណាចក្រ​កម្ពុជា​ជាទីគោរពសក្ការៈដ៏ខ្ពង់ខ្ពស់បំផុត​ ព្រះ​អង្គបាន​សព្វព្រះរាជហឫទ័យស្ដេច​យាង​ចូល​រួម​ពិធី​លៀង​សាយភោជ​ នា​វិមាន​សភា​ប្រជាជន​ចិន​ តបតាមសេចក្តីក្រាប​បង្គំ​ទូល​ថ្វាយ​សូមយាង​របស់​ ឯកឧត្តម​ សុី​ ជីន​ភីង​ ប្រធានាធិបតី​ នៃ​សាធារណរដ្ឋ​ប្រជាមានិត​ចិន​ ក្នុង​ឱកាសអបអរសាទរទិវាបុណ្យ​ជាតិ​​ខួប​លើកទី ៦៩​ ឆ្នាំ​ នៃសាធារណរដ្ឋប្រជាមានិតចិន(១៩៤៩-២០១៨)។

ប្រភព៖ ទំព័រហ្វេសបុក ព្រះករុណា ព្រះបាទសម្ដេចព្រះបរមនាថ នរោត្ដម សីហមុនី

RAC Media ស៊ាង រ៉ូហ្សាត



  ថ្ងៃអង្គារ, 02 តុលា 2018 ម៉ោង 11:24 AM

«កម្ពុជានឹងបើកស្ថានឯកអគ្គរាជទូតក្នុងប្រទេសតួកគីនិងប៊ុលហ្គារី»

ថ្ងៃអង្គារ ទី២ ខែតុលា ឆ្នាំ២០១៨

បើយោងតាមការផ្សាយព័ត៌មានរបស់ ភ្នំពេញប៉ុស្តិ៍ នៅថ្ងៃទី១ ខែតុលា ឆ្នាំ២០១៨ គឺកម្ពុជាគ្រោងនឹងបើកស្ថានឯកអគ្គរាជទូតរបស់ខ្លួននៅក្នុងប្រទេសចំនួន២ទៀតនៅឆ្នាំ ២០១៩ខាងមុខគឺនៅសាធារណរដ្ឋតួកគី និងនៅប្រទេសប៊ុលហ្គារី ដើម្បីពង្រឹងកិច្ចសហប្រតិបត្តិការជាមួយប្រទេសទាំងនោះ។

បើយោងតាមព័ត៌មានវាយោចេញផ្សាយនៅថ្ងៃទី១ ខែ តុលា ឆ្នាំ២០១៨ គឺការគ្រោងបើកទូតនៅប្រទេសប៊ុលហ្គារី ត្រូវបានលោកនាយករដ្ឋមន្ត្រីហ៊ុន សែនលើកឡើងក្នុងជំនួបពិភាក្សាការងារជាមួយលោកប៊ួយកូ បូរីសូវ (BoykoBorissov) នាយករដ្ឋមន្ត្រីប៊ុលហ្គារីកាលពីថ្ងៃទី២៨ ខែកញ្ញាក្នុងឱកាសដែលប្រមុខរាជរដ្ឋាភិបាលកម្ពុជា អញ្ជើញចូលរួមមហាសន្និបាតអង្គការសហប្រជាជាតិលើកទី៧៣នាទីក្រុងញ៉ូវយ៉ក សហរដ្ឋអាម៉េរិកហើយប្រមុខ រដ្ឋាភិបាលនៃប្រទេសទាំងពីរបានឯកភាពគ្នាក្នុងការបន្តពង្រឹង ពង្រីកទំនាក់ទំនង កិច្ចសហប្រតិបត្តិការនៃប្រទេសទាំងពីរឱ្យកាន់តែរឹងមាំទ្វេឡើងថែមទៀតទាំងក្នុងវិស័យសេដ្ឋកិច្ច វិនិយោគ ពាណិជ្ជកម្ម និងទេសចរណ៍។

យោងតាមសេចក្ដីប្រកាសព័ត៌មានរបស់ក្រសួងការបរទេស និងកិច្ចសហប្រតិបត្តិការអន្តរជាតិ ដែលចេញផ្សាយនៅរសៀលថ្ងៃទី២៨ ខែកញ្ញា ឆ្នាំ២០១៨ព្រះរាជាណាចក្រកម្ពុជានឹងបើកស្ថានឯកអគ្គរាជទូតរបស់ខ្លួន នៅរដ្ឋធានីអង់ការ៉ា ប្រទេសតួកគី ក្នុងឆ្នាំ២០១៩។នៅក្នុងសេចក្តីប្រកាសព័ត៌មានក៏បានឱ្យដឹងបន្ថែមថាប្រមុខការទូតកម្ពុជានឹងពិភាក្សាអំពីកិច្ចការសហការគ្នារវាងវិទ្យាស្ថានជាតិការទូត និងទំនាក់ទំនាក់អន្តរជាតិ និងសាលាការទូតរបស់តួកគីផងដែរ៕

ដកស្រង់៖ សេចក្ដីប្រកាសព័ត៌មានរបស់ក្រសួងការបរទេស និងកិច្ចសហប្រតិបត្តិការអន្តរជាតិ  ភ្នំពេញប៉ុស្តិ៍និង វាយោ

RAC Media | ផាញ់ សារឿន

  ថ្ងៃអង្គារ, 02 តុលា 2018 ម៉ោង 10:58 AM

«កម្ពុជាទទួលចំណូលជាង៨៥លានដុល្លារបានពីការលក់សំបុត្រចូលទស្សនាអង្គរនៅរយៈពេល៩ខែ ឆ្នាំនេះថវិកាជិត៤លានដុល្លារ ត្រូវឧបត្ថម្ភមន្ទីរពេទ្យគន្ធបុប្ផា»

ថ្ងៃអង្គារ ទី២ ខែតុលា ឆ្នាំ២០១៨

(សៀមរាប)៖ នៅរយៈពេល៩ខែ ឆ្នាំ២០១៨នេះកម្ពុជាទទួលបានចំនួន ៨៥,៥៧៩,៥២៣ដុល្លារ ពីការលក់បណ្ណចូលទស្សនារមណីយដ្ឋានអង្គរ កើតឡើង១៣ភាគរយ បើធៀបនឹងរយៈពេលដូចគ្ កាលពីឆ្នាំ២០១៧។នេះតាមរបាយការណ៍ផ្លូវការរបស់គ្រឹះស្ថានអង្គរដែលRAC Media ទើបទទួលបាននៅព្រឹកថ្ងៃទី០១ ខែតុលានេះ។

របាយការណ៍បញ្ជាក់ថានៅរយៈពេល៩ខែចាប់ពីខែមករា ដល់ កញ្ញា ឆ្នាំ២០១៨ ភ្ញៀវទេសចរបរទេសចំនួន ១៩០១៥៦៩នាក់បានទិញបណ្ណចូលទស្សនាអង្គរ កើនឡើង៨.៤៧ភាគរយ។ក្នុងចំនួនចំណូលដែលទទួលបានជាង៨៥លានដុល្លារនេះ រាជរដ្ឋាភិបាលកម្ពុជាបានដក​ចំនួន៣,៨០៣,១៣៨ដុល្លារឧបត្ថម្ភចូលមន្ទីរពេទ្យគន្ធបុប្ផា ដើម្បីទ្រទ្រង់ដំណើរការពិនិត្យនិងព្យាបាលកុមារកម្ពុជា។

សូមជម្រាបថា បណ្ណចូលទស្សនាតំបន់អង្គរត្រូវបានបែងចែកជា៣ប្រភេទ៖

*ប្រភេទប័ណ្ណចូលទស្សនា១ថ្ងៃ មានតម្លៃ ៣៧ដុល្លារ។

*ប្រភេទប័ណ្ណចូលទស្សនា៣ថ្ងៃ មានតម្លៃ ៦២ដុល្លារ និងមានសុពលភាព១០ថ្ងៃ។

*ប្រភេទបណ្ណចូលទស្សនា៧ថ្ងៃ មានតម្លៃ ៧២ដុល្លារ និងមានសុពលភាព០១ខែ៕

ប្រភព​៖គ្រឹះស្ថានអង្គរ

RAC Media | ហេង​ សុភី

​

  ថ្ងៃអង្គារ, 02 តុលា 2018 ម៉ោង 10:52 AM

«អ្នកទោសជាង៣០០នាក់នឹងត្រូវនាយករដ្ឋមន្ត្រីស្នើសុំលើកលែងនិងបន្ថយទោស»

ថ្ងៃអង្គារ ទី២ ខែតុលា ឆ្នាំ២០១៨

​យោងតាមការផ្សាយព័ត៌មានរបស់ភ្នំពេញប៉ុស្តិ៍ ថាមានអ្នកទោសចំនួន៣១៩នាក់នឹងត្រូវលោកនាយករដ្ឋមន្ត្រី ហ៊ុន សែន ស្នើសុំលើកលែងទោសនិងបន្ធូរបន្ថយទោសក្នុងឱកាសបុណ្យភ្ជុំបិណ្ឌខាងមុខនេះតាមគោលការណ៍មនុស្សធម៌របស់លោក ខណៈអតីតតំណាងរាស្ត្របក្សប្រឆាំងស្នើឱ្យលើកលែងអ្នកជាប់ឃុំដោយសារនិន្នាការនយោបាយជាអាទិភាព។លោកនាយករដ្ឋមន្ត្រី ហ៊ុន សែន បានថ្លែងទៅកាន់អ្នកគាំទ្រលោកនៅអាមេរិកថា៖«ឆ្នាំនេះខ្ញុំចង់ឱ្យមានការលើកលែងទោសដោយទ្រង់ទ្រាយធំមួយនៅពេលភ្ជុំនៅពេលបុណ្យឯករាជ្យនិងនៅពេលខួប២០ឆ្នាំនៃការបញ្ចប់សង្គ្រាមស៊ីវិលរបស់កម្ពុជា។ក្រសួងមហាផ្ទៃនិងក្រសួងយុត្តិធម៌កំពុងតែពិនិត្យករណីនេះហើយ»។

លោក ជិន ម៉ាលីន អ្នកនាំពាក្យក្រសួងយុត្តិធម៌បានប្រាប់កាលពីម្សិលមិញដែរថាការស្នើសុំលើកលែង និងបន្ធូរបន្ថយទោសសម្រាប់បុណ្យភ្ជុំបិណ្ឌនេះមានសរុប៣១៩នាក់ក្នុងនោះមានស្ត្រីចំនួន១៣៣នាក់។ប៉ុន្តែលោកបានបញ្ជាក់ថា ចំនួនដែលទទួលបានការលើកលែង ឬ បន្ធូរបន្ថយទោសជាក់ស្តែងគឺ អាស្រ័យលើការវាយតម្លៃរបស់គណៈកម្មការ។លោកបន្ថែមថាការលើកលែងទោសនេះក៏ផ្អែកលើគោលការណ៍ច្បាស់ផងដែររួមមានការកែប្រែខ្លួនក្នុងពន្ធនាគារតាម រយៈការវាយតម្លៃពីពន្ធនាគារពីគណៈកម្មការថ្នាក់ខេត្តដល់ថ្នាក់ជាតិនិងរយៈពេលនៃការអនុវត្តទោសដូចជា អ្នកអនុ វត្តទោសបាន១ភាគ៣នឹងទទួលបានការបន្ធូរបន្ថយទោស ហើយអ្នកអនុវត្តមាន២ភាគ៣ ទទួលបានការលើកលែងទោស។

លោកថា ចំនួននិងឈ្មោះអ្នកទោសដែលទទួលបានការលើកលែង និងបន្ធូរបន្ថយនឹងត្រូវបង្ហាញឲ្យឃើញតាមព្រះរាជក្រឹត្យ៕

ដកស្រង់៖ ភ្នំពេញប៉ុស្តិ៍

RAC Media | ផាញ់ សារឿន

  ថ្ងៃអង្គារ, 02 តុលា 2018 ម៉ោង 10:40 AM

«៦៧% នៃ​ពលរដ្ឋ​ពេញ​វ័យ​នៅ​កម្ពុជា កំពុង​ប្រើប្រាស់​សេវា​ហិរញ្ញវត្ថុ»

បច្ចុប្បន្ន​អត្រា​នៃ​ប្រជាជន​ពេញវ័យ ដែល​ប្រើប្រាស់​សេវា​ហិរញ្ញវត្ថុ​នេះ​មាន​ការ​កើនឡើង​ខ្ពស់ រហូតដល់​៦៧% បើ​ធៀប​កាលពីមុន​មាន​ត្រឹម​ក្រោម​១០%​ប៉ុណ្ណោះ។នេះ​បើ​យោង​តាម​ការ​លើក​ឡើង​របស់​លោក ជា ចាន់តូ អគ្គទេសា ភិបាល​ធនាគារ​ជាតិ​នៃ​កម្ពុជា ក្នុង​ជំនួប​រវាង​សមាគម​នាវា​យុវជន​អាស៊ីអាគ្នេយ៍​កម្ពុជា​-​ជប៉ុន​លើ​ក​ទី​៤៥។

លោក​ជា ចាន់តូ បាន​ឱ្យយ​ដឹង​ថា បច្ចុប្បន្ន​វិស័យ​មីក្រូហិរញ្ញវត្ថុ​នៅ​កម្ពុជា បាន​កំពុង​រួមចំណែក​កាត់បន្ថយ​ភាព​ក្រីក្រ និងលើកស្ទួយ​ជីវភាព​របស់​ពលរដ្ឋ ហើយ​ការ​កើនឡើង​ជា​លំដាប់​នេះ បាន​ឆ្លុះបញ្ចាំង​តាមរយៈ​កំណើន​នៃ​ប្រជាជន​ពេញវ័យកំពុង​ប្រើប្រាស់​សេវា​ហិរញ្ញវត្ថុ។បន្ត​ទៀត​ថា វិស័យ​មីក្រូហិរញ្ញវត្ថុ​កំពុង​រីកចម្រើន ដោយ​ក្នុង​នោះ​ទ្រព្យសកម្ម​ក្នុង​វិស័យ​នេះ​កើន​រហូត​ដល់​១៤% នៃ​ទ្រព្យ​សកម្ម​របស់​គ្រឹះស្ថាន​ធនាគារ ឥណទាន​បាន​កើន​ដល់​១៩,២% នៃ​ឥណទាន​គ្រឹះស្ថាន​ធនាគារ និង​ប្រាក់​បញ្ញើ​កើន​ដល់​១១,១​ភាគរយ នៃ​ប្រាក់​បញ្ញើ​គ្រឹះស្ថាន​ធនាគារ។ លោក​ក៏​បានបញ្ជាក់​ទៀត​ថា កំណើន​រហូត​ដល់​៦៧% នៃ​ការប្រើប្រាស់​សេវា​ហិរញ្ញវត្ថុ របស់​ប្រជាជន​ពេញវ័យ​នៅ​កម្ពុជា​នេះ មាន​ការ​កើនឡើង​ខ្ពស់​មែនទែន បើ​ធៀប​នឹង រយៈពេល​ដូចគ្នា​កាលពី​១​ទសវត្សរ៍​កន្លង​ទៅ ដែល​មាន​ត្រឹមតែ​ក្រោម​១០%​ប៉ុណ្ណោះ។លើស​ពី​នេះ​កំណើន​ប្រជាជន​កំពុង​ប្រើប្រាស់​សេវា​ហិរញ្ញវត្ថុ​ក៏​ឆ្លុះបញ្ចាំង​ពី​កម្រិត​នៃ​ការ​យល់ដឹងរស់​ពលរដ្ឋ​មក​លើ​វិស័យ​នេះ​។

​​គួរ​បញ្ជាក់​ថា វិស័យ​មីក្រូហិរញ្ញវត្ថុ​បាន​ផ្ដល់​ឥណទាន ដល់​ប្រជាជន​ចំនួន​១,៨​លាន​នាក់ និង​មាន​អ្នក​ដាក់​ប្រាក់​បញ្ញើ​១,៦​លាន​នាក់ ព្រមទាំង​បាន​ផ្ដល់​ការងារ​ដល់​ប្រជាជន​៣​ម៉ឺន​នាក់ ហើយ​ឥណទាន​របស់​មីក្រូហិរញ្ញវត្ថុ បាន​ផ្ដល់​ទៅ​លើ​វិស័យ​សេដ្ឋកិច្ច​នានា​រួមមាន​៖ វិស័យ​កសិកម្ម​៣០%, ក្រុម​គ្រួ សារ​៣០.៥%, វិស័យ​ពាណិជ្ជកម្ម​១៨,៨%, វិស័យ​សេវាកម្ម​១០% និង​វិស័យ​ផ្សេងៗ​ទៀត​១០ % ផង​ដែរ៕

ប្រភព៖ Vayo FM

RAC Media | ហេង​ សុភី

  ថ្ងៃអង្គារ, 02 តុលា 2018 ម៉ោង 10:29 AM