ព័ត៌មាន
នៅព្រឹកនេះ ក្រុមប្រឹក្សាជាតិភាសាខ្មែរ (ក.ជ.ភ.ខ.) នៃរាជបណ្ឌិត្យសភាកម្ពុជា រៀបចំសិក្ខាសាលាមួយ ស្ដីពី «បញ្ហាការកត់សូរភាសាបរទេសជាអក្សរខ្មែរ និងការកត់សូរភាសាខ្មែរជាអក្សរឡាតាំងបែបខ្មែរ»។
ភ្នំពេញ៖ នៅព្រឹកថ្ងៃព្រហស្បតិ៍ ១០រោច ខែជេស្ឋ ឆ្នាំកុរ ឯកស័ក ព.ស. ២៥៦៣ ត្រូវនឹងថ្ងៃទី២៧ ខែមិថុនា ឆ្នាំ២០១៩ នេះ នៅសាលនាងនួន នៃរាជបណ្ឌិត្យសភាកម្ពុជា មានការរៀបចំសិក្ខាសាលាមួយ ស្ដីពី «បញ្ហាការកត់សូរភាសាបរទេសជាអក្សរខ្មែរ និងការកត់សូរភាសាខ្មែរជាអក្សរឡាតាំងបែបខ្មែរ» ដែលមានការអញ្ជើញចូលរួមជាវាគ្មិនពីសំណាក់អ្នកជំនាញអក្សរសាស្ត្រខ្មែរដែលជាថ្នាក់ដឹកនាំនិងមន្ត្រីជំនាញនៃរាជបណ្ឌិត្យសភាកម្ពុជា និងសមាជិកនៃក្រុមប្រឹក្សាជាតិភាសាខ្មែរ (ក.ជ.ភ.ខ.) នៃរាជបណ្ឌិត្យសភាកម្ពុជា។
សិក្ខាសាលាដ៏មានសារៈសំខាន់នេះ ត្រូវបានអញ្ជើញជាអធិបតីប្រកាសបើកដោយឯកឧត្ដមបណ្ឌិតសភាចារ្យ សុខ ទូច ប្រធានរាជបណ្ឌិត្យសភាកម្ពុជា និងជាអនុប្រធានប្រចាំការក្រុមប្រឹក្សាបណ្ឌិតសភាចារ្យ និងឡើងថ្លែងសេចក្ដីរាយការណ៍ស្ដីពី «បញ្ហាការកត់សូរភាសាបរទេសជាអក្សរខ្មែរ និងការកត់សូរភាសាខ្មែរជាអក្សរឡាតាំងបែបខ្មែរ» ដោយឯកឧត្ដមបណ្ឌិត ហ៊ាន សុខុម ប្រធានក្រុមប្រឹក្សាជាតិភាសាខ្មែរ និងអញ្ជើញចូលរួមជាវាគ្មិនពីសំណាក់អ្នកជំនាញអក្សរសាស្ត្រខ្មែរដូចខាងក្រោម៖
១. លោក ចែម វត្ថុ ជាសមាជិកគណៈកម្មការភាសាវិទ្យា ធ្វើបទបង្ហាញស្ដីពី «ការកត់សម្គាល់អំពីអក្ខរវិធីសំណងរូប និងអក្ខរវិធីសំណងសូរ»
២. លោក ឃឹម វិច្ឆិកា ជាអនុប្រធានលេខធិការដ្ឋាននៃក្រុមប្រឹក្សាជាតិភាសាខ្មែរ ធ្វើបទបង្ហាញស្ដីពី «ទិដ្ឋភាពទូទៅ នៃភាសាខ្មែរក្នុងវចនានុក្រមខ្មែរ បោះពុម្ពគ្រាទី៥ ដោយវិទ្យាស្ថានពុទ្ធសាសនបណ្ឌិត្យ ឆ្នាំ១៩៦៧-១៩៦៨»
៣. ឯកឧត្ដម សូ មុយឃៀង ប្រធានគណៈកម្មការអក្ខរាវិរុទ្ធនិងអំណាន ធ្វើបទបង្ហាញស្ដីពី «ព្យញ្ជនៈឡាតាំង និងព្យញ្ជនៈខ្មែរ»
៤. ឯកឧត្ដមបណ្ឌិតសភាចារ្យ ច័ន្ទ សំណព្វ ប្រធានគណៈកម្មការបង្កើតពាក្យ និងកម្ចីពាក្យ ធ្វើបទបង្ហាញស្ដីពីឡាតាំងខ្មែរ
៥. ឯកឧត្ដមបណ្ឌិត ប៊ី សុខគង់ អនុប្រធានក្រុមប្រឹក្សាជាតិភាសាខ្មែរ ធ្វើបទបង្ហាញស្ដីពី «ការសិក្សាការកត់សូរព្យញ្ជនៈ និងសូរស្រៈខ្មែរជាអក្សរឡាតាំងតាមរយៈគណៈកម្មការបង្កើតពាក្យ និងកម្ចីពាក្យ»
គួរបញ្ជាក់ផងដែរថា សិក្ខាសាលាខាងលើនេះ ត្រូវបានរៀបចំឡើងពេញមួយថ្ងៃទី២៧ ខែមិថុនា ឆ្នាំ២០១៩ នេះ នៅសាលនាងនួន នៃរាជបណ្ឌិត្យសភាកម្ពុជា៕
RAC Media | លឹម សុវណ្ណរិទ្ធ